Канон Пресвятой Богородице перед Ее иконой, именуемой «Неопалимая Купина»

Тропа́рь, гла́с 4:

Иже во огни́ купины́ неопали́мыя, дре́вле Моисе́ем ви́денныя, та́йну воплоще́ния Своего́ от неискусобра́чныя Де́вы Мари́и Прообразова́вый, То́й и ны́не, я́ко чуде́с Творе́ц и всея́ тва́ри Созда́тель, ико́ну Ея́ святу́ю чудесы́ мно́гими просла́ви, дарова́в ю́ ве́рным во исцеле́ние неду́гом и в защище́ние от о́гненнаго запале́ния. Сего́ ра́ди вопие́м Преблагослове́нней: наде́ждо христиа́н, от лю́тых бе́д, огня́ и гро́ма изба́ви на Тя́ упова́ющих, и спаси́ ду́ши на́ша, я́ко милосе́рда.

Стихи́ра, гла́с 2:

Весели́тся дне́сь гора́ Сина́йская и све́тло торжеству́ет, Ма́тери Госпо́дни светоно́сное пра́зднество соверша́ющи на ме́сте то́м, иде́же неопали́мая купина́ вели́ким во проро́цех Моисе́ем ви́дена бы́сть. Зде́ бо и до ны́не благода́ть Бо́жия обита́ет и чуде́с мно́жество явля́ет ве́рным, благоче́стно Богоро́дицу в пе́снех велича́ющим.

Кано́н Пресвяте́й Богоро́дице. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Пресвята́я Богоро́дице, спаси́ на́с.

Ум помраче́нный мо́й просвети́, Де́во, огнено́сным сия́нием Твоея́ сла́вы, па́мять, в славосло́вии изнемога́ющую, укрепи́ и воспламени́ хла́дное мое́ се́рдце боже́ственною любо́вию, да Тебе́, Купине́ Неопали́мей, пе́ние хвале́бное воспою́ досто́йно, Чи́стая.

Припев: Пресвята́я Богоро́дице, спаси́ на́с.

Хра́м Трисо́лнечнаго Све́та прекра́сный, украси́ моя́ чу́вства, молю́ся, да целому́дренною мы́слию и нескве́рными усты́ огнезра́чныя ико́ны Твоея́ явле́ние воспою́ досто́йно, Чи́стая.

Сла́ва Отцу́ и Сы́ну и Свято́му Ду́ху:

К Твое́й пресве́тлаго зра́ка ико́не припа́даю, окая́нный: ду́шу мою́ озари́ благода́тно, яви́ и те́ло нескве́рно и, от лю́тых мя́ неду́гов свободи́вши, покажи́ прича́стника насле́дия небе́снаго, Богоневе́стная.

И ны́не и при́сно и во ве́ки веко́в. Ами́нь.

Неду́гующа страстьми́ многоразли́чными, от ико́ны Твоея́ боже́ственныя исцеле́ния сподо́би мя́, о Богома́ти Влады́чице, да сла́влю чудеса́ Твоя́ и пою́ Тя, благи́х вино́вную, Ве́чную Бла́гость воплоти́вшую, ми́ра благу́ю Засту́пницу.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Пресвята́я Богоро́дице, спаси́ на́с.

Низложи́ нало́ги бесо́вския, стужа́ющия мне́, Влады́чице, го́рдость в доброде́тели, лицеме́рие в свя́тости, тщесла́вие во бде́нии, высокоу́мие в благогове́нии и неблагода́рность в благодея́ниих Сы́на Твоего́, еди́на Всепе́тая Де́во.

Припев: Пресвята́я Богоро́дице, спаси́ на́с.

Стра́нна мя́ любоче́стия сотвори́, молю́ Тя, Де́во, и чу́жда любопы́тства о челове́ческих согреше́ниих, де́рзость и изли́шнее на ми́лость Сы́на Твоего́ упова́ние отдали́ от мене́, да досто́йны Ему́ плоды́ принесу́, еди́на Пречи́стая.

