Канон второй Державной иконе Пресвятой Богородицы

Тропарь, глас 4:

Ангелов ли́цы благогове́йно Тебе́ слу́жат, и вся́ небе́сныя си́лы немо́лчными гла́сы Тя́ ублажа́ют, Богоро́дице Де́во; усе́рдно мо́лим Тя́, Влады́чице: да пребу́дет Боже́ственная благода́ть на честне́й ико́не Твое́й Держа́вней, и светоза́рный лу́чь сла́вы чуде́с Твои́х да нисхо́дит от нея́ на все́х, с ве́рою Тебе́ моля́щихся и вопию́щих Бо́гу: аллилу́ия.

Канон, глас 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Самоизмышле́нная па́губа покры́ла е́сть всю́ зе́млю Твою́, и мра́к ве́лий воцари́ся дне́сь в вертогра́де Твое́м. Тя́жко ми́ е́сть, и рыда́ю Тебе́, Ма́ти Пречи́стая, и, а́ще услы́шиши, ничесо́же устрашу́ся, и воспою́ и́мя Твое́, сла́вно бо просла́вися.

Припев: Пресвята́я Богоро́дице, спаси́ на́с.

Покая́нию научи́ мя́, Влады́чице, да де́нь и но́щь излию́ сле́зы моя́ и да смире́н от вра́г мои́х воскли́кну Тебе́: никто́же чи́ст, ра́зве Тебе́, Отрокови́це Чи́стая, и сохрани́т мя́ Держа́ва Твоя́, сла́вно бо просла́вися.

Припев: Пресвята́я Богоро́дице, спаси́ на́с.

А́з из глубины́ зо́л мои́х вопию́ Ти́, и не премолчи́т сто́н мо́й пред Тобо́ю: ви́ждь, о, ви́ждь, Влады́чице Де́во, и не отве́ржи мене́, услы́ши у́бо во́пль гла́са моего́ и покры́й мя́ ри́зою смиренному́дрия Твоего́, сла́вно бо просла́вися.

Сла́ва Отцу́ и Сы́ну и Свято́му Ду́ху:

Су́д гне́вен прии́де на ны́, и разсы́пася ра́дость люде́й Твои́х, вси́ бо пла́чем и рыда́ем и та́ко глаго́лем: о мечу́ Бо́жий, доко́ле не упоко́ишися? Преста́ни у́бо, пощади́ ны́, и воспое́м Держа́ву Влады́чицы на́шея, сла́вно бо просла́вися.

И ны́не и при́сно и во ве́ки веко́в. Ами́нь.

Из но́щи де́л пре́лести погуби́ша ны́, па́л е́сть Сио́н, и заключе́ни есмы́; Иерусали́ме, Иерусали́ме, почто́ та́ко омрачи́лся еси́? Того́ же ра́ди и возопии́м Влады́чице си́це: то́кмо Твоя́ Держа́ва сохрани́т ны́, сла́вно бо просла́вися.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Припев: Пресвята́я Богоро́дице, спаси́ на́с.

Обольсти́ мя́ зми́й, клеветни́к бо е́сть, и, душевре́дное в себе́ насажда́я, смути́лось се́рдце мое́. Я́ко ме́ртв, пребыва́ю и ки́ими словесы́ о себе́ возрыда́ю? Но Тя́ молю́, Влады́чице, молю́ и глаго́лю: облада́й над ни́м и от греха́ моего́ очи́сти мя́.

Припев: Пресвята́я Богоро́дице, спаси́ на́с.

Го́рьким пла́чем мои́м, я́ко во́ду, излию́ се́рдце мое́, сокруше́ние мое́ я́ко же́ртва Тебе́, и молю́ Тя́, Пречи́стая: е́й, не отврати́ мене́, раба́ Твоего́, сохрани́ у́бо и до после́дняго дне́.

Припев: Пресвята́я Богоро́дице, спаси́ на́с.

О́чи мои́ поме́ркнусте от я́звы моея́, и утруди́ мя́ бре́мя мое́. Иде́же е́сть сла́ва моя́? И заключи́ мене́ неду́г и вра́г, а́з же, я́ко ми́лость, прие́млю у́зы моя́ и пою́, веселя́ся: никто́ у́бо, я́ко Бо́г, вознесе́т Сы́й Христа́ Своего́ и Ма́терь Его́, Влады́чицу на́шу.

Сла́ва Отцу́ и Сы́ну и Свято́му Ду́ху:

Руковожде́ние пода́ждь ми́, Нищепита́тельнице, и озари́ мя́ све́том, е́же от Тебе́ во истоща́нии просия́вшим. О Богоро́дице и Ма́ти Бо́га моего́, бу́ди же и мне́ заступле́нием ве́рным.

