Шрифт

Чудотворной Зографской иконе Акафистной Пресвятой Богородицы, нарицаемой Предвозвестительница.

Тропа́рь, гла́с 1:

Якоже иногда́ ста́рцу и́ноку, пред свято́ю Твое́ю ико́ною похва́льная Тебе́ воспева́вшему, взаи́мно ра́доватися рекла́ еси́, и враго́в прише́ствие предвозвести́ла еси́, Богоро́дице, та́ко и ны́не услы́ши на́ша мольбы́, и наше́ствие враго́в ви́димых и неви́димых прожени́ от на́с, да вси́ благода́рственно вопие́м Ти́: ра́дуйся, безневе́стная Ма́ти, кова́рства вра́жия запина́ющая, и от все́х зо́л на́с избавля́ющая.

Кано́н Богоро́дицы, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Отве́рзи, Влады́чице, уста́ моя́, и ду́х прему́дрости и стра́ха Бо́жия пода́ждь ми́, да во гла́се хвале́ния воспою́ вели́чия и ми́лости Твоя́, я́же на́м, Богома́ти, яви́ла еси́.

Отку́ду начну́, и о чесо́м пе́рвее просла́влю Тя́, Богома́ти? О о́ном ли, я́ко Рождество́м Твои́м естество́ на́ше от а́да и сме́рти ве́чныя изба́вила еси́, или́ я́ко и ны́не избавля́еши ны́ от все́х зо́л и лю́тых обстоя́ний?

Во глубину́ пре́лести диа́воли па́дшее челове́чество, на го́ру и́стиннаго богопозна́ния возвела́ еси́, Влады́чице. Ны́не же в заблужде́ния ерети́ческая впа́сти на́с непопусти́ла еси́.

Всеблаже́нная Отрокови́це, Чи́стая Голуби́це, житие́ чи́стое проводи́ти укрепи́ на́с, и блаже́нства ве́чнаго сподо́би моли́твами Твои́ми, да всегда́ прославля́ем Тя́, вино́вницу спасе́ния на́шего.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Твоя́ песносло́вцы, и́стинную Богоро́дицу Тя́ зна́ющия и Сы́на Твоего́ Главу́ Це́ркве нарица́ющия, Ма́терняго Твоего́ благоволе́ния не лиши́, проти́вно же сему́ ве́рующия вразуми́, и единомы́сленны с на́ми сотвори́, Влады́чице.

Истинный Жени́х Це́ркве — Сы́н Тво́й, Богоро́дице, мы́ же то́кмо по́званнии на пи́р ве́ры. Сего́ ра́ди, Влады́чице, ненави́диши латиному́дрия папослужи́тели, жениха́ми Це́ркве себе́ нарица́ющия, и си́м Христа́ посрамля́ющия.

Истинный Жени́х, Христо́с, и ученицы́, дру́зи Его́, не стрижа́ху власы́ главы́ своея́; ло́жнии же лати́нстии жениси́ законоположи́ша себе́ стрищи́ власы́, и си́м, Влады́чице, проти́вни Сы́ну Твоему́ сотвори́шася.

Сы́н Тво́й, Богоро́дице, еди́ножды принесе́ себе́ в же́ртву Бо́гу Отцу́; безу́мнии же лати́ны, неразуме́юще сего́, на еди́ном же́ртвеннице во еди́н де́нь не́колико кра́тно же́ртву сию́ прино́сят, и я́ко бы втори́чно Христа́ распина́ют, и та́йну искупле́ния неде́йственну сотворя́ют.

Седа́лен святы́х, гла́с 8.

Солнцезра́чная колесни́це Дави́дова, порфиропо́сланный о́др Соломо́нов, сви́ток богоначерта́нный Иса́иин, и одушевле́нная ски́ния Моисе́ева, и стена́ адама́нтская Аммо́сова, Ты́ была́ еси́, свети́льник златокова́нный Заха́риев, Дании́лова же гора́, дщи́ца желтобе́лая Авваку́мова, и превосхо́дное проро́ков оглаше́ние. Моли́ся Сы́ну Твоему́ и Бо́гу прегреше́ний оставле́ние дарова́ти, благогове́йно покланя́ющимся боже́ственному о́бразу Твоему́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Злы́й сове́т лати́нов на жре́бий Тво́й, наше́дших иногда́, разруши́ла еси́, Богоро́дице, и со студо́м во своя́ си возврати́тся и́м сотвори́ла еси́, благоче́стия же ра́ди пострада́вшия от ни́х рабы́ Твоя́, венце́в сла́вы сподо́била еси́.

