Шрифт

Триодь Цветная. Песнопения Недели о Слепом

Стихиры:

Глас 5.

Честны́м Твои́м Кресто́м, Христе́, / диа́вола посрами́л еси́, / и Воскресе́нием Твои́м жало грехо́вное притупи́л еси́, / и спасл еси́ ны от врат сме́ртных: / сла́вим Тя, Единоро́дне.

Воскресе́ние дая́й ро́ду челове́ческому, / я́ко овча́ на заколе́ние веде́ся, / устраши́шася сего́ кня́зи а́дстии, / и взя́шася врата́ плаче́вная. / Вни́де бо Царь сла́вы Христо́с, / глаго́ля су́щим во у́зах, изыди́те: / и су́щим во тьме, откры́йтеся.

Ве́лие чу́до, / неви́димых Соде́тель, за человеколю́бие пло́тию пострада́в, / воскре́се Безсме́ртный. / Прииди́те оте́чествия язы́к, Тому́ поклони́мся: / благоутро́бием бо Его́ от пре́лести изба́вльшеся, / в Трие́х Ипоста́сех Еди́наго Бо́га пе́ти навыко́хом.

Вече́рнее поклоне́ние / прино́сим Тебе́, Невече́рнему Све́ту, / на коне́ц веко́в, я́ко в зерца́ле пло́тию возсия́вшему мiрови, / и да́же до а́да низше́дшему, / и та́мо су́щую тьму разруши́вшему, / и свет Воскресе́ния язы́ком показа́вшему: / Светода́вче Го́споди, сла́ва Тебе́.

Нача́льника спасе́ния на́шего, / Христа́ славосло́вим: / Тому́ бо из ме́ртвых воскре́сшу, / мiр от пре́лести спасе́н бысть. / Ра́дуется лик А́нгельский, / бе́гает де́монов пре́лесть, / Ада́м пады́й воста́, / диа́вол упраздни́ся.

И́же от кустоди́и науче́ни быва́ху от беззако́нник, / покры́йте Христо́во Воста́ние, / и приими́те сре́бреники, и рцы́те / я́ко нам спя́щим, из гро́ба укра́ден бысть Ме́ртвый. / Кто ви́де, кто слы́ша, мертвеца́ укра́дена когда́, / па́че же пома́зана и на́га, / оста́вльша и во гро́бе погреба́льная Своя́? / Не прельща́йтеся иуде́е, / навы́кните рече́нием проро́ческим, и уразуме́йте, / я́ко Той есть вои́стинну Изба́витель мiра, и Всеси́льный.

Го́споди, ад плени́вый, / и смерть попра́вый, Спа́се наш, / просвети́вый мiр Кресто́м честны́м, / поми́луй нас.

Го́споди, мимоходя́ путе́м, / обре́л еси́ челове́ка сле́па от рожде́ния, / и удивле́ни бы́вше ученицы́, вопроша́ху Тя глаго́люще: / Учи́телю, кто согреши́: сей ли, / или́ роди́тели его́, да слеп роди́ся? / Ты же Спа́се мой возопи́л еси́ к ним: / ни сей согреши́, ни роди́тели его́, / но да явя́тся дела́ Бо́жия на нем. / Мне подоба́ет де́лати дела́ Посла́вшаго Мя, / я́же никто́же мо́жет де́лати. / И сия́ рек, плю́нув до́лу, и бре́ние сотво́рь, / пома́зал еси́ о́чи его́, рек к нему́: / иди́, умы́йся в Силоа́мстей купе́ли. / Он же умы́вся здрав бысть, и вопия́ше к Тебе́: / ве́рую Го́споди, и поклони́ся Тебе́. / Те́мже вопие́м и мы, поми́луй нас.

В Чермне́м мо́ри, / Неискусобра́чныя Неве́сты о́браз написа́ся иногда́. / Та́мо Моисе́й, раздели́тель воды́, / зде же Гаврии́л, служи́тель чудесе́. / Тогда́ глубину́ ше́ствова немо́кренно Изра́иль; / ны́не же Христа́ роди́ безсе́менно Де́ва. / Мо́ре по проше́ствии Изра́илеве пребы́сть непрохо́дно, / Непоро́чная по Рождестве́ Эмману́илеве пребы́сть Нетле́нна. / Сый и пре́жде Сый, / явле́йся, я́ко Челове́к, / Бо́же поми́луй нас.

Тебе́, Воплоще́ннаго Спа́са Христа́, / и Небе́с неразлучи́вшася, / во гла́сех пе́ний велича́ем, / я́ко Крест и смерть прия́л еси́ за род наш, / я́ко Человеколю́бец Госпо́дь, / испрове́ргий а́дова врата́, / тридне́вно воскре́сл еси́, / спаса́я ду́ши на́ша.

