Канон Пресвятой Богородице пред иконой Черниговская Гефсиманская

Тропа́рь Богоро́дице, глас 5:

Похвала́ми венча́ем, Влады́чице Богоро́дице,/ венцено́сный Черни́говский о́браз Твой,/ от него́же явле́нием чу́да/ в Гефсима́нии земли́ Ра́донежския/ благослови́ Госпо́дь вене́ц ле́та бла́гости Своея́./ И ны́не приле́жно мо́лимся Ти, Всецари́це:/ венча́й благослове́ньми пою́щия Тя.

Кано́н Богоро́дице, глас 2.

Песнь 1

Ирмос: Гряди́те лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Припев: Пресвята́я Богоро́дице, спаси́ на́с.

Покрови́тельница оби́тели Гефсима́нския Ты еси́, Богороди́тельнице,/ помози́ нам просла́вити Тя/ и разреше́ние прегреше́ний пода́ждь благоче́стно поклоня́ющимся о́бразу Твоему́.

Припев: Пресвята́я Богоро́дице, спаси́ на́с.

Я́коже на одре́ боле́зни лежа́щия жены́ моле́ния послу́шала еси́, Влады́чице,/ та́ко и на́ше смире́нное воздыха́ние не отри́ни,/ но, Сама́ заступи́вши, зла́го обстоя́ния изба́ви рабы́ Твоя́.

Сла́ва Отцу́ и Сы́ну и Свято́му Ду́ху:

Пове́дает оби́тель Гефсима́нская, я́же от о́браза Твоего́ бы́вшая чудеса́,/ той бо исто́чник соде́лася, исцеле́ния струи́ оби́льно излива́ющий,/ ве́рою призыва́ющим и́мя Твое́, Богома́ти.

И ны́не и при́сно и во ве́ки веко́в. Ами́нь.

О, Всепе́тая Ма́ти, стра́ждущая жена́ рече́,/ да́руй ми исцеле́ние, да, восста́вши, поклоню́ся о́бразу Твоему́ свято́му./ Ты же, прикло́ньшися к ея́ моле́нию,/ проси́мая подала́ еси́, Пречи́стая.

Пе́снь 3.

Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Припев: Пресвята́я Богоро́дице, спаси́ на́с.

Тя похвалу́, ве́рнии, стяжа́хом,/ прибе́жище и утвержде́ние и ра́дование, и душа́м спасе́ние,/ наде́жду же и сте́ну, покро́в и заступле́ние, Богоблагода́тная Влады́чице.

Припев: Пресвята́я Богоро́дице, спаси́ на́с.

Не усыпа́ет о нас в моли́твах Пречи́стая Ма́терь Спа́сова/ и явля́ет чу́дное Свое́ милосе́рдие всем, ве́рою притека́ющим/ и любо́вию свято́му Ея́ о́бразу покланя́ющимся.

Сла́ва Отцу́ и Сы́ну и Свято́му Ду́ху:

Приклони́ся к мольба́м рабо́в Твои́х, Влады́чице,/ и не закосни́ изба́вити нас от бед и скорбе́й, я́же обдержа́т нас,/ ви́димых и неви́димых враго́в отжени́,/ да не зле поги́бнем, окая́ннии.

И ны́не и при́сно и во ве́ки веко́в. Ами́нь.

Ми́лостивым и кро́тким Твои́м о́ком, Богороди́тельнице,/ при́зри на нас, недосто́йных,/ и от напа́сти обстоя́щия свободи́,/ призыва́ющих Тя на по́мощь, Всепречи́стая.

Седа́лен, глас 4:

Твоего́ милосе́рдия дарова́ния воспомина́юще, Влады́чице,/ и Твой чудотво́рный о́браз благогове́йно лобыза́юще,/ я́ко посреде́ нас пребыва́ющую Тя помышля́ем и ве́рою Тебе́ вопие́м:/ Твоего́ Сы́на и Го́спода моли́,/ да научи́т нас за́поведи Его́ всегда́ твори́ти,/ злы́я же искуше́ния побежда́ти,/ и Тебе́, Предста́тельницу на́шу, досто́йно пе́ти и сла́вити во ве́ки.

Песнь 4

Ирмос: Услы́шах, Го́споди, глас Твой,  его́же рекл еси́, / глас вопию́щаго в пусты́ни,/ я́ко возгреме́л еси́ над вода́ми мно́гими,/ Твоему́ свиде́тельствуяй Сы́ну,/ весь быв соше́дшаго Ду́ха, возопи́: / Ты еси́ Христо́с, Бо́жия Му́дрость и Си́ла.

