Акафист преподобному Илии Макеевскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный чудотворе и изрядный угодниче Христов, отче Илие преподобне, всем, прибегающим к тебе, молитвенное заступление. Прославляя Господа, прославльшаго тя, со умилением похвальная тебе приносим пения:

Радуйся, Илие преподобне, теплый молитвенниче о душах наших.

Икос 1

Велика Совета Ангел и мира Творец избра тя от лет отроческих на служение Себе; ты же, послушание истинное Богу являя, нд Горе Афонстей во смирении и иночестем подвизе пребыл еси, мы же, промышлению Его о тебе дивящеся, с верою зовем:

Радуйся, лозы Христовы истинная поросле.

Радуйся, измлада путь спасения избравый.

Радуйся, правил веры изрядный рачителю.

Радуйся, Мира Горняго умильный яснозрителю.

Радуйся, иноков преславное украшение.

Радуйся, в миру сущим истинное поможение.

Радуйся, притекающих к тебе скорое утешение.

Радуйся, земли Донецкия украшение.

Радуйся, Илие преподобне, теплый молитвенниче о душах наших.

Кондак 2

Видя Царь Небесный истинное желание твое спасение обрести, приведе тя в сад дивный Божией Матери — на Гору Афонскую: тамо бо, в подвизе смирения, послушания, терпения духовно возрастая, Господеви пел еси: Аллилуиа.

Икос 2

Разум небесный в дар от Бога приим, оставил еси дом отчий и вся прелести мира Царствия ради Божия и правды Его. Сего ради, похвальная глаголюще, зовем ти:

Радуйся, чадо Церкви Христовы верное.

Радуйся, образе кротости духовныя.

Радуйся, яко к докродетели от юности навыкл еси.

Радуйся, яко в законе Господни поучался еси день и нощь.

Радуйся, яко, отечество земное оставив, к небесному устремился еси.

Радуйся, юность свою в дар Господеви принесый.

Радуйся, от Господа помощь и прозрение духовное восприемый.

Радуйся, благодатные дары, данные тебе, преумноживый.

Радуйся, Илие преподобне, теплый молитвенниче о душах наших.

Кондак 3

Силою Вышняго осененный, иноческое поприще проходя, духовным ведением люту годину во отечествии твоем прозревая, многия люди ко угождению Богу наставил еси. Мы же, к заступлению твоему притекающе, зовем: Аллилуиа.

Икос 3

Имея в сердце твоем истинную любовь ко Творцу всех, добрым подвигом потрудився, равноангельское житие стяжал еси. Мы же во умилении и радости глаголем сице:

Радуйся, смиреним и послушанием Христу подражавый.

Радуйся, небесныя дарования стяжавый.

Радуйся, бдения и службы церковныя ревнителю.

Радуйся, ближним яко самому Господу послуживый.

Радуйся, алчущия и жаждущия духовно насытивый.

Радуйся, яко скорбящим был еси утешение.

Радуйся, яко болящим был еси отрада.

Радуйся, о тяжко труждающихся в недрех земных пред Богом ходатаю.

Радуйся, Илие преподобне, теплый молитвенниче о душах наших.

Кондак 4

Бури искушений и напастей, во Отечествии твоем, от нечестивых гонителей на Церковь воздвизаемыя не устрашився: пришел еси во град Макеевку, и светильник во тьме седящим явился еси. Обители Горния являяся истинный гражданин, с Вышними силами поя Богови: Аллилуиа.

Икос 4

Слышав скорби и тяготу народа Божия, оставив тишину безмолвия, любовию Христовою уязвляем, на Него же все упование твое возложил еси: моли даровати и нам, немощным, милости Христа Бога, да согласно поем ти:

Радуйся, иго Христово на себе восприявый.

Радуйся, во уделе Божией Матери рабе благий и верный.

Радуйся, плоть твою духови покоривый.

Радуйся, в сонме Афонских преподобных просиявый.

