Приложения Октоиха

Богородичны осми гласов, поемыя, егда есть Слава: святому в минеи, И ныне: по гласу сия

ГЛАС 1

В неделю вечера Богородичен:

Небе́сных чино́в ра́дование, / на земли́ челове́ков кре́пкое предста́тельство, / Пречи́стая Де́во, / спаси́ ны, и́же к Тебе́ прибега́ющия, / я́ко на Тя упова́ние по Бо́зе, Богоро́дице, возложи́хом.

В понедельник на утрени Богородичен:

Святе́йшая святы́х всех Сил, / честне́йшая всея́ тва́ри, Богоро́дица, Влады́чица ми́ра, / спаси́ ны, Спа́са ро́ждшая, / от прегрешений тмори́чных и бед / я́ко Блага́я моли́твами Твои́ми.

В понедельник вечера Богородичен:

Де́во Всепе́тая, / ю́же в Тебе́ та́йну Моисе́й проро́ческима ви́де очи́ма, / купину́ горя́щу и неопаля́ему, / Божества́ бо Огнь утро́бу Твою́, Чи́стая, не опали́. / Те́мже мо́лим Тя я́ко Ма́терь Бо́га на́шего, / мир испроси́ти ми́рови и ве́лию ми́лость.

Во вторник утра Богородичен:

Блудни́цу, и блу́днаго аз, и разбо́йника победи́х, / и мытаря́ прегреше́нии премину́х, и ниневи́тяны. / Увы́ мне, что бу́ду; / ка́ко убе́гну му́ки, аз, окая́нный?/ Чи́стая, припа́даю Ти,/ уще́дри мя ми́лостию Твое́ю,/ я́коже о́ныя Сын Твой спасл есть.

В среду вечера Богородичен:

Ра́дуйся, ра́досте пра́дедов, / апо́столов и му́чеников весе́лие / и покро́в нас, Де́во, Твои́х рабо́в.

В четверток утра Богородичен:

Ра́дуйся, Богоро́дице Де́во, / ра́дуйся, похвало́ всея́ вселе́нныя, / ра́дуйся, Пречи́стая Ма́ти Бо́жия, Благослове́нная.

В пяток вечера Богородичен:

Вои́стинну па́че ума́ / чу́дная Твоя́ вели́чия, рождества́ Твоего́, Богоневе́сто, / я́же пропове́даша проро́цы вси, / вся пресла́вная, / зача́тие и рождество́, Всепе́тая, недомы́сленно и несказа́нно, / и́мже мир спасл есть я́ко Милосе́рд.

В субботу утра Богородичен:

Ра́дуйся, от нас Свята́я Богоро́дице Де́во, / чи́стый сосу́де всея́ вселе́нныя, / свеще́ неугаси́мая, вмести́лище Невмести́маго, / хра́ме необори́мый; / ра́дуйся, из Нея́же роди́ся А́гнец Бо́жий, / взе́мляй грехи́ всего́ ми́ра.

ГЛАС 2

В неделю вечера Богородичен:

Ра́дуйся, Мари́е Богоро́дице, хра́ме неразруши́мый, / па́че же святы́й, я́коже вопие́т проро́к: / свят храм Твой, ди́вен в пра́вде.

В понедельник утра Богородичен:

На Тя упова́ние, Богоро́дице, возложи́хом, / ча́яния да не отпаде́м, / спаси́ нас от бед, Помо́щнице недоуме́емым, / и сопроти́вных сове́ты разори́: / Ты бо еси́ на́ше спасе́ние, / Благослове́нная.

В понедельник вечера Богородичен:

Непроходи́мая врата́, та́йно запеча́тствованная, / Благослове́нная Богоро́дице Де́во, / приими́ моле́ния на́ша / и принеси́ Твоему́ Сы́ну и Бо́гу, / да спасе́т Тобо́ю ду́ши на́ша.

