Песнопения Субботы 3-й седмицы по Пасхе

В Пятницу вечера

Тропарь, глас 2:

Егда́ снизше́л еси́ к сме́рти, Животе́ Безсме́ртный, / тогда́ ад умертви́л еси́ блиста́нием Божества́; / егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: / Жизнода́вче, Христе́ Бо́же наш, сла́ва Тебе́.

Слава: Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и благоуха́ньми, / во гро́бе но́ве, закры́в, положи́, / но тридне́вен воскре́сл еси́, Го́споди, / подая́й ми́рови ве́лию ми́лость.

И ныне: Мироно́сицам жена́м, при гро́бе предста́в А́нгел, вопия́ше: / ми́ра ме́ртвым суть прили́чна, / Христо́с же истле́ния яви́ся чуждь. / Но возопи́йте: воскре́се Госпо́дь, / подая́й ми́рови ве́лию ми́лость.

Кондак, глас 2:

Ра́доватися мироно́сицам повеле́л еси́, / плачь прама́тере Е́вы утоли́л еси́ / воскресе́нием Твои́м, Христе́ Бо́же, / апо́столом же Твои́м пропове́дати повеле́л еси́: / Спас воскре́се от гро́ба.

Стихи́ры, гла́с 2.

Мироно́сицы жены́, у́тру глубоку́, арома́ты взе́мшя, Госпо́дня гро́ба достиго́ша. Я́же не наде́яхуся обре́тшя, помышля́ху благогове́ющя ка́менному отвале́нию, и друга́ ко друзе́й глаго́лаху: где́ су́ть печа́ти гро́ба? где́ е́сть Пила́това кустоди́а, и опа́сное утвержде́ние? бы́сть же возвести́тель неразумева́ющым жена́м, блиста́яйся а́нгел, и глаго́ляй к ним: что́ с рыда́нием и́щете жива́го, и оживотвори́вшаго род челове́ческий? воста́ Христо́с Бог наш из ме́ртвых я́ко всеси́лен, подая́й всем нам нетле́ние и жи́знь, просвеще́ние и ве́лию ми́лость.

Почто́ ми́ра со слеза́ми, о учени́цы, растворя́ете? ка́мень отвали́ся, гроб истощи́ся: ви́дите тлю́ живото́м попра́ную, печа́ти свиде́тельствующя я́вственно, спя́щыя лю́те стра́жники непокори́вых, сме́ртное спасе́ся пло́тию Бо́жиею, ад рыда́ет, те́кше ра́достию рцы́те апо́столом: умертви́вый Христо́с сме́рть, перворожде́н из ме́ртвых, вас предваря́ет в Галиле́и.

Мироно́сицы ра́но бы́вшя, и гроб Твой со тща́нием дости́гшя, иска́ху Тебе́ Христе́, во е́же пома́зати пречи́стое те́ло Твое́. И а́нгеловыми глаго́лы огласи́вшеся, радостотво́рныя о́бразы апо́столом пропове́даху: я́ко воскре́сл е́сть Нача́льник спасе́ния на́шего, плени́вый сме́рть, ми́рови же да́руяй живо́т ве́чный, и ве́лию ми́лость.

Сла́ва: гла́с 6:

Мироно́сицы жены́, гро́ба Твоего́ дости́гшя, и печа́ти гро́бныя ви́девшя, не обре́тшя же пречи́стаго те́ла Твоего́, рыда́ющя со тща́нием приидо́ша, глаго́лющя: кто́ укра́де на́ше упова́ние? кто́ взят ме́ртва на́га сми́рною пома́занна, Ма́тери еди́но утеше́ние? О ка́ко ме́ртвыя оживи́вый умертви́ся? а́да плени́вый, ка́ко погребе́ся? но воскресни́ Спа́се самовла́стно, я́коже ре́кл еси́, тридне́вен, спаса́я ду́шы на́шя.

