Шрифт

Каноны Божией Матери

Канон Пресвятой Богородице в честь чудотворной Ее иконы Калужская

Калужская

Тропа́рь, глас 4:

Засту́пнице от враг иноплеме́нных необори́мая Калу́жския земли́ / и Изба́вительнице от смертоно́сныя я́звы ми́лостивая! / Изба́ви рабы́ Твоя́ от вся́ких бед и боле́зней, / с ве́рою и любо́вию прибега́ющия к чудотво́рней ико́не Твое́й, / и спаси́ ду́ши на́ша.

Велича́ние:

Велича́ем Тя, / Богоро́дице Де́во, / и почита́ем чудотво́рную ико́ну Твою́, / е́юже благоволи́ла еси́ спасти́ зе́млю Калу́жскую / от наше́ствий вра́жиих и всегуби́тельных боле́зней.

Кано́н Пресвяте́й Богоро́дице, глас 1

Песнь 1

Ирмос: Песнь побе́дную пои́м вси Бо́гу, / сотво́ршему ди́вная чудеса́ мы́шцею высо́кою / и спа́сшему Изра́иля, я́ко просла́вися.

Припев: Пресвята́я Богоро́дице, спаси́ на́с.

Днесь возсия́ Пренепоро́чныя Де́вы торжество́; / приди́те у́бо, празднолю́бцы, / согла́сными пе́сньми и пе́нии ра́достно Сию́ воспои́м.

Припев: Пресвята́я Богоро́дице, спаси́ на́с.

Моли́твою Твое́ю, Влады́чице, / воспламени́ хла́дная сердца́ на́ша Боже́ственною любо́вию, / да Тебе́ пе́ние хвале́бное воспои́м досто́йно, Чи́стая.

Припев: Пресвята́я Богоро́дице, спаси́ на́с.

Стра́стными помышле́нии обурева́еми, Госпоже́, / ина́го приста́нища не и́мамы ко спасе́нию, / то́кмо Тебе́, да́рующую от ико́ны Твоея́ святы́я всем утеше́ние.

Припев: Пресвята́я Богоро́дице, спаси́ на́с.

Во́ды целе́бныя источа́ет нам ико́на Твоя́ всечестна́я, Богоро́дице, / и боле́зни многоразли́чныя исцеля́ет, / и по́мощь в беда́х ве́рным от Тебе́ подае́т, / да сла́вим чудеса́ Твоя́.

Сла́ва Отцу́ и Сы́ну и Свято́му Ду́ху:

По́прище земно́е прейти́ безбе́дно помози́ нам, Чи́стая, / и от лю́тых неду́гов исцеле́ние нам пода́ждь, / и покажи́ прича́стники нас бы́́ти насле́дия Небе́снаго.

И ны́не и при́сно и во ве́ки веко́в. Ами́нь.

Цари́ца еси́ всех еди́на, / Бо́гу, Богороди́тельнице Чи́стая, святы́й престо́л, / Его́же моли́ о чту́щих ико́ну Твою́ честну́ю, / пода́ти грехо́в оставле́ние.

Пе́снь 3.

Ирмос: Да утверди́тся се́рдце мое́ в во́ли Твое́й, Христе́ Бо́же, / И́же над вода́ми Не́бо утвержде́й второ́е / и основа́вый на вода́х зе́млю, Всеси́льне.

Припев: Пресвята́я Богоро́дице, спаси́ на́с.

Прими́ поклоне́ние на́ше, Влады́чице, / пред свято́ю ико́ною Твое́ю днесь приноси́мое: / ви́дим бо Тя на ико́не, зако́ну Бо́жию поуча́ющуся, / и поуча́емся ро́ждшагося от Тебе́ Го́спода разуме́ти и сла́вити.

Припев: Пресвята́я Богоро́дице, спаси́ на́с.

