Канон иной Пресвятой Богородице пред иконой «Млекопитательница»

Тропарь Пресвятой Богородице пред иконой Ея «Млекопитательница» глас 3

Без се́мене от Боже́ственнаго Ду́ха,/ во́лею же О́тчею зачала́ еси́ Сы́на Бо́жия,/ от Отца́ без ма́тере пре́жде век су́ща,/ нас же ра́ди из Тебе́ без отца́ бы́вша,/ пло́тию родила́ еси́/ и Младе́нца млеко́м пита́ла еси́,/ те́мже не преста́й моли́ти // изба́витися от бед душа́м на́шим.

Канон Пресвятей Богородице ради Ея иконы, нарицаемыя «Млекопитательница», глас 8.

Песнь 1

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Пресвята́я Богоро́дице, спаси́ на́с.

Чи́стая – Отроча́ ражда́еши, Де́ва – мле́ком дои́ши! Ка́ко в сию́ двою́ де́вствуеши, ро́ждши? Бо́г е́сть соде́явый, не взыску́й от Ме́не, е́же ка́ко.

Припев: Пресвята́я Богоро́дице, спаси́ на́с.

Недоуме́нием покрыва́ется рождество́ Твое́, стра́нно бо, Де́во, дои́ши Пита́теля, и мле́ком пита́еши Невеще́ственнаго, и на руку́ держи́ши Зижди́теля.

Сла́ва Отцу́ и Сы́ну и Свято́му Ду́ху:

Нося́щи Емману́ила на руку́ Твое́ю, Чи́стая, я́коже Младе́нца, Богора́дованная, вопия́ла еси́: Ча́до Мое́ сладча́йшее, ка́ко пода́м Тебе́ сосе́ц, пита́ющему вся́ческая? Ка́ко повию́ Тебе́ пелена́ми, мгло́ю повива́ющаго мо́ре?

И ны́не и при́сно и во ве́ки веко́в. Ами́нь.

Безо́тча родила́ еси́, безма́терня пре́жде Тебе́, и я́ко Младе́нца дои́ла еси́ пита́ющаго вся́, Его́же моли́ спасти́ся ве́рно пою́щим Тя́ госпо́дьственно, Богоро́дицу Чи́стую.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Припев: Пресвята́я Богоро́дице, спаси́ на́с.

Я́ко Де́ву и Еди́ну в жена́х Тя́, без се́мене ро́ждшую Бо́га, пло́тию, вси́ ублажа́ем, ро́ди челове́честии, О́гнь бо всели́ся в Тя́ Божества́ и я́ко Младе́нца до́иши Зижди́теля и Го́спода.

Припев: Пресвята́я Богоро́дице, спаси́ на́с.

Украси́вшися, Чи́стая, наи́тием Пресвята́го Ду́ха, Бо́га сосца́ми дои́ши и Сего́ держи́ши объя́тии, всю́ тва́рь дла́нию содержа́щаго.

Сла́ва Отцу́ и Сы́ну и Свято́му Ду́ху:

Некра́домое бога́тство де́вства Твоего́, Ма́ти пло́тию яви́лася еси́ Вседержи́теля, Неве́сто Неискусому́жная, Де́во Богоро́дице, воспита́вши я́ко Младе́нца, пита́ющаго я́ко Зижди́теля ве́сь ми́р и освяща́юща.

И ны́не и при́сно и во ве́ки веко́в. Ами́нь.

Отыми́ поноше́ние челове́ческое и клеветы́ наве́тник от мене́, Богоро́дице, молю́ Тя́, да усе́рдно сла́влю Го́спода, Его́же пита́ла еси́.

Седа́лен Богоро́дицы, гла́с 8:

Вели́чия Твоя́ кто́ испове́сть, Богоро́дице? Явле́нием бо чудотво́рныя ико́ны Твоея́ возвесели́ла еси́ ду́ши пра́ведных, мно́гия неду́ги е́ю врачу́я и от вся́ких бе́д избавля́я, и́же по Бо́зе упова́ние на Тя́ возлага́ют. О, Влады́чице Всеми́лостивая, не лиши́ у́бо и на́с Твоего́ заступле́ния, спаси́ гра́д се́й, оби́тель на́шу от вся́каго зла́, да, Тобо́ю хва́лящеся, не постыди́мся во ве́ки.

Песнь 4

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Пресвята́я Богоро́дице, спаси́ на́с.

Утро́ба Твоя́ препе́тая и сосца́ блаже́нна, Де́во, те́х бо ра́ди жи́знь вси́ обрето́хом.

Припев: Пресвята́я Богоро́дице, спаси́ на́с.

