Канон второй Пресвятой Богородице пред иконой «Избавительница» (во святую Пятидесятницу)

Тропарь Пресвятой Богородице пред иконой Ея «Избавительница», глас 4

Я́ко пресве́тлая звезда́,/ просия́ Боже́ственными чудесы́/ святы́й о́браз Твой, Изба́вительнице,/ луча́ми благода́ти и милосе́рдия Твоего́/ озари́в в нощи́ скорбе́й су́щих./ Пода́ждь у́бо и нам, Всеблага́я Де́во,/ избавле́ние от бед,/ исцеле́ние неду́гов душе́вных и теле́сных,// спасе́ние и ве́лию ми́лость.

Ин тропарь Пресвятой Богородице пред иконой Ея «Избавительница», глас 4

Избавле́ние Принося́щая всем,/ от се́рдца Тебе́ призыва́ющим,/ принеси́ избавле́ние ско́рое/ и нам, в лю́тых беда́х погиба́ющим// и в Тебе́ Едино́й избавле́ние на́ше на Бо́зе полага́ющим.

Канон, глас 1.

Пе́снь 1.

Ирмос: Воскресе́ния де́нь, просвети́мся, лю́дие, Па́сха, Госпо́дня Па́сха: от сме́рти бо к Жи́зни и от земли́ к Небеси́ Христо́с Бо́г на́с преведе́, побе́дную пою́щия.

Припев: Пресвята́я Богоро́дице, спаси́ на́с.

Воскресе́ния де́нь, сла́вим ны́не Го́спода Христа́. Прииди́те, и Пресвяту́ю Ма́терь Его́ просла́вим, пред свято́ю ико́ною Ея́ благода́рственная пою́ще.

Припев: Пресвята́я Богоро́дице, спаси́ на́с.

Очи́стим чу́вствия и у́зрим воскре́сшаго Христа́ и Всеблагу́ю Де́ву, Изба́вительницу от бе́д, блиста́ющуюся и озаря́ющую ве́рныя благода́тию.

Припев: Пресвята́я Богоро́дице, спаси́ на́с.

Очи́стим чу́вствия и у́зрим мы́сленными очесы́ промышле́ние о на́с Влады́чицы: честны́м бо о́бразом Свои́м изба́ви от бе́д христоимени́тыя лю́ди.

Припев: Пресвята́я Богоро́дице, спаси́ на́с.

Небеса́ у́бо досто́йно да веселя́тся, земля́ же да ра́дуется воскре́сшему Христу́, да торжеству́ет же сия́ оби́тель, обогати́вшаяся Изба́вительницы ико́ною.

Сла́ва Отцу́ и Сы́ну и Свято́му Ду́ху:

Не́бо и земля́ досто́йно да веселя́тся во Христо́вом воста́нии, да пра́зднуют же Богома́тери мона́си и бельцы́, чудотво́рный Ея́ о́браз почита́юще.

И ны́не и при́сно и во ве́ки веко́в. Ами́нь.

Умерщвле́ния преде́л сломи́ла еси́, ве́чную Жи́знь ро́ждшая – Христа́, из гро́ба возсия́вшаго дне́сь, Де́во Всенепоро́чная, и ми́р просвети́вшаго.

Пе́снь 3.

Ирмос: Прииди́те, пи́во пие́м но́вое, не от ка́мене непло́дна чудоде́емое, но нетле́ния исто́чник, из гро́ба одожди́вша Христа́, в Не́мже утвержда́емся.

Припев: Пресвята́я Богоро́дице, спаси́ на́с.

Прииди́те, пи́во пие́м но́вое от исто́чника цели́тельнаго неду́гом душе́вным и теле́сным, его́же источи́ Богоблагода́тная с ве́рою прите́кшим ко ико́не Ея́.

Припев: Пресвята́я Богоро́дице, спаси́ на́с.

Прииди́те, весны́ у́мныя в ви́димой весне́ наслади́мся, неувяда́емый бо Цве́т – Христа́ – израсти́вшая Де́ва благоуха́нием благода́ти живи́т и утеша́ет скорбя́щия.

Припев: Пресвята́я Богоро́дице, спаси́ на́с.