И ны́не: гла́с 2:

Пре́йде сень зако́нная, / благода́ти прише́дши: / я́коже бо купина́ не сгара́ше опаля́ема, / та́ко Де́ва родила́ еси́ / и Де́ва пребыла́ еси́. / Вме́сто столпа́ о́гненнаго / пра́ведное возсия́ Со́лнце, / вме́сто Моисе́я, / Христо́с, спасе́ние душ на́ших.

Стихи́ры, гла́с 2:

Пре́жде век от Отца́ ро́ждшемуся Бо́жию Сло́ву, вопло́щшемуся от Де́вы Мари́и, прииди́те поклони́мся: Кре́ст бо претерпе́в, погребе́нию предаде́ся, я́ко Сам восхоте́: и воскре́с из ме́ртвых, спасе́ мя заблужда́ющаго челове́ка.

Сти́х: Госпо́дь воцари́ся, в ле́поту облече́ся.

Христо́с Спас наш, е́же на ны́ рукописа́ние пригвозди́в на Кресте́ загла́ди, и сме́ртную держа́ву упраздни́: покланя́емся Его́ тридне́вному Воскресе́нию.

Сти́х: И́бо утверди́ вселе́нную, я́же не подви́жится.

Со арха́нгелы воспои́м Христо́во Воскресе́ние: Той бо е́сть Изба́витель и Спас душ на́ших, и в сла́ве стра́шней и кре́пцей си́ле, па́ки гряде́т суди́ти ми́ру, его́же созда́.

Сти́х: До́му Твоему́ подоба́ет святы́ня Го́споди, в долготу́ дни́й.

Воскресе́ние Твое́ Христе́ Спа́се, всю́ просвети́ вселе́нную и призва́л еси́ Твое́ созда́ние: всеси́льне Го́споди сла́ва Тебе́.

Сла́ва, и ны́не, гла́с 5:

Тебе́, оде́ющагося све́том я́ко ри́зою, снем Ио́сиф с Дре́ва с Никоди́мом, и ви́дев ме́ртва, на́га, непогребе́на, благосе́рдный пла́чь восприи́м, рыда́я глаго́лаше: увы́ мне́ сладча́йший Иису́се, Его́же вма́ле со́лнце на Кресте́ ви́сима узре́вшее мра́ком облага́шеся, и земля́ стра́хом колеба́шеся, и раздира́шеся церко́вная заве́са: но се́ ны́не ви́жу Тя́, мене́ ра́ди во́лею подъе́мша сме́рть. Ка́ко погребу́ Тя Бо́же мой, или́ како́ю плащани́цею обвию́? ко́има ли рука́ма прикосну́ся нетле́нному Твоему́ те́лу? или́ ки́я пе́сни воспою́ Твоему́ исхо́ду ще́дре, велича́ю стра́сти Твоя́, песносло́влю и погребе́ние Твое́ со Воскресе́нием, зовы́й: Го́споди сла́ва Тебе́.

В Субботу утра

Тропарь, глас 2:

Кондак, глас 2:

Седа́лен воскре́сен, гла́с 2:

Ка́мень гро́бный запеча́тати не возбрани́в, ка́мень ве́ры воскресы́й, по́дал еси́ всем, Го́споди сла́ва Тебе́.

Не́дро пречи́стое в вы́шних не истощи́вый, погребе́ние и Воскресе́ние за всех прия́л еси́: Го́споди сла́ва Тебе́.

Сла́ва, и ны́не: богоро́дичен:

Вся́ па́че смы́сла, вся́ пресла́вная Твоя́, Богоро́дице, та́инства, чистоте́ запеча́танной, и де́вству храни́му, Ма́ти позна́лася еси́ нело́жна, Бо́га ро́ждши и́стиннаго. Того́ моли́, спасти́ся душа́м на́шым.

Седа́лен, гла́с 2.

Ученико́в Твои́х лик, с мироно́сицами жена́ми, ра́дуется согла́сно: о́бщий бо пра́здник с ни́ми пра́зднуем, в сла́ву и че́сть Твоего́ Воскресе́ния, и те́ми вопие́м Ти́: Человеколю́бче Го́споди, лю́дем Твои́м пода́ждь ве́лию ми́лость.