В рождестве́ Твое́м зача́тие безсе́менно, во успе́нии Твое́м ме́ртвость нетле́нная, чу́до в чудеси́ сугу́бо стече́ся, Богоро́дице: ка́ко бо, Неискусому́жная, Младопита́тельница чи́ста су́щи? Ка́ко же Ма́ти Бо́гу мертвоно́сна мироуха́ющи?

Сла́ва Отцу́ и Сы́ну и Свято́му Ду́ху:

Млеко́м пита́ла еси́, Де́во, плотоно́сца Твоего́ Бо́га рожде́ннаго, я́ко да боле́знь Ада́мову, су́щую во а́де, обле́гчит, от дре́ва сне́дша зна́ния и за́поведь преслу́шавша.

И ны́не и при́сно и во ве́ки веко́в. Ами́нь.

Кто́ ви́де отроча́, его́же не все́я оте́ц, млеко́м пита́емое? Или́ где́ ви́дена бы́сть де́ва ма́ти? И́стинно па́че ума́ обоя́, Богороди́тельнице Чи́стая.

Песнь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Пресвята́я Богоро́дице, спаси́ на́с.

Из не́др Оте́ческих низше́л еси́ и несказа́нным истоща́нием ю́же по на́м нищету́ восприя́л еси́ па́че естества́, Человеколю́бче, в верте́п всели́тися благоволи́л еси́, Го́споди, и я́ко Младе́нец сосцы́ пита́ешися, Зижди́тель и Госпо́дь.

Припев: Пресвята́я Богоро́дице, спаси́ на́с.

Веко́в Зижди́тель пелена́ми повива́ется, я́ко Челове́к, и млеко́м пита́ется, И́же вся́ безме́рною кре́постию я́ко Бо́г содержа́в и манове́нием возводя́й.

Сла́ва Отцу́ и Сы́ну и Свято́му Ду́ху:

Еди́на Чи́стая пребыла́ еси́ и по Рождестве́, Еди́на то́кмо яви́лася еси́ безму́жная, млеко́м пита́ющая Сло́во О́тчее И́стинное, Ду́хом Святы́м прии́мшее ра́бий зра́к по на́м, Де́во Богоро́дице, Его́же, Боже́ственное чту́ще зра́ка подо́бие, почита́ем.

И ны́не и при́сно и во ве́ки веко́в. Ами́нь.

Я́ко но́сиши на руку́, Мари́е, и от сосцу́ пита́еши пита́ющаго вся́кое дыха́ние, Его́же, Богоро́дице, чту́ще, пропове́дуем, моли́ся Ему́, Чи́стая, о все́х на́с.

Песнь 6

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Припев: Пресвята́я Богоро́дице, спаси́ на́с.

По́лный истощава́ется на́с ра́ди, и прие́млет Безнача́льный от Тебе́ нача́ло, Де́во Пренепоро́чная, и ви́дится Неви́димый, и Пита́яй вся́ческая млеко́м пита́ется, обнови́ти челове́ка промышля́я.

Припев: Пресвята́я Богоро́дице, спаси́ на́с.

И́же, всея́ земли́ го́рстию содержа́й концы́, ка́ко ма́терними не́драми объе́млется, млеко́м же пита́ется от сосе́ц, насыща́я вся́ко живо́тно благоволе́ния, и бога́тый излия́ние обнищава́ет, воплоща́емь.

Сла́ва Отцу́ и Сы́ну и Свято́му Ду́ху:

Его́же тьмы́ а́нгельския и серафи́мская мно́жества ужаса́ются и разу́мная тва́рь трепе́щет, Того́ я́ко Младе́нца, Де́во, пита́еши, Его́же обра́зно на руку́ Твое́ю ви́дяще, всегда́ поклоня́емся.

И ны́не и при́сно и во ве́ки веко́в. Ами́нь.

Ада́мов Соде́тель от крове́й Твои́х чи́стых зи́ждется и млеко́м пита́ется, пита́яй вся́кое дыха́ние, Де́во Богоро́дице, те́мже я́ко Бо́жию Тя́ сла́вим Ма́терь.

Конда́к, гла́с 5:

Ду́ш на́ших чу́вствия очи́стивше, у́зрим на ико́не та́инство пресла́вное, Творца́ Вселе́нныя и Го́спода вы́шних си́л, во объя́тиих держи́ма и от сосцу́ Твое́ю я́ко Младе́нца пита́ема, и, со стра́хом и ра́достию покланя́ющеся Тебе́ и ро́ждшемуся от Тебе́ Спа́су на́шему, воззове́м: ра́дуйся, Влады́чице, жи́зни на́шея Пита́тельнице.

