Песнопения Вторника 6-ой седмицы по Пасхе

В Понедельник вечера

Тропарь, глас 5:

Собезнача́льное Сло́во Отцу́ и Ду́хови, от Де́вы ро́ждшееся на спасе́ние на́ше, воспои́м ве́рнии и поклони́мся, я́ко благоволи́ пло́тию взы́ти на Кре́ст, и сме́рть претерпе́ти, и воскреси́ти уме́ршыя сла́вным Воскресе́нием Свои́м.

Кондак, глас 4:

Душе́вныма очи́ма ослепле́н, к Тебе́ Христе́ прихожду́, я́коже слепы́й от рожде́ния, покая́нием зову́ Ти: Ты́ су́щих во тме́ све́т пресве́тлый.

Стихи́ры, гла́с 5.

Усты́ и душе́ю и умо́м, от пе́рсти Зижди́тельски и плюнове́ния, оче́с зе́ницы Да́вшаго, и о́бщее просвеще́ние, и́же пре́жде слепы́й испове́даше, тва́рем всеми́рнаго Смотри́теля и Строи́теля, за милосе́рдие то́кмо созда́ния вочелове́чившагося, и пропове́даше я́ко Бо́га Всеси́льнаго. Его́же кни́жницы за́вистию, и е́же к ни́м бесе́дование, отню́д не могу́ще зре́ти, слепотству́юще мно́жае, изгна́на от собо́рища су́дят, иногда́ зе́ницы Да́вшаго слепо́му душе́вныя и теле́сныя.

Побе́ду до́бльствия слепы́й на ви́дящих до конца́ взя́т: и́бо Соде́теля сего́ и Созда́теля все́х и слепы́й сы́й узре́, ви́дев воочевле́ние созда́вшееся от плюнове́ния, и си́м еди́нем позна́вый Просвети́вшаго, и Сы́на Бо́жия, и Влады́ку всеми́рнаго: его́же ви́дяще за́висти зло́бою ослепля́еми весьма́ не ви́деша. И та́ко сия́ многосугу́бо ви́дяще, от сего́ чуде́с де́йствия пресла́вная еди́неми глаго́лы.

Сомни́телен кни́жником слепы́м, воочи́выйся пре́жде слепы́й сы́й, яви́ся, я́ко не́гли ника́коже ви́дя: но ло́жно е́же зре́ти Спа́са ра́ди притворя́яйся, ослепля́тися хотя́щым, помраче́ньми пи́смене, в ни́хже сия́ет сла́дкое вои́стинну Со́лнце, субботоде́йствие обновля́яй, соде́лавый мне́, и́же сено́вное сего́ светоде́яй, и покрове́ние взе́мляй, и све́т и́же в си́х пре́жде слепы́м подаде́: и ны́не зря́ще, Светопода́теля ми́рови пропове́дует.

Сла́ва, и ны́не: гла́с 8:

Пра́вды Со́лнце мы́сленное Христе́ Бо́же, из утро́бы све́та лише́ннаго, Твои́м пречи́стым прикоснове́нием просвети́вшее обою́ду, и на́ши о́чи душе́вныя озари́вшее, сы́ны дне́ покажи́, да ве́рою вопие́м Ти́: мно́гое Твое́ и неизрече́нное, е́же на на́с благоутро́бие, Человеколю́бче сла́ва Тебе́.

Стихи́ры, гла́с 5:

Воскресе́ние дая́й ро́ду челове́ческому, я́ко овча́ на заколе́ние веде́ся: устраши́шася сего́ кня́зи а́дстии, и взя́шася врата́ плаче́вная. Вни́де бо Ца́рь сла́вы Христо́с, глаго́ля су́щым во у́зах, изыди́те: и су́щым во тьме́, откры́йтеся.

Го́споди, и стра́ха Твоего́ бою́ся, и лука́вое твори́ти не престаю́. Кто́ на суди́щи судии́ не бои́тся? Или́ кто́ исцели́тися хотя́, врача́ прогне́вает, я́коже а́з: долготерпели́ве Го́споди, на не́мощь мою́ умилосе́рдися и поми́луй мя́.