Сла́ва Отцу́ и Сы́ну и Свято́му Ду́ху:

Нача́ло от земли́ прие́мшую ху́дость моего́ естества́ познава́я, молю́ Тя, Де́во, да́ждь ми́ презре́ние славолю́бия, бе́гство челове́ческия хвалы́, позна́ние со́бственнаго греха́ и со́бственныя не́мощи, еди́на Богоблаже́нная.

И ны́не и при́сно и во ве́ки веко́в. Ами́нь.

Кра́ткий все́х веще́й и всего́ ми́ра коне́ц, сме́ртный ча́с и муче́ние бу́дущее за суету́ дея́ний тщесла́вных помышля́ти сподо́би мя́, Де́во, да благода́тию Сы́на Твоего́ к пути́ и́стиннаго покая́ния наста́влен, ве́чнаго избе́гну прокля́тия, Пренепоро́чная.

Седа́лен, гла́с 8:

Вели́чия Твоя́ кто́ испове́сть, Богоро́дице? Явле́нием бо огнезра́чныя ико́ны Твоея́ возвесели́ла еси́ ду́ши правосла́вных, мно́гия неду́ги е́ю врачу́я, от огня́ же и гро́ма защища́я и́же по Бо́зе на Тя́ упова́ние возлага́ют. О, Всеми́лостивая Влады́чице! Не лиши́ у́бо и на́с Твоего́ заступле́ния, спаси́ от вся́каго зла́, да Тобо́ю хва́лящеся, не постыди́мся во ве́ки.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Пресвята́я Богоро́дице, спаси́ на́с.

Жестокосе́рдием отягче́ннаго мя́ облегчи́, немилосе́рдием к тре́бующим окамене́нную утро́бу мою́ умягчи́, бу́рею сребролю́бия объя́таго мя́ утиши́, во огни́ неопали́мыя купины́ прообразова́нная Влады́чице.

Припев: Пресвята́я Богоро́дице, спаси́ на́с.

Во упова́нии тле́нных и вре́менных веще́й не оста́ви мя́ и пла́мень хище́ния непра́веднаго угаси́ во мне́ пла́менем огня́ Боже́ственнаго, Неопали́мая Купино́ я́вльшаяся, Богоневе́стная Влады́чице.

Сла́ва Отцу́ и Сы́ну и Свято́му Ду́ху:

Идолослуже́ние в лихоима́нии и заблужде́ние от и́стиннаго благоче́стия и правосла́вныя ве́ры потреби́ от мене́, Влады́чице, и не попусти́ мя па́сти паде́нием ерети́ческим, да восхваля́ю и́мя Твое́ благослове́нное до кончи́ны живота́ моего́ в правосла́вии непоро́чно, еди́на Присноде́во.

И ны́не и при́сно и во ве́ки веко́в. Ами́нь.

Ум мо́й, молю́ Тя, Богоро́дице, благоустро́й к позна́нию ве́чных и́стин Христо́ва Ева́нгелия, к разсмотре́нию тле́нности вре́менных бла́г напра́ви мо́й по́мысл и щедролю́бие да́руй ми́ неоску́дное, да благода́тию Христо́вою укра́шен, пою́ Тя, еди́на Присноде́во.

Пе́снь 5.

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Пресвята́я Богоро́дице, спаси́ на́с.

Огнь нечистоты́ и вся́кия скве́рны во мне́, безсту́дном, мо́рем бла́гости Твоея́ потопи́, и мглу́ грехо́вную разжени́, и се́рдце мое́ ра́дости испо́лни, Всенепоро́чная.

Припев: Пресвята́я Богоро́дице, спаси́ на́с.

Срамосло́вию безобра́зному не да́ждь во мне́ ме́ста, Влады́чице, селе́ние собла́знов замени́ в души́ мое́й зре́нием со́бственных грехо́в, хра́м мя́ чистоты́ и целому́дрия соде́лай, да нескве́рными усты́ велича́ю Тя́ вы́ну, Всенепоро́чная.

