Песнопения Вторника 5-ой седмицы по Пасхе

В Понедельник вечера

Тропарь, глас 4:

Све́тлую воскресе́ния про́поведь, от А́нгела уве́девше Госпо́дни учени́цы, и пра́деднее осужде́ние отве́ргша, апо́столом хва́лящеся глаго́лаху: испрове́ржеся сме́рть, воскре́се Христо́с Бо́г, да́руяй ми́рови ве́лию ми́лость.

Кондак, глас 8:

Ве́рою прише́дшая на кла́дязь самаряны́ня, ви́де тя́ прему́дрости во́ду, е́юже напои́вшися оби́льно, Ца́рствие вы́шнее насле́дова ве́чно, я́ко присносла́вная.

Стихи́ры, гла́с 1.

Творе́ц все́х и жи́зни Пода́тель, Отцу́ Боже́ственному соприсносу́щное Сло́во, во́лею от Де́вы пло́ть прии́м, и бы́в Челове́к, неизрече́нныя прему́дрости, я́ко Бла́г, все́м источи́ уче́ния.

Пра́зднику преполови́вшуся иуде́йскому Христе́, во святи́лищи предста́л еси́, зако́ну Влады́ка учя́ вла́стию, и кни́жники облича́я, я́коже пи́сано е́сть, и ужаса́я прему́дростию слове́с Твои́х, и чуде́с показа́ньми.

Пода́тель прему́дрости, и до́брых излия́тель, излива́яй Боже́ственныя струи́, от исто́чника приснотеку́щаго: прииди́те ко Мне́, зове́т, во́ду жи́зни жа́ждущии почерпи́те, и ре́ки из чре́ва ва́шего, глаго́лет, дарова́ний Боже́ственных потеку́т.

Сла́ва, и ны́не: гла́с 2:

Егда́ прише́л еси́ во святи́лище Христе́ Бо́же, преполови́вшуся пра́зднику, тогда́ лю́ди учи́л еси́, вопия́: ве́руяй в Мя́, а́ще и у́мрет, жи́в бу́дет. Иуде́и же распыха́хуся с фарисе́и и саддуке́и и кни́жники, глаго́люще: кто́ е́сть Се́й, И́же глаго́лет хулы́? не помышля́юще, я́ко Ты́ еси́ пре́жде все́х ве́к, со Отце́м и Ду́хом сла́вимый Бо́же на́ш, сла́ва Тебе́.

Стихи́ры, гла́с 4:

Дре́ва преслуша́ния запреще́ние разреши́л еси́ Спасе́, на Дре́ве кре́стнем во́лею пригвозди́вся, и во а́д соше́д Си́льне, сме́ртныя у́зы я́ко Бо́г растерза́л еси́. Те́мже кла́няемся е́же из ме́ртвых Твоему́ Воскресе́нию, ра́достию вопию́ще: всеси́льне Го́споди, сла́ва Тебе́.

Кто́ обурева́емый, и притека́яй ко приста́нищу сему́, не спаса́ется? Или́ кто́ боле́знуяй, и припа́даяй к враче́бнице се́й, не исцелева́ется? Соде́телю все́х, и врачу́ неду́гующих Го́споди, пре́жде да́же до конца́ не поги́бну, спаси́ мя.

Святы́х му́ченик прие́мый терпе́ние, и от на́с приими́ пе́ние Человеколю́бче, да́руяй на́м те́х моли́твами ве́лию ми́лость.

Сла́ва, и ны́не, гла́с 3:

Преполови́вшуся пра́зднику, сла́вим посреде́ земли́ спасе́ние Соде́лавша: Посреде́ бо двою́ разбо́йнику Живо́т на Дре́ве пове́шен бе́, и ху́лящему у́бо умолча́л, ве́рующему же возопи́л: дне́сь со Мно́ю бу́деши в раи́. Сше́л еси́ во гро́б, плени́л еси́ а́д, и воскре́сл еси́ тридне́вно, спаса́я ду́шы на́шя.

Во Вторник утра

Тропарь, глас 4:

Кондак, глас 8:

Седа́лен воскре́сен, гла́с 4:

Во́льною Твое́ю во́лею Кре́ст претерпе́л еси́ Спа́се, и во гро́бе но́ве положи́ша Тя́ челове́цы сме́ртнии, сло́вом концы́ соста́вльшаго. Те́мже свя́зан бы́сть чужди́й: сме́рть лю́то пленя́шеся, и су́щии во а́де вси́ взыва́ху живоно́сному воста́нию Твоему́: Христо́с воскре́се Жизнода́вец, пребыва́яй во ве́ки.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Помышля́й душе́, ка́ко предста́нем Судии́? поста́вятся престо́ли стра́шнии, и коего́ждо дея́ния облича́тся. Тогда́ Судия́ неумоли́мый: та́мо о́гнь лю́то предста́нет, я́коже свире́пое мо́ре содержа́, и покрыва́яй концы́. Со все́ми си́ми ви́ждь душе́ моя́, стени́ пре́жде конца́.