Во вторник утра Богородичен:

Ра́дуйся, Мари́е Богоро́дице, хра́ме неразруши́мый, / па́че же святы́й, я́коже вопие́т проро́к: / свят храм Твой, ди́вен в пра́вде.

В среду вечера Богородичен:

Я́ко плодови́та ма́слина, / Де́ва израсти́ Тебе́, / Плода́ Живо́тнаго, / плодоноси́ти ми́рови / ве́лию и бога́тую ми́лость.

В четверток утра Богородичен:

Все упова́ние мое́ / на Тя возлага́ю, Ма́ти Бо́жия, / сохрани́ мя под кро́вом Твои́м.

В пяток вечера Богородичен:

Спаси́ от бед рабы́ Твоя́, Богоро́дице Де́во, / я́ко вси по Бо́зе к Тебе́ прибега́ем, / я́ко к неруши́мей стене́ и предста́тельству.

В субботу утра Богородичен:

Прииди́те, Ма́терь Све́та, пе́сньми немо́лчными зову́ще,/ вси просла́вим, / Та бо роди́ Спасе́ние на́ше, / и ра́дуйся принесе́м, я́ко Еди́ной, ро́ждшей всех Нача́льнейшаго,/ И́же пре́жде век Бо́га; / ра́дуйся, Я́же Е́ву па́дшую па́ки назда́вшая; / ра́дуйся, Пречи́стая Де́во, Неискусобра́чная.

ГЛАС 3

В неделю вечера Богородичен:

Богоро́дице, Предста́тельнице всех, моля́щихся Тебе, / Тобо́ю дерза́ем и Тобо́ю хва́лимся, / и к Тебе́ все упова́ние на́ше есть, / моли́ Ро́ждшагося из Тебе́ за непотре́бныя рабы́ Твоя́.

В понедельник утра Богородичен:

Святопервочи́стая похвало́ су́щи Небе́сных чино́в, / апо́столов пе́ние / и проро́ков сбытие́, / Влады́чице, приими́ моли́твы на́ша.

В понедельник вечера Богородичен:

В жена́х Свята́я, Богоро́дице, / Ма́ти Безневе́стная, / моли́, Его́же родила́ еси́, Царя́ и Бо́га, / да спасе́т нас, я́ко Человеколю́бец.

Во вторник утра Богородичен:

Без се́мене зачала́ еси́ / от Ду́ха Свята́го, / и, славосло́вяще, воспева́ем Тя: / ра́дуйся, Пресвята́я Де́во.

В среду вечера Богородичен:

Вельми́ согреша́юща мя, Отрокови́це, / исхити́ вели́кою Твое́ю моли́твою пла́мене ну́жднаго / и испра́ви, Чи́стая, Твои́ми мольба́ми, / ко спасе́нным стезя́м наставля́ющи мя / ма́терними Твои́ми моли́твами.

В четверток утра Богородичен:

Без се́мене зачала́ еси́ / от Ду́ха Свята́го, / и, славосло́вяще, воспева́ем Тя: / ра́дуйся, Пресвята́я Де́во.

В пяток вечера Богородичен:

В жена́х Свята́я, Богоро́дице, / Ма́ти Безневе́стная, / моли́, Его́же родила́ еси́, Царя́ и Бо́га, / да спасе́т нас, я́ко Человеколю́бец.

В субботу утра Богородичен:

Без се́мене зачала́ еси́ / от Ду́ха Свята́го, / и, славосло́вяще, воспева́ем Тя: / ра́дуйся, Пресвята́я Де́во.

ГЛАС 4

В неделю вечера Богородичен:

Ра́дуйся, Све́та о́блаче; / ра́дуйся, све́щниче све́тлый; / ра́дуйся, ру́чко, в не́йже ма́нна; / ра́дуйся, же́зле Ааро́нов; / ра́дуйся, купино́ неопали́мая; / ра́дуйся, черто́же; ра́дуйся, престо́ле; / ра́дуйся, горо́ свята́я; / ра́дуйся, прибе́жище; / ра́дуйся, Боже́ственная трапе́зо; / ра́дуйся, две́ре та́йная; / ра́дуйся, всех ра́досте.

