Шрифт

Акафисты святым

Акафист святому преподобному Варлааму Хутынскому, Новгородскому чудотворцу

Кондак 1.

Избра́нный Чудотво́рче, и изря́дный Уго́дниче Христо́в, мно́гим воздержа́нием на земли́ житие́ Твое́ украси́вый; сего́ ра́ди и венце́м от Христа́ на Небеси́ венча́нный, и с ве́рою приходя́щим источа́яй многоцеле́бныя да́ры. Восхваля́ем Тя́, Засту́пника на́шего, преподо́бне О́тче Варлаа́ме: Ты́ же, я́ко име́яй дерзнове́ние ко Го́споду от вся́ких на́с бе́д свободи́, да зове́м Ти́:

Ра́дуйся, Варлаа́ме, вели́кий и пресла́вный чудотво́рче.

И́кос 1.

А́нгелом уподо́бился еси́, Богому́дре О́тче Варлаа́ме, непоро́чным житие́м Твои́м на земли́: доброде́тельми укра́шен, пресели́лся еси́ от земли́ на Не́бо, ди́вный о́браз соверше́нства духо́внаго на́м оста́вив, да подража́ем доброде́телем Твои́м. Ты́ же со А́нгелы и все́ми святы́ми предстоя́ Престо́лу Го́спода Сла́вы, моли́ся о на́с, почита́ющих Тя́ и во умиле́нии зову́щих Ти́ такова́я:

Ра́дуйся, О́трасле Богодарова́нная ко́рене благочести́ваго; ра́дуйся, Вели́каго Нова́града Прозябе́ние пречестно́е.

Ра́дуйся, Ча́до возлю́бленное Благода́ти Ду́ха Бо́жия испо́лненное; ра́дуйся, Отроча́ Боголюбе́зное.

Ра́дуйся, измла́да Боже́ственными Писа́ньми ду́шу Твою́ насы́тивый; ра́дуйся, во мла́дости му́дрость ста́рца стяжа́вый.

Ра́дуйся, воздержа́нием роди́тели Твоя́ изуми́вый; ра́дуйся, смире́нием и послуша́нием мно́гих удиви́вый.

Ра́дуйся, ю́ность Твою́ Непоро́чностию жития́ украси́вый; ра́дуйся, целому́дрие де́вства невреди́мо сохрани́вый.

Ра́дуйся, от ю́ности в же́ртву Благоприя́тну Го́сподеви Са́м Себя́ принесы́й; ра́дуйся, во все́м житии́ еди́но попече́ние име́вый е́же Триипоста́сному Бо́гу то́кмо служи́ти.

Ра́дуйся, Варлаа́ме, Вели́кий и Пресла́вный Чудотво́рче.

Конда́к 2.

Ви́девше роди́тели ве́лие воздержа́ние Твое́, О́тче Преблаже́нне, в печа́ли бя́ху, да не в боле́знь впаде́ши ю́н сы́й: Ты́ же Первоверхо́внаго Апо́стола глаго́лу внима́я, я́ко бра́шно и питие́ не поставля́ет на́с пред Бо́гом, но то́кмо по́ст и моли́тва, усе́рдно проси́л еси́ роди́тели Твоя́ да́ти Тебе́ посто́м и моли́твою стра́сти ю́ношеския умерщвля́ти, да не порабо́тят сия́ Ду́ха: они́ же слы́шавше такова́я, почуди́шася и оста́виша Тя́ жи́ти благо́му Твоему́ изволе́нию, воспева́юще Вразуми́вшему Тя́ Бо́гу благода́рственную пе́снь: Аллилу́иа.

И́кос 2.

Ра́зум благи́й, благоро́дство и́стинное, бога́тство неистощи́мое стяжа́л еси́, Богоблаже́нне Варлаа́ме, егда́ от ю́ности возжела́в го́рняя му́дрствовати, а не земна́я, взыска́л еси́ стези́ к Небе́сным Оби́телем в безмо́лвии и Богомы́слии. Мы́ же помина́юще толи́кую Твою́ к по́двигом духо́вным ре́вность, со умиле́нием взыва́ем Ти́ такова́я:

Ра́дуйся, безмо́лвия и Богомы́слия до́брый Рачи́телю; ра́дуйся, потре́бнаго для души́ сле́зный Иска́телю.

