Канон первый Пресвятой Богородице пред иконой «Избавительница»

Тропарь Пресвятой Богородице пред иконой Ея «Избавительница», глас 4

Я́ко пресве́тлая звезда́,/ просия́ Боже́ственными чудесы́/ святы́й о́браз Твой, Изба́вительнице,/ луча́ми благода́ти и милосе́рдия Твоего́/ озари́в в нощи́ скорбе́й су́щих./ Пода́ждь у́бо и нам, Всеблага́я Де́во,/ избавле́ние от бед,/ исцеле́ние неду́гов душе́вных и теле́сных,// спасе́ние и ве́лию ми́лость.

Ин тропарь Пресвятой Богородице пред иконой Ея «Избавительница», глас 4

Избавле́ние Принося́щая всем,/ от се́рдца Тебе́ призыва́ющим,/ принеси́ избавле́ние ско́рое/ и нам, в лю́тых беда́х погиба́ющим// и в Тебе́ Едино́й избавле́ние на́ше на Бо́зе полага́ющим.

Канон, глас 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Христе́, Све́те и́стинный, пода́ждь ми́ просвеще́ние восписа́ти похва́льная Пресвяте́й Ма́тери Твое́й, и воспою́ Тоя́ вели́кое к рабо́м Твои́м благоутро́бие.

Припев: Пресвята́я Богоро́дице, спаси́ на́с.

Горе́, вы́ну сла́вимая, благоволи́ла еси́, Госпоже́, и ни́зу среди́ бе́дных просла́вити и́мя Свое́ благода́тию чуде́с от святы́я ико́ны Твоея́, Изба́вительнице.

Припев: Пресвята́я Богоро́дице, спаси́ на́с.

Егда́ обита́тели ве́си, отча́явшеся от истребля́вшаго труды́ и́х пру́жия, притеко́ша со слеза́ми ко о́бразу Твоему́, Де́во, а́бие улучи́ша избавле́ние и, ра́дующеся, просла́виша ми́лость Твою́.

Припев: Пресвята́я Богоро́дице, спаси́ на́с.

Десни́ца Твоя́, Влады́чице, просла́вися в кре́пости, и мно́жеством ми́лости Твоея́ яви́лася еси́ Покрови́тельница и Изба́вительница во спасе́ние бе́дствовавших.

Сла́ва Отцу́ и Сы́ну и Свято́му Ду́ху:

Упова́ние христиа́ном, Помо́щнице су́щим в ско́рбех, моли́ Сы́на Твоего́ изба́витися вся́ких бе́д пра́зднующым свято́му о́бразу Твоему́, Изба́вительнице.

И ны́не и при́сно и во ве́ки веко́в. Ами́нь.

Ра́дуйся, бога́тство неистощи́мое ни́щих и си́рых Засту́пнице, ра́дуйся, спаса́ющая ве́рою и́мя Твое́, Де́во, призыва́ющих, ра́дуйся, уны́ния отгна́ние и ра́дости Пода́тельнице.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Припев: Пресвята́я Богоро́дице, спаси́ на́с.

Госпо́дь мертви́т, его́же хо́щет, и живи́т Тобо́ю, Ма́ти Живота́, исполня́я моли́твы моля́щихся Тебе́, низведе́нных во а́д возво́дит и от гно́ища страсте́й воздвиза́ет Твои́м всемо́щным предста́тельством.

Припев: Пресвята́я Богоро́дице, спаси́ на́с.

Заме́длившу иере́ю напу́тствовати умира́юща о́трока, егда́ о уме́ршем помоли́шася к Тебе́, Всеблага́я, и осени́ша ико́ною Твое́ю, Изба́вительнице, внеза́пу отроча́ оживе́ и воста́ здра́во Твое́ю и Сы́на Твоего́ животво́рною си́лою.

Припев: Пресвята́я Богоро́дице, спаси́ на́с.

Живоно́сный Тя́ и всецеле́бный исто́чник, Богоневе́сто, позна́хом, раби́ Твои́: о́бразом бо Твои́м, Изба́вительнице, жи́знь и здра́вие подае́ши душе́вное и теле́сное и от бе́д избавля́еши прося́щих Твоего́ заступле́ния.

Припев: Пресвята́я Богоро́дице, спаси́ на́с.

Нача́ло Христо́вых чуде́с Ты́ еси́, Пречу́дная Де́во, те́мже чудеса́ о́браза Твоего́ сла́вяще дне́сь, Изба́вительнице, мо́лимся Тебе́: посети́ рабы́ Твоя́ благода́тию Твое́ю, неду́гов, зо́л и ве́чныя сме́рти изыма́ющи ны́.

Сла́ва Отцу́ и Сы́ну и Свято́му Ду́ху:

Греха́ми умерщвля́емую ду́шу мою́ оживотвори́, Влады́чице, я́ко по Бо́зе вся́ могу́щая, и обдержа́щих мя́ страсте́й изба́ви, да, плене́ния стра́стнаго свобожде́н, благода́рственно Тя́ велича́ю.

И ны́не и при́сно и во ве́ки веко́в. Ами́нь.

Напра́ви, Чи́стая, к тишине́ безстра́стия во глубину́ зо́л влеко́ма раба́ Твоего́ и не попусти́ ми́ поги́бнути, прося́щему Твоея́, Изба́вительнице, ми́лости, Тобо́ю бо ве́рнии, покрыва́еми, спаса́ются.

Седа́лен, гла́с 3:

Пресвяти́и ру́це Твои́, и́миже носи́ла еси́ Нося́щаго вся́, простри́ к Нему́, Присноде́во Изба́вительнице, и моли́твами Твои́ми изба́ви ны́ гне́ва Его́, гре́х ра́ди дви́жимаго, отводя́щи лю́тая наведе́ния и те́х ра́ди быва́ющую лю́дем тугу́ и уны́ние, и спаси́ в ми́ре души́ на́ша.

Пе́снь 4.

Ирмос: Седя́й в сла́ве на Престо́ле Божества́ на о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Разуме́ша ве́рнии дела́ бла́гости Твоея́, Влады́чице, и вни́де ра́достный тре́пет в сердца́ и́х, внегда́ бо смути́тися душа́м и́х от бе́д и неду́гов, ми́лость Свою́, Благослове́нная, помяну́вши, ико́ною Твое́ю изшла́ еси́ на избавле́ние люде́й Твои́х.

Припев: Пресвята́я Богоро́дице, спаси́ на́с.

Уведе́вшии о пресла́вном чудеси́ могу́щества Твоего́, Богоро́дице, во оживле́нии о́трока, устреми́шася от разли́чных ме́ст к о́бразу Твоему́, Изба́вительнице, и, прие́млюще исцеле́ния, с весе́лием Тя́ велича́ху.

Припев: Пресвята́я Богоро́дице, спаси́ на́с.

Милосе́рда су́щи, Чи́стая, я́ко Всеблаго́е Сло́во на спасе́ние на́ше воплоти́вшая, по́мощи и избавле́ния Твоего́ не лиши́ на́с, с ве́рою притека́ющих к чудотво́рней ико́не Твое́й, Изба́вительнице.

Припев: Пресвята́я Богоро́дице, спаси́ на́с.

Ты́ похвала́ ве́рных, Ма́ти Всепе́тая, Ты́ киво́т святы́ни, освяще́ние подаю́щая, Ты́ целе́б исто́чник неисчерпа́емый и от бе́д Изба́вительница моля́щихся Тебе́ пред святы́м о́бразом Твои́м.

Сла́ва Отцу́ и Сы́ну и Свято́му Ду́ху:

Неду́гами угнета́емых и искуше́ний бори́теля, избавля́й на́с от си́х, Богороди́тельнице, и в ча́с исхо́да не преда́ждь ду́ш на́ших на одоле́ние супоста́том, да воспева́ем вели́чия Твоя́.

И ны́не и при́сно и во ве́ки веко́в. Ами́нь.

Непобеди́мая Воево́до вожде́й и во́инств христиа́нских, христолюби́вое во́инство, щито́м ве́ры и Креста́ вооруже́нных, победоно́сны явля́й, избавля́ющи от все́х наве́тов вра́жиих.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Припев: Пресвята́я Богоро́дице, спаси́ на́с.

В ско́рби ма́ле наказа́ние Сы́на Твоего́ бы́сть обита́телем ве́си, и, поболе́вше, призва́ша Тя́, Ма́терь щедро́т, и Тобо́ю возста́ша от отча́яния и возвесели́шася, роса́ бо благода́ти, я́же от ико́ны Твоея́, исцеле́ние и́м бы́сть.

Припев: Пресвята́я Богоро́дице, спаси́ на́с.

