Акафист преподобному Алексию, Карпаторусскому исповеднику

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный премудрым Промыслом Божиим быти возродителем Святыя Православныя веры / и на степень священномонаха возведенный, / в Руси Карпатстей ревностно подвизался еси в распространении веры предков наших, / Сего ради мы, позднейшая чада твоя, / от сердечныя любве к тебе зовем: / Радуйся, преподобие отче Алексие, преславный исповедниче Христов и молитвенниче о душах наших.

Икос 1

Ангельского мира и всего видимого Творец предуставивый тя быти проповедником спасительныя православныя веры среди народа нашего, мудрованием латинским плененного, но к богоугодному православно-восточному исповеданию тяготеющего, от младенческого возраста избра тя, отче Алексие, да послужиши обращению и спасению многих. Сего ради со дерзновением тебе вопием:

Радуйся, от юности Христа всем сердцем возлюбивый;

радуйся, от утра жизни твоея Тому Единому поработывай.

Радуйся, усердною молитвою дух твой окрыливый;

радуйся, во отрочестве образ жития святого показавый.

Радуйся, благочестием своим верныя возвеселяй;

радуйся, от малых лет за вся сия Богом возлюбленный.

Радуйся, преподобие отче Алексие, преславный исповедниче Христов и молитвенниче о душах наших.

Кондак 2

Видя родителя твоего на смертнем одре лежаща, телесныя и душевныя страдания его облегчал еси, блаженне, молитвою же усердною и словом его утешая, тому честь, по заповеди Господней, воздал еси. Темже и мы, тобою научаемии заповеди Божия исполняти, небесе и земли Творцу поем: Аллилуия.

Икос 2

Разум богопросвещен имее, уразумел еси, всехвальне, яко нужнейши всего есть благочестие, имже и потщался еси обогатити душу твою, в Законе Господни поучаяся. Сего ради зовем ти:

Радуйся, кроткий Иисуса последователю;

радуйся, заповедей Господних ревностный исполнителю.

Радуйся, смиренный Христов подражателю;

радуйся, иноческого равноангельского жития ревнителю.

Радуйся, ревностный благочестия защитниче;

радуйся, Православия светлый светильниче.

Радуйся, преподобие отче Алексие, преславный исповедниче Христов и молитвенниче о душах наших.

Кондак 3

Силою Вышнего наставляем, стопы твоя в Биксадскую обитель направил еси к прозорливому старцу игумену Аркадию, прося его, да наставит тя на путь добродетели. Темже, получив желаемое, воспел еси Господеви, вся во благо устрояющему, хвалебную песнь: Аллилуия.

Икос 3

Желание благое имел еси, преблаженне, девство твое сохранити и сочетатися с Церковью Православною, понести же труды и подвиги во спасение бессмертныя души своея и душ ближних твоих. Сего ради ублажаем тя и глоголем:

Радуйся, верный наставниче богомудрия;

радуйся, чистоты душевныя и телесныя хранителю.

Радуйся, проповедниче Православия дерзновенный;

радуйся, пламенною проповедию многих ко искренней вере обративый.

Радуйся, словом правды сильныя мира сего обличивый;

радуйся, яко за сие многая скорби претерпевый.

Радуйся, преподобие отче Алексие, преславный исповедниче Христов и молитвенниче о душах наших.

Кондак 4

Буря гонений и скорбен не поколеба души твоея, отче преславне, но, в истинности избранного тобою пути ко спасению себе утверждая, непрестанно воспевал еси Богу: Аллилуия.

Икос 4

Слышав сказание житий древних подвижников, како от Господа наставляеми и укрепляеми труды ко трудом прилагаху, тем подражати поревновал еси, отче преподобие, дни и нощи в молитве пребывая и на предстоящия подвиги себе уготовляя. Мы же, дивное твое подвижничество прославляюще, зовем ти таковая:

Радуйся, труды многи, истины ради, подобно апостолом подъявый;

радуйся, сего ради апостолом Православия в земли Карпатстей достойно именуемый.

Радуйся, отче благосердый, о спасении многих поревновавый;

радуйся, не своих си, но ближнего искавый.

Радуйся, непоколебимый столпе апостольских преданий;

радуйся, Христова стада добрый наставниче.

Радуйся, преподобие отче Алексие, преславный исповедниче Христов и молитвенниче о душах наших.

Кондак 5

Боготечная звезда, путеводившая иногда волхвы к Богомладенцу Христу, в Вифлееме рожденному, приведет я во святый град Иерусалим, поклонения и молитвы ради. Ты же, славя Бога за велию сию милость, воспевал еси Спасителю нашему: Аллилуия.

Икос 5

Видевше братия Афонския Пантелеимоновския обители твою святую ревность о вере истинней, давша ти икону Божией Матери «Акафистную», да будет тебе и народу твоему Заступницею и Покровительницею во всем. Сего ради зовем ти:

Радуйся, на Святую Гору Афонскую удел Божией Матери пришедый;

радуйся, братиею Пантелеимоновския обители радостно сретенный.

