Канон второй Пресвятой Богородице перед иконой Скоропослушница (Афонская)

Тропа́рь, гла́с 4:

К Богоро́дице притеце́м, су́щии в беда́х, / и святе́й ико́не Ея́ ны́не припаде́м, / с ве́рою зову́ще из глубины́ души́: / ско́ро на́ше услы́ши моле́ние, Де́во, / я́ко Скоропослу́шница наре́кшаяся. / Тебе́ бо раби́ Твои́ в ну́ждах / гото́вую Помо́щницу и́мамы.

Велича́ние:

Велича́ем Тя́, Пресвята́я Де́во, и чте́м о́браз Тво́й святы́й, и́мже то́чиши исцеле́ния все́м, с ве́рою притека́ющим.

Стихи́ра, гла́с 7:

Проше́ния испо́лни рабо́в Твои́х, / Тебе́, Пресвята́я Де́во, с ве́рою призыва́ющих. / От вся́кия ско́рби, неду́гов и озлобле́ния / все́х на́с свободи́, / да благода́рственно воспева́ем Тя́, / ско́рую моля́щихся Услы́шательницу, / подаю́щую ве́рным ве́лию ми́лость.

Други́й кано́н, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Ма́ти Присносу́щнаго Све́та и Отчия Прему́дрости, умудри́ неразу́мие мое́ и просвети́ мя́ на пе́ние и моли́тву пред свято́ю ико́ною Твое́ю, Скоропослу́шнице.

Припев: Пресвята́я Богоро́дице, спаси́ на́с.

Обре́тшии сокро́вище ра́дуются. Те́мже и мы́, иму́ще Тя́, Всецари́це, милосе́рдия сокро́вище небе́сное и неиждива́емое, воспева́ем, ра́дующеся, Твоя́ чудеса́.

Сла́ва Отцу́ и Сы́ну и Свято́му Ду́ху:

Лицу́ Твоему́, — предрече́ Дави́д, — помо́лятся бога́тии лю́дстии; исполня́ющуся сему́, вку́пе с бога́тыми и мы́, доброде́тельми убо́зии, мо́лимся Тебе́, Де́во, пред ли́ком Твои́м.

И ны́не и при́сно и во ве́ки веко́в. Ами́нь.

Якоже о́чи ра́б в руку́ госпо́дий свои́х, та́ко о́чи на́ши устремле́ни су́ть к Тебе́ и к о́бразу Твоему́, Всеблага́я Влады́чице, до́ндеже уще́дриши рабы́ Твоя́.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Пресвята́я Богоро́дице, спаси́ на́с.

Воззри́ Твои́ми очесы́, Мари́е, и ви́ждь благоутро́бно пред ико́ною Твое́ю предстоя́щих и Тя́ с ве́рою призыва́ющих, и услы́ши си́х, Скоропослу́шнице.

Припев: Пресвята́я Богоро́дице, спаси́ на́с.

Кре́пость да́руй на́м, Чи́стая, да твори́м во́лю Сы́на Твоего́ со стра́хом и любо́вию, укрепля́еши бо рабы́ Твоя́ я́ко Ма́терь Всеси́льнаго Бо́га на́шего.

Сла́ва Отцу́ и Сы́ну и Свято́му Ду́ху:

Страстьми́ бори́мии и неви́димыми се́ятелями зо́л, при́сно нужда́емся в Твое́й, Влады́чице, необори́мой по́мощи, ея́же не лиши́ на́с, Богоблагода́тная.

И ны́не и при́сно и во ве́ки веко́в. Ами́нь.

Спаси́тельный щи́т пода́ждь на́м, Госпоже́, Твое́ держа́вное заступле́ние, и́мже началозло́бнаго побежда́юще кова́рства, венце́в сла́вы сподо́бимся.

По 3-й пе́сни седа́лен:

Влады́чицу Тя́ ми́ра ве́мы, Мари́е Всепе́тая, я́ко родила́ еси́ на́м все́х Творца́, Спаси́теля ми́ра, Иже и просла́ви Тебе́, Пречи́стую Ма́терь Свою́, подая́ Тобо́ю благода́ть и ми́лость чту́щим Тя́ и моля́щимся Тебе́, Богоро́дице.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Припа́дая ко святе́й ико́не Твое́й, Де́во, вопию́ Ти́ от се́рдца сокруше́нна: не попусти́ ми́ поги́бнути, Всеми́лостивая Госпоже́, житие́ мое́ во гресе́х ижди́вшему.

Припев: Пресвята́я Богоро́дице, спаси́ на́с.