И ны́не и при́сно и во ве́ки веко́в. Ами́нь.

Душетле́нными по́мыслы лю́те стужа́емь е́смь, и тя́жко ми́ е́сть. Не ли пре́зриши раба́ Твоего́? Молю́ у́бо Тя́, Пречи́стая: изведи́ мя́ от гно́ища моего́, исцели́ ра́ны моя́ и спаси́ мя́. Влады́чице, спаси́ мя́.

Седа́лен, гла́с 3:

О Ле́ствице неизрече́нна и преизря́дна, я́ко же и ле́ствица, ю́же ви́де пра́отец, с Небеси́ низходя́щу, та́ко и Ты́, Богоневе́сто, Не́бо и зе́млю сочета́вшая, Восхожде́ние Ты́ еси́, и́мже и упасе́мся от бе́д.

Слава и ныне: Христа́ Бо́га и Сы́на Твоего́, между́ двою́ разбо́йнику на Кресте́ ви́сима, зря́ще, го́рько рыда́ла еси́, Ма́ти, и жа́ло вни́де в се́рдце Твое́. О Влады́чице Де́во, боле́знующи у́бо Сама́, спаси́ дне́сь вся́ удруче́нныя, истязу́емыя лю́ди Твоя́.

Пе́снь 4.

Ирмос: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Истоща́ние прии́де на рабы́ Твоя́, и до́м на́ш оста́вися пра́зден и пу́ст. Хожду́ и взыва́ю, но не́сть ми́ спаса́юща, еди́на у́бо сме́рть отвещава́ет на гла́с мо́й, и, рыда́я, молю́ Тя́ и глаго́лю: не отве́ржи мене́ и Ты́, Де́во Чи́стая, да спасе́н бу́ду.

Припев: Пресвята́я Богоро́дице, спаси́ на́с.

Цветоно́сную простри́, Влады́чице, ру́ку Твою́, и оживе́т вертогра́д Тво́й, и ни́щии обря́щут хле́бы своя́, и убо́зии ри́зы своя́, вси́ восхва́лят и́мя Твое́, я́ко вои́стинну неизрече́нна е́сть ми́лость Твоя́.

Припев: Пресвята́я Богоро́дице, спаси́ на́с.

Егда́ восхо́щеши, никто́же сокруши́т ны́, я́ко вели́кое дерзнове́ние обрела́ еси́ у Христа́ Бо́га, Сы́на Твоего́, и, сие́ зря́ще, вопие́м Ти́, Влады́чице, да сохрани́ши и ны́ под кро́вом Твои́м.

Припев: Пресвята́я Богоро́дице, спаси́ на́с.

Правосла́внии Христиа́ны, под Твою́ ми́лость дне́сь притека́ем и, явле́ние честны́я ико́ны Твоея́ све́тло пра́зднующе, си́це глаго́лем Тебе́: простира́еши и на́м, Благода́тная, необори́мую ри́зу Свою́.

Сла́ва Отцу́ и Сы́ну и Свято́му Ду́ху:

Разуме́йте, непокори́вии язы́цы, и не хвали́теся о мы́шце свое́й, зане́ еди́н е́сть гра́д несокруши́м, и сия́ Твоя́, Присноде́во Влады́чице, Держа́ва и Ца́рство, е́же и стои́т до сконча́ния ве́ка.

И ны́не и при́сно и во ве́ки веко́в. Ами́нь.

А́з, егда́ и во у́зех, но Тобо́ю, Отрокови́це Чи́стая, вы́ну свобо́дь е́смь, и не в стра́х ми́ умале́ние мое́ е́сть, но я́ко зла́ту — горни́ло и о́гнь, сие́ бо разуме́я, сла́влю у́зы моя́ и велича́ю Тя́, Непоро́чную Де́ву.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Припев: Пресвята́я Богоро́дице, спаси́ на́с.

Водворя́ет ны́ зми́й во юдо́ль пла́ча и ча́яний злы́х. Не мо́жем у́бо терпе́ти ско́рби своя́, но Ты́, Богороди́тельнице, простира́еши на́м покро́в Сво́й, и спасе́ни бу́дем от зо́л.

Припев: Пресвята́я Богоро́дице, спаси́ на́с.

Отрокови́це Де́во, спасла́ еси́ на́с от рабо́ты вра́жия, и те́м красно́ написа́ся и́мя Твое́: Цари́ца ми́рови Ты́ еси́, и Держа́ва Твоя́ да́же до после́дняго дне́.

