Канон первый Пресвятой Богородице перед иконой «Нечаянная радость»

Тропарь Пресвятой Богородице пред иконой Ея «Нечаянная Радость», глас 4

Днесь, ве́рнии лю́дие, духо́вно торжеству́ем,/ прославля́юще Засту́пницу усе́рдную ро́да христиа́нскаго,/ и притека́юще к пречи́стому Ея́ о́бразу, взыва́ем си́це:/ о, Преми́лостивая Влады́чице Богоро́дице,/ пода́ждь нам неча́янную ра́дость,/ обремене́нным грехи́ и скорбьми́ мно́гими,/ и изба́ви нас от вся́каго зла,// моля́щи Сы́на Твоего́, Христа́ Бо́га на́шего,/ спасти́ ду́ши на́ша.

Канон, глас 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Отве́рзшая две́ри милосе́рдия Бо́жия арха́нгельское приве́тствие Тебе́ приноси́вшему, не затвори́ и от на́с утро́бы человеколю́бия Твоего́, Тя́ воспева́ющих.

Припев: Пресвята́я Богоро́дице, спаси́ на́с.

Чу́дно бы́сть житие́ Твое́ на земли́, Пресла́вная Ма́ти Де́во, но Небе́сное Твое́ жи́тельство чу́днейше е́сть: непреста́нно бо явля́еши чудеса́ ма́терняго Твоего́ милосе́рдия Тя́ воспева́ющим.

Сла́ва Отцу́ и Сы́ну и Свято́му Ду́ху:

Сы́на, от Отца́ безле́тно ражда́ющагося в после́дняя ле́та, зачала́ еси́ осене́нием Ду́ха Свята́го, ве́чную ра́дость ми́ру роди́вши.

И ны́не и при́сно и во ве́ки веко́в. Ами́нь.

Ра́дуйся, мо́ре, потопи́вшее фарао́на мы́сленнаго — диа́вола. Ра́дуйся, ка́меню, напои́вший жа́ждущих жи́зни духо́вныя, дарова́ла бо еси́ ро́ду челове́ческому Изба́вителя плене́нных и Наста́вника заблу́ждших.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Припев: Пресвята́я Богоро́дице, спаси́ на́с.

Тя́ усе́рдно песносло́вящих утверди́ в житии́ доброде́тельнем и Ро́ждшагося от Тебе́ усе́рдно моли́, да не лише́ни бу́дем венце́в сла́вы гре́х ра́ди на́ших.

Припев: Пресвята́я Богоро́дице, спаси́ на́с.

Па́че вся́каго беззако́нна челове́ка в житии́ свое́м Сы́на Твоего́ грехи́ прогневля́ем, но, о Ма́ти милосе́рдая, бу́ди о на́с Хода́таица.

Сла́ва Отцу́ и Сы́ну и Свято́му Ду́ху:

Да сподо́бит на́с венце́в сла́вы в Боже́ственней Свое́й сла́ве седя́й со Отце́м и Святы́м Ду́хом Иису́с Человеколю́бец, рожде́йся от Тебе́ и вла́сть име́яй челове́ком оставля́ти грехи́.

И ны́не и при́сно и во ве́ки веко́в. Ами́нь.

Ра́дуйся, Де́во, невмести́маго Бо́га во чре́ве вмести́вшая, и Того́ я́ко Младе́нца носи́вшая, и сосцы́ Твои́ми пита́вшая.

Седа́лен, гла́с 5:

Те́плая Предста́тельнице и непобеди́мая, упова́ние изве́стное и непосты́дное, стено́, и покро́ве, и приста́нище прибега́ющим к Тебе́, Присноде́во Чи́стая, Сы́на Твоего́ и Бо́га моли́ со А́нгелы умире́ние да́ти ми́ру, и спасе́ние, и ве́лию ми́лость.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Спа́са всему́ ми́ру ро́ждшая, и Сама́ спаса́еши, Ма́ти, от бе́д и печа́лей жите́йских Богоро́дицу Тя́ испове́дающих.

Припев: Пресвята́я Богоро́дице, спаси́ на́с.

Исцели́ вся́ лю́тыя и неудо́бь исце́льныя боле́зни на́ша, Ма́ти Сы́на и Изба́вителя, на Кре́ст грехи́ на́ша возне́сшаго.

Сла́ва Отцу́ и Сы́ну и Свято́му Ду́ху:

Ипоста́сная Прему́дрость, Бо́г Сло́во избра́ Тя в жили́ще Свое́, Сего́ усе́рдно моли́, да спасе́т на́с и́миже ве́сть судьба́ми.

И ны́не и при́сно и во ве́ки веко́в. Ами́нь.

