Шрифт

Пресвятой Богородице перед иконой Свенская-Печерская.

Тропа́рь, гла́с 4:

Дне́сь све́тло торжеству́ет Пече́рская оби́тель и ра́дуется явле́нием о́браза Богома́тере безме́рный ли́к Пече́рских отце́в, с ни́миже и мы́ непреста́нно возопии́м: ра́дуйся, Благода́тная, Пече́рская похвало́.

Кано́н Богоро́дице ра́ди ико́ны Ея́, имену́емыя Све́нская-Пече́рская. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Помо́щница и Покрови́тельница Ты́ еси́ оби́тели Пече́рския, Де́во Чи́стая, помози́ на́м вы́ну сла́вити Тя́ и разреше́ние прегреше́ний пода́ждь, мо́лимтися, Всенепоро́чная.

Владе́тель земли́ Черни́говския кня́зь Рома́н зре́ния лиши́ся и, уве́дев о чудесе́х, от ико́ны Твоея́ Пече́рския бы́вших, приле́жно моля́шеся Тебе́.

Архимандри́т Пече́рский, вне́мля проше́нию кня́жему, совеща́вся с бра́тиею, отпусти́ святу́ю ико́ну Твою́, да уте́шится земля́ Черни́говская благода́тным прише́ствием тоя́.

Ангельское пе́ние слы́шася, егда́ со иере́ем в ладии́ по Десне́ реце́ ше́ствовала еси́, Ма́ти Бо́жия, ико́ною Твое́ю, и от на́с приими́, Влады́чице, смире́нныя сия́ похвалы́.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Утверди́ сердца́ на́ша во упова́нии на Тя́, Пречи́стая Госпоже́, я́ко утверди́ла еси́ ве́ру кня́зя Рома́на, раба́ Твоего́, да вопие́м: не́сть свя́т, я́ко Госпо́дь, и не́сть пра́веден, я́ко Бо́г на́ш.

Утру бы́вшу, ико́на Твоя́ не обре́теся в ладии́, наше́д же ю́ на дре́ве, верху́ бре́га, ра́довашеся благочести́вый кня́зь, воспева́я Ти́, Всепе́тая, благода́рственная.

О се́м ди́вном Твое́м смотре́нии возвести́ша боголюби́вому кня́зю, и се́й, ра́дости и умиле́ния испо́лненный, из глубины́ серде́чныя со слеза́ми моля́шеся Тебе́, те́мже и на́ми во умиле́нии приноси́мыя похвалы́ и проше́ния не пре́зри, Де́во.

О, Пречу́дная Влады́чице Богоро́дице, Ма́ти Христа́ Бо́га на́шего, — рече́ слепы́й владе́тель, — да́руй ми́ прозре́ти, да ви́жду све́т и лицезре́ю чу́дный о́браз Тво́й и прославля́ю Твоя́ чудеса́.

Седа́лен, гла́с 4:

Егда́ яви́ся о́браз Тво́й, Пречи́стая, в це́ркви Пече́рстей, тогда́ воспе́ша вси́, ви́девшии чу́до сие́, с ни́ми же и мы́, ве́дуще в явле́нии се́м сугу́бую благода́ть, подава́емую оби́тели на́шей, ра́достно взыва́ем Ти́, и любо́вию чте́м ли́к Пречи́стый Тво́й, Богообра́дованная, при́сно на́с снабдева́й любо́вию Свое́ю.

Сла́ва, и ны́не:

Све́тлое дне́сь Госпожи́ на́шея Пресвяты́я наста́ торжество́, весели́ся, пречу́дный Али́пие со и́ноки Пече́рскими, и да ликовству́ют вси́ боголюби́вии собо́ри: созыва́ет бо на́с Пресвята́я Богоро́дица просла́вити чу́дную Свою́ ико́ну, луча́ми ми́лости не то́кмо оби́тель Пече́рскую, но и зе́млю Бря́нскую просвеща́ющую, те́мже, ра́дующеся, вси́ вопие́м: спаси́ ны, Де́во Чи́стая.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Боголюби́вый кня́зь Рома́н, я́коже иногда́ Закхе́й, ра́дости испо́лнився, вопия́ше Тебе́, Пречи́стая: ели́ка узрю́ с ме́ста сего́ вся́ окре́стныя страны́, толи́ко прида́м к до́му Твоему́ и сози́жду хра́м и оби́тель, я́ко Ты́, Богома́ти, возлюби́ла ме́сто сие́.

Егда́ прибли́жися к дре́ву, иде́же бе́ ико́на Твоя́, па́ки послушли́вый ра́б Тво́й вопия́ше Ти́: Пресвята́я Влады́чице, услы́ши гла́с моли́твы моея́ и да́руй све́т очи́ма мои́ма.

Услы́шавши сие́ приле́жное моле́ние раба́ Твоего́, Пречи́стая Влады́чице, а́бие испо́лнила еси́ проше́ние его́; та́ко внемли́ мольба́м и на́с, смире́нных и недосто́йных.

Во всю́ зе́млю изы́де слу́х ди́внаго зна́мения ми́лости Твоея́, и во вся́ концы́ ея́ веща́ние чу́да сего́, того́ ра́ди архиере́й, и́ноцы и вси́ лю́дие ра́дости испо́лнишася и прите́кше к ико́не святе́й, восхвали́ша Тя́.

Пе́снь 5.

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Ви́ждь, Преблагослове́нная, от но́щи у́тренюющих ча́д Твои́х, о́крест стоя́щих ны́не у честны́я и достохва́льныя ико́ны Твоея́, велича́ющих безме́рную Твою́ ми́лость и прося́щих разреше́ния грехо́в и жития́ исправле́ние, не отри́ни на́с от светоно́снаго ли́ка Твоего́.

Архиере́й земли́ Бря́нския, прие́м в ру́це свои́ от дре́ва чу́дную ико́ну Твою́, благогове́йно облобыза́ ю́ и моле́бныя пе́ния воспе́ Тебе́, Де́во, херуви́мов и серафи́мов Честне́йшая.

Сия́ честна́я ико́на Твоя́, Богоро́дице, от Пече́рския оби́тели принесе́нная, рука́ма же преподо́бнаго Али́пия начерта́нная, благослове́ние свята́го уде́ла Твоего́ на зе́млю Бря́нскую излия́, и мы́, сему́ ра́дующеся, благода́рственными словесы́ воспева́ем Тя́.

Боголюби́вый кня́зь Рома́н, о исцеле́нии свое́м благодаре́ния испо́лнь, хра́м Успе́ния Твоего́ возгради́ и оби́тель учреди́, да непреста́нно славосло́вят и́ноцы вели́чие Твое́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Сла́ва ико́ны Твоея́, от оби́тели Пече́рския принесе́нныя, озари́ не то́кмо зе́млю Бря́нскую, но и гра́да Москвы́ дости́же, сего́ ра́ди вопие́м Ти́: ра́дуйся, всея́ земли́ Ру́сския похвало́.

Три́ ле́та ико́на Твоя́, Влады́чице, пребыва́ше во гра́де Москве́, по́слежде со сла́вою принесе́на бы́сть во оби́тель Све́нскую, мы́ же ны́не прославля́ем Тя́, сего́ ра́ди невреди́мы на́с сохрани́.

Честна́я Твоя́ ико́на яви́ся вои́стинну покро́в держа́вный оте́честву на́шему, я́ко не то́кмо и́ноцы Пече́рскии, но и лю́дие всея́ земли́ Ру́сския обрето́ша Твою́ по́мощь и заступле́ние.

В лю́тую годи́ну наше́ствия двана́десяте язы́к лю́дие Бря́нскии изнесо́ша честну́ю ико́ну Твою́ Пече́рскую и со слеза́ми мно́гими помоли́вшеся, Твое́ заступле́ние обрето́ша.

Конда́к, гла́с 3.

Де́ва дне́сь неви́димо предстои́т в це́ркви и с ли́ки Пече́рских отце́в мо́лится о на́с, благогове́йно велича́ющих Ея́ безме́рную ми́лость к ро́ду на́шему, я́вльшуюся в чуде́сном о́бразе Ея́, оби́тель Пече́рскую украша́ющем.

Икос:

Огради́ моя́ помышле́ния, Пречи́стая, и небе́сным Твои́м благослове́нием подви́гни мя́ досто́йно воспе́ти сла́ву Твою́ на ме́сте святе́м се́м, да, наде́яся на ми́лость Твою́, дерзну́ убо́гим язы́ком воззва́ти к Тебе́: ра́дуйся, Пече́рская сла́во, от ле́т дре́вних на́с освяща́ющая; ра́дуйся, небе́сная Игу́мение оби́тели на́шея, при́сно зде́ пребыва́ющая; ра́дуйся, упова́ние и кре́пость рабо́в Твои́х, на ме́сте се́м служа́щих Ти́; ра́дуйся, незри́мо на́с о́бразом Твои́м осеня́ющая, оби́тель Пече́рскую украша́ющем.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Лю́дие, обре́тше ди́вное заступле́ние от Твоея́ пречи́стыя ико́ны, Пече́рския имену́емыя, хвале́бными гла́сы воспева́ху: оте́ц на́ших Засту́пнице, благослове́на еси́.

В пещи́ искуше́ний и бе́д опаля́емых ороси́, Богома́ти, струя́ми Твои́х щедро́т, я́коже дре́вле яви́ла еси́ по́мощь рабо́м Твои́м, внегда́ врази́ ослепле́ни бы́ша и вся́ сокро́вища во оби́тель возврати́ша, да зове́м велегла́сно: оте́ц на́ших Засту́пнице, благослове́на еси́.

Якоже изба́вила еси́ игу́мена Мартиниа́на с бра́тиею от сме́рти напра́сныя, та́ко и на́с, гре́шных, услы́ши и уми́лостиви Сы́на Твоего́, да благода́рственно зове́м Ти́: оте́ц на́ших Засту́пнице, благослове́на еси́.

Ты́ — весе́лие в оби́телех Твои́х живу́щих и градо́в на́ших утеше́ние и похвала́, Богоро́дице Мари́е Де́во, сего́ ра́ди вы́ну воспева́ем Ти́: оте́ц на́ших Засту́пнице, благослове́на еси́.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Али́пий преподо́бный та́ко и уразуме́ го́лубя явле́ние, а́ки о́браз благода́ти Ду́ха Свята́го, це́рковь вели́кую исполня́ющия.

По́йте, и́ноцы Пече́рскии с бра́тиею Све́нскою, сла́ви, земле́ Ки́евская, ку́пно же и Бря́нская, благу́ю Влады́чицу, ико́ною Свое́ю точа́щую чудеса́; мы́ же покланя́емся Богоро́дице, пою́ще и превознося́ще Ю во вся́ ве́ки.

Ди́вныя зна́мения ми́лости от ико́ны Твоея́ Пече́рския источи́ла еси́, Влады́чице: духо́в злы́х отгна́ла еси́, отрокови́це Екатери́не, я́коже кня́зю Рома́ну, оче́с зре́ние дарова́ла еси́, сего́ ра́ди покланя́емся Тебе́, Богоро́дице, пою́ще и превознося́ще Тя́ во вся́ ве́ки.

Явле́ние ико́ны Твоея́ и́ноков, посто́м и моли́твою подвиза́вшихся, возвесели́, и си́м вя́щшую ре́вность к сниска́нию Ца́рствия небе́снаго даде́; та́ко и на́с, немощны́х, укрепи́ во благоче́стии, да пое́м и превозно́сим Тя́ во вся́ ве́ки.

Пе́снь 9.

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Прииди́те вси́, ми́лость улучи́вшии Засту́пницы на́шея, и к ди́вному Ея́ о́бразу припаде́м, я́ко положи́вшей с на́ми заве́т ми́лости, сего́ ра́ди непреста́нно Богома́терь велича́ем.

Богоро́дице Де́во, упова́ние христиа́ном, проба́ви на́шему ро́ду ми́лости Твоя́, бы́вшия отце́м на́шим во оби́тели Твое́й, разори́ сове́т нечести́вых, возстаю́щих на ны́, и сию́ Пече́рскую оби́тель Твою́ соблюди́, да Тя́ вси́ вы́ну велича́ем.

Пресвята́я Госпоже́ Богоро́дице, сотворя́юще воспомина́ния неисче́тных благодея́ний Твои́х, и́миже удиви́ла еси́ оби́тель Твою́ от ле́т дре́вних, Тя́ непреста́нно велича́ем.

Свята́я оби́тель Пече́рская ку́пно с дще́рию свое́ю оби́телию Све́нскою, дне́сь сою́зом любве́ совоку́пльшеся, Тя́, Богоотрокови́це, я́ко всея́ тва́ри честне́йшую и земны́х все́х сла́внейшую, зря́ще на ико́не Твое́й Пече́рстей, ублажа́ем.

Свети́лен:

Све́том озари́вшая це́рковь Пече́рскую от пречу́днаго ли́ка Твоего́, Богоро́дице, возсия́й ми́ све́т спасе́ния огне́м покая́ния, да ве́рою и любо́вию славлю Тя́, Приснопрославля́емую.

Молитва Пресвятой Богородице пред иконой Ея «Печерской»

О, Пресвята́я и Пренепоро́чная Де́во Богоро́дице, на́ша Пече́рская похвало́ и украше́ние, держа́вный покро́ве свята́го ме́ста сего́, и́стинная Влады́чице избра́ннаго уде́ла Своего́. Приими́ нас, недосто́йных рабо́в Твои́х, убо́гое моле́ние, с ве́рою и любо́вию принося́щих пред чу́дным о́бразом Твои́м, да посети́ши ми́лостивно грехо́вное житие́ на́ше, просвеща́ющи его́ све́том покая́ния, осени́ нас, обремене́нных скорбьми́ мно́гими, Твое́ю Небе́сною ра́достию, сподо́би нас при́сно сла́вити Тя в ми́ре и благоче́стии на ме́сте святе́м сем, да, без поро́ка преше́дше путь жития́ на́шего, по́мощию Твое́ю дости́гнем ве́чнаго весе́лия во све́тлости святы́х и Богоно́сных оте́ц на́ших Анто́ния и Феодо́сия и всех преподо́бных Пече́рских и еди́ными усты́ и се́рдцы воспои́м Тя с Предве́чным Сы́ном Твои́м и Безнача́льным Его́ Отце́м и Пресвяты́м, Животворя́щим, Всеблаги́м и Единосу́щным Его́ Ду́хом во ве́ки веко́в. Ами́нь.