Ра́дуйся, во́лею Свое́ю и́го за́поведей Христо́вых подъя́вый; ра́дуйся, угожде́ние Бо́гу па́че всего́ предъизбра́вый.

Ра́дуйся, кро́ткий После́дователю Христо́в; ра́дуйся, живы́й о́бразе Ева́нгельскаго самоотверже́ния.

Ра́дуйся, воздержа́ния Пра́вило изве́стное; ра́дуйся, я́ко от ю́ности навы́кнувый поще́нию.

Ра́дуйся, всего́ ми́ра кра́сная, зна́тность ро́да и по́чести мирски́я Христа́ ра́ди ни во что́ вмени́вый; ра́дуйся, то́кмо доброде́тельное по Бо́зе житие́ возлюби́вый.

Ра́дуйся, и на́с земны́я ра́дости презира́ти науча́яй; ра́дуйся, к Го́рнему умы́ и сердца́ на́ша направля́яй.

Ра́дуйся, Варлаа́ме Вели́кий и Пресла́вный Чудотво́рче.

Конда́к 3.

Си́ла Вы́шняго измла́да вложи́ в се́рдце Твое́, Преподо́бне О́тче на́ш Варлаа́ме, к и́ноческому житию́ ре́вность, е́юже руководи́м по сме́рти роди́телей Твои́х оста́вил еси́ до́м и́х, и во все́м упова́ние возложи́в на Го́спода, оби́тели Пресвяты́я Богоро́дицы дости́гл еси́, иде́же и водвори́лся еси́, с рабо́тающими Бо́гу во и́ноческом житии́ непреста́нно вопия́ Ему́ а́нгельскую пе́снь: Аллилу́иа.

И́кос 3.

Име́я непреодоли́мое жела́ние И́го Христо́во на Себе́ прия́ти и во сле́д Христу́ поити́, в послуша́ние отцу́ Твоему́ духо́вному преда́лся еси́ все́ю душе́ю и все́м се́рдцем. Се́й же проразумева́я в Тебе́ сосу́д избра́нный Свято́му Ду́ху, облече́ Тя́ во А́нгельский О́браз и нарече́ и́мя Ти́ Варлаа́м. Ты́ же вся́ доброде́тели, подоба́ющий и́ноком, соверши́л еси́, и в новонача́лии Свое́м соверше́н бы́ти и́нок и до́бр Подви́жник показа́лся еси́. Сего́ ра́ди из глубины́ серде́ц вопие́м Ти́ такова́я:

Ра́дуйся, и́ноческаго жития́ ско́рби и тесноту́ возлюби́вый; ра́дуйся, сожи́тельство и собесе́дничество с преподо́бными избра́вый.

Ра́дуйся, ве́рою, любо́вию и упова́нием Спасе́ния испо́лненный; ра́дуйся, обе́том де́вства чистоту́ се́рдца яви́вый.

Ра́дуйся, обе́том нестяжа́ния высоту́ Ду́ха показа́вый; ра́дуйся, обе́том послуша́ния всесоверше́нное служе́ние Свое́ Еди́ному Бо́гу утверди́вый.

Ра́дуйся, житию́ и по́двигом дре́вних преподо́бных оте́ц поревнова́вый; ра́дуйся, в труды́ и послуша́ние отцу́ Твоему́ духо́вному преда́тися усе́рдно восхоте́вый.

Ра́дуйся, иску́с долготерпе́ния благоуспе́шно проше́дый; ра́дуйся, вся́кое послуша́ние со смире́нием и кро́тостию соверши́вый.

Ра́дуйся, благочи́ния монасты́рскаго ве́рный Храни́телю; ра́дуйся, равноа́нгельнаго жития́ стро́гий Ревни́телю.

Ра́дуйся. Варлаа́ме, Вели́кий и Пресла́вный Чудотво́рче.

Кондак 4

Бу́рю мирска́го жития́ и во́лны страсте́й преше́д, Богому́дре О́тче Варлаа́ме, обре́л еси́ ти́хое приста́нище во Оби́тели Пресвяты́я Богоро́дицы, иде́же и всели́вся неле́ностно порабо́тал еси́ Христу́ во мно́зе долготерпе́нии, со вся́ким воздержа́нием смиря́я Свою́ ду́шу: те́ло же Свое́ труда́ми и по́двигами утомля́я, я́ко все́й бра́тии зело́ удивля́тися вели́кому Твоему́ смире́нию и послуша́нию, и прославля́ти о Тебе́ Бо́га, вопию́ще Ему́: Аллилу́иа.

