Канон Пресвятой Богородице перед чудотворной Ее иконой «Достойно есть».

Тропа́рь, гла́с 4:

Отце́в все́ Афо́нское мно́жество, собери́теся, ве́рно пра́зднующе, дне́сь ра́дующеся и све́тло восклица́юще вси́ в весе́лии, Бо́жия бо Ма́ти ны́не от Ангела пресла́вно воспева́ется. Те́мже, я́ко Богоро́дицу, при́сно Сию́ сла́вим.

Ин тропа́рь, гла́с то́йже:

Притеце́м, ве́рнии, со дерзнове́нием к ми́лующей Цари́це Богоро́дице и уми́льно воззове́м к Не́й: низпосли́ на ны́ ми́лости Твоя́ бога́тыя: Це́рковь на́шу сохрани́, лю́ди во благоде́нствии соблюди́, зе́млю на́шу изба́ви от вся́каго обстоя́ния, ми́р да́руй ми́рови и спасе́ние душа́м на́шим.

Велича́ние:

Досто́йно е́сть велича́ти Тя́, Богоро́дице, Честне́йшую херуви́м и Сла́внейшую без сравне́ния серафи́м.

Стихи́ра, гла́с 2.

Благовести́ Гаврии́л Благода́тней пре́жде: Ра́дуйся, Неневе́стная Отрокови́це и Неискусобра́чная! Ны́не же, я́влься в стра́ннем о́бразе мона́шествующему, пе́снь воспе́ но́вую. Тогда́ благовести́в сказа́ Тебе́, Чи́стая, ны́не воспе́ Тя́ чу́дно, я́ко Пренепоро́чную и ро́ждшую, Де́во, Го́спода.

Кано́н Богома́тери. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Афо́н, и́же нарече́ся Свята́я Гора́, Всенепоро́чная, Чи́стая, я́коже прорекла́ еси́, ны́не све́тло пра́зднует Тебе́, Святе́й вои́стинну Горе́ су́щей, и боже́ственное соверша́ет дне́сь Тебе́ торжество́.

Припев: Пресвята́я Богоро́дице, спаси́ на́с.

Боже́ственным при́сно Гаврии́л та́йнам Твои́м изря́дным слу́жит чу́дно, о Всенепоро́чная, те́мже и ны́не, Де́во, Твоея́ пе́сни, ра́дуяся, пое́т преднача́тие.

Сла́ва Отцу́ и Сы́ну и Свято́му Ду́ху:

Не престае́ши, Всенепоро́чная, соверша́ти при́сно рабо́м Твои́м пресла́вная чудеса́, Ма́ти Чи́стая, и во вся́ времена́ излива́ти благодея́ния, Пресвята́я, я́ко Благоде́тельница на́ша.

И ны́не и при́сно и во ве́ки веко́в. Ами́нь.

Ка́ко изреку́ велича́йшее, соверше́нное тобо́ю, арха́нгеле, бли́з скита́ Каре́йскаго чу́до, егда́ научи́л ны́ еси́ твои́м явле́нием пе́сни досто́йней Богома́тери?

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Пресвята́я Богоро́дице, спаси́ на́с.

Приспе́ вре́мя собра́тися все́м отце́м в хра́ме Прота́тстем, всено́щную соверши́ти хвалу́, тогда́ боже́ственную пе́снь Твою́, Чи́стая, воспева́ет арха́нгел.

Припев: Пресвята́я Богоро́дице, спаси́ на́с.

Прии́де со ины́ми и ста́рец о́наго послу́шника и́нока, и сему́ еди́ному оста́вшуся Гаврии́л арха́нгел яви́ся в подо́бнем о́бразе, предначина́я пе́снь Твою́.

Сла́ва Отцу́ и Сы́ну и Свято́му Ду́ху:

Приложе́ние творя́ше к пе́сни Твое́й, я́ко преднача́тие, Чи́стая, тоя́, ю́же пре́жде воспе́ Косма́, боже́ственный Тво́й служи́тель, глаго́ля, я́ко та́ко обы́чай е́сть и́м начина́ти пе́снь Твою́.

И ны́не и при́сно и во ве́ки веко́в. Ами́нь.

О, чуде́с Твои́х стра́шных, арха́нгеле боже́ственный Гаврии́ле! Ка́ко во и́ночестем о́бразе пе́снь воспе́л еси́ Богома́тери дне́сь и, я́ко подоба́ше, возвели́чил еси́?

Ин конда́к, гла́с 8:

Арха́нгельский гла́с вопие́м Ти́, Всецари́це: досто́йно е́сть, я́ко вои́стинну, блажи́ти Тя́, Богоро́дицу, Присноблаже́нную и Пренепоро́чную и Ма́терь Бо́га на́шего.

Седа́лен, гла́с 4.

Удиви́ся и́нок Ангела пе́сни, стра́нно пою́щаго ту́ю пред Твое́ю пе́снию, о Чи́стая, я́вльшуся сему́ во о́бразе подо́бнем, а поне́же и́нок написа́тися жела́ше о́ней, на дщи́це ка́менней руко́ю чу́дно начерта́, и неви́дим бы́сть. Отто́ле пропове́дася все́м пе́снь сия́, е́же Богоро́дицу Тя́ сла́вити, Всенепоро́чная.

Пе́снь 4.

Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Припев: Пресвята́я Богоро́дице, спаси́ на́с.

Досто́йно, предначина́ше, я́ко вои́стинну е́сть блажи́ти Тя́, Пречи́стая, Богоро́дицу, Присноблаже́нную и вои́стинну Пренепоро́чную и Бо́га Ма́терь Всенескве́рную.

Припев: Пресвята́я Богоро́дице, спаси́ на́с.

Предначина́тельную сию́ пе́снь боже́ственному Гаврии́лу стра́нно пою́щу, удивля́шеся слу́шаяй и́нок, а поне́же вопроша́ше, — та́ко пе́ти, — рече́, — обыко́хом.

Сла́ва Отцу́ и Сы́ну и Свято́му Ду́ху:

Глаго́лати и ему́ та́ко повелева́ше Гаврии́л сие́ преднача́тие, та́же пе́ти пе́снь Космы́ боже́ственную и все́х научи́ти сему́, боже́ственный рече́ арха́нгел.

И ны́не и при́сно и во ве́ки веко́в. Ами́нь.

Зане́же проси́ и́нок, Гаврии́ле боже́ственне, написа́ти пе́снь, ю́же услы́ша, ты́ начерта́л еси́ а́бие на дске́ ка́менней, арха́нгеле. Сла́ва неизрече́нней си́ле твое́й!

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Пресвята́я Богоро́дице, спаси́ на́с.

Ужасе́ся челове́к ди́вным чудесе́м, егда́ чу́до узре́, я́ко дска́ ка́менная начерта́ся и внеза́пу собесе́дующий ему́ неви́дим бы́сть, Гаврии́л, сла́вный и честны́й архистрати́г.

Припев: Пресвята́я Богоро́дице, спаси́ на́с.

Ста́рец, егда́ во у́трие в ке́ллию свою́ возврати́ся и егда́ стра́нная сия́ услы́ша, дску́ же ка́менну узре́, руко́ю начерта́нну, взе́м же а́бие с ученико́м сию́, принесо́ша Горы́ нача́льствующим.

Сла́ва Отцу́ и Сы́ну и Свято́му Ду́ху:

Зна́емы и все́м изве́стны бы́ша сия́ чудеса́, Де́во, поне́же дску́ ка́менную а́бие в ца́рствующий гра́д торже́ственно отсла́ша Горы́ нача́льствующии, во е́же сла́вити Тя́ все́м.

И ны́не и при́сно и во ве́ки веко́в. Ами́нь.

Стеко́шася вси́ во убо́гое обита́лище, в не́мже стра́нное чу́до соде́яся, и Твое́й ико́не, пред не́юже воспе́та бы́сть пе́снь, Всечи́стая, благогове́йне покланя́ющеся, единогла́сно уста́виша в Прота́те то́й храни́тися.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

С неизрече́нною вси́ стеко́шася ра́достию и весе́лием, е́же взя́ти честну́ю ико́ну Твою́, иере́и, и мона́шествующии, и все́ Горы́ мно́жество, Пречи́стая.

Припев: Пресвята́я Богоро́дице, спаси́ на́с.

Боже́ственную Твою́ ико́ну сию́ со вся́ким благогове́нием держа́ще отцы́ вси́, пле́щуще, с пе́сньми и пе́ньми внесо́ша в Боже́ственный хра́м Тво́й, Пречи́стая.

Сла́ва Отцу́ и Сы́ну и Свято́му Ду́ху:

Де́во! Стоя́ние всено́щное соверши́ша, любо́вию Тебе́ чту́ще и арха́нгела, пе́снь Твою́ возвести́вша, и ны́не мы́ та́кожде ва́с вку́пе почита́ем.

