Шрифт

Акафисты святым

Акафист святому благоверному князю Владиславу Сербскому

благоверному князю Владиславу Сербскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1.

Избранный Богом в правителя людем сербским, благоверне царю Владиславе, похвальная пение приносим ти, угодниче Христов и молимся всеблагоговейно, твоими молитвами в Православии нас верно утверди, от бед и скорбей свободи и в будущем вечных мук избави, верно зовущих ти: Радуйся, Боговенчанный царю Владиславе, Православия благий ревнителю.

Икос 1.

Архангелов и ангелов множество, предстоя Царю Царствующих и Господу господствующих, со умилением взирают на Его о стране Сербской промышлении. Постави бо тя народу ея во главу, царя, блаженнее Владиславе, веру отеческую сохраняти и храмы Божии воздвизати. Тем же величая твое Богоизбрание, с любовию поклоняемся тебе зовущее:

Радуйся, от малолетства Христа возлюбивый.

Радуйся, заповеди Его от отец верно в сердце свое приявый.

Радуйся, теплотою веры Христовой весь исполнивыйся.

Радуйся, чистотою тояжде веры из млада напоенный.

Радуйся, красотою церковною вдохновленный.

Радуйся, Духом Святым в Православии утвержденный.

Радуйся, отцев веру сохранивый и прочия люди в ней держатися научивый.

Радуйся, храмов и монастырей благий строителю и о них добрый и изрядный попечителю.

Радуйся, Боговенчанный царю Владиславе, Православия благий ревнителю.

Кондак 2.

Видя, Владыка Христос душу твою к приятию Семени Слова Божия, чистотою и милостынею предуготованную, светом познания Своего просвети тя, блаженнее Владиславе, твоими добродетельми благоутробно спасаемых части сотвори тя общника в Небесном Царствии, идеже со ангелы поеши Всесвятей Троице песнь хвалебную: Аллилуиа!

Икос 2.

Разум Богопросвященный имея, святый царю Владиславе, имже добре проразумел еси душепагубность зловерий различных, хотящихна землю твою наити. Ведая же сия, твердое Православия в стране своей утверди, врагов злочестивых козни рассыпа. Тем же по долгу славим тя взывающее:

Радуйся, блаженный сосуде Христова благоухания.

Радуйся, благое семя Слова Божия, прозябшее.

Радуйся, плоде благий на древе царей Сербских.

Радуйся, цвете благовонный на ветви отцев своих.

Радуйся, верою благою разум себе благодатный стяжавый.

Радуйся, силою Православия враги Христовы поправый.

Радуйся, Давиду царю в Богопочитании подрожавый.

Радуйся, Богом за то, такожде диадимою царскою венчанный.

Радуйся, Боговенчанный царю Владиславе, Православия благий ревнителю.

Кондак 3.

Силою любви Божественныя преисполнен, святе Владиславе, всячески стремился Богови угодить. Взирая на добродетельную жизнь предков своих, множецею старался во устроении храмов Божиих, в них же со всем народом Сербским с благодарением Христу воспеваше: Аллилуиа!

Икос 3.

Имея неоскудное стремление к житию Богоугодному, царю Владиславе, премудрому Соломону поревновал в создании храмов благоукрашенных, явился еси воистину преславный зиждитель Дома Господня. О сем восхваляем твое благожелание и хвалящее тя величаем:

Радуйся, Владыки Творца предивный угодниче.

Радуйся, способный ученик Божественного Зиждителя.

Радуйся, Дома Божия на земле устроителю.

Радуйся, о сем изрядный попечителю.

Радуйся, царей благонравных подражателю.

Радуйся, их стараний славный ревнителю.

Радуйся, духовенства и монашествующих всещедрый покровителю.

Радуйся, добродетели пречудный насадителю.

Радуйся, Боговенчанный царю Владиславе, Православия благий ревнителю.

Кондак 4

Бурею житейских страстей смущаеми, недоумеем, како достойно воспети твое дивное житие, блаженнее Владиславе. Ты же кротостию своею и незлобием, любовию и чистотою, живот мирен людем своим у Бога испросил, поя Ему непрестанно: Аллилуиа!

Икос 4.

Слышавшее от отцев святых напутственное слово по восхождении твоем на престол Сербский, о чистоте, посте, молитве и всех добродетелях, христианскому царю подобающих, слагал еси сия в сердце твоем, делы вся та исполняти обещающи. Мы же ведуще твое Богохвальное житие воспеваем ти сице:

Радуйся, ниву сердца твоего добрым семенем засеевый.

Радуйся, слезами умиления ю оросивый.