Припев: Пресвята́я Богоро́дице, спаси́ на́с.

Све́та непристу́пна Ма́ти Ты́ еси́, и всу́е дне́сь подви́жися тьма́ супроти́вная, никто́же возмо́жет на ны́, я́ко с на́ми Влады́чица на́ша, и сла́ва Твоя́ несконча́ема е́сть.

Припев: Пресвята́я Богоро́дице, спаси́ на́с.

Лю́дие Бо́жии, дру́зи моя́, уве́руйте во Христа́, Бо́га на́шего, и в преди́вно Его́ Ро́ждшую, храня́ще у́бо за́поведи Бо́га Вы́шняго и обря́щете душа́м ва́шим ми́р и ве́лию ми́лость.

Сла́ва Отцу́ и Сы́ну и Свято́му Ду́ху:

А́нгели, и ти́и просла́виша Тя́, Влады́чицу вся́ческих и па́че Не́ба Превознесе́нную, пою́т бо Христу́, Сы́ну Твоему́: искупи́л еси́ лю́ди Твоя́, и в челове́цех благоволе́ние.

И ны́не и при́сно и во ве́ки веко́в. Ами́нь.

Вели́чие Твое́ кто́ испове́сть, Богоро́дице, я́ко па́че смы́сла родила́ еси́ Бо́га Сло́ва, и не мо́жет язы́к челове́чь досто́йно Тя́ пе́ти, но приими́ ми́лостивно моли́тву мою́ и сохрани́ раба́ Твоего́.

Пе́снь 6.

Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щем, от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Но́щь, и мра́к, и во́ды пререка́ния лю́те истязу́ют зе́млю Твою́, се́ у́бо преще́ние Бо́жие и гне́в Того́ е́сть, но молю́ Тя́, Пречи́стая, молю́ и глаго́лю: а́ще хо́щеши — мо́жеши, и ве́м, я́ко умоли́т Отрокови́ца за Держа́ву Свою́.

Припев: Пресвята́я Богоро́дице, спаси́ на́с.

Уязви́хомся от зми́я, лю́ди Твоя́, и, я́ко из а́дова чре́ва, вопие́м Ти́, Благода́тная Де́во: не на́м, но ра́ди от Тебе́ избра́нных и а́нгельское житие́ возлюби́вших, спаси́, Богоро́дице, и вся́ правосла́вныя.

Припев: Пресвята́я Богоро́дице, спаси́ на́с.

Ю́зники окова́нныя, что́, о Цари́це, без Тебе́ возмо́жем и ка́ко от гре́х свои́х упасе́мся? Но Ты́, я́ко Блага́я, утверди́ в на́с святы́ню Свою́ и не отве́ржи моля́щихся Ти́.

Припев: Пресвята́я Богоро́дице, спаси́ на́с.

Затми́ся со́лнце мое́ и ду́х мо́й изы́де в непотре́бие земли́, но те́мже и вознепщева́х о све́те Со́лнца Пра́вды и смири́х горды́ню мою́, Тебе́ взыва́ю, Де́во Чи́стая, да спасе́ши раба́ Твоего́.

Сла́ва Отцу́ и Сы́ну и Свято́му Ду́ху:

Единому́дренни да пребу́дем, лю́дие, и да возра́дуемся о ра́нах, и́же от Сотво́ршаго су́ть, я́ко, наказу́я, наказа́ ны́ Госпо́дь, не сме́рти у́бо предаде́ и научи́ разуме́ти во́лю Свою́.

И ны́не и при́сно и во ве́ки веко́в. Ами́нь.

Ме́ртвии возста́нут, и изве́ржет земля́ ко́сти своя́, зане́ все́х совоскреси́т на́с истоща́ние Претерпе́вый, и Се́й е́сть Ца́рь ми́рови, и Ма́терь Его́ — Влады́чица на́ша.

Конда́к, гла́с 8:

Взбра́нной Воево́де победи́тельныя пе́сни прино́сим, я́ко дарова́ся на́м Держа́ва Твоя́, и ничесо́же устраши́мся, не от ми́ра бо спасе́ние на́ше, но Превознесе́нныя Влады́чицы милосе́рдием огражда́емся и тому́ дне́сь ра́дуемся, я́ко прии́де Засту́пница на стра́жу земли́ Своея́.