Радуйся, яко и во отечествии твоем предивный чудотворец явился еси.

Радуйся, смирением Господеви угодивый.

Радуйся, сосуд, сокровищ добродетелей, собою явивый.

Радуйся, в подвизех твоих Царя Небеснаго прославивый.

Радуйся, Царство Небесное в себе еще в земнем житии носивый.

Радуйся, Илие преподобне, теплый молитвенниче о душах наших.

Кондак 5

Богосветлое светило яви тя Господь: искусный бо делатель умныя молитвы являяся, источник приснотекущия благодати обрелся еси; и души отчаянных, светом истинныя веры озарив, ко Христу привел еси; поя Тому песнь: Аллилуиа.

Икос 5

Видевше людие тя, отче Илие, велия молитвенника, со тщанием притекаху к тебе, яко же древле народ Израиля ко пророку Божию Илии; ты же, силу духа пророча в себе носяй, верное заступление чадом Церкви был еси; не остави и нас, грешных, вопиющих ти таковая:

Радуйся, молитвенниче о нас дерзновенный.

Радуйся, силою молитвы древнему пророку подобный.

Радуйся, изрядным смирением твоим духов злобы посрамивый.

Радуйся, незлобием твоим многия кротости научивый.

Радуйся, денно и нощно псалмопением благоухавый.

Радуйся, чистоты духовныя и телесныя усердный хранителю.

Радуйся, Пустыни Афонския яко шипок благовонный украшение.

Радуйся, яко вся просимое от Господа получивый.

Радуйся, Илие преподобне, теплый молитвенниче о душах наших.

Кондак 6

Вещает цветник духовный - Гора Святая труды и подвиги твоя, духоносне отче наш Илие; бдением бо, пощением, самоуничижением, ветхаго в себе побеждая, силою Духа Святаго облеклся еси, яко же Елисей милотию Ильиною, и со Ангелы воспеваеши: Аллилуиа.

Икос 6

Возсия в сердце твоем свет любве Божественныя, Боговидцу Моисею уподобляяся, во отечество твое пришел еси, да люди ко Отечеству Небесному направиши; мы же, уповая на заступление твое, взываем сице:

Радуйся, храм нерукотворный в сердце твоем возведый.

Радуйся, множество храмов рукотворных во граде твоем предрекий.

Радуйся, смирением облекийся яко ризою нетленною.

Радуйся, во обители пророка Илии житием твоим просиявый.

Радуйся, волю свою воли Христовой поработивый.

Радуйся, не имый где главы преклонити, многия духовно обогативый.

Радуйся, по слову Христову, любити врагов научивый.

Радуйся, яко сердца гонящих тя кротостию твоею умягчивый.

Радуйся, Илие преподобне, теплый молитвенниче о душах наших.

Кондак 7

Хотяй Человеколюбец Господь всем спастися и в разум истины приити, яви тя светильника земли нашея; научил бо многия любви Божией и благочестию; темже и нас сирых, во тьме греховней блуждающих, не остави, но моли за ны Христа Бога, да поем Ему: Аллилуиа.

Икос 7

Новаго тя избранника Божия видяще: немощныя исцеляюща, утешение и молитвенное предстательство малодушным подающа; темже и за пределы града твоего изыде вещание чудес твоих; мы же, чада твоя, хвалу тебе принося, тако рцем:

Радуйся, наставниче наш прелюбезный.

Радуйся, прозорливый целителю недугов душевных и телесных.

Радуйся, помощниче скорый в бедах сущим.

Радуйся, грядущая, яко настоящая, вещавый.

Радуйся, ангелов собеседниче преславный.

Радуйся, тьмою безбожия ослепленныя светом исполнения Евангельских заповедей просветивый.

Радуйся, житием твоим милосердия и добродетели пречудный проповедниче.

Радуйся, молитвенному деланию многия научивый.

Радуйся, Илие преподобне, теплый молитвенниче о душах наших.