Благода́ть точа́щую ико́ну Твою́, Изба́вительнице, ве́рному Твоему́ рабу́, с собо́ю всегда́ носи́вшу, возбрани́ла еси́, Госпоже́, скрыва́ти ю́ от ве́рных, да избавля́ются от бе́д и неду́гов прибега́ющии к Тебе́.

Припев: Пресвята́я Богоро́дице, спаси́ на́с.

Тобо́ю, Всеми́лостивая Влады́чице, свобожде́ние от лю́тых ниспосла́ся, прите́кшим с ве́рою ко свято́му о́бразу Твоему́, наде́жда же, покро́в и неруши́мо весе́лие дарова́ся скорбя́щим, Богора́дованная.

Припев: Пресвята́я Богоро́дице, спаси́ на́с.

Ужасо́шася бе́дствовавшии о бога́тстве даро́в Твои́х, Де́во, в чудесе́х от о́браза Твоего́, к нему́же припа́дающе, ра́достно взыва́ху: вои́стину Ты́ еси́ Изба́вительница от все́х бе́д.

Сла́ва Отцу́ и Сы́ну и Свято́му Ду́ху:

Ра́досте А́нгелов и челове́ков, свобо́дна мя́ печа́лей жите́йских сотвори́ и бу́дущия тесноты́ изба́ви и ве́чнаго огня́ ма́терним дерзнове́нием Твои́м, Всеблага́я, от бе́д Изба́вительнице.

И ны́не и при́сно и во ве́ки веко́в. Ами́нь.

Богоизбра́нная Присноде́во, в руне́ ороше́нном предви́денная дре́вле, окропи́ росо́ю благода́ти изсо́хшую зе́млю се́рдца моего́ и плодоно́сну соде́лай ду́шу мою́ благи́м дея́нием и зре́нием.

Пе́снь 6.

Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Ки́й у́м пости́гнет, Госпоже́, держа́ву кре́пости Сы́на Твоего́, изве́дша лю́ди Своя́ из земли́, ея́же вереи́ закле́пи ве́чнии, и Тебе́, Ма́терь Свою́, соде́лавша враго́м стра́шну, из чре́ва а́дова избавля́ющую призыва́ющия Тя́.

Припев: Пресвята́я Богоро́дице, спаси́ на́с.

Ки́й язы́к изъясни́т всепобежда́ющую си́лу Твою́, Влады́чице! Еди́но бо то́чию подо́бие лица́ Твоего́, я́ко о́гнь, опаля́ет зло́бныя ду́хи, лю́ди же Твоя́ врачу́ет и ра́дует, его́же благогове́йно лобыза́ем, раби́ Твои́.

Припев: Пресвята́я Богоро́дице, спаси́ на́с.

Ко́е сло́во изобрази́т вели́чие чуде́с Твои́х, Всеми́лостивая от бе́д Изба́вительнице! То́чию бо принесе́ся свята́я ико́на Твоя́ к лю́те мучи́мей бесо́м, а́бие исчезе́ мучи́тель, и исцеле́нная велегла́сно просла́ви си́лу Твою́.

Припев: Пресвята́я Богоро́дице, спаси́ на́с.

От оби́лия благода́ти, прису́щей о́бразу Твоему́, Богоневе́сто, коли́ко бесну́емых и ины́х неду́жных Тобо́ю исцеле́ша, коли́ко скорбя́щих на весе́лие приложи́ся, с ве́рою прите́кших ко ико́не Твое́й.

Сла́ва Отцу́ и Сы́ну и Свято́му Ду́ху:

О, вели́каго милосе́рдия Твоего́, Богороди́тельнице, благоволи́вшая чудотво́рным о́бразом Твои́м пребыва́ти у на́с! Что́ воздади́м Ти́ за благода́ть, ю́же яви́ла еси́ на́м, дарова́вши хра́му сему́ толи́ко свяще́нное бога́тство?

И ны́не и при́сно и во ве́ки веко́в. Ами́нь.

О Всепе́тая Ма́ти, держа́вный покро́ве ми́ра! Храни́ от все́х бе́д чту́щия Тя́, спобори́ и́м на враги́ христиа́нская необори́мою си́лою Твое́ю.

Конда́к, гла́с 8:

Ко ико́не Твое́й, Пресвята́я Госпоже́, бе́дствовавшии с ве́рою прите́кше, заступле́нием Твои́м изба́вишася от злы́х, но я́ко Ма́терь Христа́ Бо́га, и на́с свободи́ от лю́тых обстоя́ний, вре́менных и ве́чных, да зове́м Ти́: ра́дуйся, Изба́вительнице на́ша от все́х бе́д.

