Песнопения Среды 3-й седмицы по Пасхе

Во Вторник вечера

Тропарь, глас 2:

Егда́ снизше́л еси́ к сме́рти, Животе́ Безсме́ртный, / тогда́ ад умертви́л еси́ блиста́нием Божества́; / егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: / Жизнода́вче, Христе́ Бо́же наш, сла́ва Тебе́.

Слава: Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и благоуха́ньми, / во гро́бе но́ве, закры́в, положи́, / но тридне́вен воскре́сл еси́, Го́споди, / подая́й ми́рови ве́лию ми́лость.

И ныне: Мироно́сицам жена́м, при гро́бе предста́в А́нгел, вопия́ше: / ми́ра ме́ртвым суть прили́чна, / Христо́с же истле́ния яви́ся чуждь. / Но возопи́йте: воскре́се Госпо́дь, / подая́й ми́рови ве́лию ми́лость.

Кондак, глас 2:

Ра́доватися мироно́сицам повеле́л еси́, / плачь прама́тере Е́вы утоли́л еси́ / воскресе́нием Твои́м, Христе́ Бо́же, / апо́столом же Твои́м пропове́дати повеле́л еси́: / Спас воскре́се от гро́ба.

Стихи́ры, гла́с 2.

Ра́дуются учени́цы Христо́вы, от а́нгела глаго́лы слы́шашя, отону́дуже Воскресе́ние нас ра́ди в ме́ртвых вмени́вшагося навыка́ют. А́ще и пре́жде мироно́сицы гро́бу предста́ша, и рыда́юще о Христе́, ка́мень узре́вше внеза́пу отвале́н, его́же недоумева́хуся преложе́нию.

Непреста́ющую и боже́ственную ра́дость подаю́щя, боже́ственным и свяще́нным ученико́м яви́шася, учени́цы мироно́сицы Христо́вы, испо́лнившя повеле́ние Боже́ственнаго а́нгела. Его́же ужасо́шася белоно́сныя оде́жды, глаго́люща: плене́н бы́сть ад всеспаси́тельным Воскресе́нием нас ра́ди уме́ршаго Царя́.

Струи́ от сле́знаго исто́чника, рыда́ние испусти́вшя, боже́ственныя Христо́вы учени́цы, глаго́лы ра́достныя приноша́ют ны́не самови́дцем благода́ти, возвеща́юще сим Сло́ва воста́ние, и я́же из гро́ба ра́дость. Те́мже вме́сто печа́ли слы́шаху глас пресла́вно, сим е́же ра́дуйтеся повелева́ющ.

Сла́ва, и ны́не: гла́с 6:

Мироно́сицы жены́, гро́ба Твоего́ дости́гшя, и печа́ти гро́бныя ви́девшя, не обре́тшя же пречи́стаго те́ла Твоего́, рыда́ющя со тща́нием приидо́ша, глаго́лющя: кто́ укра́де на́шу наде́жду? кто́ взят ме́ртва на́га сми́рною пома́зана, Ма́тери еди́но утеше́ние? о ка́ко ме́ртвыя оживи́вый умертви́ся! а́да плени́вый, ка́ко погребе́ся! Но воскресни́ Спа́се самовла́стно, я́коже ре́кл еси́, тридне́вен, спаса́яй ду́шы на́шя.

Стихи́ры, гла́с 2:

Спаси́ мя Христе́ Спа́се си́лою Кре́стною, спасы́й Петра́ в мо́ри, и поми́луй мя́ Бо́же.

Со арха́нгелы воспои́м Христо́во Воскресе́ние: Той бо е́сть Изба́витель и Спас душ на́ших, и в сла́ве стра́шней и кре́пцей си́ле, па́ки гряде́т суди́ти ми́ру, его́же созда́.

Ли́цы му́ченичестии сопроти́вишася мучи́телем, глаго́люще: мы́ во́инствуем Царю́ сил, а́ще и огню́ и му́кам преда́сте нас, не отмета́емся Тро́ическия си́лы.

Сла́ва, и ны́не, гла́с 6:

Проси́ Ио́сиф те́ло Иису́сово, и положи́ е́ в но́вом свое́м гро́бе: подоба́ше бо Ему́ из гро́ба, я́ко от черто́га проити́. Сокруши́вый держа́ву сме́рти, и отве́рзый врата́ ра́йская челове́ком, сла́ва Тебе́.

В Среду утра

Тропарь, глас 2:

Кондак, глас 2:

Седа́лен воскре́сен, гла́с 2:

Спасе́ние соде́лал еси́ посреде́ земли́ Христе́ Бо́же, на кресте́ пречи́стеи ру́це Твои́ просте́рл еси́, собира́я вся́ язы́ки зову́щыя: Го́споди сла́ва Тебе́.

Сти́х: Воскресни́ Го́споди Бо́же мой, да вознесется рука Твоя.

Воскре́с из гро́ба, и у́зы растерза́л еси́ а́да, разруши́л еси́ осужде́ние сме́рти Го́споди, вся́ от сете́й врага́ изба́вивый: яви́вый же Себе́ апо́столом Твои́м, посла́л еси́ я́ на про́поведь, и те́ми мир Твой по́дал еси́ всей вселе́нней, еди́не Многоми́лостиве.

