Канон Пасхальный ко Пресвятой Богородице, поемый в Троице-Сергиевой Лавре (В честь явления Божией Матери преподобному Сергию Радонежскому)

Тропарь Пресвятой Богородице, глас 4

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́ на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,/ Тя бо и едину на́дежду и́мамы.

Канон, глас 1.

Пе́снь 1.

Ирмос: Воскресе́ния день,/ просвети́мся, лю́дие,/ Па́сха, Госпо́дня Па́сха:/ от сме́рти бо к Жи́зни/ и от земли́ к Небеси́/ Христо́с Бог нас/ преведе́, побе́дную пою́щия.

Припев: Пресвята́я Богоро́дице, спаси́ на́с.

Очи́стим чу́вствия, и у́зрим/ в непристу́пном све́те/ Ма́терь Све́та,/ и ра́дуемся, реку́ще:/ ра́дуйся, Ма́ти Госпо́дня.

Припев: Пресвята́я Богоро́дице, спаси́ на́с.

Небеса́ у́бо досто́йно да веселя́тся,/ земля́ же да ра́дуется,/ да пра́зднует же оби́тель сия́,/ почита́ющая заступле́ние Богома́тери.

Сла́ва Отцу́ и Сы́ну и Свято́му Ду́ху:

Умерщвле́ние преде́л сломи́ла еси́,/ ве́чную Жизнь ро́ждшая, Христа́,/ из гро́ба возсия́вшаго днесь,/ Де́во Всенепоро́чная,/ и мир просвети́вшаго.

И ны́не и при́сно и во ве́ки веко́в. Ами́нь.

Воскре́сшаго ви́девши Сы́на Твоего́ и Бо́га,/ ра́дуйся со апо́столы, Богоблагода́тная Чи́стая,/ и е́же – ра́дуйся – пе́рвее,/ яко всех ра́дости вина́, восприя́ла еси́,/ Богома́ти Всенепоро́чная.

Пе́снь 3.

Ирмос: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,/ в Не́мже утвержда́емся.

Припев: Пресвята́я Богоро́дице, спаси́ на́с.

Ны́не вся испо́лнишася ра́дости неизрече́нныя,/ ви́димая же и неви́димая,/ ны́не пра́зднует све́тло ста́до Твое́, Влады́чице,/ Тобо́ю обеща́нное заступле́ние.

Припев: Пресвята́я Богоро́дице, спаси́ на́с.

Виждь, Чи́стая, и́ноков собо́ры па́ствы Твоея́,/ окружа́ющих всечестны́й о́браз Твой,/ грехо́в разреше́ния прося́щих,/ и жития́ исправле́ния,/ и прича́стия Боже́ственныя сла́вы Твоея́, Всенепоро́чная.

Сла́ва Отцу́ и Сы́ну и Свято́му Ду́ху:

Тече́т благода́ть незави́стная/ от Твоего́, Богоро́дице, о́браза,/ всем источа́ющи, моля́щимся те́пло,/ зол избавле́ние, и здра́вие, и ми́лость.

И ны́не и при́сно и во ве́ки веко́в. Ами́нь.

Все́ю душе́ю и мы́сли пра́востию/ в па́стве Твоей вси лику́юще,/ псалмы́, и пе́сньми духо́вными,/ и пе́нием Боже́ственным,/ обстоя́т о́браз Твой, Пречи́стая,/ Ты же, неотсту́пна су́ши,/ пода́ждь по́мощь, Богоневе́сто.

Ипакои́, глас 4:

Предвари́вшия у́тро я́же о Мари́и/ и обре́тшия ка́мень, отвале́н от гро́ба,/ слы́шаху от А́нгела: во Све́те Присносу́щнем Су́щаго/ с ме́ртвыми что и́щете, я́ко Челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,/ я́ко есть Сын Бо́га, спаса́ющаго род челове́ческий.

Пе́снь 4.

Ирмос: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ яко воскре́се Христо́с,/ я́ко всеси́лен.

Припев: Пресвята́я Богоро́дице, спаси́ на́с.

Се Пречи́стая гряде́т:/ услы́шав преподо́бный/ тече́т во сре́тение,/ и свет ве́лий осени́ его́,/ па́че со́лнца сия́ющь,/ и зрит Пречи́стую со двема апо́столома,/ све́тлостию Ея́ блиста́ющими,/ и паде́, моля́ся о заступле́нии.

Припев: Пресвята́я Богоро́дице, спаси́ на́с.

Не ужаса́йся, избра́нниче Мой,/ глаго́лет Богома́ти:/ приидо́х посети́ти Тебе́,/ услы́шана бысть моли́тва твоя́ о ученице́х твои́х/ и о всех, о ни́хже мо́лишися,/ и о оби́тели твое́й про́чее да не скорби́ши,/ – веща́ла еси́, Влады́чице.