Стихи́ры, Гла́с 2:

Вся́кое дыха́ние и вся́ тва́рь, Тя́ сла́вит Го́споди, я́ко Кресто́м сме́рть упраздни́л еси́, да пока́жеши лю́дем, е́же из ме́ртвых Твое́ Воскресе́ние, я́ко еди́н Человеколю́бец.

Да реку́т иуде́е, ка́ко во́ини погуби́ша стрегу́щии Царя́? почто́ бо ка́мень не сохрани́ Ка́мене жи́зни? Или́ погребе́ннаго да дадя́т, или́ Воскре́сшему да покло́нятся, глаго́люще с на́ми: сла́ва мно́жеству щедро́т Твои́х, Спа́се наш, сла́ва Тебе́.

Ра́дуйтеся лю́дие и весели́теся, а́нгел седя́й на ка́мени гро́бнем, той нам благовести́, рек: Христо́с воскре́се из ме́ртвых, Спас ми́ра, и испо́лни вся́ческая благоуха́ния: ра́дуйтеся лю́дие и весели́теся.

А́нгел у́бо е́же ра́дуйся, пре́жде Твоего́ зача́тия Го́споди, Благода́тней принесе́: а́нгел же ка́мень сла́внаго Твоего́ гро́ба в Твое́ Воскресе́ние отвали́: ов у́бо в печа́ли ме́сто, весе́лия о́бразы возвеща́я: сей же в сме́рти ме́сто, Влады́ку Жизнода́вца пропове́дуя нам, те́мже вопие́м Ти́: Благоде́телю всех, Го́споди сла́ва Тебе́.

Сла́ва, и ны́не: гла́с 1:

Приидо́ша на гроб Магдали́на, и друга́я Мари́а, и́щуще Го́спода и а́нгела ви́деша, я́ко мо́лнию седя́ща на ка́мени, и глаго́люща им: что́ и́щете жива́го с ме́ртвыми? воскре́се, я́коже рече́, в Галиле́и Его́ обря́щете. К Нему́ же возопие́м: воскресы́й из ме́ртвых, Го́споди сла́ва Тебе́.

Стихи́ры гла́с 2.

Егда́ от Дре́ва Тя́ ме́ртва, Аримафе́й снят всех Живота́, сми́рною и плащани́цею Тя́ Христе́ обви́в, и любо́вию подвиза́шеся, се́рдцем и устна́ми те́ло нетле́нное Твое́ облобыза́ти. Оба́че одержи́мь стра́хом, ра́дуяся вопия́ше Ти́: сла́ва снизхожде́нию Твоему́, Человеколю́бче.

Сти́х: Благоволи́л еси́ Го́споди зе́млю Твою́, возврати́л еси́ плен Иа́ковль.

Егда́ во гро́бе но́ве за всех положи́лся еси́, Изба́вителю всех, ад всесмехли́вый ви́дев Тя́ ужасе́ся, вереи́ сокруши́шася, сломи́шася врата́, гро́би отверзо́шася, ме́ртвии воста́ша. Тогда́ Ада́м благода́рственно ра́дуяся вопия́ше Тебе́: сла́ва снизхожде́нию Твоему́, Человеколю́бче.

Сти́х: Ми́лость и и́стина срето́стеся, пра́вда и мир облобыза́стася.

Егда́ си́лы зря́ху Тя́ Христе́, я́ко преле́стника от беззако́нных оклевета́ема, ужаса́хуся неизглаго́ланному долготерпе́нию Твоему́, и ка́мень гро́ба рука́ми запеча́танный, и́миже Твоя́ нетле́нная ре́бра прободо́ша. Оба́че на́шему спасе́нию ра́дующеся вопия́ху Ти́: сла́ва снизхожде́нию Твоему́, Человеколю́бче.

Сла́ва И ны́не: гла́с 6:

Проси́ Ио́сиф те́ло Иису́сово, и положи́ е́ в но́вом свое́м гро́бе: подоба́ше бо Ему́ из гро́ба я́ко от черто́га проити́. Сокруши́вый держа́ву сме́рти, и отве́рзый врата́ ра́йская челове́ком, Го́споди сла́ва Тебе́.