И́кос 4.

Слы́шав похваля́ема Тя́ бы́ти во Оби́тели от челове́к, превозноше́ния су́етнаго убоя́лся еси́, О́тче Преподо́бне, и те́пле моли́лся еси́ ко Го́споду да сподо́бит Тя́ в пусты́нном безмо́лвии Ему́ служи́ти. Те́мже, я́ко ища́й Сла́вы Еди́наго Бо́га. прише́л еси́ на го́ру Ху́тынскую, свы́ше Тебе́ луче́м Боже́ственнаго Све́та указа́нную, да та́мо в ми́ре Еди́ному Го́споду рабо́таеши. Мы́ же, дивя́щеся Пречу́дному сему́ указа́нию, ра́достно зове́м Ти́ такова́я:

Ра́дуйся, презре́вый сла́ву челове́ческую. я́ко су́етную; ра́дуйся, восприя́вый Свято́е Смире́ние Иису́сово.

Ра́дуйся, Благода́тию Бо́жиею води́мый, я́ко еди́н от дре́вних Патриа́рхов; ра́дуйся, освяти́вый го́ру Ху́тынскую Твои́м прише́ствием.

Ра́дуйся, Лу́ч о́гнен ви́девый на не́й; ра́дуйся, чрез сие́ прия́вый от Го́спода благо́е извеще́ние о ме́сте поко́я Твоего́.

Ра́дуйся, Зри́телю Боже́ственных виде́ний; ра́дуйся, Го́рлице пустыннолюби́вая, Ху́тынскую де́брь огласи́вшая пе́нием Сла́вы Бо́жия.

Ра́дуйся, Кри́не благоуха́ющий в пусты́ни; ра́дуйся, моли́тв благово́нное Кади́ло.

Ра́дуйся, псалмопе́ния Орга́не изя́щный.

Ра́дуйся, Варлаа́ме, Вели́кий и Пресла́вный Чудотво́рче.

Конда́к 5.

Боготе́чною Звездо́ю преше́д на го́ру Ху́тынскую, блиста́я и́ноческими по́двиги Твои́ми, Преподо́бне О́тче Варлаа́ме, ди́внаго виде́ния сподо́бился еси́, егда́ узре́в Лу́ч Боже́ственнаго Све́та, указа́вший Тебе́ ме́сто по́двигов Твои́х, зело́ умили́лся еси́ в се́рдце Твое́м, сла́вя Бо́га и воспева́я Ему́: Аллилу́иа.

И́кос 5.

Спасти́ хотя́й ду́шу Твою́, Уго́дниче Бо́жий, а́ще и всеме́рно бе́гал еси́ сла́вы, я́же от челове́к: ве́рно оба́че Сло́во Го́спода, я́ко не мо́жет гра́д укры́тися верху́ горы́ стоя́, та́ко бо и о Твое́м пусты́нном по́двизе уве́деша Вели́каго Нова́града лю́дие, и нача́ша благогове́йно приходи́ти к Тебе́, прося́ у Тебе́ моли́тв, душеполе́зных наставле́ний и благослове́ния. Ты́ же все́х с любо́вию прие́мля, поуча́л еси́ от Боже́ственнаго Писа́ния е́же твори́ти За́поведи Госпо́дни и име́ти любо́вь нелицеме́рну. Мы́ же ублажа́юще Тя́ вопие́м Ти́ такова́я:

Ра́дуйся, Гра́де, верху́ горы́ стоя́й и не моги́й укры́тися; ра́дуйся, Свети́льниче, Боже́ственным Пла́менем возже́нный.

Ра́дуйся, Огневи́дный Сто́лпе, наставля́яй на пу́ть Спасе́ния; ра́дуйся, Лучеза́рный Свети́льниче, ве́рныя просвеща́яй.

Ра́дуйся, Цве́те духо́вный, Благода́тию привлека́яй взо́ры душе́вныя к Тебе́ приходя́щих; ра́дуйся, Пчело́ трудолюби́вая, со́ты доброде́телей в насыще́ние а́лчущих с Собо́ю нося́щая.

Ра́дуйся, гре́шныя на пу́ть Спасе́ния направля́яй; ра́дуйся, скорбя́щия сла́достию слове́с Твои́х утеша́яй.

Ра́дуйся, ю́ныя наставля́яй; ра́дуйся, ста́рыя не сло́вом то́чию, па́че житие́м укрепля́яй.

Ра́дуйся, притека́ющим к Тебе́, те́плый Моли́твенниче и Боговеща́нный Учи́телю; ра́дуйся, и на́с все́х обремене́нных грехи́ мно́гими, в любви́ дру́г ко дру́гу Ди́вный Наста́вниче.

Ра́дуйся, Варлаа́ме, Вели́кий и Пресла́вный Чудотво́рче.

Конда́к 6.

Пропове́дника терпе́ния, му́жества и кро́тости зри́м Тя́, Богому́дре О́тче Варлаа́ме, во все́х озлобле́ниих, я́же творя́ху Ти́ ду́си зло́бы: си́и бо иногда́ во о́бразе звере́й ди́виих, иногда́ во о́бразе зми́й ядови́тых явля́хуся к Тебе́ и устраша́ху, понужда́я Тя́ отъити́ от ме́ста того́. Ты́ же ве́рою и кре́стнаго зна́мения си́лою вся́ ко́зни и́х сла́вно победи́л еси́ и зми́ев ядови́тых от Оби́тели Твоея́ навсегда́ дале́че отгна́л еси́. Сего́ ра́ди мы́, прославля́юще о Тебе́ Го́спода, во умиле́нии благода́рственно вопие́м Ему́: Аллилу́иа.

И́кос 6.

Возсия́в от Вели́каго Нова́града, О́тче на́ш Варлаа́ме, просвети́л еси́ чу́дным житие́м Твои́м го́ру Ху́тынскую, на не́йже и Оби́тель и́ноком во спасе́ние Бо́жиим изволе́нием устро́ил еси́, и це́рковь во И́мя Преображе́ния Госпо́дня созда́л еси́, и свяще́нства Благода́ть восприя́ти чрез святи́теля Бо́жия и Игу́меном созда́нныя Тобо́ю Оби́тели от него́ нарещи́ся не уклони́лся еси́, а́ще и тужа́ше ду́х Тво́й, ужаса́яся высоты́ сея́. Мы́ же, прославля́юще Тя́, любо́вию вопие́м Ти́:

Ра́дуйся, во удале́нии от ми́ра су́етнаго пусты́нную Оби́тель ра́ди и́щущих спасе́ния до́бре основа́вый; ра́дуйся, водвори́вшимся в не́й Вели́кий Учи́телю и Богому́дрый Наста́вниче.

Ра́дуйся, благогове́йный алтаря́ Госпо́дня Служи́телю, о ве́рных моля́йся; ра́дуйся, со мно́гим дерзнове́нием о на́с недосто́йных ко Го́споду предста́тельствующий.

Ра́дуйся, Та́ин Бо́жиих и́стинный Строи́телю; ра́дуйся, слове́снаго ста́да Твоего́ До́брый Па́стырю.

Ра́дуйся, Предводи́телю Богому́дрый в пути́ Спасе́ния; ра́дуйся, вождю́ до́блий, Мно́гих приведы́й ко спасе́нию.

Ра́дуйся, святы́я Во́ли Бо́жия Исполни́телю; ра́дуйся, оте́ческих преда́ний усе́рдный Храни́телю.

Ра́дуйся, и́ноков благочести́вых Похвало́ и Украше́ние; ра́дуйся, и о на́с гре́шных Судии́ Пра́веднаго Умоле́ние.

Ра́дуйся, Варлаа́ме, Вели́кий и Пресла́вный Чудотво́рче.

Кондак 7

Хотя́щу Ти́ угоди́ти Еди́ному Го́споду, Богоно́сне О́тче Варлаа́ме! ве́сь вда́лся еси́ безме́рным по́двигом и глубине́ смире́ния: труды́ же Твоя́, и моли́твы и поще́ния ко́е сло́во изглаго́лати мо́жет ве́мы то́кмо, я́ко вери́гами тя́жкими и власяни́цею обле́клся еси́, претерпева́я боле́зни любве́ ра́ди Бо́жия. Сего́ ра́ди Человеколю́бец Госпо́дь, ви́дя смире́ние Твое́, возвели́чи Тя́ Благода́тию Чудотворе́ний, Его́же благодаря́ще, вопие́м Ему́ ку́пно с Тобо́ю: Аллилу́иа.

И́кос 7.