Радуйся, яко семя Слова Божия в сердце твоем, яко на земле добрей, укоренися.

Радуйся, воздержанием и молитвою Богу потрудися.

Радуйся, милостынею Творца умилостививший.

Радуйся, нищия и убогия потребами снабдивый.

Радуйся, прозябение страны Сербской, царственною славою на земли и на небеси почтенный.

Радуйся, чистотою духовной дивно украшенный.

Радуйся, Боговенчанный царю Владиславе, Православия благий ревнителю.

Кондак 5.

Боготечною звездою явился еси, царю Владиславе, егда царственною одеждою облачился и венец царя Сербского на главу свою от Бога восприял, поя Ему со трепетом: Аллилуиа!

Икос 5.

Видевше святый благоверный царю Владиславе все люди земли Сербския перед собою, подобно отцу чадолюбивому, всех к себе привлекох любовию, и умилением подвизая воспевать и величать тебе тако:

Радуйся, ум твой горе имевый.

Радуйся, сердце твое жилище Святаго Духа соделавый.

Радуйся, Христу Богу человеколюбцу всего себя предавый.

Радуйся, Ему, в смирении подрожавый.

Радуйся, к лику святых Сербских причисленный.

Радуйся, от Бога и небесным венцем почтенный.

Радуйся, яко сиротам и вдовицам, ты еси был отец и питатель.

Радуйся, и нищим, ты еси был милосивый податель и обидимым благий защитниче.

Радуйся, Боговенчанный царю Владиславе, Православия благий ревнителю.

Кондак 6.

Проповедником, духоносным апостолом, подрожавше, Владиславе Богомудре, обходил еси грады и веси державы твоея, приводящи елико мощно бе, люди к вере Православней, и научающи их воспевати Единому в Троице славимому Богу: Аллилуиа!

Икос 6.

Воссиял еси паче солнца добродетельми твоими во стране Сербской и был еси отрадою для возлюбленных чад церкви Православной, милосердный и досточудный угодниче Христов, блаженнее Владиславе. Сердце же свое на прошение и нужды приходящих к тебе милостивно открыл еси, приими и нас добрый царю с любовию , к тебе прибегающих и вопиющих сице:

Радуйся, мироположниче Божественныя любви.

Радуйся, адаманте крепкий.

Радуйся, честнаго корени святое прозябение.

Радуйся, Симеона мироточиваго предивный правнуче.

Радуйся, сынов его Стефана и Саввы святогорца, архиепископа Сербского, преславный сродниче.

Радуйся, отца твоего Давида, краля Сербского, великая похвало.

Радуйся, святости отцев твоих пречудное вместилище.

Радуйся, их о тебе привеселое радование.

Радуйся, Боговенчанный царю Владиславе, Православия благий ревнителю.

Кондак 7

Коль многими бисеры и камением драгоценным украшен есть венец правды, паче солнца сияющего образ святаго жития твоего. Святый праведный царю Владиславе, ибо подвиг доброго ограждения веры Православной дарова ти Господь, сего ради и мы прибегаем под кров твой, ища спасение, и благодарно о тебе поем Богу: Аллилуиа!

Икос 7.

Новаго , тя, царя видим, добродетельми предков украшенного, и в себе вся сия от сосцу матерняя впитавшаго. Наипаче же к старости Богоугодным житием род свой возвеличившаго, и нас научившаго, како должно есть отцев почитати. Тем же яко наставника тя величаем:

Радуйся, заповеди Господни возлюбивый.

Радуйся, от них же ни како же отступивый.

Радуйся, собою пример почитания отцев показавый.

Радуйся, еже от них благая стяжавый.

Радуйся, прадеда святаго страну сохранивый.

Радуйся, нищетою духовною Царство Небесное купивый.

Радуйся, Господу и человеком угодивший.

Радуйся, образ истинной мудрости нам явивший.

Радуйся, Боговенчанный царю Владиславе, Православия благий ревнителю.

Кондак 8.

Странствия земнаго течение скончавающе, тепле Господа молил еси, благоверне Владиславе, да не оставит Он землю Сербскую по преставлении твоем во тьме неверия, но да возложит на сердце людем Сербским не оставляти веру Православную, да воспоют Богу: Аллилуиа!

Икос 8.

Весь обьят был благодатию Божественною, достохвальне Владиславе, мысленными очесы зрел еси скорби народа своего, но уповая на милость Божию, молился за люди Сербския со слезами.Сего ради воспеваем тя сице:

Радуйся, страну свою крепко возлюбивый.

