Песнопения Вторника 8-ой седмицы по Пасхе

В Понедельник вечера

Тропарь, глас 2:

Благослове́н еси́ Христе́ Бо́же на́ш, И́же прему́дры ловцы́ явле́й, низпосла́в и́м Ду́ха Свята́го, и те́ми уловле́й вселе́нную, Человеколю́бче сла́ва Тебе́.

Кондак, глас 8:

Егда́ снизше́д язы́ки слия́, разделя́ше язы́ки Вы́шний: егда́ же о́гненныя язы́ки раздая́ше, в соедине́ние вся́ призва́, и согла́сно сла́вим Всесвята́го Ду́ха.

Стихи́ры, гла́с 2.

Ны́не обновля́ются язы́цы вели́чии Бо́жиими, иновеща́нными словесы́, я́ко в ви́де о́гненном, во увере́ние все́х су́щих на земли́, пове́дати ясне́йши, ны́не зна́мение язы́ком вои́стинну спасе́ние прише́л еси́.

Ю́же низпосла́ти обеща́л еси́ ученико́м Твои́м Христе́ с высоты́ си́лу, испо́лнивый, посыла́еши Свята́го Твоего́ Ду́ха, показа́вый на́м, я́ко Ты́ еси́ и́стина, и на тя́ упова́ющии бла́же, вои́стинну не посрамля́ются.

Предъобеща́ние Испо́лнивый, Твоего́ Уте́шителя, я́ко во о́гненных язы́цех посла́л еси́ ми́ру, все́х грехи́ боже́ственным огне́м слия́ти, и да́ти на́м е́же к нему́ обще́ние и́стинное, ве́рно богосло́вящым его́.

Сла́ва, и ны́не: гла́с 1:

Пятдеся́тницу пра́зднуим, и ду́ха прише́ствие, и предложе́ние обеща́ния, и наде́жды исполне́ние, и та́инство ели́ко, я́ко вели́ко же и че́стно. Те́мже вопие́м Ти́: соде́телю все́х, Го́споди сла́ва Тебе́.

Стихи́ры, гла́с 2:

Де́лом ученико́м, я́коже обеща́л еси́ сло́ве, посла́л еси́ боже́ственнаго и Свята́го Твоего́ Ду́ха, и сия́ просвети́л еси́.

Внеза́пу с небесе́ апо́столы вся́ боже́ственнаго уте́шителя си́ла, всему́дры и богосло́вны показа́.

Ро́д иноро́дных, слы́шаще недоумева́хуся, язы́ки свои́ми, боже́ственныя апо́столы, Тро́ицу велича́ющыя.

Сла́ва, и ны́не, гла́с 1:

Язы́ками иноро́дных обнови́л еси́ Христе́, Твоя́ ученики́, да те́ми Тя́ пропове́дят безсме́ртнаго Сло́ва и Бо́га, подаю́щаго душа́м на́шым ве́лию ми́лость.

Во Вторник утра

Тропарь, глас 2:

Благослове́н еси́ Христе́ Бо́же на́ш, И́же прему́дры ловцы́ явле́й, низпосла́в и́м Ду́ха Свята́го, и те́ми уловле́й вселе́нную, Человеколю́бче сла́ва Тебе́.

Кондак, глас 8:

Егда́ снизше́д язы́ки слия́, разделя́ше язы́ки Вы́шний: егда́ же о́гненныя язы́ки раздая́ше, в соедине́ние вся́ призва́, и согла́сно сла́вим Всесвята́го Ду́ха.

Седа́лен, гла́с 1:

Счиня́ю, своспева́ю, ссла́влю, спочита́ю Отцу́ и Сы́ну ду́ха всесвята́го, соединя́я божество́м, разделя́я сво́йствы: си́це бо се́й Христо́вы Апо́столы ны́не оде́яв, во все́м ми́ре пропове́дати упрему́дри.

Седа́лен, гла́с 4.

Христо́вы ученики́ ду́ха благода́ть, стра́шно с небесе́ соше́дши в ви́де о́гненном, просвети́, и свети́льники показа́ возвеща́ющыя Святы́я Тро́ицы еди́ну си́лу, и госпо́дьство еди́но, е́же ве́рою сла́вим.

Стихи́ры гла́с 2.

Заре́ю богонача́льною у́м просвети́вше, ученицы́ твои́ сло́ве, су́щественно Ду́ха Свята́го прия́ша.

Сти́х: Се́рдце чи́сто сози́жди во мне́ Бо́же

Язы́цы со огне́м, с высоты́ ви́дими бы́вше, на апо́столы снидо́ша, разделя́еми, просвеща́юще, не опаля́юще.

Сти́х: Не отве́ржи мене́ от лица́ Твоего́ и духа Твоего Святаго не отыми от мене.

Свы́ше к на́м Уте́шителю прише́д, я́ко пре́жде Апо́столом, освяти́ и спаси́, Тя́ Бо́га пропове́дающыя.

Сла́ва И ны́не: гла́с 1:

Вся́ подае́т Ду́х Святы́й, то́чит проро́чествия, свяще́нники соверша́ет, некни́жныя му́дрости научи́, ры́бари богосло́вцы показа́, ве́сь собира́ет собо́р церко́вный: единосу́щне и сопресто́льне Отцу́ и Сы́ну, Уте́шителю сла́ва Тебе́.