Щито́м ве́ры обо́лкшеся, и о́бразом кре́стным себе́ укрепи́вше, к му́кам му́жески вда́шася, и диа́волю ле́сть и де́рзость упраздни́ша, святи́и Твои́ Го́споди. Те́х мольба́ми я́ко Всеси́льный Бо́г, ми́рови ми́р низпосли́, и душа́м на́шым ве́лию ми́лость.

Сла́ва, и ны́не, гла́с 8:

За милосе́рдие ми́лости воплоти́выйся Христе́ Бо́же, све́та лише́ннаго от утро́бы, милосе́рдием неизрече́нных щедро́т, сия́ния Боже́ственнаго сподо́бил еси́, сего́ зе́ницам пе́рстию созда́тельными пе́рсты Твои́ми прикосну́выйся. Са́м и ны́не Светода́телю, и на́шя озари́ душе́вная чу́вства, я́ко еди́н Независтнода́тель.

Во Вторник утра

Тропарь, глас 5:

Собезнача́льное Сло́во Отцу́ и Ду́хови, от Де́вы ро́ждшееся на спасе́ние на́ше, воспои́м ве́рнии и поклони́мся, я́ко благоволи́ пло́тию взы́ти на Кре́ст, и сме́рть претерпе́ти, и воскреси́ти уме́ршыя сла́вным Воскресе́нием Свои́м.

Кондак, глас 4:

Душе́вныма очи́ма ослепле́н, к Тебе́ Христе́ прихожду́, я́коже слепы́й от рожде́ния, покая́нием зову́ Ти: Ты́ су́щих во тме́ све́т пресве́тлый.

Седа́лен воскре́сен, гла́с 5:

Го́споди, ме́ртв наре́клся еси́, Умертви́вый сме́рть: во гро́бе положи́лся еси́, Истощи́вый гро́бы: горе́ во́ини гро́б стрежа́ху, до́ле от ве́ка ме́ртвыя воскреси́л еси́. Всеси́льне и Непостижи́ме Го́споди сла́ва Тебе́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Судии́ седя́щу, и а́нгелом предстоя́щым, трубе́ глася́щей, и пла́мени горя́щу, что́ сотвори́ши душе́ моя́, ведо́ма на су́д? Тогда́ бо лю́тая твоя́ предста́нут, и та́йная твоя́ облича́тся согреше́ния. Те́мже пре́жде конца́ возопи́й к Судии́: Бо́же очи́сти мя́, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Сия́ет дне́сь па́мять страстоте́рпцев, и́мать бо от небе́с озаре́ние: ли́к а́нгельский торжеству́ет, и челове́ческий ро́д спра́зднует. Те́мже мо́лятся Го́сподеви, поми́ловатися душа́м на́шым.

Сла́ва, и ны́не: богоро́дичен:

Ма́ти Бо́жия Пресвята́я, Стено́ христиа́н, изба́ви лю́ди Твоя́ обы́чно, зову́щыя к Тебе́ приле́жно: сопроти́в ста́ни враго́в, и возвыша́ющихся мы́слей, да вопие́м ти́: ра́дуйся Благода́тная.

Седа́лен, гла́с 5.

Прозре́вый ви́дится слепы́й плюнове́нием, челове́ческое составле́ние пре́жде Созда́вшаго, не ви́дяй от рожде́ния вели́кое со́лнце. Те́мже и благодаре́ние Бо́гу возсыла́ет от души́, сего́ зря́ о́браз, по подо́бию созда́нный о́браз Созда́вшаго.

Стихи́ры, Гла́с 5:

Го́споди, вереи́ ве́чныя сокруши́вый, и у́зы растерза́вый от гро́ба воскре́сл еси́, оста́вль Твоя́ погреба́льная, во свиде́тельство и́стиннаго тридне́внаго Твоего́ погребе́ния: и предвари́л еси́ в Галиле́и, в пеще́ре Стрего́мый. Ве́лия Твоя́ ми́лость, Непостижи́ме Спа́се поми́луй, и спаси́ на́с.