Радуйся, о ней Господа не мало умоливый.

Радуйся, молитвами твоими в скорбех и напастех нас заступающий.

Радуйся, во обстояниих злых отечество свое сохраняющий и нас от врагов избавляющий.

Радуйся, возлюбивших суету мира добродетельным житием превозшедший.

Радуйся, истинную мудрость возлюбивший.

Радуйся, вечное сокровище Богомудрия в Православии обретший.

Радуйся, преданностию воле Божией ангелы с человеки удививший.

Радуйся, Боговенчанный царю Владиславе, Православия благий ревнителю.

Кондак 9.

Всяких добродетелей исполнен бывше, Владиславе всечестне, с молитвою во устех, предал еси дух твой в руци Божии. Иже всели тя в Небесной обители и сопричте лику угодников Своих. Тем же испроси и нам у Господа мирную христианскую кончину, да предадим души наша в руци Христа Бога нашего, поюще Тому хвалебную песнь: Аллилуиа!

Икос 9.

Ветия многовещанныя не могут достойно восхвалити тя, Владиславе Богомудре, како ты познал еси тщету исповедания латинского и прочих учений еретических, Православного же верования взыскал еси. И якоже, преподобный Симеон, первый краль Сербский защищал народ свой от влияния иноплеменнаго, да тобою на путь правый наставляеми, взываем ти радостно:

Радуйся, добрыми твоими делы и правым ума и сердца изволением приуготовивший себе в жилище Божественныя благодати.

Радуйся, яко Дух Святый учитель тебе бысть к познанию Христа Сына Божия.

Радуйся, совершенную покорность воле Божией показавший.

Радуйся, яко умудри тя Господь, честь царскую, богатство и славу сочитати со смирением христианским.

Радуйся, яко сим образом яве нам показавый, яко блага земная не суть препятие души Боголюбивей к достижению благ небесных.

Радуйся, предивный поборниче веры Христовы.

Радуйся, поточе сладости, напоиваюший нас водою благочестия.

Радуйся, потребителю злых обычаев и суеверий.

Радуйся, Боговенчанный царю Владиславе, Православия благий ревнителю.

Кондак 10.

Спастися всем преискренне желая, молишися за ны горе у Престола Господня, избранник Христов, блаженнее Владиславе. Яко же твоими молитвами пособствуеши нам в странствовании многотрудном земнаго жития, еже в покоянии и благочестии скончати. Яко облече тя Господь Божественною силою, да обратиши вся неверныя и научиши всех со умилением сердец воспевати Творцу в Троице: Аллилуиа!

Икос 10.

Стена явился еси стране твоей несокрушимая, богомудрый и необоримый защитниче всем призывающим тя, зане тако благоволи о тебе небеси и земли Творец Господь, прославляя угодника своего. Яко же при гробнице твоей совершашися знамения чудесы, и изыде молва по всей стране, и понуди краля Уроша торжественно обрести нетленное тело твое для поклонения христианом. Мы же из глубины сердца с упованием глаголем ти молитвенниче наш, пения таковая:

Радуйся, молитвенник наш пред Богом теплый.

Радуйся, яко изыде по всей стране вещание о чудесех твоих.

Радуйся, яко успение твое торжествует Православная церковь.

Радуйся, прославленный Богом на небеси и на земли.

Радуйся, явлением мощей твоих, церковь Сербскую возвеселивший.

Радуйся, чтущее память твою и мы ныне восхваляем Господа.

Радуйся, градом Сербским похвало и утверждение.

Радуйся, яко тобою дивен Бог во святых своих является.

Радуйся, Боговенчанный царю Владиславе, Православия благий ревнителю.

Кондак 11.

Пение всеумиленное принесл еси Пресвятей Троице, святее Владиславе, умом и делом до конца своея жизни Триипостасного Бога возлюбивши. Приими же от прославляющих тя умиленное пение и не презри гласа нашего, к тебе бо в напастех и скорбех прибегаем и на твое предстательство уповающе, зовем Богу: Аллилуиа!

Икос 11.

Трисиянным светом осияваем, со всеми святыми предстоиши ныне на небеси Престолу Царя царствующих, Владиславе всеблаженне, и от туду, яко светозарное светило, просвещаеши всю страну Сербскую, разгоняющи мрак заблуждений и показующи путь к истинному просвещению к небесному блаженству. Сего ради, прославляюще тя, глаголем:

Радуйся, путеводителю, правую стезю к вечному спасению нам показующий.

Радуйся, мощный споспешник и укрепитель проповедников Православныя веры.

Радуйся, покровитель наставников, благотрудящихся на пользу общую.

