Трипеснец В Среду Седьмой седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

В сре́ду седмы́я неде́ли по Па́сце, трипе́снец, гла́с 3.

Пе́снь 3.

Ирмо́с: Утвержде́ние на Тя́ наде́ющихся, утверди́ Господи Це́рковь, ю́же стяжа́л еси́ Честно́ю Твое́ю Кро́вию.

Припев: Слава Тебе, Боже наш, слава Тебе.

Осужде́нное и преступле́нием истле́вшее естество́ челове́ческое, возве́л еси́ Владыко превы́ше ангел, я́ко Милосе́рд.

Припев: Слава Тебе, Боже наш, слава Тебе.

Возше́л еси́ на небеса́ со сла́вою, пою́щым Тя́ Господи безпло́тным, я́ко все́х Творца́ и Бога на́шего.

Сла́ва: Уте́шителя и́стиннаго Духа посла́л еси́ Владыко ученико́м Твои́м, возше́д на небеса́ Преблаги́й.

И ны́не, богоро́дичен: Воплоще́нное из Тебе́ Чи́стая про́йде Сло́во, паде́ние первозда́нных за милосе́рдие щедро́т исправля́яй.

Пе́снь 8.

Ирмо́с: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, боже́ственную пе́снь поя́ху: благослови́те вся́ дела́ Господня Господа, и превозноси́те во вся́ ве́ки.

Припев: Слава Тебе, Боже наш, слава Тебе.

Все́ я́ко Бог испо́лнив е́же о на́с смотре́ние, возне́слся еси́ зря́щым ученико́м Твои́м, и стра́хом вопию́щым Ти́: благослови́те вся́ дела́ Господня Господа.

Припев: Слава Тебе, Боже наш, слава Тебе.

Му́жие вои́стинну галиле́йстии, что́ взира́ете си́це, Владыце к небеси́ восходя́щу, глаго́лаху ангели; я́коже ви́дите, па́ки Се́й и́мать приити́ суди́ти все́й тва́ри, Его́же превозно́сим во ве́ки.

Сла́ва: Духа Пра́ваго, Духа Боже́ственнаго, Духа Су́щаго с Тобо́ю Неразде́льнаго, я́коже обеща́лся еси́, посли́ на́м, на о́блацех сла́вы носи́мый, Сло́ве Божий, божественнии апостоли зовя́ху: я́ко да Тя́ пое́м и превозно́сим во ве́ки.

И ны́не, богоро́дичен: Из Тебе́ Божия Прему́дрость до́м себе́ созда́вши, воплоти́ся неизрече́нным соше́ствием, Отрокови́це неискусобра́чная: Ты́ бо еди́на во все́х роде́х избра́на еси́, бы́ти жили́ще Христу́ Богу.

Пе́снь 9.

Ирмо́с: Но́вое чу́до и боголе́пное, Деви́ческую бо две́рь затворе́ную я́ве прохо́дит Господь, на́г во вхо́де, и плотоно́сец яви́ся во исхо́де Бог, и пребыва́ет две́рь затворе́на: сию́ неизрече́нно я́ко Богома́терь велича́ем.

Припев: Слава Тебе, Боже наш, слава Тебе.

Со сла́вою в воскликнове́нии восхо́дит, я́коже проро́к дре́вле рече́, се́й все́х е́сть Господь и Владыка: по́йте Сему́ ве́рою язы́цы, по́йте и с тре́петом Того́ славосло́вите, я́ко соде́ла неизсле́димая и неизрече́нная.

Припев: Слава Тебе, Боже наш, слава Тебе.

Скорбя́щым ре́кл еси́ ученико́м: не разлучу́ся во ве́ки от ва́с, а́ще и к посла́вшему Мя́ иду́ Отцу́: иди́те, ми́р ве́сь научи́те, позна́ти мя́ Бога Истиннаго, соде́лавша Мя́ Пресла́вная, я́же ви́десте и слы́шасте.

Сла́ва: Ми́р все́м ре́кл еси́ Христе́, и о́блак подъе́м Тя́ а́бие Све́та, все́м зря́щым, от земли́ возне́слся еси́, и возше́д превы́ше се́л еси́, над вся́ким нача́лом и вла́стию: те́мже сла́вим многопе́тую си́лу Твою́.

И ны́не, богоро́дичен: Све́та прия́телище яви́лася еси́ вои́стинну, я́ко из Тебе́ непрело́жно вопло́щся неизрече́нно Бог, на Кресте́ возвы́сив ада́мово существо́, и в ме́ртвых перворожде́н бы́в, и пребыва́я Бог в Вы́шних, ку́пно со Отце́м же и Боже́ственным Духом сла́вимый.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва, и ны́не: Го́споди, поми́луй, трижды.

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь