Приложения Октоиха

Песни Священнаго Писания во Святую и Великую Четыредесятницу

По возгласе священника Ми́лостию и щедро́тами: начинаем: Го́сподеви пое́м: на глас канона Минеи дне святаго, и глаголют стихи песней скоро, кийждо лик свой стих, дондеже достигнут до Огусте́ша: и от того начинают стихи держати на 14. И поем Минеи, со ирмосом на 6, поем же сице. Первый лик глаголет стих: Огусте́ша: и поет ирмос. Вторый же лик глаголет вторый стих: Рече́ враг: и по нем тропарь канона. И поряду стихи, по ликом, до Тогда́ потща́шася: От стиха же, Тогда́ потща́шася: начинаем трипеснец господина Иосифа, на 4. На Госпо́дь ца́рствуяй: же поем другий трипеснец, господина Феодора Студита. И поет един лик тропарь. Другий же лик вторый стих и тропарь. Посем соединившимся двум ликом поют, Сла́ва: Троичен, вышшим гласом: И ны́не: Богородичен. Таже глаголем высочайшим гласом: Сла́ва Тебе́, Бо́же наш, сла́ва Тебе́. И поем иный тропарь господина Феодора. Понеже бо по пяти тропарей имать песнь. Последи же глаголем катавасию, ирмос втораго канона. Сице поются 8-я и 9-я песни. Третию же песнь поем сице. Глаголет первый лик стих: Госпо́дь взы́де на Небеса́: и тропарь канона Минеи. Вторый лик, стих: И даст кре́пость царю́: и вторый тропарь канона Минеи. Таже, Сла́ва, и ны́не: с тропари канона. И поет первый лик ирмос Минеи третия песни последи канона. Сим образом поем и 6-ю песнь. Четвертую же, и пятую, и седмую песни сице поем. Глаголи первее ирмос канона Минеи. Таже конечныя два стиха песни поем к тропарем канона. И Сла́ва, и ны́не: Ирмосом же не покрываем песни, зане ирмос глаголется прежде песни. Поются же ирмосы Минеи по каноне, токмо по 3-й и 6-й песнех. Занеже у тех песней первее ирмос не поется. В прочия же дни седмицы, кроме понедельника, тако поется и первая песнь, якоже указася о 4-й и 5-й песнех. А в нихже песнех будет трипеснец, поется последи канона катавасия, ирмос трипеснца, якоже выше изъявися.

Ведомо же буди, яко осмогласник не поется во всю святую Четыредесятницу, кроме недель. Поется же точию Минея и трипеснец. А в нихже песнех несть трипеснца, поется токмо Минея.

Песнь 1.

1 Пое́м Го́сподеви, сла́вно бо просла́вися: / коня́ и вса́дника ве́рже в мо́ре.

2 Помо́щник и Покрови́тель бысть мне во спасе́ние: / Сей мой Бог, и просла́влю Его́; / Бог отца́ моего́, и вознесу́ Его́.

3 Госпо́дь сокруша́яй бра́ни, / Госпо́дь И́мя Ему́, / колесни́цы фарао́новы, и си́лу его́ ве́рже в мо́ре.

4 Избра́нныя вса́дники триста́ты / потопи́ в Чермне́м мо́ри.

5 Пучи́ною покры́ я́, / погрязо́ша во глубине́, я́ко ка́мень.

6 Десни́ца Твоя́, Го́споди, просла́вися в кре́пости, / десна́я Твоя́ рука́, Го́споди, сокруши́ враги́, / и мно́жеством сла́вы Твоея́ стерл еси́ сопроти́вных.

7 Посла́л еси́ гнев Твой, пояде́ я́, я́ко сте́блие, / и ду́хом я́рости Твоея́ разступи́ся вода́.

на 14: Огусте́ша я́ко стена́ во́ды, / огусте́ша и во́лны посреде́ мо́ря.

Глаголи ирмос.

9 Рече́ враг: гнав, пости́гну, / разделю́ коры́сть, испо́лню ду́шу мою́, / убию́ мече́м мои́м, госпо́дствовати бу́дет рука́ моя́.

на 12: Посла́л еси́ Дух Твой, покры́ я́ мо́ре, / погрязо́ша, я́ко о́лово, в воде́ зе́льней.

11 Кто подо́бен Тебе́ в бозе́х, Го́споди, / кто подо́бен Тебе́? Просла́влен во святы́х, / ди́вен, сла́вно творя́й чудеса́.