Радуйся, крамолы и раздоров искоренителю.

Радуйся, всех обидимых и не праведно гонимых заступниче.

Радуйся, скорбящих скорый утешитель.

Радуйся, болящих целитель.

Радуйся, людем помощь молитвами твоими от Бога подающий.

Радуйся, Боговенчанный царю Владиславе, Православия благий ревнителю.

Кондак 12.

Благодать Пресвятаго Духа испроси нам, заступниче честный, от Всещедрого Спаса Христа, вразумляющую и укрепляющую нас во спасении. Да не бесплодно будет в нас семя святыя Христовы веры, но да прозябнет и плод сотворит, им же бы возмощи нам питати души наша в будущем веце, идеже вси святии поют Богу: Аллилуиа!

Икос 12.

Поюще твоя многая и преславная благодеяния, святе Владиславе, явленная не токмо людем земли Сербския, но и прочим, по всюду сице тебе зовущим:

Радуйся, в сожительство ангельских чинов и святых любезно приятый.

Радуйся, собору царей святых сопричтенный.

Радуйся, с лики избранных Божиих в чертог небесный вселивыйся.

Радуйся, златая кадильнице, фимиам молитвы о нас Богу приносящий.

Радуйся, лицезрением небесных, вечное блаженство вкушающий.

Радуйся, с благоверными цари и князи славимый.

Радуйся, народом Сербским и всеми Православными величаемый.

Радуйся, чудес Христовых сокровище.

Радуйся, Боговенчанный царю Владиславе, Православия благий ревнителю.

Кондак 13.

О, святый благоверный царю Владиславе, приими милостивно от нас хвалебное пение сие о всех, яже тобою воздаде нам Господь. И моли Всеблагаго Бога умножити милость Свою на ны и на роды родов наших. Утвердити ны в Православии и благочестии. Сохранити же от всех скорбей и напастей, бед и зол, да сподобимся с тобою во веки воспевати Богу: Аллилуиа! Аллилуиа! Аллилуиа!

Этот конда́к читается трижды, затем 1-й и конда́к 1-й.

Икос 1.

Архангелов и ангелов множество, предстоя Царю Царствующих и Господу господствующих, со умилением взирают на Его о стране Сербской промышлении. Постави бо тя народу ея во главу, царя, блаженнее Владиславе, веру отеческую сохраняти и храмы Божии воздвизати. Тем же величая твое Богоизбрание, с любовию поклоняемся тебе зовущее:

Радуйся, от малолетства Христа возлюбивый.

Радуйся, заповеди Его от отец верно в сердце свое приявый.

Радуйся, теплотою веры Христовой весь исполнивыйся.

Радуйся, чистотою тояжде веры из млада напоенный.

Радуйся, красотою церковною вдохновленный.

Радуйся, Духом Святым в Православии утвержденный.

Радуйся, отцев веру сохранивый и прочия люди в ней держатися научивый.

Радуйся, храмов и монастырей благий строителю и о них добрый и изрядный попечителю.

Радуйся, Боговенчанный царю Владиславе, Православия благий ревнителю.

Кондак 1.

Избранный Богом в правителя людем сербским, благоверне царю Владиславе, похвальная пение приносим ти, угодниче Христов и молимся всеблагоговейно, твоими молитвами в Православии нас верно утверди, от бед и скорбей свободи и в будущем вечных мук избави, верно зовущих ти: Радуйся, Боговенчанный царю Владиславе, Православия благий ревнителю.

Молитва.

О, Святый и славный угодниче Христов, царю Владиславе! Скорый помощниче и теплый заступниче с верою притекающих к тебе. Предстоя со дерзновением Небесному Царю, испроси у Него прощение согрешений наших. И о еже избавиться нам от всегубительныя язвы, труса, потопа, огня, меча, и вечныя казни. Моли Благость Его, еже ущедрити всякую страну христианскую. Исходатайствуй у Господа на враги победу и одаление, всему же миру тишину, к Православию обращение, твердость в вере и преспеяние во благочестии. Нам же, чтущим память твою, испроси благодатное укрепление в молитве и делех благих, да благоугодное Владыке нашему Христу Богу зде творяще, сподобимся молитвами твоими, блажене, наследовати Царство Небесное, для вечного прославления Его со Отцем и Святым Духом во веки веков. Аминь!

Моли Бога о нас Святый царю Владиславе!

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (которому читался акафист) и всех святы́х, спаси́ и помилуй мя, гре́шнаго, яко Благ и Человеколюбец.

благоверному князю Владиславу Сербскому