И́кос:

Зря́ще ико́ну Твою́: во о́блацех — Бо́га и Отца́ и на ру́цех Твои́х — Христа́ Бо́га, Сы́на Твоего́ и Спа́са ми́рови, покланя́емся ко хра́му Твоему́ и, лобыза́я честны́я но́зи Твоя́, взыва́ем Ти́ си́це: вои́стинну дарова́ся на́м спасе́ние ве́лие и наде́жда на́ша вы́ну пред на́ми, я́ко прии́де Влады́чица на стра́жу земли́ Своея́.

Пе́снь 7.

Ирмос: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Пресвята́я Богоро́дице, спаси́ на́с.

Ликовству́йте, ве́рних собо́ри, и по́йте Царе́ви, И́же на Го́рних седя́щу, я́ко благослове́н и ди́вен е́сть Бо́г на́ш, Ве́лий Ревни́тель, и стра́шен Го́рний Сио́н и просла́влен во ве́ки.

Припев: Пресвята́я Богоро́дице, спаси́ на́с.

Юдо́лию пла́ча земля́ показа́ся Твоя́, о́гнь паля́щ прии́де и объя́т ю́, но не рыда́йте, бра́тие, и́бо, я́ко купина́ неопали́ма, хра́м от Сио́на и просла́влен во ве́ки.

Припев: Пресвята́я Богоро́дице, спаси́ на́с.

И́мамы Тя́, Росода́тельницу, и николи́же устраши́мся ве́тров, от пусты́нь воздвиза́емых, Тя́, бо, Пречи́стую, мо́лим и та́ко зове́м Ти́: оживи́ вертогра́д Тво́й, и бу́дет просла́влен во ве́ки.

Припев: Пресвята́я Богоро́дице, спаси́ на́с.

Сло́во ле́стче положи́ша на мне́ врази́ моя́, и сокруша́ет мя́ ро́г непокори́вых. Дру́зи мои́, и ти́и оста́виша мя́; но не оста́ви мене́ и Ты́, Влады́чице, и спаси́ мя́, я́ко Ма́ти Бо́га моего́ Ты́ еси́, и хра́м Тво́й просла́влен во ве́ки.

Сла́ва Отцу́ и Сы́ну и Свято́му Ду́ху:

Обручи́ мя́, о Присноде́во, святы́не Свое́й, и не убою́ся от те́м вра́г мои́х, лю́те напа́дших на мя́, и та́ко возопию́ Ти́: Иерусали́ме, Иерусали́ме, святы́й еси́ гра́д и просла́влен во ве́ки.

И ны́не и при́сно и во ве́ки веко́в. Ами́нь.

Херуви́ми, и Серафи́ми, и вся́ Небе́сныя во́и пою́т Тя́, Преблагослове́нную, и, вопию́ще, глаго́лют: не́сть хра́м ины́й, ра́зве Тебе́, и се́й препросла́влен во ве́ки.

Пе́снь 8.

Ирмос: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Богоро́дице, спаси́ на́с.

Рыда́ние мое́ приими́, Влады́чице моя́, и угаси́ о́гнь, е́же от супоста́т разжже́н е́сть, да позна́ю Бо́га моего́ и со тща́нием воскли́кну Ему́: по́йте и превозноси́те Его́ во ве́ки.

Припев: Пресвята́я Богоро́дице, спаси́ на́с.

А́лчущ е́смь, и взыва́ю Ти́, Влады́чице, и молю́ Тя́, да не истле́ние бу́дет ми́ в че́сть, но ми́лость Твоя́, та́ко о не́й возглаго́лю: благослови́те, вся́ дела́ Госпо́дня, Го́спода, по́йте и превозноси́те во ве́ки.

Припев: Пресвята́я Богоро́дице, спаси́ на́с.

Непрестаю́щу горды́ню отжени́ от мене́, Благода́тная, и угаси́ о́гнь я́звы моея́, и, не я́ко ды́м, но я́ко благоуха́ние Го́сподеви, воспою́ бра́тием мои́м: о́троцы, благослови́те, свяще́нницы, по́йте, лю́дие, превозноси́те Го́спода во ве́ки.

Припев: Пресвята́я Богоро́дице, спаси́ на́с.

Из пещи́ разжже́ния моего́, я́ко из а́дова пла́мени, вопию́ Ти́: о Влады́чице Де́во, окропи́ мя́ росо́ю сле́з Твои́х, у Креста́ Сы́на Твоего́ излия́нных, и воскли́кну, взыва́я: благослови́те Ма́терь Бо́га Вы́шняго, Го́спода по́йте и превозноси́те во ве́ки.

