Акафист апостолу Матфею

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный от мытарства на ученичество Слову Собезначальному, боговидче Матфее всеблаженне, призвание приял еси от Всемирнаго Света, вселенныя концы просвещати и Божественное Евангелие сподобился еси написати нам во утверждение, да, внемлюще словесем благовестия твоего, прославим Всесвятаго Бога; сего ради велегласными усты приносит тебе песнь похвальную:

Радуйся, святый апостоле и евангелисте Матфее, благовестия Христова проповедниче.

Икос 1

Ангелов лик и человеческий род приносят тебе ныне хвалебное приношение, божественный апостоле, яко, смущения мятежнаго отшед, Христу последовал еси, егда возгласи тебе Господь: «По Мне гряди». И нас, немощных, утверди к Царствию Небесному, тебе вопиющих сице:

Радуйся, от мытницы Христом призванный.

Радуйся, на апостольское служение избранный.

Радуйся, богатство мира сего презревый.

Радуйся, Небеснаго сокровища стяжателю усердный.

Радуйся Евангельския истины пламенный ревнителю.

Радуйся, глаголов жизни вечныя немолчный возвестителю.

Радуйся, слова Христовы, яко сокровище, в сердце слагавый.

Радуйся, о Христе усердно благовествовавый.

Радуйся, святый апостоле и евангелисте Матфее, благовестия Христова проповедниче.

Кондак 2

Видя, богомудре, радость народа богоизбраннаго во граде твоем, егда исцели Иисус разслаблена жилами и грехов отпущение дарова тому, возжелал еси последовати Христу, от мытницы призванный, чая и своих грехов очищения, вкупе со всеми прославляя Бога, поюще Ему: Аллилуия.

Икос 2

Разум человеческий не возможет вместити радости твоея, боговидче, егда во граде Капернауме узрел еси Мессию Иисуса, призвавшаго тя от служения кесарю ко служению Богу, вместо богатства тленнаго нетленное даруя: сего ради воспеваем ти сицевая:

Радуйся, града Капернаума славное прозябение.

Радуйся, неверующих во Христа посрамление.

Радуйся, служение кесарю отложивый.

Радуйся, сердце Царю Небесному прилепивый.

Радуйся, грешным звездо просвещения.

Радуйся, кающимся верное наставление.

Радуйся, Христовою благодатию в сердце уязвленный.

Радуйся, к сонму дванадесяти апостолов сопричтенный.

Радуйся, святый апостоле и евангелисте Матфее, благовестия Христова проповедниче.

Кондак 3

Сила Вышняго положи на сердце твое, апостоле Матфее, еже прияти Христа в дому твоем со ученики Его, сего ради трапезу уготовав, призвал еси други твоя, мытари и грешники, да познают вси Истиннаго Милующаго Бога, воспевающе: Аллилуия.

Икос 3

Имуще не по разму ревность, фарисеи глаголаху учеником Христовым: «Почто с мытари и грешники Учитель ваш яст и пиет?» Не разумеваху бо сердцами их ожесточившимися, яко прииде Господь к тебе, избранне, еже призвати грешников на покаяние и милость Божию возвестити, явлышуюся во исцеление немощей наших. Сие бо и проповедал еси миру, подвизая пети тебе таковая:

Радуйся, Христа в дому твоем приявый.

Радуйся, любовь Божию себе стяжавый.

Радуйся, о благостыни Христове сладкое вещание.

Радуйся, веры святыя благоухание.

Радуйся, покаяния велегласный проповедниче.

Радуйся, Божия милости неложный провозвестниче.

Радуйся, знамения времен уразумевый.

Радуйся, неизреченных таинниче богодухновенный.

Радуйся, святый апостоле и евангелисте Матфее, благовестия Христова проповедниче.

Кондак 4

Бурю смятений зряше Христос в народе Своем, людие бо расточени бяху, яко овцы, не имущии пастыря,темже призва тя, блаженне Матфее, с прочими ученики Своими, даде власть на дусех, нечистых, изгоняти их, и исцеляти всяк недуг и всяку болезнь в людех, научающе пети всех: Аллилуия.

Икос 4

Слышав глагол Христов: «Жатва убо многа, делателей же мало», — воспылал еси ревностию яже по Бозе, боголюбче, путь твой устрояя ко овцам погибшим дому Израилева, проповедал еси покаяние, приближися бо Царство Небесное. Мы же, воспевающе труды твоя и болезни, взываем ти, сице:

Радуйся, насадителю истиннаго богопочитания.

Радуйся, образе на Христа неложнаго упования.

Радуйся, силу многу от Христа улучивый.

Радуйся, послушание Богу в себе явивый.

Радуйся, болезни именем Христовым исцеляяй.

Радуйся, всем в нуждах помощь подаваяй.

Радуйся, Истиннаго Бога служителю.

Радуйся, бесов прогонителю.

Радуйся, святый апостоле и евангелисте Матфее, благовестия Христова проповедниче.

Кондак 5

Боготечный источник был еси, Матфее апостоле, егда от Христа, Бога и Учителя твоего, приявл еси дары многи чудотворений, утверждая искрения твоя в вере в Сына Человеческаго, научающе пети Тому: Аллилуия.

Икос 5

Видевши тя людие, чудеса творяща о имени Господни, благовестителю святый, с радостию велиею приимаху в домех своих яко человека Божия, ты же, по слову Христову, приветствовал еси тех, глаголя: «Мир дому сему!». Днесь бо и нас посети целованием твоим, блаженне, тебе приносящих таковая:

Радуйся, дару Божию тезоименитый.