Жезл Ааро́нов процве́тший именова́ Тя дре́вле Моисе́й, / Цвет бо живоно́сный — Христа́ — прозябла́ еси́, / Ему́же те́пле моли́ся, Богома́ти, / страстьми́ умерщвле́нныя ду́ши на́ша просвети́ти / животворя́щею Боже́ственною благода́тию.

Припев: Пресвята́я Богоро́дице, спаси́ на́с.

Услы́шала еси́, Ми́лостивая, глас моли́твенник Твои́х, / вопию́щих Тебе́ во обстоя́нии иноплеме́нников, / и яви́ла еси́ ико́ну Твою́ на возду́се, / и мно́жество враго́в, обыше́дших зе́млю на́шу, / дале́че отгнала́ еси́.

Припев: Пресвята́я Богоро́дице, спаси́ на́с.

Всяк с ве́рою принося́й моли́тву пред пречи́стым о́бразом Твои́м, / Влады́чице, / не неуслы́шан от Тебе́ оты́дет: / дарова́ла бо тя́жко боля́щим здра́вие, / разсла́бленным кре́пость, осле́пшим зре́ние; / те́мже и нас боле́зней душе́вных и теле́сных свободи́.

Сла́ва Отцу́ и Сы́ну и Свято́му Ду́ху:

Моли́тися всегда́ усе́рдно жела́ние пода́ждь нам, Преблага́я, / вся бо мо́жеши я́ко Ма́ти воплоти́вшагося Бо́га, / Его́же ми́лостива нам сотвори́ / всеси́льным предста́тельством Твои́м.

И ны́не и при́сно и во ве́ки веко́в. Ами́нь.

Сла́вим Тя, Богоро́дице Де́во, / и, с любо́вию припа́дающе к многоцеле́бному Твоему́ о́бразу, / се́рдцем и усты́ сей целу́ем, / ви́дяще в нем зало́г благода́тный / Твоего́ к нам ма́терняго благоволе́ния.

Седа́лен:

Све́тлое днесь Засту́пницы на́шея наста́ торжество́. / Да взыгра́ется тварь, да ликовству́ют челове́честии собо́ри, / созыва́ет бо нас Свята́я Богоро́дица / зре́ти чудоно́сную ико́ну Свою́, / луча́ми ми́лости ве́рныя просвеща́ющую. / Те́мже, ра́дующеся, вопие́м: / заступи́ зе́млю на́шу / от гла́да, губи́тельных боле́зней и междоусо́бныя бра́ни, / и моли́ Сы́на Твоего́ и Бо́га / спасти́ ду́ши на́ша.

Песнь 4

Ирмос: Ду́хом прови́дя, проро́че Авваку́ме, Словесе́ воплоще́ние, / пропове́дал еси́, вопия́: / внегда́ прибли́житися лето́м, позна́ешися, / внегда́ приити́ вре́мени, пока́жешися. / Сла́ва си́ле Твое́й, Го́споди.

Припев: Пресвята́я Богоро́дице, спаси́ на́с.

Арха́нгел по́слан бысть с высоты́ Небе́с, Пречи́стая Влады́чице, / благовести́ти та́йну спасе́ния на́шего, / и зачала́ еси́ во утро́бе Твое́й предве́чнаго Бо́га, / пло́тию яви́лася еси́ Вседержи́теля, / воспита́вши я́ко Младе́нца Творца́ вселе́нныя.

Припев: Пресвята́я Богоро́дице, спаси́ на́с.

Безневе́стная Де́во, Чи́стая Голуби́це, / Бо́га Сло́ва Безнача́льнаго родила́ еси́ на земли́, / Его́же, Богоро́дице, чту́ще, пропове́дуем; / моли́ся Ему́ о всех нас.

Припев: Пресвята́я Богоро́дице, спаси́ на́с.

В мир пришла́ еси́ за гре́шники Хода́таица, / вся утеша́я и ко исправле́нию подвиза́я; / ны́не и нас спаса́й, Влады́чице, / да си́лу Твою́ вели́кую сла́вим и велича́ем, / непотре́бныя рабы́ Твоя́.