Ра́дуйся, Неве́сто прекра́сная, до́брая. Ра́дуйся, Голуби́це Чи́стая. Ра́дуйся, Ма́ти Емману́илева, Богоро́дице Присноде́во.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Припев: Пресвята́я Богоро́дице, спаси́ на́с.

Не́бо и земля́ удивля́ются, зря́ще милосе́рдие Твое́ к ро́ду христиа́нскому, пресла́вная Ма́ти Де́во, и к са́мым до́лу пове́рженным гре́шником нисхо́диши, Всеблага́я.

Припев: Пресвята́я Богоро́дице, спаси́ на́с.

Спаси́ от зо́л и скорбе́й рабы́ Твоя́, Богоро́дице, и ми́р Бо́жий, превы́сший вся́каго ми́ра земна́го, пода́ждь рабо́м, Тя́ воспева́ющим.

Сла́ва Отцу́ и Сы́ну и Свято́му Ду́ху:

Родила́ еси́ умиротвори́вшаго Го́рняя и до́льняя и сего́ ра́ди на зе́млю Соше́дшаго, от Отца́ же и Ду́ха Свята́го не разлучи́вшагося.

И ны́не и при́сно и во ве́ки веко́в. Ами́нь.

Ра́дуйся, Цари́це Небесе́ и земли́. Ра́дуйся, превы́сшая А́нгел и Арха́нгел. Ра́дуйся, я́ко Тобо́ю Иа́ковом предвозвеще́нный к на́м Примири́тель соше́л е́сть.

Пе́снь 6.

Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Свяще́нное торжество́ ны́не духо́вно соверша́юще, прииди́те, празднолю́бцы, воспои́м пе́сньми Богома́терь, прославля́юще Сы́на, дарова́вшаго толи́кую благода́ть Ма́тери Свое́й.

Припев: Пресвята́я Богоро́дице, спаси́ на́с.

При́зри на пе́ние рабо́в, Богороди́тельнице, враго́в ви́димых и неви́димых смиря́я вознесе́нную горды́ню и на смире́нныя излива́я высо́кия ми́лости Твоя́.

Сла́ва Отцу́ и Сы́ну и Свято́му Ду́ху:

Ты́ еси́ ко́рень, от него́же произы́де же́зл Иессе́ев, Христо́с, Челове́к от до́му Дави́дова и Бо́г, Отцу́ и Ду́ху Соприсносу́щный.

И ны́не и при́сно и во ве́ки веко́в. Ами́нь.

Ра́дуйся, Ма́ти Обра́дованная. Ра́дуйся, прекра́снейшая все́х дще́рей челове́ческих. Ра́дуйся, благоро́дная о́трасль Богоизбра́ннаго ро́да Дави́дова.

Конда́к, гла́с 6:

Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице. Ты́ на́м помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.

И́кос:

Не вве́ри мя́ челове́ческому предста́тельству, Пресвята́я Влады́чице, но приими́ моле́ние раба́ Твоего́: ско́рбь бо обдержи́т мя́, терпе́ти не могу́ де́монскаго стреля́ния, покро́ва не и́мам, ниже́ где́ прибе́гну, окая́нный, всегда́ побежда́емь, и утеше́ния не и́мам, ра́зве Тебе́, Влады́чице ми́ра. Упова́ние и предста́тельство ве́рных, не пре́зри моле́ние мое́, поле́зно сотвори́.

Пе́снь 7.

Ирмос: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Пресвята́я Богоро́дице, спаси́ на́с.

Презре́ла еси́ вся́ кра́сная ми́ра, Чи́стая, Еди́ному Бо́гу возжела́вши послужи́ти, Ему́же воспева́ла еси́: отце́в Бо́же, благослове́н еси́.

Припев: Пресвята́я Богоро́дице, спаси́ на́с.

На́с, всесоверше́нно благочести́вым отроко́м не после́дующих, но прилепля́ющихся тва́ри па́че, не́же Творцу́, наста́ви, Влады́чице, еди́ному Бо́гу служи́ти и воспева́ти: отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Дании́л у́мныма очи́ма предузре́ Тя, Христе́, в ка́мени нерукосе́чнем, разруши́вшем су́етная ца́рства челове́ческая, во спасе́ние пою́щих Тебе́ со Отце́м и Ду́хом: отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Ра́дуйся, Горо́, благода́тию Бо́жиею приосене́нная, от нея́же отсече́ся ка́мень, Бо́гом Отце́м положе́нный во главу́ у́гла Це́ркве Своея́, Христо́с, Ему́же пое́м: отце́в Бо́же, благослове́н еси́.

Пе́снь 8.

Ирмос: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Богоро́дице, спаси́ на́с.

Слы́ши, Отрокови́це Де́во Чи́стая, глаго́л, Гаврии́лом Тебе́ веща́нный: роди́ши Сы́на, спаса́ющаго воспева́ющих: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Богоро́дице, спаси́ на́с.

Пло́тию от Тебе́ происше́дый спа́сл е́сть от огня́ отроко́в, ве́рою зре́вших Его́. Того́ моли́ и на́с спасти́, пла́менем страсте́й жего́мых, Сы́ну же Твоему́ воспева́ющих: Го́спода по́йте, дела́, и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

В пещи́ Вавило́нстей ви́ден бы́л еси́, Христе́, я́ко А́нгел светоно́сный, зра́ком же Сы́ну Бо́жию подо́бный. Тебе́ со Отце́м и Ду́хом пое́м: Го́спода по́йте дела́ и превозноси́те Его́ во вся́ ве́ки.

И ны́не и при́сно и во ве́ки веко́в. Ами́нь.

Ра́дуйся, купино́, Моисе́ем ви́денная, в после́дняя же ле́та от ко́рене Дави́дова происше́дшая и Спа́са все́х неизрече́нно ро́ждшая, Ему́же пое́м: Го́спода по́йте, дела́, и превозноси́те Его́ во вся́ ве́ки.

Песнь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Пресвята́я Богоро́дице, спаси́ на́с.

Бо́г, от Тебе́ воплоти́выйся и к на́м прише́дый, соде́ла чре́во Твое́ Небе́с простра́ннейше. Ди́вное чу́до: Невмести́мый во утро́бу Де́вы вмеща́ется, да Сию́ пое́м во вся́ ве́ки.

Припев: Пресвята́я Богоро́дице, спаси́ на́с.

Неизрече́нно в после́дняя ле́та от Тебе́ Заче́ншагося моли́, Богоро́дице Де́во, вся́ на́ша печа́ли на ра́дость преложи́ти и све́та невече́рняго на́с сподо́бити, да Сию́ пое́м во вся́ ве́ки.

Сла́ва Отцу́ и Сы́ну и Свято́му Ду́ху:

Ты́ еси́ Престо́л сла́вы Бо́жия, Иезеки́илем та́йно узре́нный, я́ко Сы́на Бо́жия, Отцу́ и Ду́ху Сопресто́льна, во Твою́ Пречи́стую утро́бу восприя́ла еси́ и Твои́ма ма́тернима рука́ма носи́ла еси́.

И ны́не и при́сно и во ве́ки веко́в. Ами́нь.

Ра́дуйся, хра́ме одушевле́нный, в не́мже Бо́г пло́тию обита́. Ра́дуйся, киво́те, сла́вою Сы́на Бо́жия приосене́нный. Ра́дуйся, Всеблаже́нная, Богоро́дице Чи́стая, Присноде́во.

Свети́лен.

Посети́л ны́ е́сть Восто́к с высоты́ и дарова́ на́м, я́ко пресве́тлую зарю́, Тебе́, Богоро́дице, в ско́рбных обстоя́ниих неча́янную ра́дость на́м подаю́щую, гре́шных Хода́таицу.

Молитва Пресвятой Богородице пред иконой Ея «Нечаянная Радость»

О, Пресвята́я Де́во, Всеблага́го Сы́на Ма́ти Всеблага́я, гра́да и свята́го хра́ма сего́ Покрови́тельнице, всех су́щих во гресе́х, ско́рбех, беда́х и боле́знех ве́рная Предста́тельнице и Засту́пнице! Приими́ моле́бное пе́ние сие́ от нас, недосто́йных раб Твои́х, Тебе́ возноси́мое, и я́коже дре́вле гре́шника, на всяк день мно́гажды пред честно́ю ико́ною Твое́ю моли́вшагося, не презре́ла еси́, но дарова́ла еси́ ему́ неча́янную ра́дость покая́ния и преклони́ла еси́ Сы́на Твоего́ мно́гим и усе́рдным к Нему́ хода́тайством к проще́нию сего́ гре́шнаго и заблу́дшагося, та́ко и ны́не не пре́зри моле́ния нас, недосто́йных рабо́в Твои́х, и умоли́ Сы́на Твоего́ и Бо́га на́шего, да и всем нам, с ве́рою и умиле́нием поклоня́ющимся пред цельбоно́сным о́бразом Твои́м, да́рует неча́янную по коего́ждо потре́бе ра́дость: гре́шником, погря́зшим во глубине́ зол и страсте́й, — вседе́йственное вразумле́ние, покая́ние и спасе́ние; су́щим в ско́рбех и печа́лех — утеше́ние; обрета́ющимся в беда́х и озло́блениих — соверше́нное сих избы́тие; малоду́шным и ненаде́жным — наде́жду и терпе́ние; в ра́дости и изоби́лии живу́щим — непреста́нное Благоде́телю Бо́гу благодаре́ние; бе́дствующим — милосе́рдие; су́щим в боле́зни и долгонеду́жии и оста́вленным врача́ми — неча́емое исцеле́ние и укрепле́ние; ижди́вшим от неду́га ум — ума́ возвраще́ние и обновле́ние; отходя́щим в ве́чную и несконча́емую жизнь — па́мять сме́ртную, умиле́ние и сокруше́ние о гресе́х, дух бодр и тве́рдую на милосе́рдие Судии́ наде́жду.

О, Госпоже́ Пресвята́я! Умилосе́рдися о всех чту́щих всечестно́е и́мя Твое́ и всем яви́ всемо́щный покро́в Твой и заступле́ние: во благоче́стии, чистоте́ и честне́м жи́тельстве пребыва́ющия до сконча́ния их во бла́гости соблюди́; злы́я бла́ги сотвори́; заблу́ждшия на путь пра́вый наста́ви; вся́кому де́лу благо́му и Сы́ну Твоему́ уго́дному споспешеству́й; вся́кое де́ло зло́е и богопроти́вное разруши́; в недоуме́нии и тру́дных и опа́сных обстоя́ниих обрета́ющимся незри́мую по́мощь и вразумле́ние с Небесе́ ниспосли́, от искуше́ний, собла́знов и поги́бели спаси́, от всех злых челове́к и от враго́в ви́димых и неви́димых защити́ и сохрани́; пла́вающим спла́вай, путеше́ствующим спутеше́ствуй; су́щим в ну́жде и гла́де бу́ди Пита́тельница; неиму́щим кро́ва и приста́нища бу́ди покро́в и прибе́жище; наги́м пода́ждь одея́ние, оби́димым и непра́ведно гони́мым — заступле́ние; клевету́, поноше́ние и хуле́ние терпя́щия незри́мо оправда́й; клеветники́ и хули́тели пред все́ми обличи́; ожесточе́нно вражду́ющим неча́емое пода́ждь примире́ние и всем нам — друг ко дру́гу любо́вь, мир, и благоче́стие, и здра́вие с долгоде́нствием. Супру́жества в любви́ и единомы́слии сохрани́; супру́ги, во вражде́ и разделе́нии су́щия, умири́, соедини́ я́ друг ко дру́гу и положи́ им сою́з любве́ неразруши́мый; ма́терем детородя́щим ско́рое пода́ждь разреше́ние, младе́нцы воспита́й, ю́ныя уцелому́дри, отве́рзи им ум к восприя́тию вся́каго поле́знаго уче́ния, стра́ху Бо́жию, воздержа́нию и трудолю́бию наста́ви; от дома́шния бра́ни и вражды́ единокро́вныя ми́ром и любо́вию огради́; безма́терних сиро́т бу́ди Ма́терь, от вся́каго поро́ка и скве́рны отврати́ я́ и всему́ благо́му и богоуго́дному научи́, прельще́нныя же и во грех и нечистоту́ впа́дшия, скве́рну греха́ отъя́вши, из бе́здны поги́бели изведи́; вдов бу́ди Уте́шительница и Помо́щница, ста́рости бу́ди жезл; от внеза́пныя сме́рти без покая́ния всех нас изба́ви и всем нам христиа́нскую кончи́ну живота́ на́шего, безболе́зненну, непосты́дну, ми́рну и до́брый отве́т на Стра́шнем Суди́щи Христо́ве да́руй: преста́вльшияся в ве́ре и покая́нии от жития́ сего́ со А́нгелы и все́ми святы́ми жи́ти сотвори́; сконча́вшимся внеза́пною сме́ртию ми́лостива бы́ти Сы́на Твоего́ умоли́ и о всех усо́пших, и́же не и́мут сро́дников, о упокое́нии их Сы́на Твоего́ умоля́ющих, Сама́ бу́ди непреста́нная и те́плая Моли́твенница и Хода́таица: да вси на Небеси́ и на земли́ ве́дят Тя, я́ко тве́рдую и непосты́дную Предста́тельницу ро́да христиа́нскаго, и, ве́дуще, сла́вят Тя и Тобо́ю Сы́на Твоего́, с Безнача́льным Его́ Отце́м и Единосу́щным Его́ Ду́хом, ны́не, и при́сно, и во ве́ки веко́в. Ами́нь.