Ны́не вся́ испо́лнишася све́та воскресе́нием Христо́вым, да пра́зднуем и мы́ све́тло Изба́вительнице, лучи́ испуща́ющей ра́дости о Бо́зе Спа́се в нощи́ искуше́ний.

Припев: Пресвята́я Богоро́дице, спаси́ на́с.

Ны́не оби́тель сия́ озаря́ется све́том от Ма́тере Све́та в наро́читом дни́ пра́зднества чудотво́рному Тоя́ о́бразу и благода́тию Сы́на Ея́ утвержда́ется.

Сла́ва Отцу́ и Сы́ну и Свято́му Ду́ху:

Вчера́ погребе́но бе́ селе́ние ве́рных в смертоно́снем отча́янии, дне́сь же оживотвори́ся ско́рым от бе́д избавле́нием Богоневе́стныя Мари́и, наде́жды безнаде́жных.

И ны́не и при́сно и во ве́ки веко́в. Ами́нь.

На нетле́нную жи́знь прихожду́ дне́сь, бла́гостию Ро́ждшагося из Тебе́, Чи́стая, и все́м конце́м све́т облиста́вшаго.

Пе́снь 4.

Ирмос: На Боже́ственней стра́жи Богоглаго́ливый Авваку́м да ста́нет с на́ми и пока́жет светоно́сна А́нгела, я́сно глаго́люща: дне́сь спасе́ние ми́ру, я́ко воскре́се Христо́с, я́ко всеси́лен.

Припев: Пресвята́я Богоро́дице, спаси́ на́с.

На Боже́ственней стра́жи ста́вше во Христе́, бра́тие, и воспомина́ние творя́ще чуде́с Изба́вительницы, со благогове́нием рце́м: дне́сь спасе́ние Богоро́дицею бы́сть скорбя́щим, я́ко вся́ могу́щею.

Припев: Пресвята́я Богоро́дице, спаси́ на́с.

Я́ко непоро́чную А́гницу, пречи́стаго А́гнца ро́ждшую, венча́ем Тя́, Благослове́нная, пе́сненными цве́ты: покры́й от зо́л рабы́ Твоя́, воскре́сшаго Сы́на Твоего́ о все́х умилостивля́ющи.

Припев: Пресвята́я Богоро́дице, спаси́ на́с.

Богооте́ц у́бо Дави́д пред се́нным ковче́гом скака́ше, игра́я, раби́ же Твои́, Госпоже́, пред ико́ною Твое́ю лику́юще, весели́мся боже́ственне о Твое́м милосе́рдом заступле́нии к Тебе́ прибега́ющих.

Припев: Пресвята́я Богоро́дице, спаси́ на́с.

Я́ко в красне́йший хра́м, всели́ся в Тя́, Чи́стая, Иису́с, все́х Ца́рь, сни́тием же во а́д жили́ще мра́чное упраздни́ и воскресе́нием совоскреси́ челове́ки, оживля́я Тобо́ю уме́ршия, я́ко всеси́лен.

Сла́ва Отцу́ и Сы́ну и Свято́му Ду́ху:

Святы́х Свята́го па́че ума́ Ма́ти яви́лася еси́, Влады́чице, освяще́ние и избавле́ние от бе́д подаю́щи ве́рным, сла́вящим Его́ воскресе́ние и Тебе́, Всеблагу́ю Изба́вительницу, призыва́ющим.

И ны́не и при́сно и во ве́ки веко́в. Ами́нь.

Созда́вый Ада́ма, Твоего́ пра́отца, Чи́стая, зи́ждется от Тебе́, и сме́ртное жили́ще разори́ Свое́ю сме́ртию дне́сь, и озари́ вся́ Боже́ственными блиста́ньми воскресе́ния.

Пе́снь 5.

Ирмос: У́тренюем у́тренюю глубоку́, и вме́сто ми́ра пе́снь принесе́м Влады́це, и Христа́ у́зрим, Пра́вды Со́лнце, все́м жи́знь возсия́юща.

Припев: Пресвята́я Богоро́дице, спаси́ на́с.

У́тренююще во свято́м хра́ме Твое́м, Чи́стая, Сы́на Твоего́ воспева́ем, из гро́ба возсия́вшаго, и Тя́, Изба́вительнице, велича́ем, от Со́лнца Пра́вды уме́ршему о́троку жи́знь возсия́ющу.