В понедельник утра Богородичен:

Богоро́дице, всех Цари́це, / правосла́вных похвало́, / ерети́чествующих шата́ния разори́ / и ли́ца их посрами́, / не кла́няющихся, ниже́ чту́щих, Пречи́стая, / честны́й Твой о́браз.

В понедельник вечера Богородичен:

Изба́ви нас от нужд на́ших, / Ма́ти Христа́ Бо́га, / ро́ждшая всех Творца́, / да вси зове́м Ти: / ра́дуйся, еди́но предста́тельство душ на́ших.

Во вторник утра Богородичен:

От всех бед рабы́ Твоя́ сохраня́й, / Благослове́нная Богоро́дице, / да Тя сла́вим, наде́жду душ на́ших.

В среду вечера Богородичен:

Иму́ще Тя, Богоро́дице, упова́ние и предста́тельство, / вра́жиих наве́т не убои́мся, / я́ко спаса́еши ду́ши на́ша.

В четверток утра Богородичен:

Тя, сте́ну стяжа́хом, Богоро́дице Пречи́стая, / и благоути́шное приста́нище, и утвержде́ние. / Те́мже молю́ся, / и́же в житии́ обурева́ем: / окорми́ и спаси́ мя.

В пяток вечера Богородичен:

Свеще́ неугаси́мая, престо́ле пра́ведный, / Пречи́стая Влады́чице, / моли́ спасти́ся душа́м на́шим.

В субботу утра Богородичен:

Еди́на Чи́стая и Пречи́стая Де́во, / Я́же Бо́га безсе́менно ро́ждшая, / моли́ спасти́ся душа́м на́шим.

ГЛАС 5

В неделю вечера Богородичен:

Стра́шно, и пресла́вно, и ве́лие та́инство: / Невмести́мый во чре́ве вмести́ся / и Ма́ти по рождестве́ па́ки пребы́сть Де́ва, / Бо́га бо роди́, из Нея́ воплоще́нна. / Тому́ возопии́м, Тому́ песнь рцем, / со А́нгелы воспева́юще: / Свят еси́, Христе́ Бо́же, / И́же нас ра́ди вочелове́чивыйся, сла́ва Тебе́.

В понедельник утра Богородичен:

Обра́дованная, хода́тайствуй Твои́ми моли́твами / и испроси́ душа́м на́шим мно́жество щедро́т / и очище́ние мно́гих прегреше́ний, мо́лимся.

В понедельник вечера Богородичен:

Утоли́ боле́зни / многовоздыха́ющия души́ моея́, / утоли́вшая вся́ку сле́зу от лица́ земли́: / Ты бо челове́ков боле́зни отго́ниши / и гре́шных ско́рби разруша́еши. / Тебе́ бо вси стяжа́хом наде́жду и утвержде́ние, / Пресвята́я Ма́ти Де́во.

Во вторник утра Богородичен:

Обра́дованная, хода́тайствуй Твои́ми моли́твами / и испроси́ душа́м на́шим мно́жество щедро́т / и очище́ние мно́гих прегреше́ний, мо́лимся.

В среду вечера Богородичен:

Блажи́м Тя, Богоро́дице Де́во, / и сла́вим Тя, ве́рнии, по до́лгу, / град непоколеби́мый, сте́ну необори́мую, / тве́рдую Предста́тельницу / и прибе́жище душ на́ших.

В четверток утра Богородичен:

Блажи́м Тя, Богоро́дице Де́во, / я́ко из Тебе́ возсия́ Со́лнце пра́вды, Христо́с, / име́яй ве́лию ми́лость.

В пяток вечера Богородичен:

Тебе́ мо́лимся, я́ко Бо́жии Ма́тери: / Благослове́нная, моли́ / о спасе́нии душ на́ших.

В субботу утра Богородичен:

О́ле окая́нная душе́! / Кий отве́т и́маши рещи́ Судии́ во он час, / егда́ престо́ли поста́вятся на Суде́ / и Судия́ прии́дет от Небе́с, / соше́д со тьма́ми а́нгельскими? / Егда́ ся́дет на Суди́щи, / прю сотвори́ти с рабы́ непотре́бными, подо́бными мне, / что отвеща́ти и́маши? / Что же принести́ тогда́? / Пои́стинне ничто́же, ум и те́ло оскверни́вши твое́. / Те́мже припади́ к Де́ве и зови́ непреста́нно / пода́ти тебе́ бога́тно грехо́в проще́ние.

ГЛАС 6

В неделю вечера Богородичен:

Арха́нгельски воспои́м, ве́рнии, / Небе́сный черто́г и дверь запеча́танну вои́стину: / ра́дуйся, Ея́же ра́ди отрасте́ нам Спас всех, Христо́с, / Жизнода́вец и Бог. / Низложи́, Влады́чице, мучи́тели, / безбо́жныя враги́ на́ша, / руко́ю Твое́ю, Пречи́стая, / упова́ние христиа́н.

В понедельник утра Богородичен:

Арха́нгельское сло́во прия́ла еси́, / и херуви́мский престо́л показа́лася еси́, / и на объя́тиях Твои́х носи́ла еси́, Богоро́дице, / Наде́жду душ на́ших.

В понедельник вечера Богородичен:

Никто́же, притека́яй к Тебе́ / посра́млен от Тебе́ исхо́дит, / Пречи́стая Богоро́дице Де́во, / но про́сит благода́ти / и прие́млет дарова́ние к поле́зному проше́нию.

Во вторник утра Богородичен:

Вели́ких дарова́ний, Чи́стая Де́во Богома́ти, / Ты сподо́билася еси́, / я́ко родила́ еси́ пло́тию Еди́наго от Тро́ицы, Христа́ Жизнода́вца, / во спасе́ние душ на́ших.

В среду вечера Богородичен:

О́ко се́рдца моего́ / воспуща́ю к Тебе́, Влады́чице: / не пре́зри ма́лаго моего́ воздыха́ния / в час, егда́ су́дит Сын Твой ми́ру, / бу́ди ми покро́в и Помо́щница.

В четверток утра Богородичен:

Преложе́ние скорбя́щих, / премене́ние боля́щих еси́, Богоро́дице Всепе́тая, / спаси́ град и лю́ди, / бори́мых умире́ние, обурева́емых тишина́, / еди́на Предста́тельнице ве́рных.

В пяток вечера Богородичен:

Моли́твами Ро́ждшия Тя, Христе́, / му́ченик Твои́х, и апо́стол, и проро́к, и святи́телей, / преподо́бных, и пра́ведных, и всех святы́х, / усо́пшия рабы́ Твоя́ упоко́й.

В субботу утра Богородичен:

Бо́га, из Тебе́ воплоти́вшагося, / разуме́хом, Богоро́дице Де́во: / Того́ моли́ о спасе́нии душ на́ших.

ГЛАС 7

В неделю вечера Богородичен:

Е́же ра́дуйся, Тебе́ зове́м со А́нгелом, Богоневе́сто, / черто́г, и дверь, и престо́л о́гненный нарица́юще Тебе́, / и несеко́мую го́ру, и купину́ неопали́мую.

В понедельник утра Богородичен:

Умири́ моли́твами Богоро́дицы жизнь на́шу, / вопию́щих Ти: / Ми́лостиве Го́споди, сла́ва Тебе́.