Припев: Пресвята́я Богоро́дице, спаси́ на́с.

Свята́я святы́х су́щи, Чи́стая, / во храм святы́й измла́да возжела́ла еси́ всели́тися / и со А́нгелы, Де́во, бесе́дующе, / пребыва́ла та́мо неизхо́дно, / с Небесе́ хлеб прие́млюще / и в Зако́не Бо́жии поуча́яся.

Сла́ва Отцу́ и Сы́ну и Свято́му Ду́ху:

Иа́кову яви́лася еси́ о́бразно Ле́ствица, / от земли́ к высоте́ утвержде́нная, / е́юже сни́де Влады́ка Не́ба и земли́, / да То́ю пу́ть пра́вый покая́ния пока́жет нам / и к черто́гам го́рним возведе́т нас, / те́пле моля́щихся Пречи́стей Ма́тере Его́.

И ны́не и при́сно и во ве́ки веко́в. Ами́нь.

Неискусобра́чно родила́ еси́ Го́спода, о Де́во! / И по Рождестве́ яви́лася еси́ па́ки де́вствующи; / те́мже немо́лчными гла́сы Тебе́, Влады́чице, / ве́рою несумне́нною воспева́ем, / я́ко ору́жие непобеди́мое на враги́ и спасе́ния наде́жду.

Песнь 5

Ирмос: Твой мир даждь нам, Сы́не Бо́жий, / ино́го бо, ра́зве Тебе́, Бо́га не зна́ем, / И́мя Твое́ имену́ем, / я́ко Бог живы́х и ме́ртвых еси́.

Припев: Пресвята́я Богоро́дице, спаси́ на́с.

Мир пода́ждь нам, Богоро́дице, / правосла́вных Похвало́ и Предста́тельнице, / све́том Сы́на Твоего́ просвети́ нас, / во мра́ке неве́дения седя́щих, / и ерети́чествующих шата́ния разори́, / и бу́ди Моли́твенница пред Сы́ном Твои́м и Бо́гом / о нас, почита́ющих чу́дный Твой о́браз.

Припев: Пресвята́я Богоро́дице, спаси́ на́с.

Из глубины́ зол мно́гих Тебе́ припа́даем, Цари́це, / и мо́лимся приле́жно, / Твою́ благода́тную по́мощь нам пода́ждь, / и упра́ви, Пречи́стая, житие́ на́ше / к ти́хому приста́нищу Твоему́.

Припев: Пресвята́я Богоро́дице, спаси́ на́с.

Ца́рство и Госпо́дство дарова́ Тебе́ Сын Твой и Бог, / ца́рствуеши бо с Ним ве́чно / и покрыва́еши лю́ди, честно́ю Его́ кро́вию искупле́нныя, / я́же сла́вят многопе́тое и́мя Твое́ / и покланя́ются чудотво́рней ико́не Твое́й.

Припев: Пресвята́я Богоро́дице, спаси́ на́с.

Свята́я Твоя́ ико́на, Богома́ти, / зало́г вои́стину благода́тный яви́ся, / на ню́же взира́юще, / сия́ние Бо́жией благода́ти в ду́ши на́ша неви́димо прие́млем / и Тя, Благоде́тельницу на́шу, непреста́нно велича́ем.

Сла́ва Отцу́ и Сы́ну и Свято́му Ду́ху:

От вели́ких и разли́чных прегреше́ний же и напа́стей / всегда́ избавля́еши нас, Ма́ти Бо́жия, / те́мже к Тебе́ прибега́ем, / непобеди́мей по́мощи скорбя́щим: / от бед изведи́ нас Твои́м заступле́нием.

И ны́не и при́сно и во ве́ки веко́в. Ами́нь.

Горды́нею одержи́мых вразуми́ла еси́, Богоро́дице, / сего́ а́дского пла́мени и нас изба́ви, Всесвята́я, / и лю́тых страсте́й свободи́, / и Сама́ спаси́ грехми́ погружа́емии при́сно.