Грехолюби́в сы́й, удали́хся, Влады́чице, Сы́на Твоего́, и лише́н е́смь дерзнове́ния к Нему́. Те́мже к покая́нию мя́ напра́вив, сподо́би получи́ти, е́же погуби́х.

Сла́ва Отцу́ и Сы́ну и Свято́му Ду́ху:

Богоизбра́нная Отрокови́це, в руне́ ороше́нном предви́денная, окропи́ росо́ю благода́ти изсо́хшую зе́млю се́рдца моего́ и благопло́дну соде́лай ду́шу мою́.

И ны́не и при́сно и во ве́ки веко́в. Ами́нь.

Ра́дуйся, Богоневе́сто, доброде́тельми, я́ко ря́сны златы́ми, преукра́шенная; ра́дуйся, сосу́де мѵ́ра, и́мже врачу́ются зову́щии: сла́ва, Христе́, си́ле Твое́й.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Пресвята́я Богоро́дице, спаси́ на́с.

Не́сть, Всеми́лостивая Госпоже́, такова́го, и́же бы лиши́ся щедро́т Твои́х, прибе́г с ве́рою к Твоему́ благоутро́бию. Те́мже приле́жно мо́лим Тя́: сподо́би и на́с гре́шных ми́лости Твоея́.

Припев: Пресвята́я Богоро́дице, спаси́ на́с.

Умилостивле́ние о все́м ми́ре су́щая, умоли́, Де́во, Сы́на Твоего́, все́х Судию́, да не помяне́т грехо́в на́ших, и да изба́вимся Тобо́ю вся́каго преще́ния Его́, находя́щаго на лю́ди согреши́вшия.

Сла́ва Отцу́ и Сы́ну и Свято́му Ду́ху:

Го́ру Твою́ и сию́ оби́тель, иму́щих о́браз Тво́й, всеблага́я Скоропослу́шнице, покры́й от вся́каго зла́, соблюда́ющи рабо́в Твои́х в едине́нии ду́ха, во вся́кой благосты́ни и и́стине.

И ны́не и при́сно и во ве́ки веко́в. Ами́нь.

Примири́теля вся́ческих ро́ждшая, всемо́щным предста́тельством Твои́м, Влады́чице, умиротвори́ на́с к Нему́, к бли́жним и к себе́ сами́м, я́ко воспева́ющим Тя́ ми́р подава́ющая.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Ты́ — рабо́в Твои́х утеше́ние, Всеблаже́нная; Ты́ — све́т, удобре́ние и наде́жда спасе́ния; Ты́ у́бо промышле́нием Твои́м вся́кия ну́жды и ско́рби изба́ви на́с.

Припев: Пресвята́я Богоро́дице, спаси́ на́с.

Ве́дущи не́мощи на́ша, Богороди́тельнице, восполня́й духо́вную и веще́ственную ску́дость на́шу, да подаю́щаго на́м Тобо́ю вся́ блага́я Бо́га сла́вим.

Сла́ва Отцу́ и Сы́ну и Свято́му Ду́ху:

Не оста́ви на́с, Всеще́драя, внегда́ оскудева́ти кре́пости на́шей, не отступи́ от упова́ющих на Тя́ во исхо́де и по исхо́де яви́ на́м бла́гости Твоея́ си́лу.

И ны́не и при́сно и во ве́ки веко́в. Ами́нь.

Преблагослове́нная Мари́е, кни́га Бо́жия запечатле́нная, в кни́зе живота́ ве́чнаго написа́тися на́м сподо́би, да от Тебе́ ро́ждшагося Бо́га сла́вим.

Конда́к, гла́с 8:

В мо́ри жите́йстем обурева́емии, / треволне́нию подпа́даем страсте́й и искуше́ний. / Пода́ждь у́бо на́м, Госпоже́, ру́ку по́мощи, / я́коже Петро́ви Сы́н Тво́й, / и ускори́ от бе́д изба́вити ны́, да зове́м Ти́: / ра́дуйся, всеблага́я Скоропослу́шнице.

