Шрифт

Песнопения Пасхального периода

Песнопения Субботы 4-ой седмицы по Пасхе

В Пятницу вечера

Тропарь, глас 8:

Преполови́вшуся пра́зднику, жа́ждущую ду́шу мою́ благоче́стия напо́й вода́ми, я́ко все́м Спа́се возопи́л еси́: жа́ждай да гряде́т ко Мне́ и да пие́т, исто́чниче жи́зни на́шея Христе́ Бо́же, сла́ва Тебе́.

Кондак, глас 4:

Пра́зднику зако́нному преполовля́ющуся, все́х Тво́рче Влады́ко, к предстоя́щым глаго́лал еси́ Христе́ Бо́же: прииди́те и почерпи́те во́ду безсме́ртия. Те́мже Тебе́ припа́даем, и ве́рно вопие́м: щедро́ты Твоя́ да́руй на́м, Ты́ бо еси́ исто́чник жи́зни на́шея.

Стихи́ры, гла́с 1.

Творе́ц все́х и жи́зни Пода́тель, Отцу́ Боже́ственному соприсносу́щное Сло́во, во́лею от Де́вы пло́ть прии́м, бы́в Челове́к, неизрече́нныя прему́дрости, я́ко Бла́г все́м источи́ уче́ния.

Пра́зднику преполови́вшуся иуде́йскому Христе́, во святи́лищи предста́л еси́, зако́ну Влады́ка, учя́ вла́стию, и кни́жники облича́я, я́коже пи́сано е́сть, и устраша́я прему́дростию слове́с Твои́х, и чуде́с показа́ньми.

Пода́тель прему́дрости, и до́брых излия́тель, излива́яй Боже́ственныя струи́ от исто́чника приснотеку́щаго, прииди́те ко Мне́, зове́т, во́ду жи́зни жа́ждущии почерпи́те, и ре́ки из чре́ва ва́шего, глаго́лет, дарова́ний Боже́ственных потеку́т.

Сла́ва: гла́с 1:

Пятдеся́тницы наста́ дне́й преполове́ние, в не́мже Христо́с обнажи́в малови́дно Боже́ственную си́лу, разсла́бленнаго стягну́ сло́вом, того́ от одра́ возста́вив, и Боголе́пно чудотворя́ в зда́нном те́ле, челове́ком дарова́ ве́чный живо́т, и ве́лию ми́лость.

И ны́не: гла́с 3:

Ка́ко не диви́мся, Богому́жному Рождеству́ Твоему́ Пречестна́я? Искуше́ния бо му́жескаго не прие́мши Всенепоро́чная, родила́ еси́ без отца́ Сы́на пло́тию, пре́жде ве́к от Отца́ рожде́ннаго без ма́тере: ника́коже претерпе́вшаго измене́ния, или́ смеше́ния, или́ разделе́ния, но обою́ существу́ сво́йство це́ло сохра́ншаго. Те́мже Ма́ти Де́во Влады́чице, Того́ моли́ спасти́ся душа́м, правосла́вно Богоро́дицу испове́дающих Тя́.

Стихи́ры, гла́с 3:

Твои́м Кресто́м Христе́ Спа́се, сме́рти держа́ва разруши́ся, и диа́воля пре́лесть упраздни́ся: ро́д же челове́ческий ве́рою спаса́емый, пе́снь Тебе́ всегда́ прино́сит.

Сти́х: Госпо́дь воцари́ся, в ле́поту облече́ся.

Просвети́шася вся́ческая, Воскресе́нием Твои́м Го́споди, и ра́й па́ки отве́рзеся, вся́ же тва́рь восхваля́ющи Тя́, пе́снь Тебе́ всегда́ прино́сит.

Сти́х: И́бо утверди́ вселе́нную, я́же не подви́жится.

Сла́влю Отца́ и Сы́на си́лу, и Ду́ха Свята́го пою́ вла́сть, неразде́льное, несозда́нное Божество́, Тро́ицу Единосу́щную, ца́рствующую в ве́к ве́ка.

Сти́х: До́му Твоему́ подоба́ет святы́ня Го́споди, в долготу́ дни́й.

Стра́стию Твое́ю Христе́, омрачи́вый со́лнце, и све́том Твоего́ Воскресе́ния, просвети́вый вся́ческая, приими́ на́шу вече́рнюю пе́снь Человеколю́бче.

Сла́ва, и ны́не, гла́с 1:

Во святи́лище прише́л еси́ Прему́дросте Бо́жия, преполовля́ющуся пра́зднику, учя́ и облича́я непокори́выя иуде́и, фарисе́и и кни́жники, и вопия́ со дерзнове́нием к ни́м: жа́ждай да гряде́т ко Мне́, и пие́т во́ду живо́тную. И не вжа́ждет в ве́к. ве́руяй Мое́й бла́гости, ре́ки потеку́т из чре́ва его́ жи́зни ве́чныя. О бла́гости и благоутро́бия Твоего́ Христе́ Бо́же на́ш, сла́ва Тебе́.

В Субботу утра

Тропарь, глас 8:

Преполови́вшуся пра́зднику, жа́ждущую ду́шу мою́ благоче́стия напо́й вода́ми, я́ко все́м Спа́се возопи́л еси́: жа́ждай да гряде́т ко Мне́ и да пие́т, исто́чниче жи́зни на́шея Христе́ Бо́же, сла́ва Тебе́.

