Канон предпразднству Рождества Пресвятой Богородицы

Тропа́рь, гла́с 4:

От ко́рене Иессе́ева и от чре́сл Дави́довых Богоотрокови́ца Мариа́м ражда́ется дне́сь на́м, ра́достию бо ра́дуются вся́ческая и обновля́ются. Сра́дуйтеся ку́пно, не́бо и земля́, восхвали́те Ю, оте́чествия язы́ков! Иоаки́м весели́тся, и Анна торжеству́ет, зову́щи: непло́ды ражда́ет Богоро́дицу и Пита́тельницу Жи́зни на́шея.

Кано́н предпра́зднства. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Ра́дующеся дне́сь, с весе́лием воспои́м боже́ственное рождество́ Богома́тере, и́бо роди́ Ра́дость вселе́нней, печа́ль прама́тере потребля́ющую.

Припев: Пресвята́я Богоро́дице, спаси́ на́с.

От непло́дове происхо́дит греха́ непло́дство, Юже зако́н прописа́ и пропове́дания предъяви́ша боже́ственных богоглаго́льников, Пречи́стая Влады́чица и Всенепоро́чная.

Сла́ва Отцу́ и Сы́ну и Свято́му Ду́ху:

Хра́м и пала́та Царе́ва бы́сть, в Не́йже жили́ще Себе́ сотвори́в, жили́ще Святы́я Тро́ицы ве́рныя содева́ет Пресу́щественный.

И ны́не и при́сно и во ве́ки веко́в. Ами́нь.

Черто́г красне́йший, престо́л Бо́жий высоча́йший из непло́дове происхо́дит, на не́мже се́де пло́тию Пресу́щественный, седя́щия во тме́ поги́бели воздвиза́ет к зна́нию Све́та бла́гостию.

Пе́снь 3.

Ирмос: Яко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди.

Припев: Пресвята́я Богоро́дице, спаси́ на́с.

Земля́ плодови́та от земли́ непло́дныя ражда́ется, Яже плодороди́т Де́лателя благи́х и жизноно́сный Кла́с, пита́ющь вся́ Боже́ственным манове́нием.

Припев: Пресвята́я Богоро́дице, спаси́ на́с.

Дне́сь прозябе́ де́вства же́зл, из него́же процвете́т Цве́т, Садоде́латель на́ш Бо́г, лука́выя ра́сли отсека́я кра́йнею бла́гостию.

Сла́ва Отцу́ и Сы́ну и Свято́му Ду́ху:

Се́ несеко́мая гора́ от ка́мене непло́дна отсече́н Ка́мень плодороди́т мы́сленный, Иже сокруше́ние соде́лает истука́нных все́х льсти́ваго.

И ны́не и при́сно и во ве́ки веко́в. Ами́нь.

Зако́на проначерта́ния Тя́ предсказа́ша, Отрокови́це: Законода́вца бо Ты́ зако́нных кроме́ во чре́ве но́сиши, соблюда́юща Тя́ па́че сло́ва нетле́нну и нескве́рну.

Седа́лен, гла́с 8.

Да ра́дуется не́бо, и земля́ да весели́тся: Бо́жие бо не́бо на земли́ роди́ся, Богоневе́стная сия́, от обетова́ния. Непло́ды младе́нца пита́ет Мари́ю, и ра́дуется о рождестве́ Иоаки́м: же́зл, глаго́ля, роди́ся мне́, из него́же Цве́т Христо́с прозябе́, из ко́рене Дави́дова. Вои́стинну чу́до пресла́вно!

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Превы́шшая Ангелов на земли́ Отрокови́ца ражда́ется, в святы́ни су́щи и чистоте́ без разсужде́ния, Яже очище́ние все́х, Христа́, ражда́ет, освяще́ние и всесоверше́нное избавле́ние.

Припев: Пресвята́я Богоро́дице, спаси́ на́с.

Блаже́нно чре́во Аннино бы́сть, во чре́во бо хотя́щую вмести́ти блаже́нное и невмести́мое Сло́во породи́, возрожде́ние все́м ве́рным подаю́щее.

Сла́ва Отцу́ и Сы́ну и Свято́му Ду́ху:

Ны́не мра́к зло́бный потребля́тися начина́ет, Со́лнца бо одушевле́нный о́блак возсия́ от непло́дных ложе́сн, Всенепоро́чная, Ея́же Рождество́ светоза́рное воспра́зднуим.