Ди́вное и пресла́вное чу́до показа́ Тобо́ю на земли́ все́х чуде́с Творе́ц и Влады́ка, егда́ премени́шася естества́ уста́вы: среди́ бо ле́та мра́з си́лен и сне́г глубо́к яви́стася в преде́лах Нова́града, е́же Ты́ предре́кл еси́ о́ному святи́телю; Святи́тель Бо́жий и лю́дие Нова́града смути́шася тогда́ зело́, боя́хубося, я́ко гла́д ве́лий наста́нет в стране́ и́х. Егда́ же услы́шаша от Тебе́ изволе́ние Бо́жие, явле́нное в ви́димом и благо́е промышле́ние о лю́дех Свои́х, ра́дости испо́лнишася и возблагодари́ша Бо́га Ди́внаго во Святы́х Свои́х. Мы́ же, дивя́щеся Си́ле Бо́жией, обита́ющей в Тебе́ и помина́юще ско́рое Твое́ заступле́ние, со умиле́нием покланя́емся Тебе́, я́ко ве́лие дерзнове́ние иму́щему пред Го́сподем и благода́рственно вопие́м:

Ра́дуйся, в ми́ре преми́рным яви́выйся; ра́дуйся, страну́ Новагра́дскую удиви́вый чудесы́.

Ра́дуйся, и́мже о Си́ле Бо́жией естества́ уста́вы премени́шася; ра́дуйся, и́мже лю́дие Нова́града от гла́да изба́вишася.

Ра́дуйся, Де́лателю чуде́с пресла́вных; Ра́дуйся, Хода́таю и Пода́телю дарова́ний многообра́зных.

Ра́дуйся, мно́гия от тя́жких напа́стей и скорбе́й изба́вивый; ра́дуйся, ско́рый Помо́щниче все́х в беда́х су́щих.

Ра́дуйся, Нова́града Красото́ и Утвержде́ние; ра́дуйся, горы́ Ху́тынския Сла́во и Похвале́ние.

Ра́дуйся, Промышле́ние о лю́дех благо́е Прия́телище; ра́дуйся, и на́с гре́шных прибега́ющих под кро́в Тво́й, неусы́пный Засту́пниче.

Ра́дуйся, Варлаа́ме, Вели́кий и Пресла́вный Чудотво́рче.

Конда́к 8.

Неистощи́мый Исто́чник вели́ких чуде́с яви́лся еси́, Достосла́вне О́тче на́ш Варлаа́ме! прия́л бо еси́, еще́ в ми́ре се́м живя́, да́р от Бо́га не то́кмо неду́ги исцеля́ти, но и ме́ртвыя воскреша́ти, я́коже воскреси́л еси́ моли́твою о́наго о́трока: и бу́дущая прорица́ти, я́коже предре́кл еси́ кня́зю Новагра́дскому о рожде́нии ему́ сы́на. По сме́рти же наипа́че просла́ви Тя́ Бо́г мно́гими чудотворе́нии, да вси́ Чудотворя́щему Тобо́ю Бо́гу вопие́м: Аллилу́иа.

И́кос 8.

Ве́сь еси́ с ве́рою к Тебе́ притека́ющим вои́стинну Помо́щник Вели́кий, Уго́дниче Бо́жий Варлаа́ме! не то́чию прибега́ющим к цельбоно́сным моще́м Твои́м, но и дале́че отстоя́щим и призыва́ющим всечестно́е И́мя Твое́. Те́мже во умиле́нии зове́м Ти́, я́ко вои́стину досто́йному благохвале́ний:

Ра́дуйся, Утеше́ние! скорбя́ми жите́йскими утесне́нных; ра́дуйся, Весе́лие, в печа́лех су́щих.

Ра́дуйся, злостра́ждущих от духо́в зло́бы Ско́рый Помо́щниче и Изба́вителю; ра́дуйся, я́же никто́же с ве́рою притека́яй, то́щь отхо́дит от Тебе́.

Ра́дуйся, я́ко су́щим в пучи́не скорбе́й До́бр обрета́ешися Ко́рмчий; ра́дуйся, я́ко Ми́лостивый при жи́зни, благотвори́ши все́м тре́бующим и по сме́рти.

Ра́дуйся, пла́вающих ле́гкое по вода́м Прехожде́ние; ра́дуйся, путеше́ствующих До́брый Путеводи́телю.