Оби́тель Зогра́фская дне́сь све́тло торжеству́ет, и пра́зднество сотворя́ет честне́й ико́не Твое́й, е́юже, Богома́ти, заблужде́ние лати́н изобличи́ла еси́, и наше́ствие и́х предвозвести́ла еси́.

Не то́кмо оби́тель Зогра́фская, но и вся́ гора́ Афо́нская прославля́ет Тя́, Богома́ти, я́ко не попусти́ла еси́ латиному́дрствующим вознести́ на ню́ ро́г сво́й, и Правосла́вие в не́й до ны́не неврежде́нно сохрани́ла еси́.

Якоже корабле́ц в пучи́не, та́ко и Це́рковь Сы́на Твоего́, Влады́чице, коле́блема е́сть бу́рею разли́чных ересе́й, но в ти́хое приста́нище ве́чнаго спасе́ния упра́ви ю́, многомо́щными Твои́ми к Бо́гу моли́твами.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Ужасо́шася папослужи́телие, егда́ услы́шаша гла́с с небесе́, укрепля́ющь страстоте́рпцы Зогра́фския, и мзду́ на небеси́ и́м обещава́ющь, оба́че не пока́яшася, но а́ки а́спиды глуси́и, неиспра́влены пребы́ша в заблужде́нии свое́м.

Не ве́сте ко́его ду́ха есте́ вы́, лати́не! Аще бо Ева́нгелие Христо́во пропове́дуете, то почто́ неслу́шающия ва́с, слуги́ Богома́тере, убива́ете и огне́м сожига́ете? Христо́с бо не повеле́ ученико́м Свои́м та́ко твори́ти.

Слы́шите, лати́не, и устыди́теся! Аще бы́ уче́ние ва́ше было́ пра́во, и ре́вность ва́ша по ве́ре Христо́ве Бо́гу уго́дна, не бы́ Цари́ца Небе́сная, чрез ико́ну Свою́, врага́ми Сы́на Своего́ нарекла́ ва́с.

Припа́дающе ко святе́й ико́не Твое́й, Де́во, вопие́м Ти́ от се́рдца сокруше́нна: не попусти́ на́м впа́сти в се́ти ерети́ческия, Госпоже́ Всеми́лостивая, но в Правосла́вии до кончи́ны живота́ на́шего пребы́ти укрепи́ на́с.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Арха́нгел Гаврии́л возвести́ Тебе́ та́йну, от ве́ка сокрове́нную: ны́не же Ты́, Богома́ти, прия́ла еси́ от Бо́га да́р, враго́в наше́ствие предвозвеща́ти, и от лю́тости те́х ве́рныя рабы́ Твоя́ защища́ти.

Смире́нно молю́ся Тебе́, Всеблаго́й Предвозвести́тельнице: возвеща́й ми́ при́сно неизбе́жный ча́с сме́ртный и стра́шный су́д Сы́на Твоего́, да поне́ та́ко удержу́ся от де́л грехо́вных, и́хже обы́чаем всегда́ прельще́н е́смь.

Ра́дуйся, Преблагослове́нная Де́во, жре́бий Сво́й земны́й в жили́ще и́ноком дарова́вшая; ра́дуйся, любо́вь Свою́ к ме́сту сему́, я́сно возвести́вшая; ра́дуйся, защища́ти подвиза́ющихся в Горе́ се́й обеща́вшая; ра́дуйся, от обеща́ния Своего́ никогда́ же отступа́ющая.

Ра́дуйся, вся́ких даро́в рабо́м Твои́м всеще́драя пода́тельнице; ра́дуйся, во бране́х, в боле́знех и труде́х и́х премилосе́рдая уте́шительнице; ра́дуйся, благоде́нственное житие́ зде́, и всеблаже́нное та́мо в ве́чности и́м устроя́ющая.

Конда́к ико́не Богоро́дицы, гла́с 8.

Оби́тель Зогра́фская и вся́ гора́ Афо́нская, от наше́ствия ерети́чествующих и кровожа́дных лати́н изба́вльшеся, благода́рно вопию́т Ти́, Богоро́дице: ра́дуйся, покро́ве, ши́рший о́блака, от зно́я гне́ва Бо́жия на́с защища́ющий и от все́х бе́д избавля́ющий.

