Четверопеснец В Субботу Восьмой седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Слава Тебе, Боже наш, слава Тебе.

Царю́ Небе́сный, / Уте́шителю, Ду́ше и́стины, / И́же везде́ сый / и вся исполня́яй, / Сокро́вище благи́х / и жи́зни Пода́телю, / прииди́ и всели́ся в ны, / и очи́сти ны от вся́кия скве́рны, / и спаси́, Бла́же, ду́ши на́ша.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, (12 раз).

Тропарь, глас 8:

Благослове́н еси́, Христе́ Бо́же наш, / И́же прему́дры ловцы́ явле́й, / низпосла́в им Ду́ха Свята́го, / и те́ми уловле́й вселе́нную, / Человеколю́бче, сла́ва Тебе́.

Кондак праздника. глас 8:

Егда́ снизше́д язы́ки слия́, / разделя́ше язы́ки Вы́шний, / егда́ же о́гненныя язы́ки раздая́ше, / в соедине́ние вся призва́, / и согла́сно сла́вим Всесвята́го Ду́ха.

В суббо́ту пятдеся́тную  четверопе́снец. Гла́с 6.

Пе́снь 6.

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти, возведи́ от тли́ живо́т мо́й Многоми́лостиве.

Припев: Слава Тебе, Боже наш, слава Тебе.

Де́йствовал еси́ пе́рвее во ангельских во́инствах, свяще́ние да́руя, и просвеща́я божества́ мо́лниями Душе Святы́й, и соблюда́я еди́нственным освяще́нием.

Припев: Слава Тебе, Боже наш, слава Тебе.

Проро́ки показа́л еси́ могу́щыя прозре́ти бу́дущих предве́дение, в сердца́х и́х я́ко благ, все́лься Уте́шителю, и да́льная прозира́ти устро́ил еси́.

Сла́ва: От земли́ возноси́ми боже́ственных ра́ди доброде́телей, Христо́вы апостоли, с небесе́ Духа Владычня прише́дша прия́ша, и Божества́ заре́ю просия́ша.

И ны́не, богоро́дичен:  Дух Святы́й соше́д на Тя́, Чи́стый Де́вства хра́м соде́ла све́тло, Пречи́стый до́м Сыну вы́шняго Всеблаже́нная.

Пе́снь 7.

Ирмо́с: Росода́тельну у́бо пе́щь, соде́ла ангел преподобным отроко́м, халде́и же опаля́ющее веле́ние Божие, мучи́теля увеща́ вопи́ти: благослове́н еси́ Боже Отец на́ших.

Припев: Слава Тебе, Боже наш, слава Тебе.

Всевино́внаго Отца́ и Роди́теля, Еди́наго пре́жде ве́к Сына, и происхо́дна Свята́го Духа, ве́рнии согла́сно сла́вим при́сно: благослове́н Бог Отец на́ших.

Припев: Слава Тебе, Боже наш, слава Тебе.

Уте́шитель сво́йство Божества́ нося́ ны́не прии́де, апостолом бо во о́гненных язы́цех бесе́дуя Бог, показа́ся я́ве: благослове́н Бог Отец на́ших.

Сла́ва: Небеса́ приснодви́жима Единоче́стным Духом Твои́м, утверди́л еси́ ученики́ Твоя́ Тебе́ Христе́ пропове́дати вели́кое Солнце, на́м я́сно возсия́вшее: благослове́н Бог Отец на́ших.

И ны́не, богоро́дичен: Воплоще́нием Сло́ва боже́ственный сосу́д Чистая, Дух Святы́й осени́ на Тя́, божественный ковче́г све́тел соде́ла Пречистая: благослове́нна Бога Пло́тию роди́вшая.

Пе́снь 8.

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши Христе́, то́кмо е́же хоте́ти, Тя́ превозно́сим во вся́ ве́ки.

Припев: Слава Тебе, Боже наш, слава Тебе.

Из Отца́ неизрече́нно исходя́ща, и на Сыне неслия́нно почива́юща, Духа Честна́го и Всеси́льнаго, Тя́ превозно́сим во ве́ки.

Припев: Слава Тебе, Боже наш, слава Тебе.

Душе́вных скве́рн на́с очи́сти, грехо́внаго ка́ла на́с омы́й, да́ждь на́м Христе́ ДухПпра́вый спасе́ния, обновля́ющ во вся́ ве́ки.

Сла́ва: Во гробе́х живу́щыя призва́вый и лице́ всея́ земли́ обновля́яй, я́же на земли́ у́ды умертви́, Тебе́ покланя́ющымся во вся́ ве́ки.

И ны́не, богоро́дичен: Небо яви́ся Чистая земно́е, Небесное Сло́во во чре́во вмести́вши, су́щым на земли́ пло́тию прибли́жившася: Его́же превозно́сим во ве́ки.

Пе́снь 9.

Ирмо́с: Бога челове́ком не возмо́жно ви́дети, на Него́же не сме́ют чи́ни ангельстии взира́ти: Тобо́ю бо Всечистая, яви́ся челове́ком Сло́во воплоще́нно. Его́же велича́юще, с небе́сными во́и Тя́ ублажа́ем.

Припев: Слава Тебе, Боже наш, слава Тебе.

Огненными язы́ки я́сно веща́юще ученицы́, ле́сть и́дольскую попали́ша, ве́рных же ду́шы озари́ша, светле́йшим божественным де́йством Уте́шителя, проявле́нно прише́дша.

Припев: Слава Тебе, Боже наш, слава Тебе.

Чи́стая прия́телища божественныя благода́ти, и боже́ственныя зари́ нескве́рная зерца́ла, му́дрыя Твоя́ ученики́ показа́л еси́, богонача́льным Духа сия́нием, и си́х посла́л еси́ Блаже, я́ко Многоми́лостив.

Сла́ва: Улучи́ти боже́ственнаго блаже́нства певце́м Ти́, Твои́м прише́ствием Уте́шителю, я́ко исто́чник благи́х, благоволи́, всеору́жных даро́в прича́стие, я́ко благопода́тель подая́, Еди́не Человеколю́бче.

И ны́не, богоро́дичен: Бога челове́ком Чистая премени́ла еси́ па́че естества́, Его́же и на́м исхода́таивши: Тобо́ю бо Пречи́стая совокупи́ во еди́но пре́жде расточе́нныя, и вси́ Небе́снаго Боже́ственнаго насле́дия, и пи́щи сподо́бихомся.

Вместо Достойно есть:

Апо́столи, соше́ствие Уте́шителя зря́ще, удиви́шася, / ка́ко в ви́де о́гненных язы́к яви́ся Дух Святы́й.

Ирмос, глас 4: Ра́дуйся, Цари́це, / матероде́вственная сла́во, / вся́ка бо удобообраща́тельная / благоглаго́ливая уста́ вити́йствовати не мо́гут, / Тебе́ пе́ти досто́йно, / изумева́ет же ум всяк Твое́ Рождество́ разуме́ти. / Те́мже Тя согла́сно сла́вим.

Сла́ва, и ны́не:

Господи, помилуй (трижды).

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь