Канон третий Пресвятой Богородице перед иконой «Троеру́чица»

Тропа́рь Богоро́дице, гла́с 4:

Яко звезда́ светозаря́ющая, из Се́рбии на Афо́н чуде́сно прии́де всечестна́я ико́на Твоя́ Троеру́чица, ю́же оби́тель Хиланда́рская благогове́йно восприе́мши, я́ко Боже́ственный да́р свы́ше, прославля́ет Тя́, Влады́чицу, и уми́льно вопие́т: не оста́ви ми́лость Твою́ от на́с, но пребу́ди с на́ми во ве́ки.

Стихи́ра, гла́с 6:

Припа́дающе о́бразу Твоему́ честно́му, Пречи́стая Богоро́дице, покланя́емся Тебе́, Тя́ бо еди́ну и́мамы вси́ прибе́жище и сте́ну и Тя́ сла́вим немо́лчно, Ма́ти Чадолюби́вая.

Кано́н Богоро́дице, гла́с 4.

Пе́снь 1.

Ирмос: Не́сть Тебе́ подо́бен, Препросла́вленный Го́споди: руко́ю бо кре́пкою изба́вил еси́ лю́ди, я́же стяжа́л еси́, Человеколю́бче.

Припев: Пресвята́я Богоро́дице, спаси́ на́с.

Просвети́ ду́шу мою́, у́м и се́рдце, Преми́лостивая Ма́ти Бо́жия, и да́ждь ми́ да́р воспе́ти Тя́, кре́пкую Предста́тельницу, благи́х Хода́таицу и в печа́лех сла́дкое Утеше́ние.

Припев: Пресвята́я Богоро́дице, спаси́ на́с.

Облак светоза́рный яви́лася еси́ преподо́бному Иоа́нну Дамаски́ну, егда́ моли́тву его́ ско́ро услы́шала еси́ и отсече́нную десни́цу его́ здра́ву сотвори́ла еси́.

Сла́ва Отцу́ и Сы́ну и Свято́му Ду́ху:

Дне́сь согла́сно торжеству́ют вси́ концы́ земли́, вку́пе Тя́ воспева́юще, тве́рдую По́мощь и Храни́тельницу жи́зни на́шея.

И ны́не и при́сно и во ве́ки веко́в. Ами́нь.

Твою́ всечестну́ю и чудотво́рную ико́ну Троеру́чицу стяжа́вши, свята́я оби́тель Хиланда́р вопие́т Ти́: ра́дуйся, стено́ неруши́мая и кре́пкое заступле́ние оби́тели сея́.

Пе́снь 3.

Ирмос: Свя́т еси́, Го́споди Бо́же на́ш, утверди́ и на́ша сердца́ непреста́нно вопи́ти Тебе́: пра́веден не́сть, па́че Тебе́, Го́споди.

Припев: Пресвята́я Богоро́дице, спаси́ на́с.

Ве́рных собо́ри совокупля́ются дне́сь к прославле́нию Твоего́ благосе́рдия, е́же яви́ла еси́ преподо́бному Иоа́нну Дамаски́ну, исцели́вши отсече́нную десни́цу его́.

Припев: Пресвята́я Богоро́дице, спаси́ на́с.

Очи серде́ц на́ших воспуща́ем к Тебе́, Влады́чице, егда́ взира́ем на чудотво́рную ико́ну Троеру́чицу, бу́ди на́м держа́ва и огражде́ние и вы́шняго прича́стия сподо́би на́с.

Сла́ва Отцу́ и Сы́ну и Свято́му Ду́ху:

Юже славосло́вят си́лы небе́сныя, пое́м Тя́, Всепе́тая Де́во, спаси́ ны от грехо́внаго плене́ния и вся́кия ско́рби, находя́щия на ны́.

И ны́не и при́сно и во ве́ки веко́в. Ами́нь.

Моли́, Его́же родила́ еси́, Ма́ти Безневе́стная, о все́х, притека́ющих к честне́й ико́не Твое́й, я́ко да защити́т и́х и просвети́т.

Седа́лен, гла́с 4:

Егда́ и́ноцы Хиланда́рстии ви́деша пречестну́ю ико́ну Твою́, Влады́чице, на осля́ти, ники́мже води́мем, ко врато́м оби́тели Хиланда́рския принесе́нную, ра́достию ве́лиею возра́довашася и, покланя́ющеся е́й, прославля́ху Твое́ к ни́м благоволе́ние.

Пе́снь 4.

Ирмос: Услы́шах слу́х Тво́й, Го́споди, я́ко яви́лся еси́ на земли́, и просла́вих Твою́ си́лу.

Припев: Пресвята́я Богоро́дице, спаси́ на́с.

Исто́чника Приснотеку́щаго источи́ла еси́, Пречи́стая Де́во, вся́ удо́лия напая́юща, погрузи́ и вся́ на́ша собла́зны и до конца́ потреби́.

Припев: Пресвята́я Богоро́дице, спаси́ на́с.

Ле́ствицу Иа́ковлю, Гедео́ново руно́, ра́дости Хода́таицу, кре́пость и похвалу́ все́х ве́рных, прииди́те, вси́ воспои́м, глаго́люще: ра́дуйся, Де́во Чи́стая.

Сла́ва Отцу́ и Сы́ну и Свято́му Ду́ху:

Образ Тво́й честны́й целу́юще, Всечи́стая, к Твое́й бла́гости прибега́ем и, коле́на преклоня́юще, с пла́чем мо́лим Тя́: не пре́зри на́шего воздыха́ния, но в де́нь су́дный бу́ди на́м Покро́в и Помо́щница.

И ны́не и при́сно и во ве́ки веко́в. Ами́нь.

Сло́во Бо́жие ро́ждшая, посети́ на́с благода́тию Твое́ю, и омраче́нныя на́ша ду́ши и сердца́ просвети́, и пода́ждь на́м от бе́д избавле́ние и все́х грехо́в оставле́ние.

Пе́снь 5.

Ирмос: Зако́ном за́поведей Твои́х, еди́не Человеколю́бче, просвети́ се́рдце мое́, молю́ся, Го́споди, и поми́луй мя́.

Припев: Пресвята́я Богоро́дице, спаси́ на́с.

Твоя́ всечестна́я ико́на Троеру́чица я́сно все́м свиде́тельствует, я́ко Ты́ кре́пость на́ша и си́ла еси́, сего́ ра́ди прославля́ем Ма́тернее Твое́ к на́м милосе́рдие.

Припев: Пресвята́я Богоро́дице, спаси́ на́с.

Преподо́бный Иоа́нн Дамаски́н сле́зно моля́шеся Тебе́ пред честно́ю ико́ною Твое́ю, Ты́ же моли́тву его́ ско́ро услы́шала еси́ и усече́нней руце́ его́ исцеле́ние дарова́ла еси́.

Сла́ва Отцу́ и Сы́ну и Свято́му Ду́ху:

Ра́дости Хода́таице, мольбы́ ра́б Твои́х приими́, вся́ проти́вных враго́в сове́ты разжени́ и ста́до Твое́ невреди́мо сохрани́ и от все́х скорбе́й спаси́.

И ны́не и при́сно и во ве́ки веко́в. Ами́нь.

Избавля́еми прегреше́ний Твои́ми святы́ми моли́твами, Благослове́нная Богоро́дице, благоразу́мно Тя́ вси́ ублажа́ем.

Пе́снь 6.

Ирмос: Ве́чер, и у́тро, и полу́дне хва́лим Тя́, Го́споди Бо́же на́ш, услы́ши гла́с на́ш.

Припев: Пресвята́я Богоро́дице, спаси́ на́с.

Блажи́м Тя́ и сла́вим, Богоро́дице Де́во, и́бо Ты́, о Благода́тная, благода́тию Твое́ю всегда́ на́с осеня́еши, покрыва́ющи, и заступа́ющи, и от лука́вых враго́в избавля́ющи.

Припев: Пресвята́я Богоро́дице, спаси́ на́с.

Ездяй на херуви́мех и Пева́емый от серафи́м из Твои́х ложе́сн яви́ся, и все́ челове́чество спасе́но бы́сть, сего́ ра́ди сла́вим Тя́, я́ко Засту́пницу на́шу непосты́дную.

Сла́ва Отцу́ и Сы́ну и Свято́му Ду́ху:

Гряди́те, лю́дие, на поклоне́ние Бо́жией Ма́тери, благода́ть бо све́та Ея́ и на́м возсия́ и научи́ пе́ти: сподо́би на́с, о Благода́тная, вы́шняго прича́стия.

И ны́не и при́сно и во ве́ки веко́в. Ами́нь.

Ангелов ра́дость Ты́ еси́, Богоро́дице, и все́х челове́ков вои́стинну весе́лие; спаси́ ду́ши все́х, пою́щих Тя́, Чи́стая.

Конда́к, гла́с 3.

Де́ва дне́сь благоволе́ние к на́м явля́ет, гора́ же Афо́н благодаре́ние Ей прино́сит, Ангели и и́ноцы славосло́вят, Троеру́чица из Се́рбии чуде́сно путеше́ствует: на́с бо ра́ди прии́де и всели́ся во святу́ю оби́тель Хиланда́рскую.