на 10: Просте́рл еси́ десни́цу Твою́, / пожре́ я́ земля́. / Наста́вил еси́ пра́вдою твое́ю лю́ди Твоя́ сия́, я́же изба́вил еси́.

13 Уте́шил еси́ кре́постию Твое́ю во оби́тель святу́ю Твою́. / Слы́шаша язы́цы и прогне́вашася, / боле́зни прия́ша живу́щии в Филисти́ме.

на 8: Тогда́ потща́шася влады́ки Едо́мстии, / и князе́й Моави́тских, прия́т я́ тре́пет, / раста́яша вси, живу́щии в Ханаа́не.

15 Нападе́т на ня страх и тре́пет, / вели́чием мы́шцы Твоея́ да ока́менятся.

на 6: До́ндеже про́йдут лю́дие Твои́, Го́споди, / до́ндеже про́йдут лю́дие Твои́ си́и, я́же стяжа́л еси́.

17 Введ, насади́ я́ в го́ру достоя́ния Твоего́, / в гото́вое жили́ще Твое́, е́же соде́лал еси́, Го́споди, / святы́ню, ю́же угото́васте ру́це Твои́.

на 4: Госпо́дь ца́рствуяй ве́ки, и на век, и еще́, / егда́ вни́де конь фарао́нов с колесни́цами и вса́дники в мо́ре.

19 И наведе́ на ня Госпо́дь во́ду морску́ю, / сы́нове же Изра́илевы проидо́ша су́шею посреде́ мо́ря.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в, ами́нь.

Подобает ведати, яко вторая песнь никогдаже стихословится, токмо во единой великой Четыредесятнице, во вторник, стихословим же ю даже до конца, к тропарям же глаголем припев: Сла́ва Тебе́, Бо́же наш, сла́ва Тебе́. [Единому коемуждо.]

Песнь 2.

1Вонми́, Не́бо, и возглаго́лю, / и да слы́шит земля́ глаго́лы уст мои́х.

2Да ча́ет, я́ко дождь, веща́ние мое́, / и да сни́дут, я́ко роса́, глаго́ли мои́.

3Я́ко ту́ча на тро́скот / и я́ко и́ней на се́но, / я́ко И́мя Госпо́дне призва́х, / дади́те вели́чие Бо́гу на́шему.

4Бог, и́стинна дела́ Его́, / и вси путие́ Его́ суд.

5Бог ве́рен, и несть непра́вды в Нем, / пра́веден и преподо́бен Госпо́дь.

6Согреши́ша, не того́ ча́да поро́чная, / ро́де стропти́вый и развраще́нный, / сия́ ли Го́сподеви воздаете́.

7Си́и лю́дие бу́ии и не му́дри, / не сам ли сей оте́ц твой стяжа́ тя, / и сотвори́ тя, и созда́ тя?

8Помяни́те дни ве́чныя, / разуме́йте ле́та ро́да родо́в.

9Вопроси́ отца́ твоего́, и возвести́т тебе́, / ста́рцы твоя́, и реку́т ти́.

10Егда́ разделя́ше Вы́шний язы́ки, / я́коже разсе́я сы́ны Ада́мовы.

11Поста́ви преде́лы язы́ков / по числу́ А́нгел Бо́жиих, / и бысть часть Госпо́дня, лю́дие Его́ Иа́ков, / у́же насле́дия Его́ Изра́иль.

12Удовли́ его́ в пусты́ни / в жа́жди зно́я в безво́дне.

13Обы́де его́, и наказа́ его́, / и сохрани́ его́ я́ко зе́ницу о́ка.

14Я́ко оре́л, покры́ гнездо́ свое́ / и на птенцы́ своя́ возжеле́.

15Просте́р криле́ свои́, и прия́т я́, / и подъя́т я́ на ра́му свое́ю.

16Госпо́дь еди́н вожда́ше я́, / и не бе с ни́ми бог чуждь.

17Возведе́ я́ на си́лу земли́, / насы́ти я́ жит се́льных.

18Сса́ша мед из ка́мене / и еле́й от тве́рда ка́мене.

19Ма́сло кра́вие и млеко́ о́вчее / с ту́ком а́гнчим и о́вним, / сыно́в ю́нчих и ко́злих / с ту́ком пшени́чным / и кровь гро́здову пия́ху вино́.

