Шрифт

Пресвятой Богородице и Приснодеве Марии в честь иконы Ее, именуемой Печерская-Нерукотворенная.

Тропа́рь, гла́с 4:

Дне́сь све́тло торжеству́ет Пече́рская оби́тель и ра́дуется явле́нием о́браза Богома́тере безме́рный ли́к Пече́рских отце́в, с ни́миже и мы́ непреста́нно возопии́м: ра́дуйся, Благода́тная, Пече́рская похвало́.

Стихи́ра, гла́с 6:

Прииди́те, ве́рнии, любо́вию облобыза́ем чуде́сный о́браз Богома́тере, явля́ющий пред все́ми держа́вный покро́в Ея́ над на́ми, в него́же прибега́юще, преклоня́ем коле́на се́рдца на́шего и ве́рно зове́м: сохрани́ и спаси́, Богоро́дице, все́х притека́ющих к Тебе́ и чу́дному о́бразу Твоему́ кла́няющихся.

Кано́н Богоро́дице ра́ди ико́ны Ея́, имену́емыя Пече́рская-Нерукотворе́нная. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Сло́во ми́ да́ждь, Пречи́стая, да ве́рою и любо́вию воспою́ е́же к на́м Твое́ безме́рное снизхожде́ние.

Покро́в Тво́й, Богороди́тельнице, ви́дяще над на́ми в явле́нии чу́днаго о́браза Твоего́, благода́рственная от души́ воспева́ем.

Ангельстии ли́цы удиви́шася, зря́ще Твое́ промышле́ние, е́же о на́с, и с тре́петом окружи́ша Тво́й пречи́стый ли́к.

Си́лою Бо́жиею украша́ющии Тво́й хра́м, Богоро́дице, иконопи́сцы вку́пе с Али́пием преподо́бным со мно́гою хвало́ю воспе́ша Тя́, чу́дно и́м я́вльшуюся.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Из у́ст Твои́х, Пречи́стая, явля́я благода́тное освяще́ние це́ркве Пече́рския, излете́ го́лубь, я́ко о́браз Ду́ха Свята́го, все́льшагося зде́.

Просвети́ся о́браз Тво́й, Богоро́дице, и, све́том небе́сным осиява́еми, иконопи́сцы падо́ша ни́ц, ужаса́ющеся.

Ра́достию объя́т бе́ явле́ния Ду́ха Свята́го в ви́де голуби́не преподо́бный Али́пий, с ве́рою и любо́вию взира́я на Тя́, Богома́ти.

Егда́ узре́ша иконопи́сцы гре́честии го́лубя, восходя́ща из у́ст Богома́тере ко о́бразу Спа́сову, а́ще и не а́бие уразуме́ша чу́до сие́, но по́слежде просла́виша Тя́, Богома́ти.

Седа́лен, гла́с 4:

Егда́ яви́ся о́браз Тво́й, Пречи́стая, в це́ркви Пече́рстей, тогда́ воспе́ша вси́, ви́девшии чу́до сие́, с ни́ми же и мы́, ве́дуще в явле́нии се́м сугу́бую благода́ть, подава́емую оби́тели на́шей, ра́достно взыва́ем Ти́, и любо́вию чте́м ли́к Пречи́стый Тво́й, Богообра́дованная, при́сно на́с снабдева́й любо́вию Свое́ю.

Сла́ва, и ны́не:

Све́тлое дне́сь Госпожи́ на́шея Пресвяты́я наста́ торжество́, весели́ся, пречу́дный Али́пие со и́ноки Пече́рскими, и да ликовству́ют вси́ боголюби́вии собо́ри: созыва́ет бо на́с Пресвята́я Богоро́дица просла́вити чу́дную Свою́ ико́ну, луча́ми ми́лости не то́кмо оби́тель Пече́рскую, но и зе́млю Бря́нскую просвеща́ющую, те́мже, ра́дующеся, вси́ вопие́м: спаси́ ны, Де́во Чи́стая.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Чи́ст и бе́л, а́ки сне́г, го́лубь, бя́ше во о́браз Всесвята́го и Пречи́стаго Ду́ха Бо́жия, и́же лета́ше по це́ркви, на ли́ки святы́х возседа́я. Сподо́би и на́с чи́стою душе́ю воспева́ти Тя́, Пресвята́я Де́во.