Сла́ва Отцу́ и Сы́ну и Свято́му Ду́ху:

Сме́рть, су́д и муче́ния ве́чная, гре́шником угото́ванная, в па́мяти мое́й углуби́, Влады́чице, да поне́ после́дняя сия́ в па́мяти содержа́, лю́тая беззако́ния оста́влю и плоды́ покая́ния и́стиннаго принесу́, велича́я Тя́ при́сно, еди́но души́ моея́ упова́ние.

И ны́не и при́сно и во ве́ки веко́в. Ами́нь.

Любо́вь сея́ жи́зни изли́шнюю и плотска́го поко́я раче́ние отложи́ от мене́, молю́ Тя, Де́во Чи́стая, да су́етных попече́ний избе́г, Тобо́ю получу́ нетле́нное на небеси́ бога́тство, еди́на души́ моея́ Покрови́тельнице.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Пресвята́я Богоро́дице, спаси́ на́с.

Ра́дости су́етныя, к преогорче́нию бли́жняго приводя́щия, чу́жда мя́ соде́лай, Купино́ Неопали́мая ве́рными имену́емая, Пречу́дная Цари́це, о несча́стиях и́скренняго без печа́ли бы́ти не допуща́й мене́, Человеколюби́вая Влады́чице, и памятозло́бия изба́ви мя́, приле́жно молю́ Тя, Всенепоро́чная Де́во.

Припев: Пресвята́я Богоро́дице, спаси́ на́с.

За́висти в по́мысле мое́м не да́ждь вкореня́тися, виде́нием несгара́емыя купины́ прообразова́нная Моисе́ю и ро́ждшаяся от ко́рене свя́та, Де́во, и братоненавиде́ния изба́ви мя́, Чи́стая, да не зло́бою мра́чною оскверне́н бы́в, лишу́ся Бо́жия благода́ти и жи́зни ве́чныя, Всенепоро́чная Влады́чице.

Сла́ва Отцу́ и Сы́ну и Свято́му Ду́ху:

Терпе́ние в беда́х утверди́ во мне́, Всечи́стая, с ра́дующимися духо́вную ра́дость, к се́тующим сожале́ние да́руй ми́, Пресвята́я, и братолю́бие низпосли́ мне́ свы́ше, Любве́ Пучи́ну ро́ждшая Де́во и любо́вь ве́лию при́сно явля́ющая ро́ду христиа́нскому.

И ны́не и при́сно и во ве́ки веко́в. Ами́нь.

Жела́ние кра́йнее согре́й во мне́ вся́кому бли́жнему от души́ благотвори́ти, Блага́я, да не ка́ко зло́б лю́тых душа́ моя́ испо́лнится, и живо́т мо́й а́ду прибли́жится, и пре́дан бу́ду без ми́лости, я́ко несотвори́вый ми́лости, во тму́ кроме́шнюю, Всенепоро́чная Богоневе́сто.

Конда́к, гла́с 8:

Предочи́стим чу́вствия ду́ш и теле́с на́ших, да ви́дим та́инство Боже́ственное, обра́зно явле́нное дре́вле вели́кому во проро́цех Моисе́ю купино́ю, горе́вшею огне́м и не сгара́вшею, в не́йже Твоего́ безсе́меннаго Рождества́, Богоро́дице, предвозвеще́ние испове́дуем и, благогове́йно покланя́ющеся Тебе́ и ро́ждшемуся от Тебе́ Спа́су на́шему, со стра́хом вопие́м: ра́дуйся, Влады́чице, покро́ве, и прибе́жище, и спасе́ние ду́ш на́ших.