Припев: Пресвята́я Богоро́дице, спаси́ на́с.

Влады́чице Пречи́стая, ели́ка про́сим днесь от Тебе́ прия́ти,/ сия́ от чудотво́рныя Твоея́ ико́ны нам пода́ждь,/ немощно́е на́ше произволе́ние утверди́/ и Небе́сных благ жела́ние в сердца́ на́ша всели́.

Припев: Пресвята́я Богоро́дице, спаси́ на́с.

Спасе́ния Тя наде́жду, моли́тву неусы́пну, заступле́ние тве́рдо и́мамы:/ умилосе́рдися и виждь на́шу нестерпи́мую печа́ль, боле́зни и ско́рби/ и ми́лостивно посети́, Ма́ти Бо́жия,/ осла́бу ско́рую подаю́щи.

Сла́ва Отцу́ и Сы́ну и Свято́му Ду́ху:

В ско́рбех Тя Засту́пницу стяжа́хом, Влады́чице,/ те́мже и ны́не помози́ нам, лю́те обурева́емым,/ ру́ку по́мощи простира́ющи, Чи́стая:/ бу́ди ми́лостива боле́знем на́шим, Ма́ти Бо́жия,/ исцеле́ние ско́рое подаю́щи.

И ны́не и при́сно и во ве́ки веко́в. Ами́нь.

Смири́, Влады́чице, вы́ю враго́в вознесе́нную,/ сове́ты тех и сердца́ злонра́вная укроти́,/ кре́пость же пода́ждь призыва́ющим Тя, Ма́ти Бо́жия,/ побе́ду ско́рую подаю́щи.

Песнь 5

Ирмос: Хода́тай Бо́гу и челове́ком был еси́, Христе́ Бо́же,/ Тобо́ю бо, Влады́ко, к Светонача́льнику Отцу́ Твоему́/ от но́щи неве́дения/ приведе́ние и́мамы.

Припев: Пресвята́я Богоро́дице, спаси́ на́с.

Мно́зи ле́ты тя́жким неду́гом свя́занная жена́, здра́вие Тобо́ю улучи́вши,/ созыва́ет ве́рныя просла́вити чу́дная дела́ Твоя́, Богоро́дице, зову́щи:/ ра́дуйся, Исто́чниче дарова́ний, Богоблагода́тная Де́во.

Припев: Пресвята́я Богоро́дице, спаси́ на́с.

Неизсле́димую бе́здну Твоея́ ми́лости рассла́бленная жена́ позна́вши,/ пред свято́ю Твое́ю ико́ною усе́рдную моли́тву Тебе́ принесе́/ и, а́бие исцеле́ние от неду́га своего́ прие́мши,/ здра́ва в дом свой возврати́ся, Тя воспева́ющи.

Сла́ва Отцу́ и Сы́ну и Свято́му Ду́ху:

Свяще́нная ико́на Твоя́/ друга́я Силоа́мская купе́ль показа́ся, Влады́чице,/ очища́ющая и исцеля́ющая боле́зни душ и теле́с,/ ве́рою приходя́щих к ней/ и Тя любо́вию велича́ющих.

И ны́не и при́сно и во ве́ки веко́в. Ами́нь.

Присту́пим, ве́рнии, с любо́вию к чудотво́рному о́бразу Присноде́вы/ и благогове́йне ему́ поклони́мся,/ се бо в нем чуде́с си́лу Всеблага́я Влады́чица явля́ет и вся спаса́ет,/ с ве́рою несумне́нною почита́ющих пречи́стаго ли́ка Ея́ подо́бие.

Песнь 6

Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Припев: Пресвята́я Богоро́дице, спаси́ на́с.

Изба́ви нас от напа́стей и бед, Богоневе́сто,/ Тя бо Хода́таицу устро́и Бог во спасе́ние на́ше и заступле́ние./ Сего́ ра́ди исхода́тайствуй нам, недосто́йным,/ от печа́ли грехо́вныя избавле́ние.

Припев: Пресвята́я Богоро́дице, спаси́ на́с.

Пое́м Тя и покланя́емся Ти, Богома́ти Де́во,/ ве́рою и любо́вию пропове́дающе мно́гая и пресла́вная чудеса́,/ от ико́ны Твоея́ чудотво́рныя явле́нныя./ Те́мже от вся́ких нас бед изба́ви.