20И яде́ Иа́ков, и насы́тися, / и отве́ржеся возлю́бленный.

21Уты́, утолсте́, разшире́, / и оста́ви Бо́га, сотво́ршаго его́, / и отступи́ от Бо́га, Спа́са своего́.

22Прогне́ваша Мя о чужди́х / и в ме́рзостех свои́х преогорчи́ша Мя.

23Пожро́ша бесово́м, а не Бо́гу, / бого́м, и́хже не ве́деша: / но́ви и секра́ти приидо́ша, / и́хже не ве́деша отцы́ их.

24Бо́га, ро́ждшаго тя, оста́вил еси́ / и забы́л еси́ Бо́га, пита́ющаго тя.

25И ви́де Госпо́дь, и возревнова́, / и раздражи́ся за гнев сыно́в их и дще́рей,

26И рече́: отвращу́ лице́ Мое́ от них / и покажу́, что бу́дет им напосле́док.

27Я́ко род развраще́н есть, / сы́нове, и́мже несть ве́ры в них.

28Ти́и раздражи́ша Мя не о Бо́зе, / прогне́ваша Мя во и́долех свои́х.

29И Аз раздражу́ я́ не о язы́це, / о язы́це же неразу́мливе прогне́ваю я́.

30Я́ко огнь возгори́тся от я́рости Моея́, / разжже́тся до а́да преиспо́дняго.

31Снест зе́млю и жи́та ея́, / попали́т основа́ния гор.

32Соберу́ на них зла́я / и стре́лы Моя́ сконча́ю в них:

33Та́юще гла́дом, и снедь птиц, / и горб неисце́лен.

34Зу́бы звере́й послю́ в ня, / с я́ростию пресмыка́ющихся по земли́.

35Отвне́ безча́дит я́ меч, / и от храмо́в их страх: / ю́ноша с де́вою, / ссу́щее с соверше́нным ста́рцем.

36Рех: разсе́ю я́, / уста́влю же от челове́к па́мять их.

37А́ще не за гнев враго́в, да не долголе́тствуют, / и да не наля́гут супоста́ти,

38Да не реку́т: рука́ на́ша высока́, / и не Госпо́дь сотвори́ сия́ вся.

39Я́ко язы́к погуби́вый сове́т есть, / и несть в них худо́жества.

40Не смы́слиша разуме́ти сия́ вся, / да прии́мут во гряду́щее ле́то.

41Ка́ко пожене́т еди́н ты́сящи / и два дви́гнета тьмы.

42А́ще не Бог отда́ст я́, / и Госпо́дь преда́ст я́?

43Не суть бо бо́зи их, я́ко Бог наш: / врази́ же на́ши неразу́мливи.

44От виногра́дов бо Содо́мских виногра́д их, / и розга́ их от Гомо́рры.

45Грозд их, грозд же́лчи, / грозд го́рести их.

46Я́рость змие́в вино́ их, / и я́рость а́спидов неисце́льна.

47Не сия́ ли вся собра́шася у Мене́ / и запечатле́шася в сокро́вищах Мои́х?

48В день отмще́ния возда́м.

49Во вре́мя, внегда́ соблазни́тся нога́ их.

50Я́ко близ день поги́бели их, / и предстоя́т гото́вая вам.

51Я́ко су́дит Госпо́дь лю́дем Свои́м / и о рабе́х Свои́х умоле́н бу́дет.

52Ви́де бо я́ разсла́бленны, / и иста́явша во вре́мя, и изнемо́гша.

53И рече́ Госпо́дь: где суть бо́зи их, / и́хже упова́ша на ня; / и́хже тук жертв их ядя́сте / и пия́сте вино́ треб их?

54Да воскре́снут, и помо́гут вам, / и бу́дут вам покрови́тели.

55Ви́дите, ви́дите, я́ко Аз есмь, / и несть бог, ра́зве Мене́.

56Аз убию́ и жи́ти сотворю́, / поражу́ и Аз исцелю́, / и несть, и́же и́змет от ру́ку Мое́ю.

57Я́ко воздви́гну на не́бо ру́ку Мою́, / и клену́ся десни́цею Мое́ю, / и реку́: живу́ Аз во ве́ки.

58Я́ко поострю́, я́ко мо́лнию, меч Мой, / и прии́мет суд рука́ Моя́.

59И возда́м месть враго́м / и ненави́дящим Мя возда́м.

60Упою́ стре́лы Моя́ от кро́ве, / и меч Мой снест мяса́.

61От кро́ве я́звенных и плене́ния, / от глав князе́й язы́ческих.

62Возвесели́теся, небеса́, ку́пно с Ним, / и да покло́нятся Ему́ вси А́нгели Бо́жии.

63Возвесели́теся, язы́цы, с людьми́ Его́, / и да укрепя́тся Ему́ вси сы́нове Бо́жии.

64Я́ко кровь сыно́в Свои́х отмща́ет, / и отмсти́т, и возда́ст месть враго́м, / и ненави́дящим Его́ возда́ст.

65И очи́стит Госпо́дь зе́млю люде́й Свои́х.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в, ами́нь.

Песнь 3.

1Утверди́ся се́рдце мое́ во Го́споде, / вознесе́ся рог мой о Бо́зе мое́м, / разшири́шася уста́ моя́ на враги́ моя́, / возвесели́хся о спасе́нии Твое́м.

2Я́ко несть свят, я́ко Госпо́дь, / и несть пра́веден, я́ко Бог наш, / и несть свят, па́че Тебе́.

3Не хвали́теся и не глаго́лите высо́кая в горды́ни, / ниже́ да изы́дет велере́чие из уст ва́ших.

4Я́ко Бог ра́зумов Госпо́дь, / и Бог, уготовля́яй начина́ния Своя́.

на 14: Лук си́льных изнемо́же / и немощству́ющии препоя́сашася си́лою.

Глаголи ирмос.

6Испо́лненнии хле́бов лиши́шася, / и а́лчущии прише́льствоваша зе́млю.

на 12: Я́ко непло́ды роди́ седмь, / и мно́гая в ча́дех изнемо́же.

8Госпо́дь мертви́т и живи́т, / низво́дит во ад и возво́дит.

на 10: Госпо́дь убо́жит и богати́т, / смиря́ет и вы́сит, / возставля́ет от земли́ убо́га / и от гно́ища воздвиза́ет ни́ща.

10Посади́те его́ с могу́щими люде́й / и престо́л сла́вы насле́дуя ему́.

на 8: Дая́й моли́тву моля́щемуся / и благослови́ ле́та пра́веднаго.

12Я́ко не укрепля́ется си́лен муж кре́постию свое́ю, / Госпо́дь не́мощна сотвори́ супоста́та Его́, / Госпо́дь свят.

на 6: Да не хва́лится прему́дрый прему́дростию свое́ю, / и да не хва́лится си́льный си́лою свое́ю, / и да не хва́лится бога́тый бога́тством свои́м.

14Но о сем да хва́лится хваля́йся, / е́же разуме́ти и зна́ти Го́спода / и твори́ти суд и пра́вду посреде́ земли́.

на 4: Госпо́дь взы́де на Небеса́ и возгреме́, / Той су́дит конце́м земли́, пра́веден Сый.

16И даст кре́пость царю́ на́шему, / и вознесе́т рог Христа́ Своего́.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в, ами́нь.

Сла́ва Тебе́, Бо́же наш, сла́ва Тебе́.

Песнь 4.

1Го́споди, услы́шах слух Твой и убоя́хся, / Го́споди, разуме́х дела́ Твоя́ и ужасо́хся.

2Посреде́ двою́ живо́тну позна́н бу́деши. / Внегда́ прибли́житися ле́том, позна́ешися; / внегда́ приити́ вре́мени, яви́шися; / внегда́ смути́тися души́ мое́й во гне́ве, ми́лость Твою́ помяне́ши.

3Бог от ю́га прии́дет, / и Святы́й из горы́ приосене́нныя ча́щи.

4Покры́ Небеса́ доброде́тель Его́, / и хвалы́ Его́ испо́лнь земля́.

5И сия́ние Его́ я́ко свет бу́дет, / ро́зи в рука́х Его́, / и положи́ любо́вь держа́вну кре́пости Свое́й.

6Пред лице́м Его́ преды́дет сло́во / и изы́дет на по́ле за пя́ту Его́.

7Ста и подви́жеся земля́, / призре́, и раста́яша язы́цы.

8Стры́шася го́ры ну́ждею, / и раста́яша хо́лми ве́чнии, / ше́ствия ве́чная их за труд ви́деша.

9Селе́ния Ефио́пская убоя́тся / и кро́вы земли́ Мадиа́мския.