Сла́ва Отцу́ и Сы́ну и Свято́му Ду́ху:

Богооте́ц у́бо Дави́д/ пред се́нным ковче́гом скака́ше, игра́я,/ Твои́м же заступле́нием/ весели́тся блаже́нное ста́до Твое́,/ сбытие́ слове́с Твои́х зря́ще, Богоневе́сто.

И ны́не и при́сно и во ве́ки веко́в. Ами́нь.

Реку́ Тя сла́дкую/ и пото́к насыще́ния,/ ма́нну Небе́сную,/ мед от ка́мене,/ изоби́лие и благода́ть приснотеку́щую стяжа́вше, Отрокови́це,/ во оби́тели обита́ющии/ благода́рно поют о Твое́м заступле́нии.

Пе́снь 5.

Ирмос: У́тренюем у́тренюю глубоку́,/ и вме́сто ми́ра песнь принесе́м Влады́це,/ и Христа́ у́зрим,/ Пра́вды Со́лнце,/ всем жизнь возсия́юща.

Припев: Пресвята́я Богоро́дице, спаси́ на́с.

Безме́рное Твое́ предста́тельство,/ е́же показу́еши при́сно, Всепречи́стая, ста́ду Твоему́,/ зря́ще, вопие́м Ти ны́не весе́лою душе́ю:/ ра́дуйся, Мари́е Богоневе́сто.

Припев: Пресвята́я Богоро́дице, спаси́ на́с.

Приступи́м, свещено́снии,/ ко о́бразу Де́вы днесь,/ мно́жество мона́шествующих,/ и спра́зднуем любопра́зднственными чи́нми/ посеще́ние Богома́тери.

Сла́ва Отцу́ и Сы́ну и Свято́му Ду́ху:

Неотсту́пна у́бо бу́ду от оби́тели твоея́,/ – веща́ла еси́, Влады́чице,/ избра́ннику Твоему́ Се́ргию,/ – отны́не всем изоби́льствует/ в житии́ и по твое́м ко Го́споду отхожде́нии:/ и се со сло́вом де́ло явля́еши, Цари́це.

И ны́не и при́сно и во ве́ки веко́в. Ами́нь.

Пева́емая Отрокови́це Де́во,/ чудеса́ Твоего́ заступле́ния/ удивля́ют челове́ком помышле́ния,/ па́че бо сло́во спасе́ние/ улучи́ Тобо́ю храни́мая оби́тель.

Пе́снь 6.

Ирмос: Снизше́л еси́ в преиспо́дняя земли́/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от Гро́ба.

Припев: Пресвята́я Богоро́дице, спаси́ на́с.

При́зри благосе́рдно/ на па́ству Твою́, Пречи́стая,/ и, я́коже обеща́лася еси́,/ потре́бная подава́й неоску́дно,/ снабдя́щи и покрыва́ющи/ Твоея́ по́мощи и заступле́ния те́пле и́щущия.

Припев: Пресвята́я Богоро́дице, спаси́ на́с.

Спа́се мой Преблаги́й/ и вся́ческих Тво́рче,/ Чи́стыя Богоро́дицы благоприя́тными мольба́ми/ соблюди́ Твоя́ певцы́ невреди́мы от вся́ких бед.

Сла́ва Отцу́ и Сы́ну и Свято́му Ду́ху:

Да изба́вится от всех злоключе́ний/ чту́щая Тя оби́тель, Богоро́дице Де́во,/ вражды́, огня́ и гла́да,/ во единомы́слии воспева́ющи,/ Помо́щницу Тя иму́щи.

И ны́не и при́сно и во ве́ки веко́в. Ами́нь.

Пое́м Тя и покланя́емся Ти, Богома́ти,/ не пре́зри моле́ний рабо́в Твои́х,/ заступи́ в беда́х на́ших,/ я́ко су́щи ми́лостива.

Конда́к, гла́с 8:

Аще и во гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ и Твои́м апо́столом мир да́руяй,/ па́дшим подая́й воскресе́ние.

И́кос:

Е́же пре́жде со́лнца Со́лнце, заше́дшее иногда́ во гроб,/ предвари́вша ко у́тру,/ и́щущия я́ко дне мироно́сицы де́вы,/ и друга́ ко друзе́й вопия́ху:/ о други́ни!/ прииди́те, воня́ми пома́жем Те́ло Живоно́сное и погребе́ное,/ плоть Воскреси́вшаго па́дшаго Ада́ма,/ лежа́щую во гро́бе;/ и́дем, потщи́мся, я́коже волсви́, и поклони́мся/ и принесе́м ми́ра, я́ко да́ры,/ не в пелена́х, но в плащани́це обви́тому,/ и пла́чем, и возопии́м:/ о Влады́ко, воста́ни,/ па́дшим подая́й воскресе́ние.

Пе́снь 7.

Ирмос: О́троки от пе́щи изба́вивый,/ быв Челове́к,/ стра́ждет я́ко сме́ртен,/ и стра́стию сме́ртное/ в нетле́ния облачи́т благоле́пие,/ еди́н благослове́н/ отце́в Бог и препросла́влен.