Припев: Пресвята́я Богоро́дице, спаси́ на́с.

У́тренюем у́тренюю глубоку́ и с пе́нием дея́ния принесе́м богоуго́дная, Де́ве вопию́ще: храни́, Всецари́це, Го́ру, и Росси́ю, и вся́ правосла́вныя необори́мы от вра́г ви́димых и неви́димых.

Припев: Пресвята́я Богоро́дице, спаси́ на́с.

Безме́рное Твое́ благоутро́бие, Влады́чице, у́зами вра́жиими содержи́мии зря́ще, ко ико́не Твое́й изба́вленнии идя́ху весе́лыми нога́ми, Твою́ и Сы́на Твоего́ хва́ляще Боже́ственную си́лу.

Припев: Пресвята́я Богоро́дице, спаси́ на́с.

Присту́пим, свещено́снии, исходя́щу Христу́ из гро́ба, я́ко жениху́, и спра́зднуим Богоро́дице любопра́зднственными чи́нми, в че́сть святы́я ико́ны Ея́, просла́вленныя чудесы́ мно́гими.

Сла́ва Отцу́ и Сы́ну и Свято́му Ду́ху:

Облиста́ Тя́ и возвесели́, Богора́дованная, Спа́с все́х, из гро́ба возсия́вый, Пра́вды Со́лнце, Его́же моли́ озари́ти и уте́шити сердца́ любо́вию песносло́вящих Тя́, Изба́вительнице, пред Твое́ю ико́ною.

И ны́не и при́сно и во ве́ки веко́в. Ами́нь.

Просвеща́ется Боже́ственными луча́ми и живоно́сными воскресе́ния Сы́на Твоего́, Богома́ти Пречи́стая, и ра́дости исполня́ется благочести́вых собра́ние.

Пе́снь 6.

Ирмос: Снизше́л еси́ в преиспо́дняя земли́ и сокруши́л еси́ вереи́ ве́чныя, содержа́щая свя́занныя, Христе́, и тридне́вен, я́ко от ки́та Ио́на, воскре́сл еси́ от Гро́ба.

Припев: Пресвята́я Богоро́дице, спаси́ на́с.

Снидо́хом во тьму́ грехо́вную и пра́ведное на ся́ негодова́ние Бо́жие привлеко́хом, – вопия́ху ве́рнии, но, о Госпоже́ Всеми́лостивая, Ты́ изба́вила еси́ на́с от ро́ва отча́яния.

Припев: Пресвята́я Богоро́дице, спаси́ на́с.

Сохрани́в це́лы труды́ ру́к на́ших и невреди́мы от всепояда́ющаго пру́жия, предста́тельством Твои́м, Изба́вительнице, отве́рзла еси́ на́м милосе́рдия две́ри.

Припев: Пресвята́я Богоро́дице, спаси́ на́с.

Спа́се на́ш, живо́е же и неже́ртвенное от все́х заколе́ние, бе́дствующим дарова́л еси́ Ма́терь Твою́ Изба́вительницу от бе́д, моли́твами у́бо Ея́ изба́ви на́с от вся́кия ну́жды и печа́ли.

Припев: Пресвята́я Богоро́дице, спаси́ на́с.

Яви́лася еси́, Богоневе́сто, вы́шши А́нгел, Бо́га вопло́щши, распе́ншагося за ны́, и погребе́на, и ме́ртвым нетле́ние из гро́ба источи́вша, чту́щих же Тя́ тли́ грехо́вныя избавля́юща.

Сла́ва Отцу́ и Сы́ну и Свято́му Ду́ху:

Ви́девши Сы́на Твоего́, из ме́ртвых возста́вша, ра́йския сла́дости испо́лнилася еси́, Присноде́во, Того́ у́бо моли́, Благослове́нная, да отве́рзет моля́щимся Тебе́ ра́йския две́ри.

И ны́не и при́сно и во ве́ки веко́в. Ами́нь.

Возведе́ся дре́вле держи́мое сме́ртию и тле́нием Воплоти́вшимся от Твоего́ пречи́стаго чре́ва к нетле́нней и присносу́щней жи́зни, Богоро́дице Де́во.