10Еда́ в река́х прогне́ваешися, Го́споди; / еда́ в река́х я́рость Твоя́; / или́ в мо́ри устремле́ние Твое́?

11Я́ко вся́деши на ко́ни Твоя́, / и ежде́ние Твое́ спасе́ние.

12Наляца́я, наляче́ши лук Твой / на ски́птры, глаго́лет Госпо́дь.

13Река́ми разся́дется земля́, / у́зрят Тя и поболя́т лю́дие.

14Расточа́я во́ды ше́ствия, / даде́ бе́здна глас свой, / высота́ привиде́ния своя́.

15Воздви́жеся со́лнце, / и луна́ ста в чи́не свое́м.

16Во свет стре́лы Твоя́ по́йдут, / в блиста́нии мо́лнии ору́жий Твои́х.

17Преще́нием ума́лиши зе́млю / и я́ростию низложи́ши язы́ки.

18Изше́л еси́ на спасе́ние люде́й Твои́х, / спасти́ пома́занныя Твоя́ прише́л еси́.

на 14: Вложи́л еси́ во главы́ беззако́нных смерть, / воздви́гл еси́ у́зы да́же до вы́и в коне́ц.

Глаголи ирмос.

20Разсе́кл еси́ во изступле́нии главы́ си́льных, / стрясу́тся в ней, / разве́рзут узды́ своя́, / я́ко снеда́яй ни́щий тай.

на 12: И возве́л еси́ на мо́ре ко́ни Твои́, / смуща́ющия во́ды мно́ги.

22Сохрани́хся, и убоя́ся се́рдце мое́ / от гла́са моли́твы усте́н мои́х.

на 10: И вни́де тре́пет в ко́сти моя́, / и во мне смяте́ся кре́пость моя́.

24Почи́ю в день ско́рби моея́, / да взы́ду в лю́ди прише́льствия моего́.

на 8: Зане́ смоквь не плодопринесе́т, / и не бу́дет ро́да в лоза́х.

26Солже́т де́ло ма́слинное, / и поля́ не сотворя́т я́ди.

на 6: Оскуде́ша о́вцы от пи́щи, / и не бу́дет воло́в при я́слех.

28Аз же о Го́споде возра́дуюся, / возвеселю́ся о Бо́зе, Спа́се мое́м.

на 4: Госпо́дь Бог мой, си́ла моя́, / и учини́т но́зе мои́ на соверше́ние.

30И на высо́кая возво́дит мя, / победи́ти ми в пе́сни Его́.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в, ами́нь.

Сла́ва Тебе́, Бо́же наш, сла́ва Тебе́.

Песнь 5.

1От но́щи у́тренюет дух мой к Тебе́, Бо́же, / зане́ свет повеле́ния Твоя́ на земли́.

2Пра́вде научи́теся, живу́щии на земли́, / преста́ бо нечести́вый, не научи́тся пра́вде, на земли́ и́стины не сотвори́т.

3Да во́змется нечести́вый, да не ви́дит сла́вы Госпо́дни. / Го́споди, высока́ Твоя́ мы́шца, и не ве́деша, / разуме́вше же, постыдя́тся.

на 14: За́висть прии́мет лю́ди ненака́занныя, / и ны́не огнь супоста́ты поя́ст.

Глаголи ирмос.

5Го́споди Бо́же наш, мир даждь нам, / вся бо возда́л еси́ нам.

на 12: Го́споди Бо́же наш, стяжи́ ны, / Го́споди, ра́зве Тебе́, ино́го не ве́мы, / И́мя Твое́ имену́ем.

7Ме́ртвии же живота́ не и́мут ви́дети, / ниже́ вра́чеве воскреся́т.

на 10: Сего́ ра́ди наве́л еси́, и погуби́л, / и взял еси́ всяк му́жеск пол их.

9Приложи́ им зла, Го́споди, / приложи́ зла сла́вным земли́.

на 8: Го́споди, в ско́рби помяну́хом Тя, / в ско́рби ма́ле наказа́ние Твое́ нам.

11И я́ко боля́щая приближа́ется роди́ти / и в боле́зни свое́й вопия́ше, / та́ко бы́хом Возлю́бленному Твоему́.

на 6: Стра́ха ра́ди Твоего́, Го́споди, во чре́ве прия́хом, / и поболе́хом, и роди́хом / дух спасе́ния, его́же сотвори́хом на земли́.

13Не паде́м, но паду́т живу́щии на земли́.

на 4: Воскре́снут ме́ртвии, и воста́нут, и́же во гробе́х, / и возвеселя́тся, и́же на земли́.

15Роса́ бо, я́же от Тебе́, исцеле́ние им есть, / земля́ же нечести́вых паде́т.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в, ами́нь.

Сла́ва Тебе́, Бо́же наш, сла́ва Тебе́.

Песнь 6.

Глаголи ирмос.

1Возопи́х в ско́рби мое́й ко Го́споду Бо́гу моему́, / и услы́ша мя.

на 12: Из чре́ва а́дова вопль мой, / услы́шал еси́ глас мой, / отве́ргл мя еси́ во глубины́ се́рдца морска́го, / и ре́ки обыдо́ша мя.

3Вся высоты́ Твоя́ и во́лны Твоя́ на мне преидо́ша.

на 10: И аз рех: отри́нухся от о́чию Твое́ю, / еда́ приложу́ призре́ти ми ко хра́му свято́му Твоему́?

5Возлия́ся вода́ до души́ моея́, / бе́здна обы́де мя после́дняя.

на 8: Понре́ глава́ моя́ в разсе́ли гор, / снидо́х в зе́млю, ея́же вереи́ ея́ закле́пи ве́чнии.

7И да взы́дет из истле́ния живо́т мой к Тебе́, Го́споди, Бо́же мой.

на 6: Внегда́ скончава́тися от мене́ души́ мое́й, Го́спода помяну́х.

9И да прии́дет к Тебе́ моли́тва моя́, ко хра́му свято́му Твоему́.

на 4: Храня́щии су́етная и ло́жная ми́лость свою́ оста́виша.

11Аз же со гла́сом хвале́ния и испове́дания пожру́ Тебе́: / ели́ка обеща́х, возда́м Тебе́ во спасе́ние мое́, Го́сподеви.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в, ами́нь.

Сла́ва Тебе́, Бо́же наш, сла́ва Тебе́.

Песнь 7.

1Благослове́н еси́, Го́споди Бо́же оте́ц на́ших, / и хва́льно и просла́влено И́мя Твое́ во ве́ки.

2Я́ко пра́веден еси́ о всех, я́же сотвори́л еси́ нам.

3И вся дела́ Твоя́ и́стинна, и пра́ви путие́ Твои́, / и вси суди́ Твои́ и́стинни.

4И судьбы́ и́стинны сотвори́л еси́ по всем, я́же наве́л еси́ на ны, / и на град святы́й оте́ц на́ших Иерусали́м.

5Я́ко и́стиною и судо́м наве́л еси́ сия́ вся на ны грех ра́ди на́ших.

6Я́ко согреши́хом и беззако́нновахом / отступи́ти от Тебе́ и прегреши́хом во всех.

7И за́поведей Твои́х не послу́шахом, ниже́ соблюдо́хом, ниже́ сотвори́хом, / я́коже запове́дал еси́ нам, да бла́го нам бу́дет.

8И вся, я́же сотвори́л еси́ нам, и вся, ели́ка наве́л еси́ на ны, / и́стинным судо́м сотвори́л еси́.

9И пре́дал еси́ нас в ру́ки враго́в беззако́нных, / ме́рзских отсту́пников, / и царе́ви непра́ведну и лука́внейшу па́че всея́ земли́.

10И ны́не несть нам отве́рсти уст, / студ и поноше́ние бы́хом рабо́м Твои́м и чту́щим Тя.

11Не преда́ждь же нас до конца́ и́мене Твоего́ ра́ди, / и не разори́ заве́та Твоего́, / и не отста́ви ми́лости Твоея́ от нас, / Авраа́ма ра́ди возлю́бленнаго от Тебе́, / и за Исаа́ка раба́ Твоего́, / и Изра́иля свята́го Твоего́.

12И́мже глаго́лал еси́ / умно́жити се́мя их, я́ко зве́зды небе́сныя / и я́ко песо́к при краи́ мо́ря.

13Я́ко, Влады́ко, ума́лихомся па́че всех язы́к / и есмы́ смире́ни по всей земли́ днесь грех ра́ди на́ших.

14И несть во вре́мя сие́ нача́льника, и проро́ка / и вожда́, ниже́ всесожже́ния, ниже́ же́ртвы, / ниже́ приноше́ния, ниже́ кади́ла, / ни ме́ста, е́же пожре́ти пред Тобо́ю и обрести́ ми́лость.

15Но душе́ю сокруше́нною и ду́хом смире́нным да прия́ти бу́дем.

16Я́ко во всесожже́ниих о́вних и ю́нчих / и я́ко во тьмах а́гнец ту́чных, / та́ко да бу́дет же́ртва на́ша пред Тобо́ю днесь / и да соверши́тся по Тебе́, / я́ко несть студа́ упова́ющим на Тя.

17И ны́не возсле́дуем всем се́рдцем, / и бои́мся Тебе́, и и́щем лица́ Твоего́.

18Не посрами́ нас, но сотвори́ с на́ми по кро́тости Твое́й / и по мно́жеству ми́лости Твоея́.

19И изми́ нас по чудесе́м Твои́м, / и даждь сла́ву и́мени Твоему́, Го́споди.

20И да посра́мятся вси, явля́ющии рабо́м Твои́м зла́я, / и да постыдя́тся от вся́кия си́лы, / и кре́пость их да сокруши́тся.

21И да разуме́ют, я́ко Ты еси́ Госпо́дь Бог еди́н / и сла́вен по всей вселе́нней.

22И не преста́ша влага́ющии я́ слуги́ царе́вы, / жгу́ще пещь на́фтою, и смоло́ю, и изгре́бьми, и ро́ждием.

на 14: И разлива́шеся пла́мень над пе́щию на ла́кти четы́редесять де́вять.

Глаголи ирмос.

24И обы́де, и пожже́, / я́же обре́те о пе́щи халде́йстей.

на 12: А́нгел же Госпо́день сни́де ку́пно с су́щими о Аза́рии в пещь.

26И оттрясе́ пла́мень о́гненный от пе́щи.

на 10: И сотвори́ сре́днее пе́щи, я́ко дух росы́ шумя́щь, / и не прикосну́ся их отню́дь огнь, ни оскорби́, ниже́ стужи́ им.

28Тогда́ трие́, я́ко еди́неми усты́, поя́ху, / и благословля́ху, и сла́вляху Бо́га в пещи́, глаго́люще:

на 8: Благослове́н еси́, Го́споди Бо́же оте́ц на́ших, / и препе́тый, и превозноси́мый во ве́ки.

30И благослове́но И́мя сла́вы Твоея́ свято́е, / препе́тое и превозноси́мое во ве́ки.

на 6: Благослове́н еси́ в хра́ме святы́я сла́вы Твоея́, / препе́тый и превозноси́мый во ве́ки.

32Благослове́н еси́, ви́дяй бе́здны, седя́й на Херуви́мех, / препе́тый и превозноси́мый во ве́ки.

на 4: Благослове́н еси́ на престо́ле сла́вы Ца́рствия Твоего́, / препе́тый и превозноси́мый во ве́ки.

34Благослове́н еси́ на тве́рди Небе́сней, / препе́тый и превозноси́мый во ве́ки.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в, ами́нь.

Сла́ва Тебе́, Бо́же наш, сла́ва Тебе́.

Песнь 8.

1Благослови́те, вся дела́ Госпо́дня, Го́спода, / по́йте и превозноси́те Его́ во ве́ки.

2Благослови́те, А́нгели Госпо́дни, Небеса́ Госпо́дня, Го́спода, / по́йте и превозноси́те Его́ во ве́ки.

3Благослови́те, во́ды вся, я́же превы́ше Небе́с, вся си́лы Госпо́дни, Го́спода, / по́йте и превозноси́те Его́ во ве́ки.

4Благослови́те, со́лнце и ме́сяц, зве́зды небе́сныя, Го́спода, / по́йте и превозноси́те Его́ во ве́ки.

5Благослови́те, всяк дождь и роса́, вси ду́си, Го́спода, / по́йте и превозноси́те Его́ во ве́ки.

на 14: Благослови́те, огнь и вар, студь и зной, Го́спода, / по́йте и превозноси́те Его́ во ве́ки.

Глаголи ирмос.

7Благослови́те, ро́сы и и́ней, ле́ди и мраз Го́спода, / по́йте и превозноси́те Его́ во ве́ки.

на 12: Благослови́те, сла́ны и сне́зи, но́щи и дни́е, Го́спода, / по́йте и превозноси́те Его́ во ве́ки.