Глас 2.

Слепы́й роди́выйся, в свое́м по́мысле глаго́лаше: / еда́ аз грех ра́ди роди́тельных роди́хся без о́чию? / Еда́ аз за неве́рие язы́ков роди́хся во обличе́ние? / Не домышля́юся вопроша́ти, / когда́ нощь, когда́ день? / Не терпи́та ми но́зе ка́меннаго претыка́ния, / не ви́дех бо со́лнца сия́юща, / ниже́ во о́бразе мене́ Созда́вшаго. / Но молю́ Ти ся, Христе́ Бо́же, / при́зри на мя и поми́луй мя.

Мимоходя́ Иису́с от святи́лища, / обре́те челове́ка сле́па от рожде́ния, / и умилосе́рдився положи́ бре́ние на о́чию его́, и рече́ к нему́: / иди́ умы́йся в Силоа́ме, / и умы́вся прозре́, сла́ву возсыла́я Бо́гу. / Сосе́ди же его́ глаго́лаху ему́: / кто твои́ зе́ницы отве́рзе, / и́хже никто́же от зря́щих исцели́ти возмо́же? / Он же возопи́в, рече́: / Челове́к Иису́с глаго́лемый, / Он ми рече́, умы́йся в Силоа́ме, и прозре́х. / Той есть вои́стинну, / Его́же рече́ Моисе́й в зако́не, Христа́ Месси́ю, / Той есть Спас душ на́ших.

Глас 8.

Стих: При́зри на мя, / и поми́луй мя.

За милосе́рдие ми́лости воплоти́выйся, Христе́ Бо́же, / све́та лише́ннаго от утро́бы, / милосе́рдием неизре́ченных щедро́т, / сия́ния Боже́ственнаго сподо́бил еси́, / сего́ зе́ницам пе́рстию / созда́тельными пе́рсты Твои́ми прикосну́выйся. / Сам и ны́не, Светода́телю, / и на́ша озари́ душе́вная чу́вства, / я́ко еди́н независтнода́тель.

Кто возглаго́лет си́лы Твоя́, Христе́? / Или́ кто изочте́т чуде́с Твои́х мно́жества? / Сугу́б бо я́ко ви́ден был еси́ на земли́ за бла́гость, / сугу́бы и цельбы́ неду́гующим подава́л еси́, / не то́чию бо теле́сныя о́чи отве́рзл еси́, / и́же от утро́бы слепо́му, / но и душе́вныя. / Те́мже Бо́га Тя испове́даше тая́щагося, / и всем подаю́ща ве́лию ми́лость.

Слава, глас 4:

Все житие́ слепы́й нощь помышля́я, / возопи́ к Тебе́: / Го́споди, отве́рзи ми зе́ницы, / Сы́не Дави́дов, Спа́се наш, / да со все́ми и аз воспою́ Твою́ силу.

И ныне, Богородичен, глас тойже:

При́зри на моле́ния Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи, / Тя бо еди́ну, тве́рдое и изве́стное утвержде́ние и́мамы, / и Твое́ предста́тельство стяжа́хом. / Да не постыди́мся, Влады́чице, Тя призыва́ющии. / Потщи́ся на умоле́ние, Тебе́ ве́рно вопию́щих: / ра́дуйся, Влады́чице, всех по́моще, / ра́досте и покро́ве, / и спасе́ние душ на́ших.

Тропарь, кондак, величание.

Тропарь, глас 5:

Собезнача́льное Сло́во Отцу́ и Ду́хови, / от Де́вы ро́ждшееся на Спасе́ние на́ше, / воспои́м, ве́рнии, и поклони́мся, / я́ко благоволи́ Пло́тию взы́ти на Крест, / и смерть претерпе́ти, / и воскреси́ти уме́ршия / сла́вным воскресе́нием Свои́м.

Слава, и ныне: Богородичен: Ра́дуйся, Две́ре Госпо́дня непроходи́мая, / ра́дуйся, стено́ и покро́ве притека́ющим к Тебе́. / Ра́дуйся, необурева́емое приста́нище и неискусобра́чная, / ро́ждшая пло́тию Творца́ Твоего́ и Бо́га. / Моля́щи не оскудева́й о воспева́ющих / и кла́няющихся рождеству́ Твоему́.

Кондак, глас 4:

Душе́вныма очи́ма ослепле́н, / к Тебе́, Христе́, прихожду́, / я́коже слепы́й от рожде́ния, / покая́нием зову́ Ти: / Ты су́щих во тьме Свет пресве́тлый.