В понедельник вечера Богородичен:

Ра́дуйся, Со́лнца о́блаче мы́сленнаго и неизрече́ннаго, Влады́чице; / ра́дуйся, всесве́тлая свеще́; / ра́дуйся, све́щниче всезлаты́й. / Тобо́ю, Пресвята́я, Е́ва изба́вися от кля́твы. / Но, я́ко иму́щи дерзнове́ние / ко Благопреме́нному Сы́ну Твоему́ и Бо́гу, / ма́тернею Твое́ю моли́твою / не оскуде́й моли́тися, Пречи́стая.

Во вторник утра Богородичен:

Цвет, Христе́, прозя́бл еси́ от Де́вы / и просвети́л еси́ род челове́ческий. / Го́споди, сла́ва Тебе́.

В среду вечера Богородичен:

Еди́ну по рождестве́ Пречи́стую Де́ву воспои́м, / я́ко Ма́терь Бо́га Сло́ва, / глаго́люще: сла́ва Тебе́.

В четверток утра Богородичен:

Роди́лся еси́ от Де́вы несказа́нно, Христе́, / и просвети́л еси́ су́щия во тьме, вопию́щия: / Го́споди, сла́ва Тебе́.

В пяток вечера Богородичен:

Я́же еди́на Невмести́маго прии́мши / и ро́ждши Бо́га Сло́ва воплоще́нна, / моли́ спасти́ся душа́м на́шим.

В субботу утра Богородичен:

Моли́, Де́во, / со апо́столы и му́ченики / обрести́ на Суде́ преста́вльшимся / ве́лию ми́лость.

ГЛАС 8

В неделю вечера Богородичен:

Арха́нгела Гаврии́ла глас восприи́мше, рцем: / ра́дуйся, Ма́ти Бо́жия, / Я́же Жизнода́вца Христа́ ми́ру ро́ждши.

В понедельник утра Богородичен:

Небе́сная пою́т Тя, / Обра́дованная, Ма́ти Безневе́стная, / и мы славосло́вим неизсле́дованное Твое́ Рождество́, Богоро́дице, / моли́ спасти́ся душа́м на́шим.

В понедельник вечера Богородичен:

Ра́дуйся, вселе́нныя похвало́; / ра́дуйся, хра́ме Госпо́день; / ра́дуйся, горо́ приосене́нная; / ра́дуйся, всех прибе́жище; / ра́дуйся, све́щниче златы́й; / ра́дуйся, сла́во правосла́вных честна́я; / ра́дуйся, Мари́е, Ма́ти Христа́ Бо́га; / ра́дуйся, раю́; ра́дуйся, Боже́ственная трапе́зо; / ра́дуйся, се́не; ра́дуйся, ру́чко всезлата́я; / ра́дуйся, всех упова́ние.

Во вторник утра Богородичен:

Кров Твой, Богоро́дице Де́во, / врачевство́ есть духо́вное: / в онь бо прибега́юще, / от душе́вных неду́г избавля́емся.

В среду вечера Богородичен:

Аз, Де́во Свята́я Богоро́дице, / к покро́ву Твоему́ прибега́ю, / вем, я́ко обря́щу Тобо́ю спасе́ние, / мо́жеши бо, Чи́стая, помощи́ мне.

В четверток утра Богородичен:

Исхи́ти мя, Влады́чице, / руки́ зми́я человекоуби́йцы, / хотя́ща мя лука́вством поглоти́ти до конца́; / сокруши́ че́люсти его́, молю́ Тя, / и ко́зни разори́, / я́ко да избы́в от ногте́й его́, / велича́ю заступле́ние Твое́.

В пяток вечера Богородичен:

Чи́стая Де́во, / Сло́ва врата́, Бо́га на́шего Ма́ти, / моли́ спасти́ся нам.

В субботу утра Богородичен:

Влады́чице, приими́ моли́твы раб Твои́х / и изба́ви нас / от вся́кия ну́жды и печа́ли.