И ны́не и при́сно и во ве́ки веко́в. Ами́нь.

Отцы́ боже́ственнии, с пе́сньми, по тайноде́йствии, взе́мше боже́ственную Твою́ ико́ну, вну́трь хра́ма, в невходи́мая, со мно́гим благогове́нием поста́виша.

Конда́к, гла́с 4.

Пра́зднует дне́сь ве́сь Афо́н, я́ко пе́снь прия́т от Ангела чу́дно Тебе́, Чи́стей Богома́тери, Юже вся́ тва́рь чти́т, сла́вящи.

Икос:

Ны́не да весели́тся мно́жество отце́в Афо́на: се́ бо Де́ве пре́жния пе́сни, ю́же чу́дно воспе́ Ей Косма́, боже́ственный песнопе́вец, Гаврии́л ны́не пое́т преднача́тие, и́же: Досто́йно е́сть я́ко вои́стинну, — глаго́лаше и́ноку, — блажи́ти Тя́, Богоро́дицу, Присноблаже́нную и Пренепоро́чную и Ма́терь Бо́га на́шего; сему́ повелева́ше, да та́ко вси́ предначина́ют Твою́ пе́снь. И, сию́ начерта́в руко́ю на дске́ ка́менней, внеза́пу бы́сть неви́дим. Инок же, дивя́ся, воспева́ше, я́коже научи́ся, чи́стую Богома́терь, Юже вся́ тва́рь чти́т, сла́вящи.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Пресвята́я Богоро́дице, спаси́ на́с.

Преизря́дную че́сть воздая́ху вси́ отцы́, и пре́жнии и ны́нешнии, се́й ико́не Твое́й боже́ственней, Пренепоро́чная, пра́веднейше: че́сти бо премно́гия удосто́ися пресла́вно.

Припев: Пресвята́я Богоро́дице, спаси́ на́с.

Ве́лия благода́ти удосто́ися боже́ственная ико́на Твоя́, Пренепоро́чная, я́сно бо пред не́ю Твоея́ пе́сни преднача́тие пе́рвее возгласи́ся благоволе́нием Твои́м. Те́мже по до́лгу ны́не се́й с любо́вию покланя́емся.

Сла́ва Отцу́ и Сы́ну и Свято́му Ду́ху:

Не боготвори́м ико́ну Твою́, Пречи́стая, я́коже на ны́ клеве́щут, но относи́тельне чти́м, Пренепоро́чная, сию́, ра́дующеся, лобыза́ем че́ствовательно, раби́ Твои́, ны́не же и во ве́ки.

И ны́не и при́сно и во ве́ки веко́в. Ами́нь.

С Тобо́ю, Пресвята́я, не престае́м чти́ти и сла́внаго Гаврии́ла, на́с ны́не пе́сни Твое́й научи́вшаго, и́же и пре́жде, Тебе́ возглаша́я, взыва́ше: ра́дуйся, Благода́тная.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Богоро́дице, спаси́ на́с.

Отроко́м благочести́вым подража́юще, Богоро́дице, о чудесе́х Твои́х, я́же твори́т Госпо́дь во сла́ву Твою́, Пречи́стая, воспева́юще, пое́м: Го́спода по́йте, дела́, и превозноси́те во вся́ ве́ки.

Припев: Пресвята́я Богоро́дице, спаси́ на́с.

Вои́стинну благослове́н, и́же сподо́бися услы́шати боже́ственныя хвалы́ Твоя́ от Ангела, Пресвята́я Де́во Пренепоро́чная, я́коже Сы́н Тво́й благоволи́, и́мже все́х научи́ пе́ти Тя́ досто́йно и превозноси́ти Тя́ во вся́ ве́ки.

Сла́ва Отцу́ и Сы́ну и Свято́му Ду́ху:

«Пе́ние» — по достоя́нию уста́вися именова́ти ме́сто о́но, иде́же соверши́ся сие́ чу́до, я́коже нарица́ние удержа́ся до на́с и навсегда́, на па́мять, Пречи́стая, чудесе́, я́ко да воспева́ем Тя́ и превозно́сим во вся́ ве́ки.

И ны́не и при́сно и во ве́ки веко́в. Ами́нь.

«Досто́йно е́сть» — да́же до ны́не нарица́ется я́сно и ке́ллия та́, в не́йже и бо́жественная Твоя́ ико́на, пред не́юже пе́рвее воспе́то бы́сть пе́сни Твоея́, Де́во Чи́стая, преднача́тие, я́ко да пою́т Тя́ вси́ досто́йно и превозно́сят Тя́ во вся́ ве́ки.