Песнь 6

Ирмос: Проро́ка Ио́ну подража́я, вопию́: / живо́т мой, Бла́же, свободи́ из тли / и спаси́ мя, Спа́се ми́ра, зову́ща: / сла́ва Тебе́.

Припев: Пресвята́я Богоро́дице, спаси́ на́с.

Благодари́м Тя, Влады́чице, / о благодея́ниих и чудесе́х Твои́х, / я́же твори́ши чту́щим Тя, / враго́м воспяща́юще и от тех ко́зней рабы́ Твоя́ избавля́юще; / и ны́не заступа́й ны от вся́каго зла, / сохраня́я в ми́ре ду́ши на́ша.

Припев: Пресвята́я Богоро́дице, спаси́ на́с.

Держа́вная Всецари́це, / я́коже от ви́димых сопроти́вник, ды́шущих огне́м и уби́йством, / зе́млю на́шу свободи́ла иногда́, / та́ко и от неви́димых губи́телей, и́щущих кого́ поглоти́ти, свобожда́й нас.

Припев: Пресвята́я Богоро́дице, спаси́ на́с.

Безу́мных глаго́л, хуля́щих Тя, / не возгнуша́лася еси, Ми́лостивая, / но деви́цу, изрыга́ющу я, / наказа́нием к сле́зному покая́нию привела́ еси́ / и той исцеле́ние от боле́зни дарова́ла еси́, / те́мже у́бо и нас гре́шных не лиши́ Твоея́ ми́лости.

Припев: Пресвята́я Богоро́дице, спаси́ на́с.

О́бразу Твоему́ свято́му припа́дающе, / вопие́м Ти, Де́во: / сове́ты хотя́щих нам зла́я разори́ / и напра́ви живо́т наш / твори́ти во́лю Сы́на Твоего́.

Сла́ва Отцу́ и Сы́ну и Свято́му Ду́ху:

Бу́ди нам, Влады́чице, / во искуше́ниих спаси́тельное прибе́жище, / внегда́ смути́тися нам от прегреше́ний на́ших, / си́лою Твое́ю побори́ борю́щия ны, / Богоуго́дное житие́ нам устроя́ющи.

И ны́не и при́сно и во ве́ки веко́в. Ами́нь.

Ско́рби и печа́ли на́ша возвеща́ем Ти, Госпоже́, и вопие́м: / я́коже провеща́ла еси́ не́цей рабе́ Твое́й, / ка́ко от напа́сти спасти́ся, / та́ко и нам пода́ждь му́драя и блага́я разуме́ти / и ко спасе́нию наста́ви / покланя́ющиися ико́не Твое́й.

Конда́к, глас 6:

Не и́мамы пе́сней, ниже́ слове́с, / ка́ко досто́йно восхваля́ти Тя, / Ма́ти Христа́ Бо́га на́шего, / явле́ния ра́ди чудотво́рныя ико́ны Твоея́ земли́ Калу́жстей, / то́кмо мо́жем вопи́ти Тебе́: / не отврати́ ми́лости Твоея́ от нас, / и ниспосли́ ю всем притека́ющим к цельбоно́сней ико́не Твое́й.

Песнь 7

Ирмос: Су́щим в пещи́ о́троком Твои́м, Спа́се, / не прикосну́ся, ниже́ стужи́ огнь. / Тогда́ три́е, я́ко еди́неми усты́ поя́ху / и благословля́ху, глаго́люще: / благослове́н Бог оте́ц на́ших.

Припев: Пресвята́я Богоро́дице, спаси́ на́с.

Ино́го утеше́ния не стяжа́хом на земли́, / ра́зве Тебе́, Цари́це; / моли́ е́же изба́витися нам вся́каго гне́ва и преще́ния Бо́жия, да благода́рственно сла́вим Тя.

Припев: Пресвята́я Богоро́дице, спаси́ на́с.