Радуйся, тамо ко Святей Православней Церкви приобщивыйся;

радуйся, яко сего ради желание сердца твоего исполнися.

Радуйся, яко от братии Афонския во благословение земли нашей икона Богородицы «Акафистная» даровася;

радуйся, яко с сею иконою и многими православными святынями во отечество свое возвративыйся.

Радуйся, преподобие отче Алексие, преславный исповедниче Христов и молитвенниче о душах наших.

Кондак 6

Проповедником православной веры и благочестия до скончания земного жития твоего был еси, преподобие, помощи во всем у Царицы Небесныя непрестанно прося, моляся пред чудотворною Ее иконою «Акафистною», пред нею же и мы сподобляемся воспевати: Аллилуя.

Икос 6

Возсия сугубая благодать Божия в тебе, отче Алексие, по рукоположении тя во иеромонаха для совершения Таинств церковных. Сего ради зело возрадовашеся людие земли Карпатския, зовущия ти:

Радуйся, Ангельский образ приявый;

радуйся, к Небесным Силам причтенный.

Радуйся, по приятии Ангельского образа благодати священства сподобивыйся;

радуйся, Таинств церковных совершителю благоговейный.

Радуйся, Святейшия Трапезы предстоятелю умиленный;

радуйся, за народ твой ходатаю пред Богом неустанный.

Радуйся, преподобие отче Алексие, преславный исповедниче Христов и молитвенниче о душах наших.

Кондак 7

Хотяй Преблагий Господь явити в тебе новый сосуд благодати Своея, посла тя к многострадальному народу нашему просвещения ради и освящения Таинствами церковными, ихже усердно выну совершал еси, поя Богу: Аллилуия.

Икос 7

Нового тя исповедника показа Господь Бог, егда нечестивии невинного тя связаша и ведоша во узилище. Людие же православнии, видящее сие, великия скорби исполнишася, вопиюще ти таковая:

Радуйся, за веру Христову узы и темничное заключение мужественне претерпевый;

радуйся, яко святым мучеником тем последовал еси.

Радуйся, яко исповедничеству их подражал еси;

радуйся, яко терпением твоим диавола победил еси.

Радуйся, проповедию твоею на горах Карпатских апостолу Андрею Первозванному уподобивыйся;

радуйся, святых равноапостольных Мефодия и Кирилла славный подражателю.

Радуйся, преподобие отче Алексие, преславный исповедниче Христов и молитвенниче о душах наших.

Кондак 8

Странствие земное славно прошел еси, отче преблаженне, слово истины Христовой людем возвещая и к покаянию всех призывая, да покаявшеся во гресех своих, чистым сердцем воспоют Христу Богу: Аллилуия.

Икос 8

Весь сердечною любовию к Богу и людем пламенея, не пощадил еси телесных и душевных сил твоих для проповеди слова Божия и возрождения веры православныя в народе нашем. Мы же, благодарни суще, во умилении сердца взываем ти сице:

Радуйся, преподобие отче Алексие, светильниче Православия;

радуйся, угодниче Христов, преподобия и правды исполненный.

Радуйся, к возрождению православной веры велию ревность имевый;

радуйся, к лику преподобноисповедников приобщивыйся.

Радуйся, пастырю добрый, душу свою за овцы твоя положити готовый;

радуйся, паству твою от волков лютых ограждавый.

Радуйся, преподобие отче Алексие, преславный исповедниче Христов и молитвенниче о душах наших.

Кондак 9

Всякия скорби и беды претерпел еси от нечестивых, отче многострадальне, но ничтоже возможе разлучити тя от любве Божия. Вся же напасти претерпевая благодатию Христовою, непрестанно воспевал еси Ему: Аллилуия.

Икос 9

Витии суемудренныя не могут уразумети истинности православныя веры, ниже постигнути спасающия силы ее, ибо в гордыне своей отпадоша от Единыя Святыя Соборныя и Апостольския Церкви. Мы же, яко чада Божия, научении тобою, отче Алексие, ублажаем тя приветствии сими:

Радуйся, Православия светильниче неугасаемый;

радуйся, народа нашего благодатное украшение.

Радуйся, венцем исповедническим от Христа увенчанный;

радуйся, Церковью Его славно возвеличенный.

Радуйся, преселивыйся от юдоли сия плачевныя во Иерусалим Горний – Царствие Небесное;

радуйся, яко и тело твое нетлением зде на земли прославися.

Радуйся, преподобие отче Алексие, преславный исповедниче Христов и молитвенниче о душах наших.

Кондак 10

Спасти хотяй люди от лжеучений и ересей, труды апостольския понесл еси, всюду проповедуя слово Правды Божия и всех научая православно пети Богу: Аллилуия.