Икос:

Прови́дя ди́вный Моисе́й в неопали́мей купине́ на Сина́и та́йну, от ве́ка утае́нную, Безле́тнаго, в ле́те роди́тися восхоте́вшаго, рожде́ние от Чи́стыя и Неискусобра́чныя Де́вы, у́жасом содержи́мь, вопия́ше: сия́ земля́ вои́стину свята́ е́сть, я́ко Пло́д спаси́тельный ми́ру из Нея́ произы́дет, Имже го́ресть паде́ния Ада́мова услади́тся. Сего́ послу́шая, и мы́, та́инства Бо́жия сбытие́ позна́вшии, ублажа́ем Тя́, Богоро́дице, возвели́чившую па́дшее челове́чество и милосе́рдием неизрече́нным призрева́ющую на ро́д христиа́нский, те́мже и зове́м Ти́: ра́дуйся, Влады́чице, покро́ве, и прибе́жище, и спасе́ние ду́ш на́ших.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Весе́лие мирско́е пресецы́ и душетле́нное пристра́стие умертви́ во мне́, Де́во, презре́ние вре́менных, жела́ние ве́чных бла́г и нетле́нную ра́дость пода́ждь ми́ с пою́щими: отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Безчи́нное утеше́ние и изли́шество, у́м вредя́щее, душе́ скве́рну ражда́ющее, отлучи́ от мене́, Де́во, и сподо́би во здра́вии душе́внем и теле́снем духо́внаго утеше́ния наслажда́тися с пою́щими: отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Грехо́м, сме́рть лю́тую ражда́ющим, оскверни́х ду́шу мою́, но Ты́, Пречи́стая Влады́чице, огнезра́чная и неопали́мая Купина́ я́вльшися, ти́ну страсте́й мои́х изсуши́ огне́м Бо́жия благода́ти и наста́ви мя́ на богоуго́дное житие́, украси́ же воздержа́нием и целому́дрием и да́ждь ми́ чи́стым се́рдцем пе́ти: отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

К Твое́й огнезра́чной ико́не взира́я, молю́ Тя, Влады́чице, омраче́ннаго мя́ самолю́бием, све́том зра́ка Твоего́ просвети́ и, по́хоти плотски́я укроти́вши во мне́, огне́м Бо́жия любве́ хла́дное се́рдце мое́ воспламени́, да Ро́ждшемуся от Тебе́ досто́йно возмогу́ пе́ти: отце́в Бо́же, благослове́н еси́.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Пресвята́я Богоро́дице, спаси́ на́с.

Возмуще́ние души́ моея́ утоли́, Всенепоро́чная, от клеветы́ наве́тующих изба́ви мя́, вражду́ грехо́вную во мне́ укроти́ и не́нависть мра́чную отврати́ от мене́, Де́во, да прославля́ю Тя́, Чи́стая, во ве́ки.

Припев: Пресвята́я Богоро́дице, спаси́ на́с.

Огнь я́рости, во мне́ зело́ разжже́нный, росо́ю благода́тныя моли́твы Твоея́ угаси́, хулу́, умножа́ющую души́ мое́й озлобле́ние, и вся́кий ви́д зло́бы, гнездя́щийся в се́рдце мое́м, искорени́, Де́во, да Тя́ прославля́ю, Чи́стая, во ве́ки.

Сла́ва Отцу́ и Сы́ну и Свято́му Ду́ху:

Образ Христо́в ева́нгельскими доброде́тельми напиши́ в души́ мое́й, Богоблагода́тная, укрепи́ и утверди́ мя во вся́ком де́ле благо́м, от вся́кия же зло́бы отврати́ се́рдце мое́, да ми́рными усты́ прославля́ю Тя́, Чи́стая, во ве́ки.

И ны́не и при́сно и во ве́ки веко́в. Ами́нь.

Кро́тким о́ком Твои́м ви́ждь мое́ смире́ние, Пренепоро́чная Богоневе́сто, и приклони́ у́хо Твое́ к моли́тве се́рдца моего́, кро́тостию и незло́бием благоукраси́ мя, помраче́ннаго безобра́зием зло́бных страсте́й, и сотвори́ прича́стника блаже́нства, кро́тким обетова́ннаго, да ра́дуяся прославля́ю Тя́, Чи́стая, во ве́ки.