И́кос:

Соше́дшиися во хра́ме се́м, просла́вим пресла́вный хра́м Божества́, Пресвяту́ю Де́ву, пред о́бразом Ея́ со благогове́нием вопию́ще: ра́дуйся, Боже́ственныя сла́вы селе́ние; ра́дуйся, Влады́чице Небесе́ и земли́. Ра́дуйся, неистощи́мый исто́чниче чуде́с; ра́дуйся, всемо́щное врачева́ние неду́жных. Ра́дуйся, Прогони́тельнице де́монов; ра́дуйся, мертвеце́в оживле́ние. Ра́дуйся, оби́телей Горы́ Твоея́ покро́ве; ра́дуйся, и́ноков те́плое предста́тельство. Ра́дуйся, ве́рных Засту́пнице; ра́дуйся, спасе́ние ро́да христиа́нскаго. Ра́дуйся, Е́юже возсиява́ет ра́дость; ра́дуйся, Е́юже печа́ль престае́т. Ра́дуйся, Изба́вительнице на́ша от все́х бе́д.

Пе́снь 7.

Ирмос: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Пресвята́я Богоро́дице, спаси́ на́с.

Сотвори́ с на́ми по мно́жеству ми́лости Твоея́, Богоро́дице, и изми́ на́с по чудесе́м Твои́м, и да постыдя́тся от вся́кия си́лы, и кре́пость да сокруши́тся явля́ющих зла́я рабо́м Твои́м, о Тебе́ пою́щим: отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Тебе́, Де́во, халде́йская пе́щь проо́браз иму́щи, о́троки росо́ю прохлажда́ше посреде́ пла́мене. Те́мже и на́с, о́браз Тво́й иму́щих, во огни́ искуше́ний прохлади́ и неопали́мы соблюди́ благода́тию Сы́на Твоего́, да пое́м Ему́: отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Седмери́цею разжига́емыя стре́лы седми́ смертоно́сных страсте́й, я́же испуска́ет возстаю́щий на ны́ седмигла́вый зми́й диа́вол, угаси́ и сокруши́, Влады́чице, да, я́коже о́троцы неврежде́ннии, пое́м: отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Седмисве́щный свети́льник разуме́ем Тя́, Богоблагода́тная Мари́е, седмию́ дара́ми Ду́ха светя́щий ве́рным, облагодати́ у́бо и уще́дри пою́щих о Тебе́, Пода́телю благи́х: отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Тя́, Госпоже́, иму́ще милосе́рдия неиждива́емое сокро́вище и святу́ю ико́ну Твою́, Изба́вительнице, в покро́в оби́тели и во избавле́ние от бе́д, Сы́ну Твоему́ о Тебе́ пое́м: отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Я́ко Царя́ ца́рствующих Ма́терь, мо́лим Тя́, Влады́чице: оте́честву на́шему и христолюби́вому во́инству бу́ди несокруши́мая кре́пость, подаю́щи и́м блага́я, пою́щим: отце́в Бо́же, благослове́н еси́.

Пе́снь 8.

Ирмос: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Богоро́дице, спаси́ на́с.

Я́коже трие́ о́троцы, храни́мии во огни́, поя́ху и благословля́ху Бо́га, та́ко и ве́рнии, Тобо́ю, Благослове́нная, изба́вльшеся от огня́, бе́д и неду́гов, вся́ дела́,— взыва́ху,— Го́спода по́йте и превозноси́те Его́ во ве́ки.

Припев: Пресвята́я Богоро́дице, спаси́ на́с.

Я́коже от зловре́дных пруго́в изба́вила еси́ пре́жде к о́бразу Твоему́ прите́кших, Богоро́дице, та́ко и ны́не не преста́й от те́х и вся́каго вреда́ избавля́ти оби́тель сию́, Го́ру, Росси́ю и повсю́ду правосла́вныя, да сла́вим Тя́ во ве́ки.

Припев: Пресвята́я Богоро́дице, спаси́ на́с.

Я́коже уме́рша, осене́нна ико́ною Твое́ю, Де́во, оживи́ла еси́, оживотворя́й и на́с, отводя́щи от смертоно́снаго пути́ и наставля́ющи на стезю́ ве́чнаго живота́, да, спаса́еми Тобо́ю, превозно́сим Тя́ во ве́ки.