И ны́не и при́сно и во ве́ки веко́в. Ами́нь.

Яко плодови́тая ма́слина, я́же от ко́рене прозя́бши Иессе́ева, Де́во, Анна Тя́ прораща́ет, прозяба́ющую ми́лостиваго Сло́ва, Ему́же ми́лость и и́стина всегда́ предхо́дит.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Пресвята́я Богоро́дице, спаси́ на́с.

Запеча́танная ны́не кни́га ражда́ется, Юже прочести́ невозмо́жно естество́м зако́на земны́х, соблюда́ема в жили́ще Сло́ва, я́коже кни́ги прояви́ша богоглаго́ливых Ду́хом.

Припев: Пресвята́я Богоро́дице, спаси́ на́с.

Лоза́ дне́сь роди́ся спаси́тельная, Яже нетле́нный процвете́т Гро́зд Боже́ственный, сла́дость пролива́ющий, от Него́же вся́к пия́й та́инственно, боже́ственное и спаси́тельное весе́лие плоди́т.

Сла́ва Отцу́ и Сы́ну и Свято́му Ду́ху:

Игра́йте, челове́цы, со Ангелы лику́юще: дне́сь, от непло́дове Де́ве ро́ждшейся, печа́ль преста́ и приво́дится ра́дость торжеству́ющим Тоя́ боже́ственное рождество́.

И ны́не и при́сно и во ве́ки веко́в. Ами́нь.

Боже́ственный прописа́ проро́к проявле́ннейше сви́ток Тя́ но́в, в не́мже пе́рстом Сло́во Отчим, Де́во, напи́шется, в кни́зе напису́я жи́зни вся́ бла́гостию, Того́ нача́льству повину́ющияся.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Роди́ся дне́сь мо́ст, преводя́щь к Све́ту челове́чество, ле́ствица небе́сная, гора́ Бо́жия я́вственнейшая, Богоро́дица Де́ва, Юже ублажа́ем.

Припев: Пресвята́я Богоро́дице, спаси́ на́с.

Червлени́ца Анна произведе́ багряни́цу, руно́ омочи́вшую воплоще́ния Царе́ва по́слежде, Юже досто́йно вси́ песносло́вим.

Сла́ва Отцу́ и Сы́ну и Свято́му Ду́ху:

Исто́чник ны́не произы́де из ма́лыя ка́пли, Всенепоро́чная, Яже, Бе́здну спасе́ния ро́ждши, многобо́жия упраздни́т безме́рныя то́ки.

И ны́не и при́сно и во ве́ки веко́в. Ами́нь.

От непло́днаго ко́рене прозябла́ еси́ и из ко́рене зло́бы те́рние па́че естества́ Твои́м боже́ственным прозябе́нием посе́кла еси́, Богороди́тельнице Де́во, Присноблаже́нная.

Конда́к предпра́зднства, гла́с 3.

Де́ва дне́сь и Богоро́дица Мари́я, черто́г безконе́чный Небе́снаго Жениха́, ражда́ется от непло́дове, Бо́жиим сове́том, колесни́ца Сло́ва благоукраша́ется: на сие́ бо преднарече́ся Боже́ственная две́рь и Ма́ти су́щия Жи́зни.

Икос:

Иже от непло́дове пло́д даде́ся, Богоотрокови́ца Мари́я, Юже прови́деша иногда́ боже́ственнии проро́цы Ду́хом; Сию́ мы́ дне́сь зря́ще, в не́дрех Анны игра́ющую, с ве́рным Иоаки́мом мы́сленне ко учрежде́нию стеце́мся и су́щия дале́че призове́м, глаго́люще: ми́ра сего́ ны́не воззва́ние, от непло́дна бо чре́ва прозябе́ Боже́ственная две́рь и Ма́ти су́щия Жи́зни.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Пресвята́я Богоро́дице, спаси́ на́с.

Иоаки́м же и Анна ублажа́ются, ро́ждши блаже́нную я́ве чи́стую Богома́терь, блаже́нное Сло́во ро́ждшую, блаже́нны ве́рныя соверша́ющаго вся́.

Припев: Пресвята́я Богоро́дице, спаси́ на́с.

Да́р че́стен стяжа́ша Тя́, Пречи́стая, Твои́ роди́телие, заче́ншую Бо́га, обогати́вшаго дарми́ лу́чшими взыва́ющия: отце́в Го́споди и Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Сосцы́ твои́ па́че вина́ блажа́йшии, Анно богозва́нная, я́ко сосцы́ свяще́нными преблаго́е Сло́во Дои́вшую ты́ дои́ла еси́, Пода́теля млека́ и дыха́нию Пита́теля всему́.