Сла́ва Отцу́ и Сы́ну и Свято́му Ду́ху:

О, благоутро́бия Твоего́, Де́во Чи́стая!/ Свобожда́еши бо безме́рныя печа́ли и напа́сти в ну́ждех и обстоя́ниих Тя призыва́ющих./ Те́мже и ны́не, Благослове́нная, Засту́пница нам бу́ди.

И ны́не и при́сно и во ве́ки веко́в. Ами́нь.

Ве́дущи не́мощи на́ша, Богороди́тельнице,/ уврачу́й духо́вныя неду́ги на́ша,/ да славосло́вим Сы́на Твоего́ и Бо́га на́шего,/ я́ко Врача́ вся́ческих.

Конда́к, глас 8:

Притеце́м, ве́рнии, к многоцеле́бному о́бразу Засту́пницы на́шея, Богоро́дицы Мари́и,/ и, припа́дающе к нему́ с любо́вию, си́це рцем:/ о, Всепе́тая Ма́ти, при́зри Твои́м благосе́рдием на ны, недосто́йныя,/ и яви́ нам Твоя́ ми́лости и щедро́ты:/ в боле́знех исцеле́ние, в ско́рбех утеше́ние, в беда́х заступле́ние/ и вся ны спаси́, на Тя упова́ющия, да зове́м Ти:/ ра́дуйся, Де́во, христиа́н заступле́ние.

И́кос:

Я́ко дар прия́ла еси́, Ма́ти Бо́жия, всех христиа́н неду́ги исцеля́ти,/ от бед избавля́ти, от плене́ния спаса́ти и от враго́в заступа́ти;/ не пре́зри и нас, Всеми́лостивая Госпоже́, Богоро́дице, Тебе́ вопию́щих:/ Ра́дуйся, А́нгелов удивле́ние; ра́дуйся, ми́ра утеше́ние. Ра́дуйся, христиа́н ра́дование; ра́дуйся, мона́хов утвержде́ние. Ра́дуйся, подвиза́ющихся укрепле́ние; ра́дуйся, Ра́досте скорбя́щих. Ра́дуйся, боля́щих исцеле́ние; ра́дуйся, заблу́ждших вразумле́ние. Ра́дуйся, Утоли́тельнице печа́лей; Ра́дуйся, Де́во, христиа́н засту́пнице.

Песнь 7

Ирмос: Да пресла́вное Рождество́ Твое́, Христе́, е́же от Де́вы,/ прообрази́ши я́ве,/ неопали́мы в пещи́ о́троки сохрани́л еси́,/ пе́сньми пою́щия Тебе́:/ отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Яви́ ско́рое Твое́ заступле́ние, Влады́чице,/ мо́жеши бо, я́ко Ма́ти Бо́жия./ Те́мже призыва́ем Тя серде́чне, со слеза́ми припа́дающе/ и наде́жду на Тя несумне́нную возлага́юще.

Припев: Пресвята́я Богоро́дице, спаси́ на́с.

Наде́жда блага́я и Засту́пница ве́рных Ты еси́, Влады́чице:/ сего́ ра́ди мо́лимся Тебе́ дарова́ти ми́лости бога́тыя всем,/ упова́ющим на Тя и зову́щим:/ благослове́на, Я́же Бо́га пло́тию ро́ждшая.

Сла́ва Отцу́ и Сы́ну и Свято́му Ду́ху:

Я́же еди́но упова́ние и по́мощь ве́рных, Богороди́тельнице,/ потщи́ся помощи́ рабо́м Твои́м, обурева́емым скорбьми́ и во гресе́х су́щим,/ любо́вию же к Тебе́ прибега́ющим.

И ны́не и при́сно и во ве́ки веко́в. Ами́нь.

О, ди́вное чу́до!/ Разсла́бленная бо жена́,/ лобыза́ющи цельбоно́сную ико́ну Твою́, Ма́ти Бо́жия,/ ско́ро кре́пость теле́сную ощути́ и благода́рно возопи́:/ благослове́на Ты еси́, Пречи́стая.

Песнь 8

Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте дела́, я́ко Го́спода,/ и превозноси́те во вся ве́ки.

Припев: Пресвята́я Богоро́дице, спаси́ на́с.

Прибе́жище на́ше и ми́ру ра́дование, Богороди́тельнице,/ умилосе́рдися и ско́ро благода́ть Твою́ пода́ждь нам, ско́рбным,/ и заступи́, Блага́я, рабы́ Твоя́.