Припев: Пресвята́я Богоро́дице, спаси́ на́с.

Я́коже повеле́ла еси́ рабу́ Твоему́ не скрыва́ти от ве́рных благода́ти, точа́щияся от свята́го о́браза Твоего́, Всеблага́я Изба́вительнице, источа́й сию́ и на́м, рабо́м Твои́м, да прославля́ем Тя́ во ве́ки.

Сла́ва Отцу́ и Сы́ну и Свято́му Ду́ху:

Я́коже мно́гих исцели́ла еси́, Госпоже́, от мучи́тельства де́монскаго и ины́х неду́гов, и на́с свобожда́й боле́зней душе́вных и теле́сных и от все́х сете́й вра́жиих, да воспева́ем Тя́ во ве́ки.

И ны́не и при́сно и во ве́ки веко́в. Ами́нь.

Я́коже А́нгел воодушеви́ Гедео́на на побежде́ние мадиа́млян, воодушевля́й, Всецари́це, и сла́вящия Тя́, вся́кое шата́ние враго́в низлага́ющи, да благословля́ем Тя́ во ве́ки.

Песнь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Пресвята́я Богоро́дице, спаси́ на́с.

И́ночествующии сея́ оби́тели, к Ма́тери Го́спода Вы́шняго притеце́м дне́сь, моля́щеся пред чудотво́рною ико́ною Ея́, е́юже посети́ скорбя́щия и сотвори́ избавле́ние лю́дем Свои́м.

Припев: Пресвята́я Богоро́дице, спаси́ на́с.

Ще́драго ро́ждшая и Ми́лостиваго Влады́ку и Изба́вителя все́х, покажи́, Всеблага́я, щедро́ты Твоя́ на на́с, пра́зднующих честно́му о́бразу Твоему́, и сотвори́ избавле́ние от бе́д лю́дем Свои́м.

Припев: Пресвята́я Богоро́дице, спаси́ на́с.

В Тебе́, Богоро́дице, воздви́же Сы́н Тво́й ро́г спасе́ния на́м, укрепи́ у́бо рабы́ Твоя́ служи́ти Ему́ преподо́бием и пра́вдою пред Ни́м вся́ дни́ живота́ на́шего и твори́ избавле́ние от бе́д лю́дем Свои́м.

Припев: Пресвята́я Богоро́дице, спаси́ на́с.

При́зри, Де́во Изба́вительнице, на моли́твенныя воздыха́ния на́ша, не оста́ви ны́ безпомо́щны во искуше́ниих и бу́ди Моли́твенница ко Го́споду, да пода́ст грехо́м на́шим проще́ние и избавле́ние от бе́д лю́дем Свои́м.

Сла́ва Отцу́ и Сы́ну и Свято́му Ду́ху:

Госпоже́ Всеми́лостивая, не преста́й Го́ру Твою́ и оби́тель сию́, Росси́ю и вся́ правосла́вныя посеща́ти благода́тию и твори́ти избавле́ние от бе́д лю́дем Свои́м.

И ны́не и при́сно и во ве́ки веко́в. Ами́нь.

Хода́таицу о на́с, Сло́ве Бо́жий, предлага́ем Ма́терь Твою́, от Нея́же воплоти́лся еси́ на спасе́ние на́ше, моли́твами Ея́ прости́ и поми́луй на́с, Незло́биве, согреша́ющих Тебе́, и сотвори́ избавле́ние от бе́д лю́дем Твои́м.

Свети́лен.

Ма́ти Све́та у́мнаго, просвети́ песносло́вящыя Тя́ пред лучеза́рною ико́ною Твое́ю, мра́к страсте́й на́ших прожени́ и осия́ния пра́ведных прича́стники ны́ сотвори́ Твои́м предста́тельством, Преблагослове́нная.

Молитва Пресвятой Богородице пред иконой Ея «Избавительница»

О, Ма́ти Бо́жия, по́моще и защи́та на́ша, егда́ попро́сим, бу́ди изба́вительнице на́ша, на Тя бо упова́ем и всегда́ вседу́шно Тя призыва́ем: умилосе́рдися и помози́, пожале́й и изба́ви, приклони́ у́хо Твое́ и на́ши ско́рбныя и сле́зныя моли́твы приими́, и я́коже хо́щеши, успоко́й и обра́дуй нас, лю́бящих твоего́ Безнача́льного Сы́на и Бо́га на́шего. Ами́нь.