Песнопения Среды 2-ой седмицы по Пасхе

Во Вторник вечера

Тропа́рь, гла́с 7:

Запеча́тану гро́бу, живо́т от гро́ба возсия́л еси́ Христе́ Бо́же, и две́рем заключе́нным, ученико́м предста́л еси́, все́х Воскресе́ние: Ду́х Пра́вый те́ми обновля́я на́м, по вели́цей Твое́й ми́лости.

Конда́к, гла́с 8:

Любопы́тною десни́цею, жизнопода́тельная Твоя́ ре́бра Фома́ испыта́ Христе́ Бо́же: созаключе́нным бо две́рем я́ко вше́л еси́, с про́чими апо́столы вопия́ше Тебе́: Госпо́дь еси́ и Бо́г мо́й.

Стихи́ры, гла́с 1.

Осяжи́, глаго́лет Фоме́, из ме́ртвых тридне́вен воскресы́й Человеколю́бец, и ви́ждь руку́ мое́ю и ногу́ я́звы, и ре́бр прободе́ние: и позна́й Мя́ Бо́га непреме́нна, земны́м смеше́нием по существу́ воображе́нна и стра́сть в не́м прие́мша.

Недоумева́шеся Близне́ц, я́звы зря́ ножны́я, и ручна́я вонзе́ния, и бя́ше ужаса́емь стра́шным чу́дом: и руко́ю пречи́стое ребро́ и осяза́я и ви́дя, из ни́хже показа́ несумне́нное язы́ком, е́же из гро́ба тридне́вное воста́ние.

Прие́млю превели́кое ра́дование, Твое́ Спа́се мо́й воста́ние известву́емое ви́дя: от ни́хже сподо́бися де́рзостным ве́щем Фома́ прикосну́тися. Те́мже тя́ про́ста пропове́дуем Бо́га и Челове́ка, де́йства два́ нося́ща су́щественна, от ни́хже сложи́лся еси́.

Сла́ва, и ны́не: гла́с 4:

Го́споди, нестерпи́мым Твоего́ Божества́ блиста́нием, две́рем прише́л еси́ су́щым заключе́нным, и ста́в посреде́ ученико́в, ребро́ обнажи́л еси́, и я́зв Твое́ю руку́ и ногу́ стру́пы явля́я, печа́ль же и ско́рбь разреша́я, я́ве возгласи́л еси́: и́мже о́бразом во Мне́ ви́дите, о дру́зи, пло́ти прия́тие, не ду́ха ношу́ естество́. Сомня́щему же ся ученику́ повелева́л еси́ осяза́ти тре́петно, ре́к: испыта́в вся́, гряди́ про́чее не сумни́ся. Он же ощуща́я руко́ю Твое́ сугу́бое существо́, со стра́хом вопия́ше ве́рно, ве́рою влеко́мь: Госпо́дь мо́й и Бо́г мо́й сла́ва Тебе́.

Стихи́ры, гла́с 1:

Кре́ст водрузи́ся на ло́бнем, и процвете́ на́м безсме́ртие от исто́чника приснотеку́щаго ребра́ Спа́сова.

Прииди́те лю́дие воспои́м, и поклони́мся Христу́, сла́вяще Его́ е́же из ме́ртвых Воскресе́ние, я́ко То́й е́сть Бо́г на́ш, от пре́лести вра́жия ми́р избавле́й.

О до́брыя ку́пли ва́шея святи́и! я́ко кро́ви да́сте, и небеса́ насле́довасте, и привре́менно искуси́вшеся, ве́чно веселите́ся. Вои́стинну добра́ ва́ша ку́пля: тле́нная бо оста́вльше, нетле́нная восприя́сте, и со а́нгелы лику́юще, пое́те непреста́нно Тро́ицу Единосу́щную.

Сла́ва, и ны́не, гла́с 8:

Прикосни́ся Фомо́ руко́ю ре́бром, глаго́лет Христо́с, и я́звы гвозде́й прииди́ осяжи́: ве́рою испыта́й, и бу́ди Ми́ ве́рен, и не бу́ди неве́рен. Фома́ же пе́рстом я́ко прикосну́ся Влады́це, вельми́ возопи́: Ты́ мо́й Бо́г и Госпо́дь, благоутро́бне сла́ва Тебе́.

В Среду утра

Тропа́рь, гла́с 7:

Запеча́тану гро́бу, живо́т от гро́ба возсия́л еси́ Христе́ Бо́же, и две́рем заключе́нным, ученико́м предста́л еси́, все́х Воскресе́ние: Ду́х Пра́вый те́ми обновля́я на́м, по вели́цей Твое́й ми́лости.

Конда́к, гла́с 8:

Любопы́тною десни́цею, жизнопода́тельная Твоя́ ре́бра Фома́ испыта́ Христе́ Бо́же: созаключе́нным бо две́рем я́ко вше́л еси́, с про́чими апо́столы вопия́ше Тебе́: Госпо́дь еси́ и Бо́г мо́й.

Седа́лен воскре́сен, гла́с 1:

Распе́ншуся Тебе́ Христе́, поги́бе мучи́тельство, попра́на бы́сть си́ла вра́жия: ниже́ бо а́нгел, ни челове́к, но са́м Го́споди спа́сл еси́ ны́, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Исаа́к на хо́лм возведе́н бы́сть, Ио́на во глубину́ низведе́ся, и о́ба стра́сть Твою́ Спа́се образова́ста. Ов у́бо у́зы и заколе́ние: о́в же погребе́ние, и жи́знь пресла́внаго воста́ния Твоего́. Го́споди сла́ва Тебе́.

Сти́х: Ди́вен Бо́г во святы́х Свои́х, Бо́г Изра́илев.

Боле́зньми святы́х, и́миже о Тебе́ пострада́ша, умоле́н бу́ди Го́споди, и вся́ на́шя боле́зни исцели́, Человеколю́бче, мо́лимся.

Сла́ва, и ны́не: богоро́дичен:

Твое́ предста́тельство иму́ще Пречи́стая, и Твои́ми моли́твами лю́тых избавля́еми, Кресто́м Сы́на Твоего́ везде́ соблюда́еми, по до́лгу Тя́ вси́ благоче́стно велича́ем.

Седа́лен, гла́с 1.

Прикосну́выйся руко́ю ре́бром нестерпи́мым Близне́ц Фома́, не опали́ся прикосну́тием: но пребы́сть я́звы осяза́я изве́стнее, и веща́я на́с ра́ди прободе́нному: Ты́ мо́й Госпо́дь, Ты́ и Бо́г мо́й еси́, а́ще и стра́сть претерпе́л еси́.

Стихи́ры, Гла́с 1:

Тебе́ на Дре́ве пригво́ждьшагося, и живо́т на́м пода́вшаго, я́ко Спа́са и Влады́ку пое́м непреста́нно.

А́да плени́вый, и челове́ка воскреси́вый, Воскресе́нием Твои́м Христе́, сподо́би на́с чи́стым се́рдцем Тебе́ пе́ти и сла́вити.

Ва́с всехва́льнии му́ченицы, ни ско́рби, ни теснота́, ни гла́д, ни гоне́ние, ниже́ ра́ны, ни я́рость звере́й, ни ме́чь, ниже́ о́гнь претя́щий, разлучи́ти от Бо́га возмого́ша: любо́вию же па́че к Нему́, я́ко в чужди́х подви́гшеся телесе́х, естество́ забы́сте, сме́рть презре́вше: те́мже и по достоя́нию трудо́в ва́ших мзду́ прия́сте, Небе́снаго Ца́рствия насле́дницы бы́сте. Иму́ще дерзнове́ние к Человеколю́бцу Бо́гу, ми́рови ми́р испроси́те, и душа́м на́шым ве́лию ми́лость.

Сла́ва, и ны́не: гла́с 8:

Две́рем заключе́нным, ученико́м собра́нным, предста́ Спа́с, иде́же бя́ху со́брани, и ста́в посреде́ и́х, глаго́лет Фоме́: прииди́, осяжи́, и ви́ждь о́бразы гвозде́й. Простри́ ру́ку твою́, и косни́ся ребру́ Моему́, и не бу́ди неве́рен, но ве́рою пропове́ждь е́же из ме́ртвых Мое́ Воскресе́ние.

Стихи́ры гла́с 2.

О чудесе́ но́ваго! о пресла́внаго о́браза! О ка́ко трава́ не опали́ся, рука́ апо́столова огне́м Божества́?

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Потщи́мся и мы́ ру́ки освяти́ти, страсте́й упражне́нием, и та́ко Влады́чним ре́бром прико́снемся.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Обнови́ душе́, вся́ твоя́ чу́вства к боже́ственному зре́нию: Христо́с бо си́це хо́щет соверша́тися обновле́нием.

Сла́ва И ны́не: гла́с 2:

Ви́ждь ми́ у́мно, премене́ние ми́ра, и украси́ я́же вну́трь, доброде́тельми я́ко ли́ствием душе́, и украси́шися.