Кондак 8

Странное явление видяще, Илие преподобне, притекшу тебе ветхим старцем во отечествие твое, да людем послужиши, железными бо оковы взор твой на мир сей затворивый; среди житейскаго моря, яко в безмолвней пустыни, пребыл еси, пути к Горнему Иерусалиму взыскуя, в нем же предстоя, с веселием поеши: Аллилуиа.

Икос 8

Весь еси желанием небесным исполненный, не остави и нас, молитвою твоею ограждаемых, мы же, надеждою облекшеся о заступлении твоем пред Владыкою всех, с любовию и радостию величаем тя, зовуще:

Радуйся, зрением ума херувимом уподобившийся.

Радуйся, серафимом, пламенеющим сердцем ко Господу, подобен бывый.

Радуйся, усердно чтущих тя ходатаю непостыдный.

Радуйся, мглу страстей душевредных помощию Божиею победивый.

Радуйся, правоверным воином духовный споборниче.

Радуйся, супостаты молитвою твоею посяцаяй.

Радуйся, милость Всевышняго к чадом твоим приклонивый.

Радуйся, и о всем мире ходатаю неусыпный.

Радуйся, Илие преподобне, теплый молитвенниче о душах наших.

Кондак 9

Всякое естество человеческое дивится, преподобне Илие: како нощными бдениями пустыню озаряя, в подвизе же молитвенном не ослабен до конца претруднаго твоего жития пребыл еси: умоли Господа Сил стяжати добродетель сию и нам недостойным, поющим Ему: Аллилуиа.

Икос 9

Витийство всякое не может изрещи любовь твою; многим бо, притекающим к тебе в недоумении, благий совет подал еси, многия заблуждающаяся кротко вразумил еси, болящим врач являяся, и по смерти прибегающих к твоему ходатайству не оставляеши; мы же с упованием зовем ти:

Радуйся, в добродетели древним отцам подражавый.

Радуйся, на суетный мир единым токмо оком взиравый.

Радуйся, к Миру Горнему умный твой взор вперивый.

Радуйся, светом Божией Благодати осиянный.

Радуйся, оковами смирения добродетели твоя сокрывый.

Радуйся, по слову Христову: "яко ничтоже есть тайно иже не станет явным", на себе явивый.

Радуйся, жертвенною любовию к ближнему Небесныя Обители унаследовавый.

Радуйся, житием твоим Господеви угодивый.

Радуйся, Илие преподобне, теплый молитвенниче о душах наших.

Кондак 10

Спастися хотящим путь истинный примером твоим явивый; отрешатися суеты мира сего и нам помози: обуреваемым противу кознем диавольским стати и ум свой, подобно тебе, вместо суетного мира к Горним Обителем возвести, идеже со всеми святыми поеши хвалебную песнь: Аллилуиа.

Икос 10

Стена несокрушимая явился еси, отче Илие преподобне, необоримым бо заступником предстоиши у Престола Господа Славы с Пречистой Госпожею Богородицею и всеми святыми, за ны моляся: Мы же, к раце с мощами твоими притекающе, умильно глаголем ти таковая:

Радуйся, при жизни никогоже из приходящих к помощи твоей не отринувый.

Радуйся, и по преставлении твоем нас не оставляющий.

Радуйся, изнемогающим духовно помошниче скорый.

Радуйся, страждующим телесно целителю неотложный.

Радуйся, связанным духом злобы поднебесной скорое свобождение.

Радуйся, жертвенною любовию исполненный.

Радуйся, фимиам молитв твоих за ны пред Престолом Божиим воскуряющий.

Радуйся, сосуде Благодати Божией.

Радуйся, Илие преподобне, теплый молитвенниче о душах наших.

Кондак 11

Песнь достохвальную Пресвятей Троице житием твоим принесл еси; и во время отшествия твоего дух твой в руце Бога Живаго с молитвою на устех предал еси, отче преподобне; от юности бо твоея Господеви неленостно потрудився, венец нетленный стяжав, во обителех небесных вселился еси, идеже со ангелы поеши: Аллилуиа.

