Песнопения Четверга 5-ой седмицы по Пасхе

В Среду вечера

Тропарь, глас 4:

Све́тлую воскресе́ния про́поведь, от А́нгела уве́девше Госпо́дни учени́цы, и пра́деднее осужде́ние отве́ргша, апо́столом хва́лящеся глаго́лаху: испрове́ржеся сме́рть, воскре́се Христо́с Бо́г, да́руяй ми́рови ве́лию ми́лость.

Кондак, глас 8:

Ве́рою прише́дшая на кла́дязь самаряны́ня, ви́де тя́ прему́дрости во́ду, е́юже напои́вшися оби́льно, Ца́рствие вы́шнее насле́дова ве́чно, я́ко присносла́вная.

Стихи́ры, гла́с 4.

На кла́дязе Христо́с самаряны́ню обре́т, проси́ во́ду пи́ти от нея́, жа́ждай сея́ исправле́ния и спасе́ния, е́же и уразуме́ся де́лы исполня́емое. Сию́ бо влеку́щую питие́, пития́ Са́м извлека́ет, и пития́ исполня́ет живу́щаго, согра́жданом возвеща́ющую: се́ дре́вле в зако́не рече́нный Месси́а Христо́с, яви́ся я́ко Челове́к, мы́слей сокрове́нных открыва́я неизрече́нная.

Се́ Месси́а Христо́с, су́щым во гра́де, на земли́ яви́ся, самаряны́ня глаго́лет: напи́санный приити́, и́же соде́янная мно́ю сказа́, и я́же во глубине́ се́рдца моего́ сокрове́нная, вся́ мне́ рече́, я́ко соверши́х. Те́мже гра́д сте́кшийся ви́дит словеса́ ея́, по всему́ и́стинствующая, и ве́щи удивля́ется, и уверя́ется виде́нию.

Тебе́ в шесты́й ча́с, я́ко влады́ку иногда́ в раи́ ходя́ща бо́га, прама́терняя ви́де дщи́ па́ки, в ча́с шесты́й та́ко седя́ща, иде́же исто́чник воды́, и кладене́ц ископа́ся, и от нея́ прося́ща пи́ти, я́ко да водо́ю сию́ напои́ши жи́зни нетле́ния, е́же и соде́яся: твоея́ бо живоно́сныя воды́, она́ изъоби́льно напи́вшися, и во гра́де пропове́да водно́е бога́тство.

Сла́ва, и ны́не: гла́с 1:

На исто́чник прише́л еси́, исто́чниче чуде́с, в шесты́й ча́с, Е́вин улови́ти пло́д: Е́ва бо в то́й изы́де из рая́ пре́лестию зми́евою: Прибли́жи бо ся самаряны́ня почерпсти́ во́ду, ю́же ви́дев рече́ Спа́с: да́ждь Ми́ во́ду пи́ти, и А́з воды́ теку́щия насы́щу тя́, и во гра́д те́кши целому́дренная, наро́дом возвести́ а́бие: прииди́те, ви́дите Христа́ Го́спода, Спа́са ду́ш на́ших.

Стихи́ры, гла́с 4:

Врата́ а́дова сокруши́л еси́ Го́споди, и Твое́ю сме́ртию сме́ртное ца́рство разруши́л еси́: ро́д же челове́ческий от тле́ния свободи́л еси́, живо́т и нетле́ние ми́ру дарова́в, и ве́лию ми́лость.

Апо́стольский ли́к, Ду́хом Святы́м просвети́л еси́ Христе́, и на́шу скве́рну грехо́вную те́ми отмы́й Бо́же, и поми́луй на́с.

Иму́ще дерзнове́ние ко Спа́су святи́и, моли́теся непреста́нно за ны́ гре́шныя, оставле́ние прегреше́ний прося́ще, и душа́м на́шым ве́лию ми́лость.

Сла́ва, и ны́не, гла́с 2:

На студене́ц я́ко прии́де Госпо́дь, самаряны́ня моля́ше Благоутро́бнаго: пода́ждь ми́ во́ду ве́ры, и прииму́ купе́льныя воды́ ра́дование и избавле́ние: Животода́вче Го́споди, сла́ва Тебе́.

В Четверг утра

Тропарь, глас 4:

Све́тлую воскресе́ния про́поведь, от А́нгела уве́девше Госпо́дни учени́цы, и пра́деднее осужде́ние отве́ргша, апо́столом хва́лящеся глаго́лаху: испрове́ржеся сме́рть, воскре́се Христо́с Бо́г, да́руяй ми́рови ве́лию ми́лость.

Кондак, глас 8:

Ве́рою прише́дшая на кла́дязь самаряны́ня, ви́де тя́ прему́дрости во́ду, е́юже напои́вшися оби́льно, Ца́рствие вы́шнее насле́дова ве́чно, я́ко присносла́вная.

Седа́лен воскре́сен, гла́с 4:

Распны́йся на́с ра́ди во́лею, и вмене́н бы́в в ме́ртвых Животода́вче, и воскре́с тридне́вно Христе́ Бо́же на́ш, сокруши́л еси́ си́лою Твое́ю сме́рти держа́ву, все́х воста́нием Твои́м су́щих во а́де оживи́вый. И воспева́юще чте́м Твое́ воста́ние вси́, безсме́ртне Го́споди.

Сти́х: Во всю́ зе́млю изы́де веща́ние и́х и в концы вселенныя глаголы и́х.

Свети́ла в конце́х ученики́ Твоя́, Спа́се, показа́л еси́ сия́юща Твои́м пропове́данием, просвеща́ющыя ду́шы на́шя: пре́лесть и́дольскую те́ми омрачи́в, уче́ньми благоче́стия просвети́вый ми́р. Те́х моли́твами спаси́ ду́шы на́шя.

Сти́х: Ди́вен Бо́г во святы́х Свои́х, Бо́г Изра́илев.

Кресто́м вооружи́вшеся страстоте́рпцы Твои́, победи́ша ко́зни злонача́льнаго врага́, Христе́ Бо́же на́ш: возсия́ша я́ко свети́ла, челове́ки наставля́юще, подаю́т исцеле́ния ве́рою прося́щым. Те́х моли́твами спаси́ ду́шы на́шя.

Сла́ва, и ны́не: богоро́дичен:

Де́во Пренепоро́чная, Преблага́го Бо́га ро́ждшая, со апо́столы Того́ непреста́нно моли́, оставле́ние прегреше́ний, и исправле́ние жития́ пода́ти на́м, пре́жде конца́, ве́рою и любо́вию воспева́ющым Тя́ по до́лгу, еди́на Всепе́тая.

Седа́лен, гла́с 6.

Я́ко ве́рней самаряны́не Го́споди, Божества́ Твоего́ исто́чник отве́рзл еси́, и излия́л еси́ богоразу́мие на ню́, напоя́я питие́м богоприя́тным: и ны́не все́м на́м низпосли́ прегреше́ний очище́ние преблаги́й.

Стихи́ры, Гла́с 4:

Оте́ческих Твои́х не́др не разлучи́вся, Единоро́дне Сло́ве Бо́жий, прише́л еси́ на зе́млю за Человеколю́бие, челове́к бы́в непрело́жен, и Кре́ст и сме́рть претерпе́л еси́ пло́тию, безстра́стный Божество́м, воскре́с же из ме́ртвых, безсме́ртие по́дал еси́ челове́ческому ро́ду я́ко еди́н Всеси́лен.

Некни́жныя ученики́ Ду́х Тво́й Святы́й наказа́тели яви́ Христе́ Бо́же, и многовеща́нным сли́чием язы́ков пре́лесть упраздни́, я́ко Всеси́лен.

Ка́ко ва́шым подвиго́м не удиви́мся святи́и му́ченицы, я́ко те́лом ме́ртвенным обложе́ни, безпло́тныя враги́ победи́сте? Не устраши́ша ва́с мучи́тельская преще́ния, ни ужаси́ша ва́с му́к приложе́ния, вои́стинну досто́йно от Христа́ просла́вистеся. Непреста́нно моли́теся спасти́ся душа́м на́шым.

Сла́ва, и ны́не: гла́с 2:

Собезнача́льный и соприсносу́щный Сы́н и Сло́во о О́тчее, на исто́чник прии́де, исто́чник исцеле́ний, и жена́ от Самари́и прии́де почерпсти́ во́ду, ю́же ви́дев рече́ Спа́с: да́ждь Ми́ воды́ пи́ти, и ше́дши пригласи́ твоего́ му́жа. Она́ же я́ко Челове́ку глаго́лющи, а не Бо́гу, утаи́ти тща́щися, глаго́лаше: не и́мам му́жа. И Учи́тель к не́й: и́стину рекла́ еси́: не и́мам му́жа, пя́ть бо име́ла еси́, и ны́не его́же и́маши, не́сть тво́й му́ж. Она́ же о глаго́ле удиви́вшися, и во гра́д те́кши, наро́дом вопия́ше, глаго́лющи: прииди́те ви́дите Христа́, И́же да́рует ми́рови ве́лию ми́лость.

Стихи́ры гла́с 4.

Ты́ исто́чник бла́гости сы́й и пучи́на, жи́зни же храни́тель, еди́не Благоутро́бне, ка́ко жене́ самаряны́не бесе́дуя возгласи́л еси́: да́ждь Ми́ во́ду пи́ти, я́ко да прии́меши оставле́ние: воспева́ем Твое́ мно́гое благоутро́бие, и́мже спаса́еши челове́ческий ве́сь ро́д, за мно́гую бла́гость.

Сти́х: Наляцы́, и успева́й, и ца́рствуй, и́стины ра́ди, и кро́тости, и пра́вды.

Прииди́те ви́дите Челове́ка, И́же рече́ ми дне́сь на исто́чнице седя́й, что́ сотвори́х: Проро́к бо и́стиннеший е́сть и превели́кий, сокрове́нная и явле́нная ве́дый вся́. Но да́руй во́ду жи́ву, ю́же подае́ши жа́ждущым, да не вжа́жду па́ки во ве́ки, Человеколю́бче.

Сти́х: Возлюби́л еси́ пра́вду, и возненави́дел еси́ беззако́ние.

Исто́чник приснотеку́щий, животе́ безсме́ртне, струя́ неистоща́емая же и нетле́нная, путеше́ствовав седя́ше бли́з кла́дязя, Своя́ ученики́ посла́в по бра́шно, бесе́доваше жене́ че́рплющей, сию́ хотя́ улови́ти, и просвети́ти души́ ея́ о́чи.

Сла́ва И ны́не: гла́с 3:

Да ра́дуется дне́сь све́тло не́бо и земля́, я́ко Христо́с яви́ся воплоща́емь я́ко Челове́к, да Ада́ма изме́т от кля́твы всеро́дна, и удивля́ется чудесы́ в Самари́ю прише́д: жене́ же бесе́доваше воды́ прося́, И́же о́блаки вода́ми одева́яй. Те́мже вси́ ве́рнии поклони́мся, на́с ра́ди во́лею Обнища́вшему, благоутро́бным сове́том.