Икос:

Ви́девше и́ноцы Зогра́фстии ико́ну Богома́тере, чу́дно к ни́м прише́дшую, и во огни́ не сгоре́вшую, с любо́вию облобыза́юща ю́, и во хра́ме Успе́ния наме́стною поста́виша, ра́достно вопию́ще: ра́дуйся, Влады́чице, оби́тели на́шея покро́ве и огражде́ние, от огня́ же и все́х бе́д избавля́ющи.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

В пещи́ искуше́ний и бе́д опаля́емых ороси́, о, Богома́ти, струя́ми Твои́х щедро́т, да посра́мятся врази́ на́ши, и да разуме́ют, я́ко мы́ — рабы́ Твои́ есмы́, и ве́ра на́ша — чиста́ и непоро́чна е́сть.

Якоже гора́ Афо́нская и вся́ Це́рковь Восто́чная, от ле́сти и наси́лия папослужи́телей, Тобо́ю, Богома́ти изба́вльшеся, благода́рно Тебе́ вопию́т: Благослове́нна Ты́ в жена́х, еди́на Всенепоро́чная Влады́чице.

Правосла́внии, собери́теся лю́дие, дне́сь, и торжество́ соста́вите Пречи́тей Богома́тери, прославля́юще святу́ю Ея́ ико́ну, е́юже нахожде́ние вра́жие предвозвеща́ет, и от все́х зо́л избавля́ет вопию́щия: Благослове́н Бо́г оте́ц на́ших.

Тво́рче и Спаси́телю на́ш, Христе́ Бо́же, приими́ Пречи́стыя Твоея́ ма́тере моли́тву, ю́же Тебе́ за ны́, гре́шныя, прино́сит, и изба́ви на́с от все́х бе́д и наве́тов вра́жиих, да Тебе́ ра́достно зове́м: Благослове́н Бо́г оте́ц на́ших.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

По́йте, и́ноцы Афо́нстии, благословля́й, оби́тель Зогра́фская, Благу́ю Влады́чицу, Засту́пницу Всеми́лостивую, покро́вом Свои́м правосла́вныя лю́ди покрыва́ющую, ерети́ческих же вся́ за́мыслы разруша́ющую.

Хотя́ху иногда́ папослужи́телие всю́ го́ру Афо́нскую мече́м плени́ти, и вся́ и́ноки во свою́ па́губную е́ресь обрати́ти, но заступле́нием Твои́м, Влады́чице, Госпо́дь сотре́ горды́ню и́х, те́мже превозно́сим Тя́ во ве́ки.

Вседержи́тель Госпо́дь, всели́выйся во утро́бу Твою́, сто́лп утвержде́ния ве́рным Тя́ показа́, к нему́же прибега́юще, напа́стей свобожда́емся, искуше́ний ересе́й, и все́х бе́д избавля́емся, те́мже согла́сно пое́м, и превозно́сим Тя́, Чи́стая, во ве́ки.

Страстоте́рпцы Зогра́фския оби́тели, пострада́ти за благоче́стие укрепи́ла еси́, Влады́чице, с ни́ми у́бо моли́ Христа́ Бо́га о спасе́нии ду́ш на́ших, да благослови́м и превозно́сим Тя́ во вся́ ве́ки.

Пе́снь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Прииди́те, Правосла́вия пито́мцы, духо́вно возвесели́мся, дне́сь бо наста́ све́тлый пра́здник чу́дныя, Пречи́стыя Богома́тере ико́ны, е́юже Правосла́вие утвержда́ется, заблужде́ние же латиному́дрствующих я́ве изоблича́ется.

Сове́т зо́л совеща́ша на ны́ богобо́рцы лати́ны, я́коже Ахитофе́л на Дави́да, но моли́твами Твои́ми, Богоро́дице, се́й разори́ла еси́, и кре́пость и́х низложи́ла еси́.

Отча́явшихся ве́лие прибе́жище, обурева́емых ти́хое приста́нище — Ты́ еси́, Богоро́дице, те́мже заступи́ и на́с от все́х зо́л и лю́тых обстоя́ний, да покланя́ющеся святе́й ико́не Твое́й, усе́рдно Тя́ велича́ем.

Приими́, Отрокови́це Пречи́стая, приноси́мую Тебе́ пе́снь сию́, воздаю́щи благода́ть на Тя́ наде́ющимся, испроси́ у Сы́на Твоего́ ми́р це́рквам, правосла́вным христиа́ном пода́ждь побе́ду на богопроти́вныя, да Тя́ вся́к язы́к правосла́вно велича́ет.

Свети́лен.

Горды́ню низложи́, Влады́чице, латиному́дрствующих, да посра́мятся и уразуме́ют, я́ко не́сть во уче́нии и́х и́стины, но пре́лесть го́рдаго сатаны́, и́же хотя́ на небеси́ поста́вити престо́л сво́й, и бы́ти подо́бен Вы́шнему, до а́да низве́ржеся и в преиспо́днюю всели́ся.