Ра́дуйся, си́льный вдови́ц Покрови́телю; ра́дуйся, сиро́т милосе́рдый и благопопечи́тельный Храни́телю.

Ра́дуйся, а́лчущих любвеоби́льный Пита́телю; ра́дуйся, все́х безпомо́щных ве́рный пред Го́сподем Хода́таю.

Ра́дуйся, Варлаа́ме, Вели́кий и Пресла́вный Чудотво́рче.

Кондак 9

Вся́кия ско́рби и труды́ до́бльственно претерпе́л еси́, О́тче на́ш Варлаа́ме! ше́ствуя по пути́ Спасе́ния до масти́тыя ста́рости. Скончава́я же тече́ние вре́менныя жи́зни сея́, все́х поуча́л еси́ исполне́нием Во́ли Бо́жией благоугожда́ти Го́сподеви. Мы́ же гре́шнии, и́щуще с ве́рою Твоего́ заступле́ния и припа́дающе к Тебе́ я́ко Отцу́ благосе́рдому, смире́нно мо́лим Тя́ бу́ди на́м Покро́в и Защище́ние в де́нь кончи́ны на́шея, да неосужде́нно предста́нем Престо́лу Судии́ все́х, и вопие́м Ему́ с Тобо́ю и со все́ми Небе́сными Си́лами А́нгельскую пе́снь: Аллилу́иа.

И́кос 9.

Вети́йствующий язы́к недоуме́ет досто́йно воспе́ти Твоя́ по́двиги и труды́, Благи́й Ра́бе Бо́жий, я́же поне́сл еси́ любве́ ра́ди и спасе́ния ду́ш при́сных Твои́х: яви́лся бо еси́ Пропове́дник воздержа́ния и терпе́ния и́ноком пустыннолюби́вым и все́м Учи́тель Му́дрый, наставля́яй на пу́ть спасе́ния. Мы́ же, чудя́щеся высоте́ и си́ле Твоея́ доброде́тели, зане́ ви́дим плоды́ ея́ в Твои́х ученика́х и сподви́жниках Анто́ние, Ксенофо́нте, Косьме́ и Константи́не, уже́ просла́вленных вме́сте с Тобо́ю во Ца́рствии Отца́ Небе́снаго, любо́вию прославля́ем Тя́ си́це:

Ра́дуйся, Трудолю́бче, тече́ние жи́зни Твоея́ в вели́ких по́двигах соверши́вый; ра́дуйся, терпе́нию Христо́ву ве́рно Подража́вый.

Ра́дуйся, све́том доброде́телей Твои́х Бо́га просла́вивый; ра́дуйся, Се́мя До́брое, на земли́ бла́зе посе́янное и стори́чный Пло́д прине́сшее.

Ра́дуйся, Свети́ло благоче́стия Немерца́ющее; ра́дуйся, Звездо́, ко спасе́нию пу́ть ве́рным показу́ющая.

Ра́дуйся, не сло́вом то́чию, но па́че житие́м поуча́яй; ра́дуйся, и́ноком пу́ть и́стинный ко спасе́нию показа́вый.

Ра́дуйся, по́стничества и терпе́ния О́браз преди́вный; ра́дуйся, воздержа́ния Учи́телю.

Ра́дуйся, за́поведей Христо́вых ве́рный Исполни́телю; ра́дуйся, и все́х на́с в любви́ к при́сным ди́вный Наста́вниче.

Ра́дуйся, Варлаа́ме, Вели́кий и Пресла́вный Чудотво́рче.

Конда́к 10.

Спасти́ хотя́й ду́ши учени́к Твои́х, Преподо́бне О́тче Варлаа́ме! и проразуме́вый, е́же к Бо́гу Твое́ отше́ствие, призва́л еси́ всю́ бра́тию Твою́, и я́ко Оте́ц чадолюби́вый наставля́я и́х, предре́кл еси́ о бы́ти име́ющем по блаже́нней кончи́не Твое́й прославле́нии Оби́тели Твоея́, а́ще любо́вь соблюду́т дру́г ко дру́гу. Ны́не же, по предрече́нию Твоему́ исполня́емая зря́ще, в ра́дости ку́пно с Тобо́ю вопие́м Го́споду и Бо́гу благода́рственную пе́снь: Аллилу́иа.

И́кос 10.