И ны́не и при́сно и во ве́ки веко́в. Ами́нь.

Игра́й, бряца́й в гу́сль твою́, богодохнове́нне Дави́де, и лику́й: се́ бо киво́т, его́же дре́вле провозвести́л еси́, от непло́дствующа чре́ва про́йде, Царю́ тва́ри и Бо́гу соблюде́н.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Богоро́дице, спаси́ на́с.

Подви́гнем язы́к, песнопе́ньми боже́ственное рождество́ чту́ще, препе́тое Сло́во и пребоже́ственное Воплоти́вшия Ду́хом, и воззове́м: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Богоро́дице, спаси́ на́с.

Боже́ственнии, игра́йте, проро́цы, почита́юще Де́вы рождество́: Та́ бо испо́лни все́х пропове́дания, ва́ми сказу́емаго поро́ждши Христа́, вся́ческих Царя́, Его́же превозно́сим во вся́ ве́ки.

Припев: Пресвята́я Богоро́дице, спаси́ на́с.

Возопи́йте, го́ры, весе́лие, апо́столи и му́ченицы, лику́йте, преподо́бнии и пра́веднии, ны́не ра́дуйтеся в рождестве́ дне́сь Госпо́дни Ма́тере, Го́спода по́йте, вопию́ще, и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Процвете́ я́блоко благово́нное, ши́пок Боже́ственный появи́ся, и облагово́ни дне́сь концы́, и злосмра́дие уста́ви греха́ на́шего, Всечи́стая и Ма́ти Сло́ва, Юже превозно́сим во вся́ ве́ки.

И ны́не и при́сно и во ве́ки веко́в. Ами́нь.

Непло́дствующее естество́ челове́ческое честны́х дарова́ний Боже́ственнаго Ду́ха, дне́сь возвесели́ся, от непло́дове Богоотрокови́цу ро́ждшуся ви́дев, и возопи́й: Го́спода по́йте, дела́, и превозноси́те Его́ во вся́ ве́ки.

Песнь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Пресвята́я Богоро́дице, спаси́ на́с.

Се́ Бо́жие ме́сто свято́е проявле́нно показа́ся, гра́д препросла́вленный Царе́в назда́ся, светоза́рный ра́й све́тло процвете́, рая́ Хода́таица су́щи, к Бо́гу же челове́ков усво́ение.

Припев: Пресвята́я Богоро́дице, спаси́ на́с.

Яви́ся свеща́ и свети́льник дне́сь, златозаря́щий Све́т преве́чный, в Ню́же всели́вся, су́щия в нощи́ лю́тых просвети́т, разори́т же безбо́жия мглу́ и дне́ вся́ соде́лает прича́стники и́стинно ве́ры ра́ди.

Припев: Пресвята́я Богоро́дице, спаси́ на́с.

Дне́сь земля́ лику́ет, но́вое бо не́бо ви́де, Бо́жие прекра́сное поро́ждшееся, в Не́мже всели́вся пло́тию, небе́с превы́шше возведе́т челове́ки и обожи́т вся́ бла́гостию, Его́же, пою́ще ве́рно, велича́ем.

Сла́ва Отцу́ и Сы́ну и Свято́му Ду́ху:

Предо́брая дво́ица прозябе́, Иоаки́м и Анна, Юницу нескве́рную, из Нея́же Юне́ц упита́нный проше́д, за ми́р закла́ся, е́мляй прегреше́ния челове́ков, приноси́мыя же разоря́я же́ртвы де́моном.

И ны́не и при́сно и во ве́ки веко́в. Ами́нь.

Просвети́ ны, Све́т ро́ждшая, светоно́сное Твое́ рождество́ ду́хом, Богороди́тельнице, торжеству́ющия, и све́та бу́дущаго покажи́, Пречи́стая, прича́стники, и ми́р пода́ждь и избавле́ние лю́тых, Ма́терними Твои́ми моли́твами.

Свети́лен.

Ада́ме, обнови́ся, и Ева, возвели́чися, проро́цы, со апо́столы лику́йте и пра́ведными, о́бщая бо ра́дость возсия́ Ангелов же и челове́ков от пра́ведных дне́сь Иоаки́ма и Анны, Богоро́дица Мари́я.