Синаксарь во святую и великую Неделю Пасхи

Стихи́: Христо́с сше́д к борьбе́ а́дове Еди́н.

Мно́гия взе́м побе́ды коры́сти, взы́де.

Во святу́ю и вели́кую Неде́лю Па́схи, са́мое живоно́сное Воскресе́ние пра́зднуем Го́спода Бо́га и Спа́са на́шего Иису́са Христа́, е́же у́бо и Па́сху имену́ем: я́же евре́йскою бесе́дою преведе́ние толку́ется. То́й бо е́сть де́нь, во́ньже Бо́г в нача́ле ми́р от небытия́ приведе́. В то́й де́нь изра́ильтеския лю́ди, сквозе́ Чермно́е мо́ре прове́д, от фарао́новых исхища́ет ру́к. В то́й па́ки с небесе́ соше́д, во утро́бу Де́вы всели́ся: и ны́не из а́довых сокро́вищ челове́ческое естество́ все́ исхити́в, на небеса́ возведе́, и к дре́внему достоя́нию приведе́ нетле́ния. Оба́че соше́д во а́д, не все́х воскреси́, но ели́цы ве́ровати Ему́ изво́лиша: ду́шы же я́же от ве́ка святы́х ну́ждею держи́мыя от а́да свободи́, и все́м даде́ на небеса́ взы́ти. Сего́ ра́ди ра́дующеся преесте́ственне со све́тлостию Воскресе́ние пра́зднуем, ра́дость образу́юще, е́юже естество́ на́ше милосе́рдия ра́ди ми́лости Бо́жия обогати́ся: та́кожде и вражды́ разруше́ние, и е́же с Бо́гом соедине́ние и с саме́ми а́нгелы показу́юще, обы́чное содева́ем целова́ние. Госпо́дне же Воскресе́ние бы́сть си́це: во́ином стрегу́щым гро́б, о полу́нощи тру́с быва́ет: соше́д бо А́нгел, ка́мень отваля́ет от две́рей гро́ба, стра́жие же ужаса́ющеся бе́гают. И прихожде́ние зде́ жена́м быва́ет в суббо́ту по́зде, я́коже от полсуббо́тныя но́щи. И пе́рвее у́бо Воскресе́ние Бо́жии Ма́тери познава́емо быва́ет пря́мо седя́щей гро́ба с Магдали́нею, я́коже глаго́лет Матфе́й. Но да не сомни́ло бы ся Воскресе́ние, за е́же к Ма́тери присвое́ния, евангели́сти глаго́лют: пе́рвее явля́ется Магдали́ни Мари́и, она́ же и на ка́мени А́нгела ви́де: и прини́кши па́ки су́щыя вну́трь зри́т, и́же у́бо и Госпо́дне Воскресе́ние возвеща́ют: воста́ бо, глаго́лют, не́сть зде́: се́ ме́сто, иде́же положи́ша Его́. Тече́т у́бо сия́ слы́шавши, и к тепле́йшым от учени́к прихо́дит, к Петру́ и Иоа́нну, и Воскресе́ние си́м благовеству́ет. Возвраща́ющися же е́й с друго́ю Мари́ею, сре́те я́ Христо́с, глаго́ля: ра́дуйтеся. Подоба́ше бо пе́рвее слы́шавшему ро́ду: в печа́лех роди́ши ча́да, тому́ пре́жде и ра́дость внуши́ти. Сия́ же любо́вию побежда́емыя приступа́ют, и пречи́стыма нога́ма Его́ каса́ются, опа́снейше разуме́ти хотя́ще. Апо́стола же ко гро́бу притеко́ста, Иоа́нн у́бо прини́к то́чию во гро́б, оти́де. Пе́тр же вну́трь вхо́дит, и испы́тнейше зри́т, плащани́це же каса́ется и сударе́ви. Па́ки же Магдали́на прихо́дит ко гро́бу о у́трени, со други́ми жена́ми, ви́денная уве́рити хотя́щи опа́сне. У вне́шних же стоя́щи рыда́ше, вну́трь же гро́ба прини́кши, зри́т два́ А́нгела блиста́ющася све́тлостию, и а́ки претя́ща е́й, и глаго́люща: же́но, что́ пла́чеши? и кого́ и́щеши? Иису́са и́щете Назаряни́на распя́таго: воста́, не́сть зде́. И а́бие воста́ша пристра́шни, ви́девше Го́спода. Те́мже она́ обра́щшися вспя́ть, ви́дит Христа́ стоя́ща, вертогра́даря же его́ бы́ти мня́щи, [зане́ в вертогра́де гро́б бы́сть,] глаго́лет: Го́споди, а́ще Ты́ еси́ взя́л Его́, рцы́ ми, где́ еси́ положи́л Его́? и а́з возму́ Его́. Па́ки же Спа́с ко А́нгелом помаа́в, глаго́лет к Магдали́ни: Мари́е. Она́ же сла́дкий и обы́чный Христо́в ощути́вши гла́с, прикосну́тися Ему́ хотя́ше. О́н же глаго́лет: не прикаса́йся Мне́, не у бо взыдо́х ко Отцу́ Моему́, я́коже ты́ помышля́еши, еще́ челове́ка Мя́ бы́ти непщу́ющи: иди́ же к бра́тии мое́й, и рцы́ и́м, ели́ка же ви́дела еси́ и слы́шала. И сие́ у́бо Магдали́на де́лает. Свита́ющу же дню́ па́ки у гро́ба с про́чими быва́ет. Су́щии же со Иоа́нною и Саломи́ею, возсия́вшу со́лнцу приидо́ша. И про́сто рещи́, разли́чно е́же на гро́б же́н прихожде́ние бы́сть, в ни́хже бе́ и Богоро́дица: та́ бо е́сть, ю́же Иоси́еву глаго́лет Мари́ю Ева́нглие. Ио́сифов же бе́ сы́н се́й Иоси́й. В неизве́стном у́бо е́сть, в ки́й ча́с воскре́се Госпо́дь: не́цыи у́бо в пе́рвое куроглаше́ние глаго́лют: друзи́и же егда́ тру́с бы́сть, и разли́чно друзи́и. Си́м же та́ко бы́вшым, се́ не́цыи от кустоди́и доше́дше, возвести́ша архиере́ем соде́явшаяся. Они́ же сре́брениками и́х умзди́вше, повину́ют рещи́: я́ко ученицы́ Его́ прише́дше но́щию, украдо́ша Его́. В ве́чер настоя́щаго дне́, ученико́м во еди́но собра́ным стра́ха ра́ди иуде́йскаго, и две́рем тве́рдо заключе́ным, вхо́дит к ни́м Иису́с, я́ко в нетле́ннем телеси́ бе́, и ми́р обы́чно си́м благовеству́ет. Они́ же Сего́ ви́девше, премно́го возра́довашася, и дунове́нием соверше́ннейшее Всесвята́го Ду́ха де́йство прие́млют. Ка́ко же тридне́вное Воскресе́ние Госпо́дне? ве́ждь си́це: Ве́чер четвертка́, и де́нь пятка́, та́ко бо нощеде́нство евре́е исчита́ют, де́нь еди́н. Пятка́ па́ки но́щь, и суббо́та вся́, друго́е нощеде́нство, се́ де́нь вторы́й. Па́ки суббо́тная но́щь, и неде́ли де́нь, от ча́сти бо нача́ла все́ прие́млется, тре́тие нощеде́нство: се́ де́нь тре́тий. Или́ си́це: В тре́тий ча́с пятка́ ра́спят бы́сть Христо́с. Та́же от шеста́го часа́ до девя́таго тма́ бы́сть, сие́ но́щь ми́ разуме́й, се́ от тре́тияго да́же до девя́таго еди́но нощеде́нство. Та́же па́ки по тме́, де́нь и но́щь пятка́, се́ два́ нощеде́нства. Де́нь суббо́ты, и но́щь ея́ па́ки, се́ три́ нощеде́нства, по евангели́сту глаго́лющему: свита́ющу во еди́ну от суббо́т. А́ще ли в тре́тий обеща́в облагоде́тельствова на́с Спа́с, скоре́йше соде́ла благоде́йство, и та́ко благода́ть, и сла́ва Ему́ во ве́ки веко́в. Ами́нь.