Икос:

Иде́же осени́т благода́ть Твоя́, Влады́чице, та́мо неду́жнии здра́ви быва́ют, бе́дствующии во благополу́чие прихо́дят, и вся́к скорбя́щий ра́дости исполня́ется. Те́мже благода́тию Твое́ю осени́ и на́с, сицева́я ра́достная Тебе́ глаго́лющих: ра́дуйся, Богоблагода́тная, непристу́пнаго Божества́ селе́ние; ра́дуйся, свята́я трапе́зо, Хле́бом жи́зни на́с снабдева́ющая; ра́дуйся, мѵ́ро многоце́нное, облагоуха́ющее ве́рных; ра́дуйся, ма́слино, еле́ем милосе́рдия на́с умаща́ющая; ра́дуйся, неистощи́мое сокро́вище даро́в; ра́дуйся, приснотеку́щий исто́чниче чуде́с; ра́дуйся, оби́димых заступле́ние; ра́дуйся, обурева́емых благоути́шное приста́нище; ра́дуйся, глухи́х слы́шание и све́те слепы́х; ра́дуйся, разсла́бленных укрепле́ние; ра́дуйся, свобожде́ние плене́нных; ра́дуйся, ми́ра всего́ упова́ние; ра́дуйся, всеблага́я Скоропослу́шнице.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Пресвята́я Богоро́дице, спаси́ на́с.

Наста́внице ко спасе́нию рабо́в Твои́х, души́ трича́стное, Госпоже́, испра́ви, да благода́ти безстра́стия сподо́бльшеся, пое́м: препе́тый отце́в Госпо́дь и Бо́г, благослове́н еси́.

Припев: Пресвята́я Богоро́дице, спаси́ на́с.

Жела́тельную си́лу души́ к боже́ственному раче́нию напра́ви, да то́ю Бо́га всеце́ло возлю́бим и к Нему́ при́сно стреми́мся, я́ко всеблаже́нному жела́ний кра́ю.

Сла́ва Отцу́ и Сы́ну и Свято́му Ду́ху:

Яростную си́лу души́ помози́ на́м, Де́во, обраща́ти на неви́димыя враги́ спасе́ния на́шего и спаси́тельныя любве́ испо́лни сердца́ на́ша к бли́жним и к Бо́гу.

И ны́не и при́сно и во ве́ки веко́в. Ами́нь.

Слове́сное души́ к богоуго́дному созерца́нию воскрыли́, Влады́чице, богопроти́вных помышле́ний избавля́ющи, и все́х на́с благо́е мы́слити, глаго́лати и твори́ти укрепи́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Богоро́дице, спаси́ на́с.

Па́жить плодоно́сну обрета́ет ста́до под Твои́м, Богома́ти, управле́нием, и душетле́ннии во́лцы не мо́щны расх́тити слове́сных ове́ц, храни́мых благода́тию Сы́на Твоего́ и Бо́га.

Припев: Пресвята́я Богоро́дице, спаси́ на́с.

Блаже́н челове́к, ему́же е́сть заступле́ние его́ от Тебе́, Богоневе́сто, при́сно бо полага́ет таковы́й восхожде́ния в се́рдце свое́м, до́ндеже у́зрит себе́ спасе́нна и воспое́т: Го́спода по́йте дела́ и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Седмисве́щный свети́льниче, седмию́ дара́ми Ду́ха светя́щий, сподо́би и на́м украси́тися духо́вными плода́ми, да, уще́дреннии чрез Тебе́ Бо́гом, пое́м: Го́спода по́йте дела́ и превозноси́те Его́ во вся́ ве́ки.

И ны́не и при́сно и во ве́ки веко́в. Ами́нь.

Горо́ Бо́жия, в Не́йже благоволи́ жи́ти Бо́г, моли́ся к Нему́ о на́с, да по́мощию Его́ благо́е творя́ще, сподо́бимся узре́ти преми́рныя го́ры и та́мо пе́ти: Го́спода по́йте дела́ и превозноси́те Его́ во вся́ ве́ки.

Песнь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Пресвята́я Богоро́дице, спаси́ на́с.

Помяни́, Госпоже́, рабы́ Твоя́, любо́вию сла́вящия Тя́, услы́ши моля́щихся к Тебе́ и моли́твами Твои́ми благоуве́тлива на́м соде́лай Сы́на Твоего́ и Бо́га, зде́ и на стра́шном Суде́ Его́, Всеблаже́нная Богоро́дице, Чи́стая Присноде́во.

Припев: Пресвята́я Богоро́дице, спаси́ на́с.

Ра́досте Ангелов и челове́ков, свобо́дны на́с печа́лей жите́йских сотвори́ и хода́тайством Твои́м не конча́емых му́к изба́ви, да вре́менных и ве́чных бе́д Тобо́ю избы́вше, вопие́м: ра́дуйся, Всеблаже́нная Богоро́дице, Чи́стая Присноде́во.

Сла́ва Отцу́ и Сы́ну и Свято́му Ду́ху:

Ви́димо пред о́бразом Твои́м предстоя́ще, неви́димо же к Тебе́, одесну́ю Сы́на Твоего́ стоя́щей, у́м возводя́ще, мо́лим Ти ся приле́жно: сподо́битися на́м ра́йскаго блаже́нства умоли́, Всеблаже́нная Богоро́дице, Чи́стая Присноде́во.

И ны́не и при́сно и во ве́ки веко́в. Ами́нь.

Блага́го Царя́ Блага́я Ма́ти, осени́ нас необори́мым покро́вом Твои́м, Всеблаже́нная Богоро́дице, Чи́стая Присноде́во.

Свети́лен:

Зря́щии Тя́ ны́не на ико́не с Предве́чным Младе́нцем, про́сим Тебе́, Богоневе́сто: не лиши́ на́с и в бу́дущем ве́це всеблаже́ннаго лицезре́ния Твоего́ и воплоти́вшагося от Тебе́ Сы́на Бо́жия, да со благоугоди́вшими Ему́ и́мя Его́ и Твое́ велича́ем.

Молитва Божией Матери пред иконой Ее «Скоропослушница»

Преблагослове́нная Влады́чице, Присноде́во Богоро́дице, Бо́га Сло́ва па́че вся́каго сло́ва на спасе́ние на́ше ро́ждшая, и благода́ть Его́ преизоби́льно па́че всех прия́вшая, мо́ре я́вльшаяся Боже́ственных дарова́ний и чуде́с приснотеку́щая река́, излива́ющая бла́гость всем, с ве́рою к Тебе́ прибега́ющим! Чудотво́рному Твоему́ о́бразу припа́дающе, мо́лимся Тебе́, всеще́дрей Ма́тери Человеколюби́ваго Влады́ки: удиви́ на нас пребога́тыя ми́лости Твоя́, и проше́ния на́ша, приноси́мая Тебе́, Скоропослу́шнице, ускори́ испо́лнити, все, е́же на по́льзу во утеше́ние и спасе́ние коему́ждо устроя́ющи. Посети́, Преблага́я, рабы́ Твоя́ благода́тию Твое́ю, пода́ждь неду́гующим цельбу́ и соверше́нное здра́вие, обурева́емым тишину́, плене́нным свобо́ду и разли́чными о́бразы стра́ждущих уте́ши, изба́ви, всеми́лостивая Госпоже́, всяк град и страну́ от гла́да, я́звы, тру́са, пото́па, огня́, меча́ и ины́я ка́зни вре́менныя и ве́чныя, Ма́терним Твои́м дерзнове́нием отвраща́ющи гнев Бо́жий: и душе́внаго разслабле́ния, обурева́ния страсте́й и грехопаде́ний свободи́ рабы́ Твоя́, я́ко да непреткнове́нно во вся́ком благоче́стии пожи́вше в сем ве́це, и в бу́дущем ве́чных благ сподо́бимся благода́тию и человеколю́бием Сы́на Твоего́ и Бо́га, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и Пресвяты́м Ду́хом, ны́не и при́сно, и во ве́ки веко́в. Ами́нь.

Молитва вторая Божией Матери пред иконой Ее «Скоропослушница»

О, Пресвята́я Де́во, Ма́ти Го́спода Вы́шняго, Скоропослу́шная Засту́пнице всех, к Тебе́ с ве́рою прибега́ющих! При́зри с высоты́ небе́снаго вели́чия Своего́ на мене́ непотре́бнаго, припа́дающаго к ико́не Твое́й, услы́ши ско́ро смире́нную моли́тву мене́ гре́шнаго и принеси́ ю́ к Сы́ну Своему́: умоли́ Его́, да озари́т мра́чную ду́шу мою́ све́том Боже́ственныя благода́ти Своея́ и очи́стит ум мой от по́мыслов су́етных, да успоко́ит стра́ждущее мое́ се́рдце и исцели́т ра́ны его́, да вразуми́т мя на до́брая дела́ и укрепи́т рабо́тати Ему́ со стра́хом, да прости́т вся соде́янная мно́ю зла́я, да изба́вит ве́чныя му́ки и не лиши́т Небе́снаго Своего́ Ца́рствия. О Преблагослове́нная Богоро́дице: Ты благоизво́лила еси́ нарещи́ся во о́бразе Свое́м Скоропослу́шница, повелева́ющи всем притека́ти к Тебе́ с ве́рою: не пре́зри у́бо мене́ ско́рбнаго и не попусти́ поги́бнути мне в бе́здне грехо́в мои́х. На Тя по Бо́зе все мое́ упова́ние и наде́жда спасе́ния, и Твоему́ покро́ву и предста́тельству поруча́ю себе́ во ве́ки. Ами́нь.