Стра́ждущу глухото́ю повеле́ла еси́, Де́во, / моли́тися пред ико́ною Твое́ю явле́нною / и тому́ исцеле́ние нело́жно подала́ еси́; / уврачу́й и на́ша я́звы, Пречи́стая, / и от гно́я страсте́й свободи́ ны.

Припев: Пресвята́я Богоро́дице, спаси́ на́с.

Ка́ко воспои́м ди́вная чудеса́, / во гра́де на́шем явле́нная от святы́я ико́ны Твоея́ Калу́жския: / о́трока боля́ща я́звы внеза́пу уврачева́ся; / разсла́бленным, на одре́ лежа́щим, кре́пость дарова́ся, / слепы́м зре́ние откры́ся, / врача́ми оста́вленным здра́вие подаде́ся; / тем, Всеблага́я, не презри́ мольбы́ и нас, / неду́гующих скорбьми́ душе́вными же и теле́сными.

Припев: Пресвята́я Богоро́дице, спаси́ на́с.

Спасе́ние бу́ди, Госпоже́, от руки́ ненави́дящих нас, / я́коже иногда́ спаса́ла еси́ град Твой от пове́трия смертоно́снаго, / не по грехо́м бо на́шим наказу́еши нас, / но ми́луеши при́сно неизрече́ннаго ра́ди человеколю́бия Твоего́.

Сла́ва Отцу́ и Сы́ну и Свято́му Ду́ху:

Хода́таица благоприя́тная и си́льная к Бо́гу, / тьму́ у́бо страсте́й, Ма́ти Све́та, прожени́ от нас, / обстоя́щих све́тлое подо́бие ли́ка Твоего́.

И ны́не и при́сно и во ве́ки веко́в. Ами́нь.

Стена́ необори́мая ве́рных, / стране́ на́шей пода́ждь умире́ние и благоде́нствие, / храни́ лю́дие ея́ от грехо́вных дея́ний и помышле́ний, / да еди́неми усты́ и еди́нем се́рдцем превозно́сим Тя во ве́ки.

Песнь 8

Ирмос: Его́же ужаса́ются а́нгели и вся во́инства, / я́ко Творца́ и Го́спода, / по́йте, свяще́нницы, просла́вите, о́троцы, / благослови́те, лю́дие, / и превозноси́те во вся ве́ки.

Припев: Пресвята́я Богоро́дице, спаси́ на́с.

Яви́ся заступле́ние Твое́, Влады́чице, / во дни междоусо́бныя бра́ни, / егда́ со́нмище сопроти́вных устреми́ся на зе́млю на́шу: / тогда́ ико́на Твоя́ иноплеме́нником на возду́се яви́ся, / и вра́жия полки́ устраши́.

Припев: Пресвята́я Богоро́дице, спаси́ на́с.

Преклони́ся к мольба́м рабо́в Твои́х, Пречи́стая, / и не закосни́ изба́вити нас от напа́стей, и бед, и омраче́ния душе́внаго, и уны́ния; / вся стра́сти отжени́ от нас, Чи́стая, / да немо́лчно воспева́ем ми́лости Твоя́.

Припев: Пресвята́я Богоро́дице, спаси́ на́с.

Скорбя́ми испыту́ются ду́ши на́ша, / да не горды́не жите́йстей, ни жестокосе́рдию поработи́мся, / но да смиренному́дрию поучи́мся / и утеше́ния от Ма́тере Бо́жия, я́ко ра́дости всех скорбя́щих, да испо́лнимся.

Сла́ва Отцу́ и Сы́ну и Свято́му Ду́ху:

Я́ко неду́жным и разсла́бленным ско́ро яви́ла еси́ ми́лость Твою́, Пресвята́я Де́во, / та́кожде и от нас не отступа́й, Цели́тельнице, / к покая́нию те́плому душ на́ших ше́ствие устреми́, / слепо́тствующий ум наш ра́зумом и́стиннаго Богове́дения озари́, / да не поги́бнем лю́те во гресе́х на́ших.