Царя́ Небе́снаго возлюби́в все́м се́рдцем Твои́м и все́ю душе́ю Твое́ю и все́ю мы́слию Твое́ю, до конца́ жи́зни Твоея́ в терпе́нии и по́двизе неосла́бно пребы́л еси́, и егда́ дости́гнув в ме́ру во́зраста и в му́жа соверше́нна, позна́л приближе́ние вре́мени, ну́жнаго челове́ку измене́ния, во е́же тле́нному насле́довати обетова́нное безсме́ртие, тогда́ завеща́л еси́ ученико́м Твои́м вся́ потре́бная ко спасе́нию, наста́вника же в Себе́ ме́сто Анто́ния сподви́жника Твоего́ оста́вил еси́, ему́же и Оби́тель Святу́ю вручи́л еси́ и бра́тию: Та́же благослови́в все́х, пре́дал еси́ Святу́ю ду́шу Твою́ в ру́це Бо́жии. Мы́ же, помина́юще сия́, из глубины́ серде́ц вопие́м Ти́ такова́я:

Ра́дуйся, и́скреннюю любо́вь к Бо́гу в душе́ и се́рдце непреста́нно име́вый; ра́дуйся, то́юже любо́вию к духо́вным ча́дам Твои́м, при отше́ствии испо́лненный.

Ра́дуйся, стра́х Бо́жий в се́рдце вы́ну сохрани́вый; ра́дуйся, Еди́ному Го́споду до конца́ послужи́вый.

Ра́дуйся, благоче́стно тече́ние вре́менныя жи́зни сконча́вый; ра́дуйся, кончи́ну Свою́ предуве́девый.

Ра́дуйся, я́ко с тве́рдым наде́янием Бла́г Ве́чных преста́вился еси́ к Бо́гу; ра́дуйся, я́ко Ца́рь ца́рствующих прия́л Тя́ в Небе́сное Ца́рствие.

Ра́дуйся, я́ко свя́тостию жития́ Ми́лость Бо́жию обре́л еси́; ра́дуйся, Ра́бе Благи́й и Ве́рный вше́дый в ра́дость Го́спода Твоего́.

Ра́дуйся, я́ко от Оби́тели земны́я в Оби́тель Небе́сную пресели́лся еси́; ра́дуйся, я́ко с Небе́сных высо́т на мольбы́ на́ша ми́лостивно призира́еши.

Ра́дуйся, Варлаа́ме, Вели́кий и Пресла́вный Чудотво́рче.

Конда́к 11.

Пе́ние погреба́льное слеза́ми растворя́шеся у гро́ба Твоего́, Досточу́дне О́тче Варлаа́ме, мно́жества же ра́ди свеще́й и благово́ния кади́льнаго, све́тлым торжество́м явля́шеся погребе́ние Твое́, и мно́зи тогда́ неду́жнии получи́ша исцеле́ние прикоснове́нием ко Святы́м моще́м Твои́м, ра́дующеся и благода́рственно взыва́юще к Чудотворя́щему Тобо́ю Бо́гу: Аллилу́иа.

И́кос 11.

Светоза́рное Свети́ло, на Ху́тынской горе́ возсия́вшее, и по честне́м успе́нии Твое́м зри́м Тя́, Богому́дре О́тче Варлаа́ме, зане́ и ны́не све́тиши на́м зна́мении и чудесы́, от Святы́х моще́й Твои́х истека́ющими, я́же изволе́нием Бо́жиим земля́ яви́ Святи́телю Евфи́мию и бы́вшим во хра́ме с ни́м игу́мену Тара́сию, иподиа́кону Иоа́нну, я́ко многоце́нное и Благода́ти испо́лненное Сокро́вище. Те́мже и мы́, благода́рственная Бо́гу принося́ о тебе́ пе́ния, взыва́ем к тебе́ си́це:

Ра́дуйся, нетле́нием моще́й твои́х сла́вно от Бо́га возвели́ченный; ра́дуйся, от моще́й твои́х исцеле́ния неду́гов Благода́тию Бо́жией источа́яй.

Ра́дуйся, Ча́ше, излива́ющая то́ки Милосе́рдия Бо́жия; ра́дуйся, чуде́с Пучи́но, свы́ше излия́нная.

Ра́дуйся, пре́жде сме́рти яви́вый ди́вная; ра́дуйся, и по успе́нии соверша́яй чу́дная.