Припев: Пресвята́я Богоро́дице, спаси́ на́с.

О́троки от пе́щи Изба́вльшаго, Чи́стая,/ Ты родила́ еси́ нетле́нною Твое́ю, Богора́дованною утро́бою,/ по рождестве́, я́ко пре́жде рождества́, Сохра́ншаго Тя,/ Его́же и моля́щи непреста́й о нас, воспева́ющих Тя.

Припев: Пресвята́я Богоро́дице, спаси́ на́с.

Вси ны́не собери́теся,/ пле́щуще пра́зднственная во оби́тели сей/ и Христо́ву Ма́терь просла́вите,/ еди́ну, па́че Херуви́м несравне́нную/ и Серафи́м препросла́вленную.

Сла́ва Отцу́ и Сы́ну и Свято́му Ду́ху:

Я́ко вои́стинну свяще́нный,/ и спаси́тельный и зарено́сный, Де́во,/ о́браз посе́щения Твоего́/ покланя́ющимся бо сему́/ здра́вие раздае́ши и ми́лость/ теле́с же и душ,/ и взыска́ющим наде́жная еси́ Помо́щница,/ Бо́га пло́тию ро́ждшая.

И ны́не и при́сно и во ве́ки веко́в. Ами́нь.

Мона́шествующий и вси челове́цы,/ стра́хом и ра́достию ны́не поклони́мся о́бразу/ посеще́ния Богоотрокови́цы,/ моля́щеся с преподо́бным Се́ргием,/ и е́же ра́дуйся: Гаврии́лово,/ Благода́тная, вопию́ще.

Пе́снь 8.

Ирмос: Сей нарече́нный и Святы́й День –/ еди́н суббо́т царь и госпо́дь,/ пра́здников пра́здник/ и торжество́ есть торже́ств,/ в о́ньже благослови́м Христа́, во ве́ки.

Припев: Пресвята́я Богоро́дице, спаси́ на́с.

Сей нарече́нный и святы́й день/ всех созыва́ет к духо́вному весе́лию,/ сря́щим у́бо сей ра́достно и возопие́м:/ ра́дуйся, Богоро́дице, во вся ве́ки.

Припев: Пресвята́я Богоро́дице, спаси́ на́с.

Прииди́те, мона́хов мно́жества,/ испо́лнимся Боже́ственнаго благоуха́ния,/ заступле́нием Бо́жия Ма́тери/ и, Сию́ прославля́юще, поклони́мся,/ пою́ще при́сно во вся ве́ки.

Сла́ва Отцу́ и Сы́ну и Свято́му Ду́ху:

Возведи́ о́крест о́чи Твои́, Чи́стая, и виждь:/ се бо приидо́ша к Тебе́,/ я́ко Богосве́тлая свети́ла,/ от за́пада, и се́вера, и мо́ря,/ и восто́ка ча́да Твоя́,/ поклони́тися Твоему́ всепречи́стому о́бразу.

И ны́не и при́сно и во ве́ки веко́в. Ами́нь.

О́тче Вседержи́телю, и Сло́ве, и Ду́ше,/ Безнача́льное Существо́ и Непостижи́мое Естество́,/ Бо́же всех,/ оби́тель сию́ изми́ от вся́кия ско́рби/ мольба́ми вои́стинну Чи́стыя Еди́ныя Богоро́дицы.

Песнь 9.

Ирмос: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́,/ лику́й ны́не/ и весели́ся, Сио́не,/ Ты же, Чи́стая, красу́йся, Богоро́дице,/ о воста́нии Рождества́ Твоего́.

Припев: Пресвята́я Богоро́дице, спаси́ на́с.

Свети́ся, ра́дуйся, мона́шествующих мно́жество,/ изря́днее же игра́й, оби́тель сия́,/ лику́й ны́не и весели́ся све́тло,/ и́бо обрела́ еси́ Чи́стую Де́ву,/ Блюсти́тельницу Непобеди́мую.

Припев: Пресвята́я Богоро́дице, спаси́ на́с.

О, Боже́ственнаго, о, любе́знаго,/ о, неистощи́маго пролия́ния Твои́х безме́рных чуде́с,/ и́миже, Чи́стая, оби́тель сию́ обогаща́еши,/ и́бо сла́ва ея́ в Твое́м заступле́нии:/ Ты врата́рница ея́ и утвержде́ние.

Сла́ва Отцу́ и Сы́ну и Свято́му Ду́ху:

О Ма́ти Де́во!/ в моли́тву прино́сим Тебе́ мольбы́ уго́дника Твоего́,/ мо́лим Тя вси:/ изба́ви нас от вся́кия напа́сти и озлобле́ния.

И ны́не и при́сно и во ве́ки веко́в. Ами́нь.

Да сохрани́ши, Де́во, стадонача́льника оби́тели Твоея́/ ра́дуйся, Неискусобра́чная Честна́я,/ сохрани́ ста́до Твое́ от вся́каго озлобле́ния,/ Еди́на Богоневе́стная.

Молитва

Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.