И ны́не и при́сно и во ве́ки веко́в. Ами́нь.

Язы́к челове́ческий не возмо́жет изрещи́ ди́вная чудеса́ и неизчисли́мая благодея́ния, явля́емая от ико́ны Твоея́, Богоро́дице, мы же во смире́нии се́рдца со умиле́нием вопие́м Ти: пода́ждь рабо́м Твои́м ве́ру и́стинную и любо́вь нелицеме́рную, да сподо́бимся по́двигом до́брым подвиза́тися, житие́ ми́рно сконча́ти, хваля́ Го́спода.

Песнь 9.

Ирмос: Живоприе́мный исто́чник приснотеку́щий, / светоно́сный свети́льник благода́ти, / храм одушевле́нный, сень пречи́стую, / Небесе́ и земли́ простра́ннейшую, / Богоро́дицу, ве́рнии, велича́ем.

Припев: Пресвята́я Богоро́дице, спаси́ на́с.

Бога́тство духо́вное неиждива́емое / дарова́ла еси́ рабо́м Твои́м, Пренепоро́чная, / ико́ну Твою́ свяще́нную, / ея́же прославле́ние све́тло пра́зднующее, ве́рнии, / избавля́емся от вся́ких бед и ско́рбных обстоя́ний.

Припев: Пресвята́я Богоро́дице, спаси́ на́с.

Виждь, Чи́стая, от но́щи у́треннюющу па́ству, / ико́ну Твою́ Богохва́льную обстоя́щу, / разреше́ния же грехо́в прося́щу и жития́ исправле́ния: / уми́лостиви о той в Тро́ице Еди́наго Бо́га.

Припев: Пресвята́я Богоро́дице, спаси́ на́с.

В пещи́ искуше́ний и бед опаля́емыя ороси́, Де́во, струя́ми Твои́х щедро́т, да посра́мятся беззако́ннующии врази́ спасе́ния на́шего и да разуме́ют Тя, Всеблагу́ю Цари́цу, / сла́вимую по всей вселе́нней.

Припев: Пресвята́я Богоро́дице, спаси́ на́с.

Богоро́дице Пречи́стая, а́ще и многогре́шни суть лю́дие, ко святе́й ико́не Твое́й притека́ющии, но я́коже Сын Твой спасе́ния ра́ди гре́шник от Небе́с к нам прише́л есть, та́ко и Ты с Небесе́ на моле́ния на́ша при́зри, и проше́ний люде́й Твои́х не отри́ни, Всепе́тая.

Сла́ва Отцу́ и Сы́ну и Свято́му Ду́ху:

Умноже́нием чуде́с от преди́вныя ико́ны Твоея́ быва́емых, Влады́чице, да утвержда́ется ве́ра правосла́вная, да прославля́ется в лю́дех Твое́ ми́лостивое предста́тельство.

И ны́не и при́сно и во ве́ки веко́в. Ами́нь.

Никто́же возмо́жет досто́йно Ма́терь Го́спода на́шего просла́вити, / но мы слеза́ми те́плыми ску́дость слове́с воспо́лним, / красоте́ доброде́телей Влады́чицы на́шей дивя́щеся, / и та́ко Сию́ возвели́чим.

Свети́лен:

Све́том благода́тным от ико́ны Твоея́ озаря́еми, / воздыха́нии серде́чными и благодаре́нии непреста́нными возопие́м Влады́чице Богоро́дице: / ра́дуйся, безме́здная Цели́тельнице; / ра́дуйся, Ма́ти всех скорбя́щих, / ра́дуйся, А́нгелов Сла́во и челове́ков Похвало́; / ра́дуйся, боже́ственное Утеше́ние ро́ду христиа́нскому; / ра́дуйся, ско́рая Помо́щнице моля́щимся Тебе́.