Припев: Пресвята́я Богоро́дице, спаси́ на́с.

Тя от всея́ души́ нело́жно призыва́ющих, Богоро́дице,/ во вся́кой ско́рби и в боле́знех разли́чных,/ беда́х и обстоя́ниих лю́тых спе́шно услы́ши,/ сих избавля́ющи при́сно моли́твами Твои́ми.

Сла́ва Отцу́ и Сы́ну и Свято́му Ду́ху:

Безсме́ртия зарю́ и исто́чник спасе́ния ве́мы Тя, Богоро́дице,/ я́ко ро́ждшую Отца́ Безсме́ртнаго Сло́во,/ от сме́рти избавля́ющее вся,/ превознося́щия Его́ во ве́ки.

И ны́не и при́сно и во ве́ки веко́в. Ами́нь.

Спаси́ от зол и скорбе́й рабы́ Твоя́, Богоро́дице,/ и мир Бо́жий, превы́шший вся́каго ми́ра земна́го,/ пода́ждь рабо́м Твои́м, Тя воспева́ющим.

Песнь 9.

Ирмос: Недоуме́ет всяк язы́к благохвали́ти по достоя́нию,/ изумева́ет же ум и преми́рный пе́ти Тя, Богоро́дице:/ оба́че, Блага́я су́щи, ве́ру приими́,/ и́бо любо́вь ве́си боже́ственную на́шу,/ Ты бо христиа́н еси́ Предста́тельница, Тя велича́ем.

Припев: Пресвята́я Богоро́дице, спаси́ на́с.

В моли́твах неусыпа́ющую Богоро́дицу Чи́стую призове́м вси, взыва́юще:/ изба́ви от лю́тыя сме́рти и огня́ гее́нскаго рабы́ Твоя́,/ Ты бо христиа́н еси́ Предста́тельница, Тя велича́ем.

Припев: Пресвята́я Богоро́дице, спаси́ на́с.

Отча́явшихся кре́пкое прибе́жище,/ обурева́емых ти́хое приста́нище Ты еси́, Богоро́дице./ Те́мже и мы притека́ем к Тебе́, взыва́юще:/ спаси́ нас, усе́рдно Тя велича́ющих.

Сла́ва Отцу́ и Сы́ну и Свято́му Ду́ху:

Не преста́й, Чи́стая, моля́щи от Тебе́ ро́ждшагося Бо́га/ о всех, с ве́рою притека́ющих к Тебе́/ и прося́щих избавле́ния,/ Ты бо христиа́н еси́ Предста́тельница, Тя велича́ем.

И ны́не и при́сно и во ве́ки веко́в. Ами́нь.

Дар от Бо́га прия́ла еси́, я́ко Ма́ти Бо́жия,/ неду́ги исцеля́ти и от бед избавля́ти,/ о гресе́х умоля́ти и от плене́ния спаса́ти./ Не пре́зри и нас, Госпоже́ Преми́лостивая,/ Ты бо христиа́н еси́ Предста́тельница, Тя велича́ем.

Молитва

О, Пресвята́я Де́во, Ма́ти Христа́ Бо́га на́шего, Цари́це Небеси́ и земли́! Вонми́ многоболе́зненному воздыха́нию душ на́ших, при́зри с высоты́ святы́я Твоея́ на нас, с ве́рою и любо́вию покланя́ющихся пречи́стому о́бразу Твоему́: се бо, грехми́ погружа́еми и скорбми́ обурева́еми, взира́юще на Твой о́браз, я́ко живу́щей Ти с на́ми, прино́сим смире́нная моле́ния на́ша, не и́мамы бо ины́я по́мощи, ни ина́го предста́тельства и утеше́ния, то́кмо Тебе́, о, Ма́ти всех скорбя́щих и обремене́нных. Помози́ нам, немощны́м, утоли́ ско́рбь на́шу, наста́ви на путь пра́вый нас, заблу́дших, уврачу́й боле́зненная сердца́ на́ша и спаси́ безнаде́жныя. Да́руй нам про́чее вре́мя живота́ на́шего в ми́ре и покая́нии проводи́ти, пода́ждь христиа́нскую кончи́ну и на Стра́шнем Суде́ Сы́на Твоего́ яви́ся нам милосе́рдая Предста́тельница, да всегда́ пое́м, велича́ем и сла́вим Тя, я́ко Благу́ю Засту́пницу ро́да христиа́нскаго, со все́ми угоди́вшими Бо́гу. Ами́нь.