Сти́х: Ди́вен Бо́г во святы́х Свои́х, Бо́г Изра́илев.

И́же во все́м ми́ре му́ченик Твои́х, я́ко багряни́цею и ви́ссом кровьми́ Це́рковь Твоя́ украси́вшися, те́ми вопие́т Ти́, Христе́ Бо́же: лю́дем Твои́м щедро́ты Твоя́ низпосли́, ми́р жи́тельству Твоему́ да́руй, и душа́м на́шым ве́лию ми́лость.

Сла́ва, и ны́не: богоро́дичен:

Стра́шное та́инство, и чу́до пресла́вное, ка́ко Де́ва Тебе́ Зижди́теля все́х понесе́, и по рождестве́ па́ки цела́ и Де́ва пребы́сть? Рожде́йся из Нея́ ве́ру утверди́, язы́ки укроти́. И ми́р умири́, я́ко Человеколю́бец.

Седа́лен, гла́с 8.

Прему́дрости во́ду и жи́зни источа́я ми́рови, все́х Спа́се призыва́еши почерпсти́ спасе́ния во́ды: Боже́ственный бо зако́н Тво́й прии́м челове́к, в себе́ угаша́ет, преле́стное у́глие: отону́дуже во ве́ки не вжа́ждет, ни преста́нет насыще́ния Твоего́ Влады́ко Царю́ Пренебе́сный. Сего́ ра́ди сла́вим держа́ву Твою́ Христе́ Бо́же, прегреше́ний оставле́ние прося́ще посла́ти бога́тно рабо́м твои́м.

Стихи́ры, Гла́с 4:

Кресто́м Твои́м Христе́, от дре́вния кля́твы свободи́л еси́ на́с, и сме́ртию Твое́ю естество́ на́ше му́чащаго диа́вола упраздни́л еси́: воста́нием же Твои́м ра́дости вся́ испо́лнил еси́. Те́мже вопие́м Ти́: воскресы́й из ме́ртвых Го́споди, сла́ва Тебе́.

Омы́й мя́ слеза́ми мои́ми Спа́се, я́ко оскверни́х во мно́гих гресе́х. Те́мже и припа́даю Ти́ Ми́лостиве: согреши́х, поми́луй мя́ Бо́же.

А́нгелом соприча́стницы бы́сте святи́и му́ченицы, в по́двизе Христа́ му́жески пропове́давше: вся́ бо я́же в ми́ре оста́висте кра́сная, я́ко не су́щая, ве́ру же я́ко агки́ру тве́рдую удержа́сте. Те́мже и ле́сть отгна́вше, источа́ете ве́рным исцеле́ний дарова́ния, непреста́нно моля́щеся спасти́ся душа́м на́шым.

Сла́ва, и ны́не: гла́с 4:

Го́споди, пре́жде честна́го Твоего́ Креста́, пра́зднику преполови́вшуся, во святи́лище вше́л еси́, иуде́и со дерзнове́нием учя́, Моисе́ом и в зако́не Тобо́ю законоположе́нным, ужаса́ющеся же Христе́, Твоея́ прему́дрости неизрече́нному та́инству, е́же на Тя́ ропта́нию в себе́ за́вистию поуча́хуся: ка́ко Се́й ве́сть пи́смена не учи́вся? Не ве́дуще Тебе́ Спа́са ду́ш на́ших.

Стихи́ры гла́с 2.

Коне́ц сы́й и нача́ло, преполове́ние же, посреде́ пра́здника предста́л еси́ во святи́лищи Христе́ мо́й, источа́я ми́ оставле́ние.

Сти́х: Помяни́ со́нм Тво́й, его́же стяжа́л еси́ испе́рва.

Слы́ша Сио́н Воскресе́ния Твоего́ Боже́ственную держа́ву Сло́ве, и ра́дуется с ча́ды, воспева́я Тя́ Благоутро́бнаго.

Сти́х: Бо́г же Ца́рь на́ш пре́жде ве́ка содела спасение посреде земли.

Све́т от Отца́, возсия́в Сло́во, но напоследи́ ле́т яви́лся еси́ я́ко Челове́к, подая́ мне́ прегреше́ний оставле́ние.

Сла́ва И ны́не: гла́с 8:

Преполови́вшуся пра́зднику Па́схи, в хра́м вше́л еси́ святи́лищный Спа́се на́ш, и ста́в посреде́ наро́да, учи́л еси́ те́х с дерзнове́нием, и глаго́лал еси́: А́з е́смь све́т ми́ра, в сле́д Мене́ иды́й, не и́мать ходи́ти во тме́, но име́ти бу́дет све́т безсме́ртныя жи́зни.