9Благослови́те, свет и тьма, мо́лния и о́блацы, Го́спода, / по́йте и превозноси́те Его́ во ве́ки.

на 10: Благослови́те, земля́, го́ры и хо́лми и вся, прозяба́ющая на ней, Го́спода, / по́йте и превозноси́те Его́ во ве́ки.

11Благослови́те, исто́чницы, моря́ и ре́ки, ки́ты и вся, дви́жущаяся в вода́х, Го́спода, / по́йте и превозноси́те Его́ во ве́ки.

на 8: Благослови́те, вся пти́цы небе́сныя, зве́рие и вси ско́ти, Го́спода, / по́йте и превозноси́те Его́ во ве́ки.

13Благослови́те, сы́нове челове́честии, / да благослови́т Изра́иль Го́спода, / по́йте и превозноси́те Его́ во ве́ки.

на 6: Благослови́те, свяще́нницы Госпо́дни, раби́ Госпо́дни, Го́спода, / по́йте и превозноси́те Его́ во ве́ки.

15Благослови́те, ду́си и ду́ши пра́ведных, / преподо́бнии и смире́ннии се́рдцем, Го́спода, / по́йте и превозноси́те Его́ во ве́ки.

на 4: Благослови́те, Ана́ния, Аза́рия, Мисаи́л, Го́спода, / по́йте и превозноси́те Его́ во ве́ки.

17Благослови́те, Апо́столи, проро́цы и му́ченицы Госпо́дни, Го́спода, / по́йте и превозноси́те Его́ во ве́ки.

Благослови́м Отца́ и Сына́ и Свята́го Ду́ха, Го́спода.

И ны́не и при́сно и во ве́ки веко́в, ами́нь.

Сла́ва Тебе́, Бо́же наш, сла́ва Тебе́.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Песнь Пресвятыя Богородицы:

1Вели́чит душа́ Моя́ Го́спода, / и возра́довася дух Мой о Бо́зе, Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

2Я́ко призре́ на смире́ние Рабы́ Своея́, / се бо от ны́не ублажа́т Мя вси ро́ди.

3Я́ко сотвори́ Мне вели́чие Си́льный, / и свя́то И́мя Его́, / и ми́лость Его́ в ро́ды родо́в боя́щимся Его́.

4Сотвори́ держа́ву мы́шцею Свое́ю, / расточи́ го́рдыя мы́слию се́рдца их.

5Низложи́ си́льныя со престо́л / и вознесе́ смире́нныя, а́лчущия испо́лни благ и богатя́щияся отпусти́ тщи.

6Восприя́т Изра́иля, О́трока Своего́, помяну́ти ми́лости, / я́коже глаго́ла ко отце́м на́шим, / Авраа́му и се́мени его́, да́же до ве́ка.

Песнь 9,
святаго пророка Захарии, отца Предтечева:

Глаголи ирмос.

1Благослове́н Госпо́дь, Бог Изра́илев, / я́ко посети́ и сотвори́ избавле́ние лю́дем Свои́м.

на 12: И воздви́же рог спасе́ния нам / в дому́ Дави́дове, о́трока Своего́.

3Я́коже глаго́ла усты́ святы́х, су́щих от ве́ка проро́к Его́.

на 10: Спасе́ние от враг на́ших / и из руки́ всех, ненави́дящих нас.

5Сотвори́ти ми́лость со отцы́ на́шими / и помяну́ти Заве́т Святы́й Свой.

на 8: Кля́тву, е́юже кля́тся ко Авраа́му, отцу́ на́шему, / да́ти нам без стра́ха, из руки́ враг на́ших изба́вльшимся.

7Служи́ти Ему́ преподо́бием и пра́вдою / пред Ним вся дни живота́ на́шего.

на 6: И ты, отроча́, проро́к Вы́шняго нарече́шися, / преды́деши бо пред лице́м Госпо́дним, угото́вати пути́ Его́.

9Да́ти ра́зум спасе́ния лю́дем Его́ / во оставле́ние грех их / милосе́рдия ра́ди ми́лости Бо́га на́шего.

на 4: В ни́хже посети́ нас Восто́к с высоты́, / яви́тися во тьме и се́ни сме́ртней седя́щим.

11Напра́ви но́ги на́ша на путь ми́рен.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в, ами́нь.

Сла́ва Тебе́, Бо́же наш, сла́ва Тебе́.