Икос:

Вои́стинну пречу́дное явле́ние: пресла́вная ико́на Твоя́ Троеру́чица, ю́же первосвяти́тель се́рбский, Са́вва, от святы́я Ла́вры Са́ввы Освяще́ннаго, со благогове́нием, я́ко многоце́нен да́р, в страну́ Се́рбскую принесе́, на безслове́снем осля́ти от Се́рбии на Афо́н чуде́сно прино́сится и ко святе́й оби́тели Хиланда́рстей прии́де. Иноцы же оби́тели сея́, восприи́мше сию́ с ра́достию, я́ко да́р небе́сный, поста́виша ю́ в олтари́ собо́рныя це́ркве оби́тели, и́бо разуме́ша сбытие́ сие́ я́ко я́вное Твое́ к ни́м благоволе́ние. Сего́ ра́ди с ра́достию и любо́вию покланя́хуся всечестне́й ико́не Твое́й, целу́юще ю́ и Тебе́ воспева́юще: ра́дуйся, святу́ю ико́ну Твою́ зало́гом ми́лости на́м дарова́вшая, все́м ве́рным ско́рое поможе́ние.

Пе́снь 7.

Ирмос: В нача́ле Безнача́льное Сло́во, со Отце́м и Ду́хом Сы́н Единоро́дный, благослове́н еси́, и превозноси́мый Бо́же оте́ц на́ших.

Припев: Пресвята́я Богоро́дице, спаси́ на́с.

Еди́ну Тя́ обре́те Чи́стую Соде́тель все́х и всели́ся в Тя́, я́ко в хра́м прекра́сный, сего́ ра́ди пое́м Ти́: Христа́ Бо́га на́шего Ма́ти, благослове́на еси́.

Припев: Пресвята́я Богоро́дице, спаси́ на́с.

Ми́лостию Твое́ю ве́сь ми́р обогаща́еши и ду́ши просвеща́еши, еди́на Всепе́тая, те́мже воспева́ем Ти́: Христа́ Бо́га на́шего Ма́ти, благослове́на еси́.

Сла́ва Отцу́ и Сы́ну и Свято́му Ду́ху:

Безневе́стная Де́во, многопло́дное дре́во яви́лася еси́, сне́дию небе́сною вся́ насыща́ющее, добродея́ния все́м источи́, да вси́ пое́м Ти́: Христа́ Бо́га на́шего Ма́ти, благослове́на еси́.

И ны́не и при́сно и во ве́ки веко́в. Ами́нь.

Образа Твоего́ прише́ствием от злы́х избавля́емся и посрамля́ются вси́, рабо́м Твои́м зла́я явля́ющии, сего́ ра́ди вопие́м: благослове́на еси́, Ма́ти Христа́ Бо́га на́шего.

Пе́снь 8.

Ирмос: Во о́бразе Ангела, я́вльшагося в пещи́ о́гненней песносло́вцем, Христа́ Бо́га по́йте, о́троцы, свяще́нницы, благослови́те, лю́дие, превозноси́те во вся́ ве́ки.

Припев: Пресвята́я Богоро́дице, спаси́ на́с.

Гла́сы моле́бными, прииди́те, вси́ воспои́м Чи́стую Де́ву, се́ бо ны́не весе́лие приближа́ется, ве́рнии спаса́ются, и воскли́кнем в весе́лии: Богоро́дицу по́йте и превозноси́те во вся́ ве́ки.

Припев: Пресвята́я Богоро́дице, спаси́ на́с.

Очи́ма Ангельскима глубина́ неудобозри́мая, челове́ческими по́мыслы высота́ неудобовосходи́мая прии́де к на́м во о́бразе Троеру́чицы, поклони́мся у́бо честно́му о́бразу и возопии́м: Богоро́дицу по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Ра́дующеся, приступа́ем о́бразу Твоему́ честно́му и, уми́льно моля́щеся, из глубины́ души́ взыва́ем: Богоро́дицу по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Огне́м возгара́шеся гора́ Сина́йская, не терпя́ше бо сни́тия сла́вы Бо́жия, Ты́ Боже́ственный Огнь су́щ, Бо́жие Сло́во во чре́ве Твое́м неопа́льно носи́ла еси́, сего́ ра́ди пое́м: Богоро́дицу по́йте и превозноси́те во вся́ ве́ки.

Песнь 9.

Ирмос: Безсе́менное Рождество́ Твое́, Богоро́дице Чи́стая, Христа́ Бо́га на́шего пе́сньми немо́лчными велича́ем.

Припев: Пресвята́я Богоро́дице, спаси́ на́с.

Дне́сь ра́дуется Правосла́вная Се́рбия и вся́ гора́ Афо́нская, изря́днее же оби́тель Хиланда́рская, и́бо прии́де и всели́ся в ню́ всечестна́я ико́на Троеру́чица, явля́ющи к на́м благоволе́ние Бо́жия Ма́тере.