Икос:

Арха́нгельское целова́ние услы́шала еси́, Присноде́во, и в чистоте́ де́вственней Бо́га зачала́ и родила́ еси́, Его́же я́ко Младе́нца, от сосцу́ Твое́ю млеко́м пита́ла еси́. Ангели и челове́цы удиви́вши вели́чием Твои́х соверше́нств и соде́явшагося о Тебе́ Боже́ственнаго та́инства. Те́мже ублажа́ем Тя́, и́стинную Богоро́дицу, возвели́чившую па́дшее челове́чество и милосе́рдием неизрече́нным призира́ющую на ро́д христиа́нский, богоумиле́нно зове́м: ра́дуйся, Влады́чице, Пита́тельнице жи́зни на́шея.

Песнь 7

Ирмос: От Иуде́и доше́дше, о́троцы в Вавило́не иногда́ ве́рою Тро́йческою пла́мень пе́щный попра́ша, пою́ще: отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Неизглаго́ланно, Чи́стая, Изба́вителя ро́ждши, несказа́нно дои́ла еси́, Де́ва пребы́вши, Его́же у́бо моли́ о пою́щих Тя́ и славосло́вящих во вся́ ве́ки.

Припев: Пресвята́я Богоро́дице, спаси́ на́с.

Свята́я святы́х су́щи, Чи́стая, во хра́м святы́й возлюби́ла еси́ всели́тися и со А́нгелы, Де́во, бесе́дующи, пребыва́еши пресла́вне, с Небесе́ хле́б прие́млющи, Пита́тельнице жи́зни.

Сла́ва Отцу́ и Сы́ну и Свято́му Ду́ху:

Ка́ко дои́ши млеко́м Сы́на, Чи́стая, без отца́ пита́ющаго вся́кое дыха́ние, Ма́ти Пречи́стая? Ка́ко на руку́ но́сиши вся́ Содержа́щего? Па́че ума́ чу́до Твое́, те́м пое́м вели́чия Твоя́.

И ны́не и при́сно и во ве́ки веко́в. Ами́нь.

О чу́до пресла́вно! Ка́ко ражда́еши иску́са му́жеска не позна́вши? Ка́ко же пита́еши, Де́во Ма́ти, Пода́теля вои́стинну млека́ и Пита́теля всея́ тва́ри.

Песнь 8

Ирмос: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки.

Припев: Пресвята́я Богоро́дице, спаси́ на́с.

Еди́на нетле́нно рожда́еши, Еди́на дои́ши Младе́нца без бра́ка, Еди́на Созда́теля Твоего́ рожда́еши и Влады́ку, а́ще и Ма́ть, и Раба́, Тя́, Ма́ти Де́во, пое́м во ве́ки.

Припев: Пресвята́я Богоро́дице, спаси́ на́с.

Бо́га ка́ко на руку́ но́сиши, рцы́, и ка́ко дои́ши вся́ческая руко́ю Содержа́щего, о Де́во Всеблаже́нная? А́з, – рече́, – чиста́ пребыва́ю и по рождестве́, Христа́ Бо́га ро́ждши, ада́мов до́лг и прама́терний отъе́мши.

Сла́ва Отцу́ и Сы́ну и Свято́му Ду́ху:

Ложесны́ Сло́во прия́ла еси́, вся́ нося́щаго носи́ла еси́, ма́нием пита́ющаго Вселе́нную всю́, Чи́стая, Емуже пое́м: Го́спода по́йте, дела́, и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Со́лнце победи́ся Твое́ю све́тлостию, Мари́е, Ты́ бо свети́лы Не́бо украси́вшего рука́ма объя́ла еси́ и от Твое́ю сосцу́ пита́ла еси́.

Песнь 9.

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с Безпло́тными ли́ки Тя́ велича́юще.

Припев: Пресвята́я Богоро́дице, спаси́ на́с.

Дави́д, пра́отец Тво́й, воспе́ Тя́ дре́вле, Де́во Богоневе́сто, Дще́рь глаго́ля Тя́ Царя́ Христа́, Его́же и роди́вши, ма́терски Младе́нца пита́ла еси́.

Припев: Пресвята́я Богоро́дице, спаси́ на́с.

О Ча́до сладча́йшее! Ка́ко пита́ю Тя́, пита́ющаго? Ка́ко держу́ Тя́, держа́щаго вся́ ма́нием? Ка́ко же пелена́ми повию́, повива́ющаго всю́ зе́млю мгло́ю? - вопия́ше Всечи́стая Влады́чица, Ю́же непреста́нно велича́ем.