Сти́х: Ди́вен Бо́г во святы́х Свои́х, Бо́г Изра́илев.

Страстоте́рпцы Госпо́дни, блаже́нна земля́ напи́вшаяся кровьми́ ва́шими, и свя́та селе́ния прие́мшая телеса́ ва́шя: в по́двизе бо врага́ победи́сте, и Христа́ со дерзнове́нием пропове́дасте. Того́ я́ко Бла́га моли́те, спасти́ся, мо́лимся душа́м на́шым.

Сла́ва, и ны́не: богоро́дичен:

Предстоя́щи Кресту́ Твоему́ безсе́менно Ро́ждшая Тя́, и не терпя́щи ви́дети непра́ведно стра́ждуща, рыда́ше с пла́чем, и вопия́ше Тебе́: ка́ко стра́ждеши естество́м безстра́стный, сладча́йший Сы́не? Воспева́ю Твою́ кра́йнюю благосты́ню.

Седа́лен, гла́с 2.

Ко гро́бу Твоему́ Спа́се, честны́я мироно́сицы прише́дшя, Влады́ку пома́завшыя ми́ры, я́ко Челове́ка Тя́ мня́ху: а́нгел же им ра́дость возвести́, воскре́се Госпо́дь. Тем и пропове́дите апо́столом, из гро́ба вои́стинну стра́шное Его́ Воскресе́ние.

Стихи́ры, Гла́с 2:

Во́лею обнища́в нището́ю Ада́млею Христе́ Бо́же, прише́л еси́ на зе́млю от Де́вы вопло́щся, и Кре́ст восприя́л еси́, да нас свободи́ши от рабо́ты вра́жия: Го́споди сла́ва Тебе́.

Ра́дуйтеся лю́дие и весели́теся, а́нгел седя́й на ка́мени гро́бнем, той нам благовести́, рек: Христо́с воскре́се из ме́ртвых, Спас ми́ра, и испо́лни вся́ческая благоуха́ния: ра́дуйтеся лю́дие и весели́теся.

Святы́х Твои́х мно́жества мо́лят Тя́ Христе́, поми́луй нас я́ко Человеколю́бец.

Сла́ва, и ны́не: гла́с 1:

Со стра́хом приидо́ша жены́ на гроб, арома́ты те́ло Твое́ пома́зати тща́щеся, и сие́ не обре́тше, недоумева́хуся друга́ ко друзе́й, не ве́дуще Воскресе́ния, но предста́ им а́нгел, и рече́: воскре́се Христо́с, да́руяй нам ве́лию ми́лость.

Стихи́ры гла́с 2.

У́бо в ме́ртвых ли Изба́витель? рыда́ньми мироно́сицы вопия́ху, Христо́вы учени́цы. Со́лнце же преве́лие да́же и до дне́сь под земле́ю ли, или́ воскре́се, я́коже рече́? и си́це пла́чущым, от гро́ба а́нгел Боже́ственную вои́стинну ра́дость рече́: Христо́с воскре́се, тецы́те, пропове́дите всем, Его́ из гро́ба Боже́ственное Воскресе́ние.

Сти́х: Благоволи́л еси́ Го́споди зе́млю Твою́, возврати́л еси́ плен Иа́ковль.

Ми́ра угото́ваша честна́я, еще́ тме́ су́щей во еди́ну от суббо́т, приидо́ша на гроб Твой мироно́сицы Христе́, е́же пома́зати пречи́стое и Боже́ственное Твое́ те́ло. Те́мже Воскресе́ние уве́девшя Твое́, потща́хуся возвести́ти и таи́нником: и́хже предсре́т из гро́ба, ра́дуйтеся, возопи́л еси́ человеколю́бнейше.

Сти́х: Ми́лость и и́стина срето́стеся, пра́вда и мир облобыза́стася.

Вы́шняго Бо́га на земли́ погребе́на, я́ко ме́ртва пома́зати тща́тся Его́ учени́цы, арома́ты честны́ми: и во гро́бе седя́ща но́ва ю́ношу, ви́девшя в блиста́ющем зра́це, ужасо́шася. Те́мже Сло́ва из гро́ба воста́ние тридне́вное уве́девшя, и апо́столом возвеща́ху.

Сла́ва И ны́не: гла́с 5:

Тебе́, оде́ющагося све́том я́ко ри́зою, снем Ио́сиф с Дре́ва с Никоди́мом, и ви́дев ме́ртва, на́га, непогребе́на, благосе́рдный пла́чь восприи́м, рыда́я глаго́лаше: увы́ мне́ сладча́йший Иису́се, Его́же вма́ле со́лнце на Кресте́ ви́сима узре́вшее мра́ком облага́шеся, и земля́ стра́хом колеба́шеся, и раздира́шеся церко́вная заве́са: но се́ ны́не ви́жу Тя́, мене́ ра́ди во́лею подъе́мша сме́рть. Ка́ко погребу́ Тя Бо́же мой, или́ како́ю плащани́цею обвию́? ко́има ли рука́ма прикосну́ся нетле́нному Твоему́ те́лу? или́ ки́я пе́сни воспою́ Твоему́ исхо́ду Ще́дре, велича́ю стра́сти Твоя́, песносло́влю и погребе́ние Твое́ со Воскресе́нием, зовы́й: Го́споди сла́ва Тебе́.