Пе́снь 7.

Ирмос: О́троки от пе́щи изба́вивый, бы́в Челове́к, стра́ждет, я́ко сме́ртен, и стра́стию сме́ртное в нетле́ния облачи́т благоле́пие, еди́н Благослове́н отце́в Бо́г и Препросла́влен.

Припев: Пресвята́я Богоро́дице, спаси́ на́с.

О́троки от пе́щи изба́вивый, презре́в, я́ко Милосе́рд, прегреше́ния на́ша, соблюди́ ны́ невре́дны от пе́щи искуше́ний Пресвяты́я Ма́тере Твое́й мольба́ми, отце́в Бо́же Препросла́вленный.

Припев: Пресвята́я Богоро́дице, спаси́ на́с.

Жены́ с ми́ры Богому́дрыя всле́д теча́ху Христа́, обита́телие же ве́си, вме́сто ми́ра сле́зы Де́ве принося́ще, поклони́шася, ра́дующияся, Ея́ ико́не и избавле́ние от бе́д зде́ благовести́ша.

Припев: Пресвята́я Богоро́дице, спаси́ на́с.

Жены́ с ми́ры всле́д Христа́ теча́ху, да тече́м и мы́ усе́рдно, до́брый по́двиг и́ночества соверша́юще и ра́дующеся живо́му Бо́гу, да сподо́бимся моли́твами Богома́тере па́сху та́йную вкуша́ти.

Припев: Пресвята́я Богоро́дице, спаси́ на́с.

Сме́рти пра́зднуем умерщвле́ние воскресе́нием Христа́ и избавле́ние от бе́д милосе́рдием Влады́чицы, те́мже, пред ико́ною Ея́ лику́юще, пое́м Вино́внаго, еди́наго Благослове́ннаго отце́в Бо́га и Препросла́вленнаго.

Сла́ва Отцу́ и Сы́ну и Свято́му Ду́ху:

Я́ко вои́стинну свяще́нный и ра́достный се́й пра́здник Богоро́дицы, провозве́стник су́щий чуде́с от честна́го Тоя́ о́браза, от него́же благода́ть исцеле́ний я́вственно все́м возсия́.

И ны́не и при́сно и во ве́ки веко́в. Ами́нь.

Умертви́в Сы́н Тво́й сме́рть, Всенепоро́чная, дне́сь, все́м сме́ртным пребыва́ющий живо́т во ве́ки веко́в дарова́, еди́н Благослове́нный отце́в Бо́г и Препросла́вленный.

Пе́снь 8.

Ирмос: Се́й нарече́нный и Святы́й Де́нь – еди́н суббо́т ца́рь и госпо́дь, пра́здников пра́здник и торжество́ е́сть торже́ств, в о́ньже благослови́м Христа́ во ве́ки.

Припев: Пресвята́я Богоро́дице, спаси́ на́с.

Се́й нарече́нный и Святы́й Де́нь, в о́ньже сла́вим Всепе́тую Влады́чицу, я́ко изба́ви от бе́д прите́кших к Ея́ о́бразу, и благослови́м Сию́ во ве́ки.

Припев: Пресвята́я Богоро́дице, спаси́ на́с.

Прииди́те, оби́тели сея́ и́ночествующии, с любо́вию благодаре́ние Де́ве принесе́м, Храни́тельнице Горы́ и Изба́вительнице на́шей, пою́ще Ю́ я́ко Богома́терь во ве́ки.

Припев: Пресвята́я Богоро́дице, спаси́ на́с.

Возведи́ о́крест о́чи Твои́, Чи́стая, и ви́ждь рабы́ Твоя́, пред ико́ною Твое́ю моля́щияся Тебе́, и проше́ния испо́лни о Тебе́ благословя́щия Христа́ во ве́ки.

Припев: Пресвята́я Богоро́дице, спаси́ на́с.

Всеси́льный Госпо́дь роди́ся из Тебе́, Мари́е, и Кресто́м Свои́м умерщвле́ние а́ду соде́ла, избавля́я смертоно́сных бе́д к о́бразу Твоему́ притека́ющих и пою́щих Его́ я́ко Бо́га во ве́ки.