Икос 10

Стеною твердою и непреоборимою был еси народу твоему, отче преподобие, непрестанно моляся ко Господу, да призрит на люди Своя и да утвердит в них веру правую. Мы же, прославляя труды и подвиги твоя, умиленно вопием ти:

Радуйся, твердое Православия утверждение;

радуйся, света Евангельского сияние.

Радуйся, правило веры и благочестия; радуйся, молитвенниче о нас пред Богом неусыпный.

Радуйся, совершенства христианского изящнейший учителю;

радуйся, во искушениих житейских всегдашний нам помощниче.

Радуйся, преподобие отче Алексие, преславный исповедниче Христов и молитвенниче о душах наших.

Кондак 11

Пение всякое побеждается звездочисленными твоими труды, отче Алексие. Кто бо от земнородных прославит многотрудное житие твое, кто возвеличит священныя подвиги твоя, смирение изрядное, молитву непрестанную, любовь нелицемерную, за ню же сподобился еси со всеми Богу угодившими воспевати вечное: Аллилуия.

Икос 11

Светозарный светильник явился еси, всеблаженне отче, разгоняя тьму неверия и озлобления в стране нашей светом веры Христовой, сего ради воспеваем ти:

Радуйся, славу мирскую, яко суетную, презревый;

радуйся, нищету духовную, Христа ради, восприемый.

Радуйся, Православия цвете прекрасный; радуйся, светлостию своею мрак душ наших осиявающий.

Радуйся, апостольского служения сопричастниче;

радуйся, ревностию о вере православней сердца наша распаляяй.

Радуйся, преподобие отче Алексие, преславный исповедниче Христов и молитвенниче о душах наших.

Кондак 12

Благодать сугубая от Господа дадеся ти, егда приближался к блаженной кончине земного жития твоего, Великий Ангельский образ прияти сподобился еси, да с лики небесными воспевати имаши Богу: Аллилуия.

Икос 12

Поюще апостольския труды и подвиги твоя, ублажаем блаженную кончину твою, величаем прославление твое в лике преподобных исповедников Христовых и, предстоя пред многоцелебными мощами твоими, духовно торжествуем, яко имамы нового молитвенника и предстателя пред Богом, вопиюще ти таковая:

Радуйся, Царствие Небесное унаследовавый;

радуйся, яко лицем к лицу славу Божию зриши.

Радуйся, всех святых сожителю;

радуйся, яко купно с ними на Небесех Бога о нас грешных умоляеши.

Радуйся, яко нетленными мощами твоими на земли чудеса являеши;

радуйся, яко благодатную помощь всем притекающим к тебе подаеши.

Радуйся, преподобие отче Алексие, преславный исповедниче Христов и молитвенниче о душах наших.

Кондак 13

О преблаженный, новопрославленный отче Алексие, Православия проповедниче и благочестия наставниче, приими от нас, грешных и недостойных, малое сие моление и испроси у Всещедрого Бога Церковь Святую укрепити и от ересей, расколов и нестроений оградити, нам же всем в истинней вере до последнего нашего издыхания пребыти, да чистым сердцем непрестанно воспеваем Спасителю нашему: Аллилуия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобному Алексию, Карпаторусскому исповеднику

О священная главо, преподобие отче наш Алексие, вемы, яко ты, предстоя Престолу Пресвятыя Троицы, велие имаше дерзновение в молитвах пред Господем. Воззри и ныне на нас, грешных и недостойных чад твоих, к тебе ныне припадающих и усердно молящихся: умоли Господа, да подаст нам решимость стяжати благочестие отцев наших, его же ты стяжал еси от юности твоея. Ты в житии твоем ревностный защититель и хранитель истинныя веры был еси, помози и нам незыблемо соблюсти веру православную. Тихая бо душа твоя зело преуспела в Божественном смиренномудрии, научи и нас разум наш питати, не многомятежной мудростию человеческой, но смиренным познанием воли Божией. Ей, угодниче Божий, не презри нас, молящихся тебе, ибо не токмо от бед и скорбей избавления просим, но силы и твердости, великодушия и любви просим, дабы без роптания переносить оныя напасти, восстающие на ны. Испроси нам и неослабное терпение даже до конца жития нашего, мир с Господом и грехов отпущение. Отче святый, укроти в стране нашей ветры неверия и смуты, да водворит Господь на земли нашей тишину, благочестие и любовь нелицемерную. Молитвами твоими да сохранит ю от междоусобныя брани, да укрепит Святую Церковь нашу Православную, да не оскудеет она истинными пастырями, добрыми делателями, право правящими слово Евангельския истины. Упаси и заблудшия овцы стада Христова, да обратятся на путь благочестия и спасения. Наипаче же моли Господа сил, да возродится земля наша святым покаянием и единым сердцем и едиными усты да прославит дивного во святых Своих Бога, в Троице славимого Отца и Сына и Святого Духа во веки веков. Аминь.