Ра́дуйся, я́ко и по сме́рти жи́в пребыва́еши, явля́я в Себе́ си́лы Боже́ственныя; ра́дуйся, я́ко моли́твенно Тя́ призыва́ющия, ско́ро посеща́еши.

Ра́дуйся, немощны́х Цели́телю; ра́дуйся, ско́рбных Уте́шителю.

Ра́дуйся, я́ко и по преставле́нии твое́м при́сно с на́ми пребыва́еши; ра́дуйся, я́ко и живя́ в селе́ниих Ра́йских на́с не оставля́еши.

Ра́дуйся, Варлаа́ме, Вели́кий и Пресла́вный Чудотво́рче.

Конда́к 12.

Хотя́ сокрове́нную та́йну яви́ти, показа́л еси́ ди́вная боголюби́вому му́жу Тара́сию о поги́бели и потопле́нии Вели́каго Нова́града: оба́че са́м же ты́ и вели́кий Покро́в гра́ду бы́л еси́ и гне́в Бо́жий моли́твами твои́ми умягчи́л еси́, и гра́д тво́й от ка́зни изба́вил еси́. Тогда́ вси́ лю́дие ви́девше тя́ ко Го́споду Пречу́днаго хода́тая, вопия́ху к Бо́гу: Аллилу́иа.

И́кос 12.

Ди́вен показа́лся еси́ ученико́м твои́м, егда́ еди́наго от осужде́нных, никому́ же тя́ моля́щу, от ка́зни сме́ртныя свободи́л еси́, друга́го же и мно́гим тя́ о не́м прося́щим от сме́рти изба́вити не восхоте́л еси́. Мы́ же не дерза́ем испы́тывати сокрове́нная Суде́б Бо́жиих Та́йны, но со стра́хом к тебе́ взыва́ем:

Ра́дуйся, таи́нниче вели́кий, Бо́жия Благода́ти; ра́дуйся, защи́тниче, от бе́д и сме́рти непови́нныя.

Ра́дуйся, свяще́нный у́ме, постига́яй Боже́ственныя Та́йны; ра́дуйся, ра́зуме просвеще́нный све́том Го́рния Сла́вы.

Ра́дуйся, ду́ше, освяще́нный Благода́тию Бо́жиею; Ра́дуйся, се́рдцем очище́нным зря́й Непостижи́мыя Бо́жия Судьбы́.

Ра́дуйся, вну́тренняя се́рдца испыту́яй; ра́дуйся, прозрева́яй сокрове́нныя мы́сли.

Ра́дуйся, све́тлый у́ме озаре́нный Невече́рним Све́том; ра́дуйся, чи́стый душе́ю, просветле́нный Со́лнцем Пра́вды.

Ра́дуйся, Варлаа́ме, вели́кий и пресла́вный чудотво́рче.

Конда́к 13.

О, вели́кий и Пречу́дный О́тче на́ш Варлаа́ме! к Тебе́ припа́дая со умиле́нием мо́лим: приими́ сие́ ма́лое хвале́бное пе́ние на́ше и Богоприя́тным Твои́м Хода́тайством испроси́ на́м от Христа́ Ми́лостиваго Бо́га на́шего проще́ние прегреше́ний на́ших, дарова́ние на́м гре́шным христиа́нския кончи́ны живота́ на́шего и Ца́рствия Небе́снаго насле́дие, да сподо́бимся с Тобо́ю и со все́ми Святы́ми во Ве́ки воспева́ти Бо́гу и Спаси́телю на́шему: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

Моли́тва.

О, преподо́бне и богоно́сне о́тче на́ш Варлаа́ме! Услы́ши на́с моля́щихся тебе́ и бу́ди на́м помо́щник в ско́рбех на́ших, и изба́ви на́с от напа́стей, за мно́жество прегреше́ний находя́щих на ны́; умоли́, уго́дниче Христо́в, всеблага́го Бо́га дарова́ти на́м оставле́ние все́х от ю́ности на́шея до настоя́щаго дне́ и часа́, де́лом, сло́вом, помышле́нием и все́ми чу́вствы соде́янных на́ми согреше́ний, исхода́тайствуй на́м невозбра́нный вхо́д в небе́сное ца́рствие, да прославля́ем непреста́нно сла́вимую от а́нгел всесвяту́ю Тро́ицу: Отца́, и Сы́на, и Свята́го Ду́ха, и твое́ ми́лостивное предста́тельство в безконе́чныя ве́ки. Ами́нь.