Припев: Пресвята́я Богоро́дице, спаси́ на́с.

Име́ющи святу́ю ико́ну Твою́ Троеру́чицу во игу́мена себе́, я́коже Твоя́ во́ля бы́сть, Богоро́дице, оби́тель Хиланда́рская благоуха́нием святы́ни исполня́ется и непреста́нно славосло́вит и́мя Твое́.

Сла́ва Отцу́ и Сы́ну и Свято́му Ду́ху:

Цве́те прекра́сный, облагоуха́яй вся́, проти́вных нахожде́ния отгоня́яй и весе́лия все́х исполня́яй, бу́ди на́м стена́, и огражде́ние, и спаси́тельное прибе́жище.

И ны́не и при́сно и во ве́ки веко́в. Ами́нь.

Его́же воспева́ют Ангели, родила́ еси́, но и Де́вою пребыла́ еси́, сего́ ра́ди вопие́м Ти́: ра́дуйся, ско́рая Помо́щнице и кре́пкая Засту́пнице всего́ ми́ра.

Свети́лен:

Све́том благосе́рдия Твоего́ все́х озаря́ющи, вся́кую боле́знь и неду́г исцеля́еши, не забу́ди и на́с, ве́рных ра́б Твои́х, но да зна́менается на на́с све́т лица́ Твоего́ во вся́ дни́ живота́ на́шего.

Сла́ва, и ны́не:

Ико́на Твоя́ пречу́дная, Богоро́дице, да бу́дет на́м сто́лп о́гненный, руководя́щий на́с к ве́чному насле́дию, и да зна́менается на на́с све́т лица́ Твоего́ во вся́ дни́ живота́ на́шего.

Моли́твы ко Пресвяте́й Богоро́дице:

О, Пресвята́я и Преблагослове́нная Де́во Богоро́дице Мари́е! Припа́даем и покланя́емся Тебе́ пред свято́ю Троеру́чною ико́ною Твое́ю, воспомина́юще пресла́вное чу́до Твое́ исцеле́нием усече́нныя десни́цы преподо́бнаго Иоа́нна Дамаскина́ от ико́ны сея́ явле́нное, его́же зна́мение доны́не ви́димо е́сть на не́й во о́бразе тре́тия руки́, к изображе́нию Твоему́ приложе́нныя. Мо́лимся Ти́ и про́сим Тя́, всеблагу́ю и всеще́друю ро́да на́шего Засту́пницу: услы́ши на́с, моля́щихся Тебе́, и я́коже блаже́ннаго Иоа́нна, в ско́рби и боле́зни к Тебе́ возопи́вшаго, услы́шала еси́, та́ко и на́с не пре́зри, скорбя́щих и боле́знующих ра́нами страсте́й многоразли́чных и к Тебе́ от души́ сокруше́нныя и смире́нныя усе́рдно прибега́ющих. Ты́ зри́ши, Госпоже́ Всеми́лостивая, не́мощи на́ша, озлобле́ние на́ше, ну́жду, потре́бу на́шу в Твое́й по́мощи и заступле́нии, я́ко отвсю́ду враги́ окруже́ни есмы́ и не́сть помога́ющаго, ниже́ заступа́ющаго, а́ще не Ты́ умилосе́рдишися о на́с, Влады́чице. Ей, мо́лим Ти ся, вонми́ гла́су боле́зненному на́шему и помози́ на́м святооте́ческую правосла́вную ве́ру до конца́ дни́й на́ших непоро́чно сохрани́ти, во все́х за́поведех Госпо́дних неукло́нно ходи́ти, покая́ние и́стинное о гресе́х на́ших всегда́ Бо́гу приноси́ти и сподо́битися ми́рныя христиа́нския кончи́ны и до́браго отве́та на стра́шнем суде́ Сы́на Твоего́ и Бо́га на́шего, Его́же умоли́ за на́с ма́тернею моли́твою Твое́ю, да не осу́дит на́с по беззако́нием на́шим, но да поми́лует на́с по вели́цей и неизрече́нней ми́лости Свое́й. О, Всеблага́я! Услы́ши на́с и не лиши́ на́с по́мощи Твоея́ держа́вныя, да, Тобо́ю спасе́ние получи́вше, воспое́м и просла́вим Тя́ на земли́ живы́х и ро́ждшагося от Тебе́ Искупи́теля на́шего Го́спода Иису́са Христа́, Ему́же подоба́ет сла́ва и держа́ва, че́сть и поклоне́ние, ку́пно со Отце́м и Святы́м Ду́хом всегда́, ны́не и при́сно и во ве́ки веко́в. Ами́нь.