Мно́жества прегреше́ний мои́х пре́зри Го́споди, от Де́вы Рожде́йся, и вся́ очи́сти беззако́ния моя́, по́мысл мне́ подая́й обраще́ния, я́ко еди́н Человеколю́бец, молю́ся, и поми́луй мя́.

Страстоте́рпцы Твои́ Го́споди, чи́ны а́нгельския подража́вше, я́ко безпло́тнии му́ки претерпе́ша, единомы́сленное упова́ние иму́ще, обеща́нных бла́г наслажде́ние. Те́х моли́твами Христе́ Бо́же на́ш, ми́р да́руй ми́ру Твоему́ и душа́м на́шым ве́лию ми́лость.

Сла́ва, и ны́не: гла́с 8:

Кто́ возглаго́лет си́лы Твоя́ Христе́? или́ кто́ изочте́т чуде́с Твои́х мно́жества? Сугу́б бо я́ко ви́ден бы́л еси́ на земли́ за бла́гость, сугу́бы и цельбы́ неду́гующым подава́л еси́: не то́чию бо теле́сныя о́чи отве́рзл еси́, и́же от утро́бы слепо́му, но и душе́вныя. Те́мже Бо́га Тя́ испове́даше тая́щагося, и все́м подаю́ща ве́лию ми́лость.

Стихи́ры гла́с 5.

Сия́ние светоно́сное просия́вшее, зря́ще проявле́нно в суббо́ту, светоно́снаго слепца́, зако́нми моисе́а смуща́емии, нра́вом ослепля́ющеся зря́ще се́нь, осене́ния не разуме́юще покрыва́юща зако́ны, из него́же не ви́деша светоде́теля, и сло́вом суббо́ты соде́теля, воочи́вшаго слепа́го измове́нием, и плюнове́ния но́вым бренотворе́нием. с ни́мже смеша́еми бо́га того́ у́зрим, ослепле́ние фарисе́йское облича́юще зре́нием, е́же от лу́чшаго.

Сти́х: При́зри на мя́, и поми́луй мя́.

У́тро возсия́ во тме́ пребыва́ющему но́щи невиде́ния, многоболе́зненному слепо́му, во струя́х купе́ли Силоа́мстей измове́нному, све́т очесе́м боже́ственным повеле́нием. Те́мже светоно́сный нове́йший ви́дится, мра́к тмы́ нощетво́рных зако́нных изъоблича́я кни́жников, и помраче́нное си́х невиде́ние возсия́ньми просвеща́яй светоно́сными: из ни́хже ослепле́ние сено́вных пре́жде пи́смен вооча́ется, от Сло́ва на́м подае́мыми све́тлыми сия́ньми.

Сти́х: Стопы́ моя́ напра́ви по словеси́ Твоему́.

На высоту́ взы́де светоно́снаго восхожде́ния, све́том богоразу́мия просве́щся слепы́й, терпя́ теле́сное и у́мное омраче́ние, е́же от Сло́ва но́выми светоли́тии просве́щся ве́сь, а́ще и пе́рвее ослепи́ся во обои́х и Светода́вца познава́ет, и Светоде́теля возсия́вшаго из гро́ба тридне́вно, и зе́млю уясни́вшаго Свои́м воскресе́нием: из него́же возсия́ све́т возсозда́ния во тме́ держи́мым челове́ком, за благоутро́бие и ве́лию ми́лость.

Сла́ва И ны́не: гла́с 8:

Пра́вды Со́лнце мы́сленное Христе́ Бо́же, из утро́бы све́та лише́ннаго, Твои́м пречи́стым прикоснове́нием просвети́вшее обою́ду, и на́ши о́чи душе́вныя озари́вшее, сы́ны дне́ покажи́, да ве́рою вопие́м Ти́ мно́гое Твое́ и неизрече́нное, е́же на на́с благоутро́бие, Человеколю́бче, сла́ва Тебе́.