Сла́ва Отцу́ и Сы́ну и Свято́му Ду́ху:

Но́сиши вся́ Нося́щаго и млеко́м пита́еши все́м пи́щу Даю́щаго, ве́лие и стра́шное, е́же па́че ума́, Твое́ та́инство, ковче́же честна́го свяще́нства, Де́во Богоро́дице, те́мже Тя́ вси́ ублажа́ем.

И ны́не и при́сно и во ве́ки веко́в. Ами́нь.

Возвы́си ро́г благочести́вых и низложи́ ва́рваров шата́ния, Богороди́тельнице, необори́мо спаса́ющи сие́ ста́до Твое́, в не́мже вели́кое Твое́ и́мя и многосла́вное ве́рно велича́ется.

Свети́лен, гла́с 4:

Пречи́стаго о́браза Твоего́ явле́ние, Ма́ти Бо́жия, пра́зднуем све́тло, и́бо в не́м познава́ем знаме́ние Твоего́ к на́м благоволе́ния, Преблага́я, покрыва́еши и спаса́еши на Тя́ упова́ющия, Богоро́дице Всепе́тая и Неискусобра́чная.

Молитва Пресвятой Богородице пред иконой Ея «Млекопитательница»

Приими́, Госпоже́ Богороди́тельнице, сле́зная моле́ния рабо́в Твои́х, к Тебе́ притека́ющих. Зрим Тя на святе́й ико́не, на рука́х нося́щую и млеко́м пита́ющую Сы́на Твоего́ и Бо́га на́шего, Го́спода Иису́са Христа́. А́ще и безболе́зненно родила́ еси́ Его́, оба́че ма́терния ско́рби ве́си и не́мощи сыно́в и дще́рей челове́ческих зри́ши. Те́мже те́пле припа́дающе к цельбоно́сному о́бразу Твоему́ и умиле́нно сей лобыза́юще, мо́лим Тя, всеми́лостивая Влады́чице: нас, гре́шных, осужде́нных в боле́знех роди́ти и в печа́лех пита́ти ча́да на́ша, ми́лостивно пощади́ и сострада́тельно заступи́, младе́нцы же на́ша, та́кожде и роди́вшия их, от тя́жкаго неду́га и го́рькия ско́рби изба́ви. Да́руй им здра́вие и благомо́щие, да и пита́емии от си́лы в си́лу возраста́ти бу́дут, и пита́ющия их испо́лнятся ра́достию и утеше́нием, я́ко да и ны́не предста́тельством Твои́м из уст младе́нец и ссу́щих Госпо́дь соверши́т хвалу́ Свою́. О Ма́ти Сы́на Бо́жия! Умилосе́рдися на ма́тери сыно́в челове́ческих и на немощны́я лю́ди Твоя́: постига́ющия нас боле́зни ско́ро исцели́, належа́щия на нас ско́рби и печа́ли утоли́, и не пре́зри слез и воздыха́ний рабо́в Твои́х. Услы́ши нас в день ско́рби пред ико́ною Твое́ю припа́дающих, и в день ра́дости и избавле́ния приими́ благода́рная хвале́ния серде́ц на́ших. Вознеси́ мольбы́ на́ша к престо́лу Сы́на Твоего́ и Бо́га на́шего, да ми́лостив бу́дет ко грехо́м и немоще́м на́шим и проба́вит ми́лость Свою́ ве́дущим и́мя Его́, я́ко да и мы, и ча́да на́ша, просла́вим Тя, милосе́рдую Засту́пницу и ве́рную наде́жду ро́да на́шего, во ве́ки веко́в. Ами́нь

Молитва вторая Пресвятой Богородице пред иконой Ея «Млекопитательница»

О, Пресвята́я Госпоже́ Влады́чице на́ша Богоро́дице, Небе́сная на́ша Цари́це, млеко́м Христа́ Бо́га на́шего пита́вшая, и нас недосто́йных и многогре́шных Твое́ю бога́тою ми́лостию пита́еши. Спаси́ и изба́ви нас гре́шных рабо́в Твои́х от напра́сныя клеветы́, от вся́кия беды́ и напа́сти и внеза́пныя сме́рти. Поми́луй нас в дневны́х часе́х, во у́тренних и вече́рних и во вся́кое вре́мя сохрани́ нас: стоя́щих, сидя́щих соблюди́ и на вся́ких путе́х ходя́щих и в ночны́х часе́х спя́щих покры́й и заступи́. Защити́ нас, Влады́чице Богоро́дице, от всех на́ших враг ви́димых и неви́димых и от вся́каго зла́го обстоя́ния. На вся́ком ме́сте и на вся́кое вре́мя бу́ди нам, Ма́ти Преблага́я, необори́мая стена́ и кре́пкое заступле́ние, всегда́, ны́не и при́сно, и во ве́ки веко́в. Ами́нь.