Сла́ва Отцу́ и Сы́ну и Свято́му Ду́ху:

О́тче Вседержи́телю, и Сло́ве, и Ду́ше, хода́таицу о на́с Пресвяту́ю Де́ву Тебе́ предлага́ем: моли́твами Тоя́ поми́луй и спаси́ на́с, в Тя́ крести́вшихся, да Тя́ благослови́м во вся́ ве́ки.

И ны́не и при́сно и во ве́ки веко́в. Ами́нь.

Прии́де Тобо́ю в ми́р Госпо́дь, Де́во Богоро́дице, и, чре́во а́дово расто́рг, сме́ртным на́м воскресе́ние дарова́, те́мже благослови́м Его́ во ве́ки.

Песнь 9.

Ирмос: Свети́ся, свети́ся, Но́вый Иерусали́ме, сла́ва бо Госпо́дня на тебе́ возсия́, лику́й ны́не, и весели́ся, Сио́не. Ты́ же, Чи́стая, красу́йся, Богоро́дице, о воста́нии Рождества́ Твоего́.

Припев: Пресвята́я Богоро́дице, спаси́ на́с.

Свети́ся, Ру́сская оби́теле, весели́ся и красу́йся, свята́я бо в тебе́ Изба́вительницы ико́на чудесы́ просла́вися мно́гими, от бе́д свобожде́нием и неду́гов исцеле́нием.

Припев: Пресвята́я Богоро́дице, спаси́ на́с.

Благоутро́бие Твое́ к ве́рным и да́ры Твои́ су́ть па́че постиже́ния, Всеблага́я Госпоже́, сподобля́й у́бо си́х рабы́ Твоя́, благода́рственная Тебе́ пою́щия и ра́дующияся о воста́нии Рождества́ Твоего́.

Припев: Пресвята́я Богоро́дице, спаси́ на́с.

О, Боже́ственнаго, о, любе́знаго Твоего́, Богома́ти, гла́са! я́ко повеле́ла еси́ не скрыва́ти чудотво́рную ико́ну Свою́, да притека́ющий к не́й мно́гих лю́тых избавля́ются ми́лостию Твое́ю.

Припев: Пресвята́я Богоро́дице, спаси́ на́с.

О, па́че словесе́ Твои́х чуде́с, Изба́вительнице! Ты́ бо осене́нна ико́ною Твое́ю о́трока воскреси́ла еси́, Ма́ти су́щи Живота́, воскресе́нием Свои́м все́х оживотвори́вшаго.

Сла́ва Отцу́ и Сы́ну и Свято́му Ду́ху:

О Пресвята́я Влады́чице, о Всеми́лостивая Изба́вительнице от бе́д, не преста́й милосе́рдовати о бе́дствующих и сподобля́ти благода́тнаго присеще́ния оби́тель, о́браз Тво́й почита́ющую.

И ны́не и при́сно и во ве́ки веко́в. Ами́нь.

Согла́сно, Де́во, Тебе́ блажи́м, ве́рнии: ра́дуйся, две́ре Госпо́дня; ра́дуйся, гра́де одушевле́нный; ра́дуйся, Ея́же ра́ди на́м ны́не возсия́ све́т из Тебе́ Рожде́ннаго из ме́ртвых воскресе́ния.

Свети́лен:

Свети́льниче све́тлый, Пресве́тлаго Све́та ми́ра, от гро́ба возсия́вшаго, просвети́, Благослове́нная, ду́ши на́ша све́том благода́ти, да сподо́бимся зре́ти воплоти́вшееся из Тебе́ Со́лнце Пра́вды и Тебе́, Просвети́тельницу на́шу, при́сно велича́ти.

Молитва Пресвятой Богородице пред иконой Ея «Избавительница»

О, Ма́ти Бо́жия, по́моще и защи́та на́ша, егда́ попро́сим, бу́ди изба́вительнице на́ша, на Тя бо упова́ем и всегда́ вседу́шно Тя призыва́ем: умилосе́рдися и помози́, пожале́й и изба́ви, приклони́ у́хо Твое́ и на́ши ско́рбныя и сле́зныя моли́твы приими́, и я́коже хо́щеши, успоко́й и обра́дуй нас, лю́бящих твоего́ Безнача́льного Сы́на и Бо́га на́шего. Ами́нь.