Излета́ше многокра́тно се́й го́лубь из у́ст Богома́тере к лико́м Спа́сову и святы́х, облета́я всю́ це́рковь, показу́я многосугу́бую благода́ть Ду́ха Свята́го, в хра́ме Пече́рском пребыва́ющую.

Сия́ние о́браза Твоего́, Богома́ти, просвети́ всю́ це́рковь и ослепи́ у́жасом испо́лненный иконописа́телей ли́к.

То́нко и непости́жно сия́ние бы́сть сие́, я́ко снизхожде́ние Ду́ха Преве́чнаго, небесе́м отве́рстым в небеси́ подо́бную це́рковь Пече́рскую.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Яве узре́ша в явле́нии чу́дне непости́жную ми́лость Богома́тере, вси́, су́щии в це́ркви, просла́виша Го́спода, такову́ю благода́ть на́м дарова́вшаго.

Удивля́ет на́ш у́м и исполня́ет се́рдце умиле́ния сие́ пресла́вное чу́до — явле́ние ли́ка Богома́тере в це́ркви Пече́рстей.

Безу́мный то́кмо не разуме́ет безме́рную ми́лость Присноде́вы к уде́лу Своему́, и благода́ть Бо́жию в явле́нии Ду́ха Свята́го ви́дом голуби́ным.

Разуме́вше незри́мый покро́в Влады́чицы над си́м благода́тным уде́лом Свя́то-Пече́рским, устна́ми и се́рдцем принесе́м хвалу́ Пречи́стей.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Горе́ вознесе́м сердца́, ве́рою и любо́вию притеце́м под всемо́щный покро́в Богоро́дицы, дела́ достодо́лжная Ей принося́ще.

Ангельски воспева́юще Обра́дованную, потщи́мся яви́ти хвалу́ Ей ве́рою, кро́тостию и милосе́рдием.

Госпо́дни ве́дуще за́поведи, просла́вим Пречи́стую Ма́терь Спа́сову, исполне́нием зако́на Христо́ва.

Измы́ем грехи́ и беззако́ния своя́ слеза́ми покая́ния, потщи́мся чи́стою душе́ю лобыза́ти Пече́рский о́браз Богома́тере.

Конда́к, гла́с 3.

Де́ва дне́сь неви́димо предстои́т в це́ркви и с ли́ки Пече́рских отце́в мо́лится о на́с, благогове́йно велича́ющих Ея́ безме́рную ми́лость к ро́ду на́шему, я́вльшуюся в чуде́сном о́бразе Ея́, оби́тель Пече́рскую украша́ющем.

Икос:

Огради́ моя́ помышле́ния, Пречи́стая, и небе́сным Твои́м благослове́нием подви́гни мя́ досто́йно воспе́ти сла́ву Твою́ на ме́сте святе́м се́м, да, наде́яся на ми́лость Твою́, дерзну́ убо́гим язы́ком воззва́ти к Тебе́: ра́дуйся, Пече́рская сла́во, от ле́т дре́вних на́с освяща́ющая; ра́дуйся, небе́сная Игу́мение оби́тели на́шея, при́сно зде́ пребыва́ющая; ра́дуйся, упова́ние и кре́пость рабо́в Твои́х, на ме́сте се́м служа́щих Ти́; ра́дуйся, незри́мо на́с о́бразом Твои́м осеня́ющая, оби́тель Пече́рскую украша́ющем.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Мно́жество соде́янных помышля́я, окая́нный, с наде́ждою и ве́рою взыва́ю Ти́, Богороди́тельнице, я́ко Ма́тери милосе́рдия, ми́лость Твою́ изле́й на мя́.

Да осветя́тся и на́ши ду́ши све́том благода́ти Христо́вы, егда́ во умиле́нии с моли́твою притеце́м к неусыпа́ющей о на́с в заступле́нии Богоро́дице.