Песнь 9.

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Пресвята́я Богоро́дице, спаси́ на́с.

Ско́рби се́рдца моего́ утиши́, Ра́досте скорбя́щих, уны́ние душегуби́тельное отыми́ от мене́, Утоли́тельнице печа́ли, и ле́ность ко взыска́нию доброде́телей искорени́ во мне́, Взыска́ние поги́бших, да Тебе́, Де́во Чи́стая, непреста́нно велича́ю.

Припев: Пресвята́я Богоро́дице, спаси́ на́с.

Малоду́шием боле́знующаго мя́ оживи́, Цели́тельнице боля́щих, отча́янием па́дшаго мя́ возста́ви, Одиги́трие заблу́ждших, греха́ми умерщвле́ннаго мя́ воскреси́, Спору́чнице гре́шных, да Тебе́, Де́во Непоро́чная, непреста́нно велича́ю.

Сла́ва Отцу́ и Сы́ну и Свято́му Ду́ху:

Усе́рдие во мне́ твори́ти во́лю Бо́жию возбуди́ и ре́вность ко сла́ве Бо́жией воспламени́ в се́рдце мое́м, Купино́ огнезра́чная и неопали́мая, и благогове́йна служи́теля Христо́ва соде́лай мя́, Де́во, Предводи́тельнице моего́ спасе́ния.

И ны́не и при́сно и во ве́ки веко́в. Ами́нь.

Слеза́ми покая́ния и умиле́ния изсо́хшую в зно́и страсте́й ду́шу мою́ умягчи́, я́ко руно́ ороше́нное Гедео́на, и сокруше́ние к исправле́нию да́ждь ми́, Де́во, да ве́чная бла́га унасле́дую и с ли́ки избра́нных Бо́жиих воспою́ Тя, Хода́таицу моего́ спасе́ния.

Свети́лен:

Ико́ну Твою́ всечестну́ю в зало́г благоволе́ния Твоего́ ве́рным дарова́ла еси́, Влады́чице, покрыва́я и сохраня́я е́ю от о́гненнаго запале́ния на Тя́ упова́ющия. О, Ма́ти Царя́ Христа́ Бо́га! Бу́ди и на́м, гре́шным, прибе́жище спасе́ния в неча́янных беда́х и хода́таица ве́чныя жи́зни.

Стихи́ры, гла́с 6:

О, вели́кия бла́гости и неисче́тнаго милосе́рдия Твоего́, Влады́чице! Удивля́еши на́с пресла́вными чудесы́, и́хже источа́ет ико́на Твоя́ свята́я, во о́бразе неопали́мыя купины́ Тя́ изобразу́ющая и о́гненнаго естества́ си́лу укроща́ющая си́лою Твое́ю боже́ственною. Юже с весе́лием прие́млюще, Тя́, Чи́стую Богоотрокови́цу, достодо́лжно пе́сньми почита́ем и ублажа́ем.

О, благосе́рдаго Твоего́ о на́с промышле́ния, Влады́чице! В годи́ну бе́д и обстоя́ний, егда́ внеза́пное запале́ние о́гненное обы́мет жили́ща на́ша, чу́дную ико́ну Твою́ посыла́еши на́м в по́мощь и защи́ту и е́ю укроща́еши свире́пство огня́, я́ко Ма́ти стихи́ями облада́ющаго Влады́ки Христа́. Те́мже велегла́сно пропове́дуем Твоя́ чудеса́ и ми́лость мно́гу к ро́ду христиа́нскому, и пе́сньми хвале́бными немо́лчно Тя́ велича́ем и ублажа́ем.

О, пресла́внаго чудесе́! Ка́ко огнезра́чная ико́на Твоя́, Влады́чице, огня́ си́лу угаша́ет и све́тлыми луча́ми Бо́жия благода́ти умы́ просвеща́ет и сердца́ весели́т? Вои́стинну бо торжество́ благоче́стия явле́ние ико́ны Твоея́ познава́я, пра́зднуем сие́ в пе́снех духо́вных ра́достно, и Тя́, Богоблагода́тная Де́во, Вино́вницу ра́дости на́шея, славословле́ния гла́сы восхваля́ем и ублажа́ем.