Икос 11

Светоносный светильник зрим тя, преподобне отче, равноангельно бо на земли пожил еси, и по отшествии твоем молитвенно с нами пребываеши; мы же, взирая на труды и подвиги твоя, похвальная тебе приносим пения:

Радуйся, венец безсмертия от Всеблагаго Бога восприявый.

Радуйся, цельбы по молитвам твоим подающий.

Радуйся, излиянная пучино благодатных даров.

Радуйся, молитвенно призывающих тя скоро посещаяй.

Радуйся, дивная при жизни твоей явивый.

Радуйся, и по преставлении твоем неоскудную помощь нам от Бога подающий.

Радуйся, со Ангелы у престола Божия за ны предстоящий.

Радуйся, нетление стяжавый и нам светлый путь ко спасению указующий.

Радуйся, Илие преподобне, теплый молитвенниче о душах наших.

Кондак 12

Благодать Пресвятаго Духа испроси нам, угодниче Христов Илие достохвальне, вемы бо яко много может молитва праведнаго ко благосердию Владыки; да небезплодно в нас будет семя Святыя Веры. Умоли Человеколюбца Бога даровати нам истинный плод покаяния, с упованием зовущим: Аллилуиа.

Икос 12

Поюще твое прославление от Господа, ублажаем тя и мы, преподобне отче Илие; со умилением взирающе, како обретохом тя многомощна молитвенника и ходатая о нас недостойных; славяще милость Всесвятаго Бога, к нам явленную, приносим ти таковая:

Радуйся, Востока Незаходимаго заре присносияющая.

Радуйся, даров Его сокровище многоразличное.

Радуйся, силою Божиею многия чудеса соделавый.

Радуйся, щедрот и милости Его струе неизсякаемая.

Радуйся, сострадания и любве явление преславное.

Радуйся, светлый уме, озаренный Светом Невечерним.

Радуйся, ленящаяся на угождение Богу нравом твоим на исправление подвигнувый.

Радуйся, на путь исполнения заповедей Христовых многия наставивый.

Радуйся, Илие преподобне, теплый молитвенниче о душах наших.

Кондак 13

О предивный и пречудный отче наш Илие, прими сие с любовию приносимое тебе малое пение, и, молитвами твоими недуг душевных и телесных нас свобождая, грядущих вечных мук избави, да с тобою непрестанно воспеваем: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобному Илии Макеевскому

О священная главо, отче Илие преподобне, угодниче преизрядный Господень, теплый молитвенниче о всех, к помощи твоей с верою прибегающих, малодушных утешителю и всем, в скорбех и болезнех пребывающим, скорый помощниче и заступниче.

Помози нам, грешным и унылым, бурею сомнеНИЙ в суете житейскаго моря потопляемым, достигнути тихаго пристанища - Небеснаго Царствия.

Умоли Господа, всяческих благ Подателя, получити прощение многих наших грехов. Настави нас, многими соблазнами мира сего искушаемых, На путь смирения, терпения, чистоты духовныя и телесныя и искренней любви к Богу и ближним, да не погибнем люте без покаяния.

Святче Божий, подобне древлему пророку, тезоименитому Илии, ревностию объятый по Господе Бозе Вседержителе, даруй И нам разслабленным дух ревности ко спасению, укрепи сердца наша в правой вере, Церковь Святую сохрани от всякаго мятежа и раскола. Град твой, Отечество наше и всякую страну христианскую огради и сохрани молитвами твоими от глада, потопа, нашествия иноплеменных и междоусобныя брани; старость поддержи, юность уцеломудри, младенцы воспитай, на всякую добродетель нас грешных настави; кончину жития нашего причастну Святых Таин Христовых быти сподоби, да с верою и любовию прославим со ангельскими силами во Царствии Небеснем, идеже и ты пребываеши, Бога, в Троице славимаго Отца, и Сына, и Святаго Духа, во веки веков. Аминь.