Молитва Пресвятой Богородице пред иконой Ея «Калужской»

О, Пресвята́я Де́во, Ма́ти Христа́ Бо́га на́шего, Ди́вная Цари́це Небесе́ и земли́! Вонми́ многоболе́зненному воздыха́нию серде́ц на́ших; при́зри с высоты́ святы́я Твоея́ на нас, с ве́рою и любо́вию предстоя́щих пред чудотво́рною Твое́ю ико́ною и со умиле́нием моля́щихся Тебе́, Влады́чице! Не преда́ждь умале́нию Це́рковь Правосла́вную, помози́ нам, Пресвята́я Богоро́дице, святооте́ческую Правосла́вную ве́ру до конца́ дней на́ших непоро́чно сохрани́ти, во всех за́поведех Госпо́дних неукло́нно ходи́ти и изба́ви ны от па́губных душевре́дных уче́ний. На Твою́, Ди́вная Цари́це Небесе́ и земли́, ми́лость упова́ем, раби́ Твои́: очи́сти умы́ на́ша от грехо́вных по́мыслов, душе́внаго разслабле́ния, обурева́ния страсте́й, от искуше́ний, собла́знов и грехопаде́ний; Ты бо еси́, Влады́чице, кре́пкое прибе́жище гре́шников ка́ющихся. Воздви́гни нас из глубины́ грехо́вныя и и́стинным покая́нием ороси́ изсо́хшая сердца́ на́ша, просвети́ серде́чная очеса́ на́ша ко зре́нию спасе́ния, и прельще́нных бесо́вскою пре́лестию на путь пра́вый наста́ви; вся́кое де́ло зло́е и богопроти́вное разруши́; вся́кому же благо́му и богоуго́дному де́лу научи́ и споспе́шествуй; вложи́, Влады́чице, в сердца́ на́ша дух стра́ха Бо́жия, дух благоче́стия, дух кро́тости, смире́ния, терпе́ния, незло́бия; умягчи́ зла́я сердца́ на́ша и ниспосли́ нам ре́вность о спасе́нии бли́жних на́ших. Вразуми́ и научи́ ны, о, Всеми́лостивая Засту́пнице на́ша, ка́ко безгре́шно ходи́ти по пути́ земна́го сего́ жития́: я́ко Ты, Пресвята́я, ве́си ве́ру на́шу, и упова́ние на́ше ви́диши. О, Влады́чице ми́ра! Скорбя́щих уте́ши, бе́дствующим помози́; сохрани́ от молниено́снаго гро́ма, тлетво́рных ветр, лю́тых боле́зней, смертоно́сныя я́звы, междоусо́бныя бра́ни, наше́ствия враго́в иноплеме́нных. О, Пресвята́я Богоро́дице! Избави́ ны от внеза́пныя и наси́льственныя сме́рти; всем нам да́руй обраще́ние на путь и́стинный и христиа́нскую кончи́ну живота́ на́шего безболе́зненну, непосты́дну, ми́рну, Святы́х Тайн прича́стну. Во вре́мя исхо́да на́шего предста́ни нам, Де́во Богоро́дице, и изба́ви ны от вла́сти бесо́вския, возду́шных го́рьких мыта́рств и огня́ ве́чнаго. Сконча́вшимся внеза́пною сме́ртию ми́лостива бы́ти Сы́на Твоего́ умоли́, и о всех усо́пших, и́же не и́мут сро́дников, о упокое́нии их Сы́на Твоего́ умоля́ющих, Сама́ бу́ди непреста́нная и те́плая Моли́твенница и Хода́таица. Преста́вльшихся же в ве́ре и покая́нии от вре́меннаго жития́ сего́ отцы́, бра́тию, ма́тери и сестры́ на́ша сподо́би Твои́м хода́тайством всели́тися во оби́телех Небе́сных со А́нгелы и со все́ми святы́ми, иде́же непреста́нно гла́сы пра́зднующих и ра́достно сла́вящих Пресвяту́ю Тро́ицу, Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

Калужская