Сла́ва Отцу́ и Сы́ну и Свято́му Ду́ху:

Любомра́чное о́ко мое́ просвети́ све́том смиренному́дрия Твоего́, и позна́ю во́лю Сотвори́вшаго мя́, и не от мудрова́ния моего́, но се́рдцем мои́м воскли́кну о Не́м: Его́ по́йте и превозноси́те во ве́ки.

И ны́не и при́сно и во ве́ки веко́в. Ами́нь.

Ю́дуже гре́х, та́мо и скре́жет зубо́м, но не премолчи́, Де́во Чи́стая, и да́ждь ми́ глаго́л разуме́ния, да потерплю́ бре́мя мое́ и воскли́кну о Бо́зе, Спа́се мое́м: благослови́те, вся́ дела́ Госпо́дня, Го́спода, по́йте и превозноси́те во ве́ки.

Песнь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Пресвята́я Богоро́дице, спаси́ на́с.

Дыха́ние бу́рное не сокруши́т и еди́наго от забра́л стены́ Твоея́. Хра́м Тво́й утвержде́н е́сть и не подви́жится вы́ну, и, тому́ ра́дующеся, пое́м Ти́: сла́ва Держа́ве Твое́й.

Припев: Пресвята́я Богоро́дице, спаси́ на́с.

Та́йная вся́ обнаже́нии показу́ются дне́сь. Свя́т е́сть су́д Тво́й, о Го́споди, и свя́то И́мя Твое́; но ви́ждь, Бо́же, я́ко среди́ бра́тий мои́х Ма́терь Твоя́, и преложи́ гне́в Тво́й.

Припев: Пресвята́я Богоро́дице, спаси́ на́с.

Всеору́жием ве́ры опоя́ши мене́, Благода́тная, и смиренному́дрием укрепи́ десни́цу мою́, да, я́ко стра́ж, пребу́ду, воспева́я и́мя Твое́, и, а́ще помо́жеши ми́, не подви́жуся да́же до сме́рти.

Сла́ва Отцу́ и Сы́ну и Свято́му Ду́ху:

Огнезра́чный же́зл Тво́й, я́ко пла́мень чи́ст, и си́м ве́деши, Путеводи́тельнице, лю́ди Твоя́, да соблюду́тся от бе́д Христиа́ны.

И ны́не и при́сно и во ве́ки веко́в. Ами́нь.

Я́рость а́дова и та́ не возмо́жет на ны́, зане́ свя́т е́сть хра́м Тво́й и о се́мени Твое́м кля́тся Дави́д, непрестаю́ща хвала́ Твоя́ и Держа́ва Твоя́ до сконча́ния ве́ка.

Свети́лен:

Ублажа́т Тя́, Богороди́тельнице, вси́ ро́ди, я́ко смире́ние Твое́ па́че все́х предукраси́ся, и увенча́ся и́мя Твое́, и просла́ви Тя́ Бо́г, я́ко Ма́терь Свою́.

Молитва Пресвятой Богородице пред иконой Ея «Державной»

О, Держа́вная Влады́чице Пресвята́я Богоро́дице, на объя́тиях Свои́х держа́щая Содержа́щаго дла́нию всю вселе́нную Царя́ Небе́снаго! Благодари́м Тя за неизрече́нное милосе́рдие Твое́, я́ко благоволи́ла еси́ яви́ти нам, гре́шным, сию́ святу́ю и чудотво́рную ико́ну Твою́ во дни сии́. Благодари́м Тя, Засту́пнице, я́ко призре́ла еси́ с высоты́ святы́я Своея́ на чад правосла́вных, и, я́ко со́лнце све́тлое, увеселя́еши изнемо́гшия от печа́ли очеса́ на́ша пресла́достным зре́нием держа́вного о́браза Твоего́. О, Преблагослове́нная Ма́терь Бо́жия, Держа́вная Помо́щнице, Кре́пкая Засту́пнице, благодаря́ще Тя, со стра́хом и тре́петом, я́ко раби́ непотре́бнии, мы припа́даем, со умиле́нием, с сокруше́нием серде́чным, со слеза́ми мо́лим Тя: вкорени́ в сердца́ всех нас пра́вду, мир и ра́дость о Ду́се Свя́те: водвори́ в стране́ на́шей тишину́, благоде́нствие, безмяте́жие, любо́вь друг ко дру́гу нелицеме́рную! Держа́вою Твое́ю всеси́льною поддержи́ нас, сла́бых, малоду́шных, немощны́х, уны́лых, подкрепи́, возста́ви! Я́ко да под держа́вою Твое́ю всегда́ храни́ми, пое́м, велича́ем и сла́вим Тя, Держа́вную Засту́пницу ро́да христиа́нского во ве́ки веко́в. Ами́нь.