Наде́яся на заступле́ние Твое́, Пресвята́я Де́во, с ве́рою воззове́м Сы́ну Твоему́: поми́луй на́с, Бо́же, моли́тв ра́ди Ма́тере Твоея́.

Хотя́ще восприя́ти Ду́ха Всесвята́го, принесе́м в Пече́рский хра́м Богома́тери чистоту́ душе́вную и ве́ру с любо́вию.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Анто́ния и Феодо́сия преподо́бных с со́нмом Пече́рских отце́в дви́жа на моли́тву о на́с, просла́вим Пречи́стую дарова́вшую на́м таковы́я хода́таи.

Анто́ний преподо́бный вку́пе с Феодо́сием единонра́вным предстоя́т Богома́тери и мо́лятся Ей о покрове́нии оби́тели своея́ и ве́рою чту́щих ю́.

Ны́не, взира́юще на светоза́рный ли́к Присноде́вы, мо́лим Ю и на руку́ держи́маго Предве́чнаго Сы́на Ея́, пода́ти на́м по́мощь и заступле́ние.

Твои́м Ма́терним покро́вом, Пречи́стая, вы́ну сохраня́й уде́л Тво́й и ве́рою служа́щих Ти́ в не́м, и все́м приходя́щим в чу́дную оби́тель сию́.

Пе́снь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Одержи́ми ра́достию в се́й све́тлый де́нь пра́здника Богома́тере, все́ упова́ние на Ню́ возложи́м во вся́ дни́ мимотеку́щия жи́зни сея́.

Не усыпа́ет о на́с в моли́твах Пречи́стая Ма́терь Спа́сова и явля́ет чу́дное Свое́ милосе́рдие ко все́м, ве́рою чту́щим Ея́ святы́й о́браз.

Иису́са Христа́ светле́йшее и́мя призыва́юще, ве́рою просла́вим безсме́ртную Ма́терь Его́, Ко́рмчию на́шу в многомяте́жней жи́зни се́й.

Яко Ма́ти все́х милосе́рдно прие́млющая, приими́ Преблагослове́нная, и сие́ убо́гое сло́во, и сохрани́ на́с все́х под кро́вом Твои́м во ве́ки веко́в.

Свети́лен:

Све́том озари́вшая це́рковь Пече́рскую от пречу́днаго ли́ка Твоего́, Богоро́дице, возсия́й ми́ све́т спасе́ния огне́м покая́ния, да ве́рою и любо́вию славлю Тя́, Приснопрославля́емую.

Молитва Пресвятой Богородице пред иконой Ея «Печерской»

О, Пресвята́я и Пренепоро́чная Де́во Богоро́дице, на́ша Пече́рская похвало́ и украше́ние, держа́вный покро́ве свята́го ме́ста сего́, и́стинная Влады́чице избра́ннаго уде́ла Своего́. Приими́ нас, недосто́йных рабо́в Твои́х, убо́гое моле́ние, с ве́рою и любо́вию принося́щих пред чу́дным о́бразом Твои́м, да посети́ши ми́лостивно грехо́вное житие́ на́ше, просвеща́ющи его́ све́том покая́ния, осени́ нас, обремене́нных скорбьми́ мно́гими, Твое́ю Небе́сною ра́достию, сподо́би нас при́сно сла́вити Тя в ми́ре и благоче́стии на ме́сте святе́м сем, да, без поро́ка преше́дше путь жития́ на́шего, по́мощию Твое́ю дости́гнем ве́чнаго весе́лия во све́тлости святы́х и Богоно́сных оте́ц на́ших Анто́ния и Феодо́сия и всех преподо́бных Пече́рских и еди́ными усты́ и се́рдцы воспои́м Тя с Предве́чным Сы́ном Твои́м и Безнача́льным Его́ Отце́м и Пресвяты́м, Животворя́щим, Всеблаги́м и Единосу́щным Его́ Ду́хом во ве́ки веко́в. Ами́нь.