Сла́ва, и ны́не, гла́с то́йже:

О, чу́до чуде́с, Богоневе́стная Ма́ти и Де́во! Чудотвори́ти не престае́ши и ны́не ико́ною Твое́ю пречестно́ю, отра́ду и утеше́ние е́ю да́руя стра́нником земны́м в юдо́ли ско́рби и пла́ча. Из Тебе́ бо воплоти́ся Обнови́тель па́дшаго естества́ челове́ча, сы́й Бо́г на́ш, дарова́вый на́м Тебе́ в по́кров и защи́ту, Иже слы́шит моли́тву Твою́, за на́с приноси́мую, и преклоня́ется к моле́нию Твоему́ Ма́тернему, егда́ умоля́еши бла́гость Его́ за лю́ди согреши́вшия. Те́мже не преста́й, благосе́рдая Влады́чице, предста́тельствовати за вся́ ны́, чту́щия Тя́, я́ко вои́стинну еси́ хода́таица непосты́дная на́шего спасе́ния.

Молитва Пресвятой Богородице пред иконой Ея «Неопалимая Купина»

О, Пресвята́я и Преблагослове́нная Ма́ти Сладча́йшаго Го́спода на́шего Иису́са Христа́! Припа́даем и поклоня́емся Тебе́ пред свято́ю и пречестно́ю ико́ною Твое́ю, е́юже ди́вны и пресла́вны чудеса́ содева́еши, от о́гненнаго запале́ния и молниено́снаго гро́ма жили́ща на́ша спаса́вши, неду́жныя исцеля́еши и вся́кое благо́е проше́ние на́ше во бла́го исполня́еши. Смире́нно мо́лим Тя, всеси́льная ро́да на́шего Засту́пнице, сподо́би ны немощны́я и гре́шныя Твоего́ Ма́терняго уча́стия и благопопече́ния. Спаси́ и сохрани́, Влады́чице, под кро́вом ми́лости Твоея́ Це́рковь Святу́ю, оби́тель сию́, всю страну́ на́шу правосла́вную, и вся ны припа́дающия к Тебе́ с ве́рою и любо́вию, и умиле́нно прося́щия со слеза́ми Твоего́ заступле́ния. Ей, Госпоже́ Всеми́лостивая, умилосе́рдися на нас, обурева́емых греха́ми мно́гими и не иму́щих дерзнове́ния ко Христу́ Го́споду, проси́ти Его о поми́ловании и проще́нии, но Тебе́ предлага́ем к Нему́ на умоле́ние Ма́терь Его́ по пло́ти: Ты же, Всеблага́я, простри́ к Нему́ Богоприи́мнии ру́це Твои́ и предста́тельствуй за нас пред Бла́гостию Его́, прося́ще нам проще́ния прегреше́ний на́ших, благоче́стнаго ми́рнаго жития́, благи́я христиа́нския кончи́ны, и до́браго отве́та на стра́шнем Суде́ Его́. В час же гро́знаго посеще́ния Бо́жия, егда́ огне́м возгоря́тся до́мы на́ша, или молниено́сным гро́мом устраша́еми бу́дем, яви́ нам ми́лостивное Твое́ заступле́ние и держа́вное вспоможе́ние: да спаса́еми всеси́льными Твои́ми ко Го́споду моли́твами вре́меннаго наказа́ния Бо́жия зде избе́гнем и ве́чное блаже́нство ра́йское та́мо унасле́дуем: и со все́ми святы́ми воспое́м Пречестно́е и Великоле́пное и́мя поклоня́емыя Тро́ицы, Отца́ и Сы́на и Свята́го Ду́ха, и Твое́ ве́лие к нам милосе́рдие, во ве́ки веко́в. Ами́нь.