Кондак, глас 4:

Пра́зднику зако́нному преполовля́ющуся, все́х Тво́рче Влады́ко, к предстоя́щым глаго́лал еси́ Христе́ Бо́же: прииди́те и почерпи́те во́ду безсме́ртия. Те́мже Тебе́ припа́даем, и ве́рно вопие́м: щедро́ты Твоя́ да́руй на́м, Ты́ бо еси́ исто́чник жи́зни на́шея.

Седа́лен воскре́сен, гла́с 3:

Христо́с от ме́ртвых воста́, нача́ток усо́пших, перворожде́н тва́ри, и Соде́тель все́х бы́вших, истле́вшее естество́ ро́да на́шего в Себе́ Само́м обнови́: не ктому́ сме́рте облада́еши, и́бо все́х Влады́ка держа́ву твою́ разруши́.

Пло́тию сме́рти вкуси́вый Го́споди, го́ресть сме́рти пресе́кл еси́ воста́нием Твои́м, и челове́ка на ню́ укрепи́вый, пе́рвыя кля́твы одоле́ние призыва́я: защи́тниче жи́зни на́шея, Христе́ Бо́же, сла́ва Тебе́.

Сла́ва, и ны́не: богоро́дичен:

Тя́ хода́тайствовавшую спасе́ние ро́да на́шего воспева́ем Богоро́дице Де́во: пло́тию бо от Тебе́ восприя́тою Сы́н Тво́й, и Бо́г на́ш, Кресто́м восприи́м стра́сть, изба́ви на́с от тли́, я́ко Человеколю́бец.

Седа́лен, гла́с 3.

Пра́зднику преполови́вшуся зако́нному, бы́л еси́ учя́ Спа́се мо́й во святи́лищи, и облича́я безу́мие неве́рных евре́ев, и вопия́ к наро́дом Боже́ственным гла́сом, я́ко Человеколю́бец: жа́ждай, взыва́л еси́, да гряде́т ко Мне́ и пие́т. те́мже обеща́л еси́ ве́рующым пода́ти весе́лия во́ды от исто́чника нетле́ннаго. Сего́ ра́ди вопие́м Ти́: низпосли́ Христе́ Бо́же Ду́ха Твоего́ Свята́го, и спаси́ на́с, я́ко еди́н еси́ Многоми́лостивый.

Стихи́ры, Гла́с 3:

Прииди́те вси́ язы́цы, уразуме́йте стра́шныя та́йны си́лу: Христо́с бо Спа́с на́ш, е́же в нача́ле Сло́во, распя́тся на́с ра́ди, и во́лею погребе́ся, и воскре́се из ме́ртвых, е́же спасти́ вся́ческая, Тому́ поклони́мся.

Пове́даша вся́ чудеса́ стра́жие Твои́ Го́споди: но собо́р суеты́ испо́лни мздо́ю десни́цу и́х, скры́ти мня́ше Воскресе́ние Твое́, е́же ми́р сла́вит: поми́луй на́с.

Ра́дости вся́ испо́лнишася, Воскресе́ния иску́с прии́мшя. Мари́а бо Магдали́на ко гро́бу прии́де, и обре́те а́нгела на ка́мени седя́ща, ри́зами блиста́ющася, и глаго́люща: что́ и́щете Жива́го с ме́ртвыми? Не́сть зде́, но воста́, я́коже рече́, предваря́я вы́ в Галиле́и.

Во све́те Твое́м Влады́ко, у́зрим све́т Человеколю́бче: воскре́сл бо еси́ из ме́ртвых, спасе́ние ро́ду челове́ческому да́руяй, да Тя́ вся́ тва́рь славосло́вит еди́наго безгре́шнаго: поми́луй на́с.

Сла́ва, и ны́не: гла́с 4:

Просвети́вшеся бра́тие Воскресе́нием Спа́са Христа́, и дости́гше преполове́ния пра́здника Влады́чня, прии́скренно сохрани́м за́поведи Бо́жия, да досто́йни бу́дем и Вознесе́ние пра́здновати, и прише́ствие получи́ти Cвята́го Ду́ха.

Стихи́ры гла́с 2.

Теку́щий исто́чник Твоея́ прему́дрости, во́ду духо́вную источа́ет, ю́же пию́ще, догма́т Боже́ственных исполня́емся.

Сти́х: Помяни́ со́нм Тво́й, его́же стяжа́л еси́ испе́рва.

Уязвля́шеся лю́тый евре́йский ро́д вои́стинну, слы́ша Тя́ Сло́ве, науча́юща наро́ды спаси́тельным уче́нием.

Сти́х: Бо́г же Ца́рь на́ш пре́жде ве́ка содела спасение посреде земли.

Прише́л еси́ Соде́телю на Сио́н, и ста́л еси́ посреде́ люде́й Твои́х, и лю́дем да́л еси́ благода́ть спаси́тельную.

Сла́ва И ны́не: гла́с 4:

Го́споди, пре́жде честна́го Твоего́ Креста́, пра́зднику преполови́вшуся, во святи́лище вше́л еси́, иуде́и со дерзнове́нием учя́, Моисе́ем и в зако́не Тобо́ю законоположе́нным. Ужаса́ющеся же Христе́ Твоея́ прему́дрости неизрече́нному та́инству, е́же на Тя́ ропта́нию в себе́ за́вистию поуча́хуся. Ка́ко Се́й ве́сть пи́смена не учи́вся? Не ве́дяще Тебе́ Спа́са ду́ш на́ших.

Песнопения Пасхального периода