Песнь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Пресвята́я Богоро́дице, спаси́ на́с.

Вси́ раби́ Твои́, стека́емся во хра́м Тво́й Боже́ственный и пра́зднуем, све́тло соверша́юще ны́не торжество́, в ле́тную дне́сь па́мять чудесе́ Твоея́ пе́сни восполне́ния, Богоро́дице, Чи́стая Присноде́во.

Припев: Пресвята́я Богоро́дице, спаси́ на́с.

Досто́йно е́сть, — не престае́м, ра́дующеся, глаго́лати, — блажи́ти Тя́, Присноблаже́нную же я́ко вои́стинну и Пренепоро́чную и Ма́терь Бо́га на́шего, — от Ангела си́м ны́не научи́вшеся, Богоро́дице, Чи́стая Присноде́во!

Сла́ва Отцу́ и Сы́ну и Свято́му Ду́ху:

Вку́пе сла́внаго и боже́ственнаго арха́нгела Гаврии́ла дне́сь, ра́дующеся, прославля́ем, благода́рственная пе́ния принося́ще, ди́вным чу́дом все́х научи́вшаго боже́ственней пе́сни Чи́стыя Богома́тери, — ра́дуйся, таи́нниче неизрече́нных, — взыва́юще.

И ны́не и при́сно и во ве́ки веко́в. Ами́нь.

Ра́дуйся, хра́м Прота́та пресла́вный, хва́лящийся сокро́вищем всечестны́я, боже́ственныя и благода́ть точа́щия ико́ны еди́ныя Богома́тере и Предста́тельницы Афо́на: Гора́ бо сия́ избра́нный жре́бий Ея́ соде́лася.

Свети́лен.

Собери́теся, взыгра́йте, све́тло торжеству́йте, Гаврии́л бо боже́ственный мона́шествующему ны́не предста́ в и́ночестем о́бразе, пе́снь Богома́терню пе́рвый провеща́в в Горе́ Афо́нстей, стяжа́вшей Ю Предста́тельницу.

Молитва Пресвятой Богородице пред иконой Ея «Достойно есть» (Милующей)

О, Пресвята́я и Преми́лостивая Влады́чице Богоро́дице! Припа́дая к святе́й ико́не Твое́й, смире́нно мо́лимся Тебе́, вонми́ гла́су моле́ния на́шего, виждь ско́рби, виждь беды́ на́ша и, я́ко любвеоби́льная Ма́ти, потщи́ся на по́мощь нам безпо́мощным, умоли́ Сы́на Твоего́ и Бо́га на́шего: да не погуби́т нас за беззако́ния на́ша, но яви́т нам человеколю́бно свою́ ми́лость. Испроси́ нам, Влады́чице, у бла́гости Его́ теле́сное здра́вие и душе́вное спасе́ние, и ми́рное житие́, земли́ плодоно́сие, возду́ха благорастворе́ние, и благослове́ние свы́ше на вся блага́я дела́ и начина́ния на́ша. И я́коже дре́вле призре́ла еси́ ми́лостиво на смире́нное славосло́вие послу́шника Афо́нскаго, воспева́вшего Тя пред пречи́стою ико́ною Твое́ю и посла́ла еси́ к нему́ А́нгела научи́ти его́ пе́ти песнь небе́сную, е́юже славосло́вят Тя А́нгели; та́ко и ны́не приими́ на́ше усе́рдное молитвосло́вие, Тебе́ приноси́мое. О Цари́це Всепе́тая! Простри́ ко Го́споду богоно́сныя Твоя́ ру́це, и́миже Богомладе́нца Иису́са Христа́ носи́ла еси́, и умоли́ Его́ изба́вити нас от вся́каго зла. Яви́, Влады́чице, Твою́ ми́лость к нам: боля́щия исцели́, скорбя́щия уте́ши, бе́дствующим помози́ и сподо́би нас благоче́стно житие́ сие́ земно́е соверши́ти, христиа́нскую непосты́дную кончи́ну получи́ти и Небе́сное Ца́рствие насле́дити ма́терним хода́тайством Твои́м к Ро́ждшемуся от Тебе́ Христу́ Бо́гу на́шему, Ему́же со Безнача́льным Его́ Отце́м и Пресвяты́м Ду́хом подоба́ет вся́кая сла́ва, честь и поклоне́ние ны́не и при́сно, и во ве́ки веко́в. Ами́нь.