Радуйся, апостоле Христов великий.

Радуйся, мира Вышняго присный подателю.

Радуйся, Евангелия Христова изрядный сказателю.

Радуйся, чудотворением землю озаривый.

Радуйся, еже любити Бога верных научивый.

Радуйся, яко и дуси повиновахуся ти.

Радуйся, яко имя твое написася на Небеси.

Радуйся, святый апостоле и евангелисте Матфее, благовестия Христова проповедниче.

Кондак 6

Проповедающу Христу рече некий Ему: «Се, Мати Твоя и братия Твоя вне стоят, хотяще глаголати Тебе», Он же отвещав, рече: «Иже бо аще сотворит волю Отца Моего, той брат Мой и мати Ми есть», Возрадовался еси глаголом сим, Матфее, сродником возжелав быти Господу, разумение прияв, Божию токмо волю творити в житии своем, непрестанно воспевая: Аллилуия.

Икос 6

Возсиявый чудесы многими, Божественный Учитель наш, недоумевающу ти, апостоле, начат сказовати учеником Своим, яко подобает Ему много пострадати, и убиену бытии, и в третий день восстати. Не разумев, како будут сия, слагал еси в сердцы твоем вся словеса Господня: мы же, взирающе на чистоту веры твоея, дерзаем звати тебе таковая:

Радуйся, изъявителю мудрости Учителя Божественнаго.

Радуйся, слуго смиренный Господа.

Радуйся, Спасовых глаголов усердный хранителю.

Радуйся, таин веры богоозаренный изъяснителю.

Радуйся, имя Христово на земли возвеличивый.

Радуйся, Евангелие во вселенней утвердивый.

Радуйся, Слова Божия служителю.

Радуйся, Господу подражания учителю.

Радуйся, святый апостоле и евангелисте Матфее, благовестия Христова проповедниче..

Кондак 7

Хотя явити себе Иисус, яко Христа Божия, вседе на осля и вниде во Иерусалим; ты же, духоносне Матфее, купно со всеми резал еси ветви от древ и постилал еси по пути, взывая: «Осанна Сыну Давидову! Благословен Грядый во имя Господне! Аллилуия!»

Икос 7

Новаго таинства свидетель был еси, боголюбче, егда на Вечери хлеб преломив Иисус, рече: «Сие есть Тело Мое», — и прием чашу, даде ю, глаголя: «Сия есть Кровь Моя». Сего истиннаго Брашна и Пития истиннаго вкупе с тобою и всеми верными ученики и мы дерзающе причащатися, воспеваем ти сице:

Радуйся, Господни славы яснозрителю.

Радуйся, Иисуса, Сына Давидова, дерзновенный возвестителю.

Радуйся, Тайней Вечери Христом приобщенный.

Радуйся, Духом Божиим озаренный.

Радуйся, заповедем Божиим нас научающий.

Радуйся, ко блаженству Христову всех призывающий.

Радуйся, ко Причастию дерзающих укрепителю.

Радуйся, молитвенниче наш и покровителю.

Радуйся, святый апостоле и евангелисте Матфее, благовестия Христова проповедниче.

Кондак 8

Странно, явися тебе, богомудре Матфее, судище беззаконное, распятие, смерть и погребение Господа твоего и Учителя. Того явлены словесы и воскресение чая, мысленне взывал еси: Аллилуия.

Икос 8

Весь исполнен быв радости, всехвальне, внегда узрети ти Воскресшаго Господа твоего и поклонитися Ему, пасхальное целование дал еси апостолом, глаголя: «Воистину воскресе Христос!» Мы же, ликующе с тобою вкупе, приносим тебе таковая:

Радуйся, Господни Страсти яве изложивый.

Радуйся, цену спасения нашего открывый.

Радуйся, видением Воскресшаго почтенный.

Радуйся, в вере Богом твердо утвержденный.

Радуйся, Христова воскресения благовестителю.

Радуйся, во тьме неверия сидящих просветителю.

Радуйся, наставниче добрый, Богу благодарения.

Радуйся, святый апостоле и евангелисте Матфее, благовестия Христова проповедниче.

Кондак 9

Всякое отметая сомнение, Матфее богомудре, со апостолы стопы своя направил еси в гору, аможе повеле Иисус, и видев, поклонился еси Господу, прием убо от Него повеление: научающе, проповедати всем языком и крестяще их во имя Отца и Сына и Святаго Духа, соблюдати вся заповеди Божия, поя немолчно: Аллилуия.

Икос 9

Ветия Божественный, богогласне Матфее, видя Христа от земли на Небо восходяща, возрадовался еси, обетованию Спасову внимая: «Аз с вами есмь во вся дни, до скончания века!» Мы же, зряще в житии твоем исполнение глаголов Божиих, верно вопием сицевая:

Радуйся, сомнение о Христе поправый.

Радуйся, от Премудрости мудрость приявый.

Радуйся, во имя Святыя Троицы крестителю.

Радуйся, верный заповедей исполнителю.

Радуйся, Христу последовавый верно.

Радуйся, вознесением Господним в вере и надежде утвержденный.

Радуйся, глаголов Спасовых рачителю.

Радуйся, премудрый истины хранителю.

Радуйся, святый апостоле и евангелисте Матфее, благовестия Христова проповедниче.

Кондак 10

Спасительное Духа сияние в Сионстей горнице на тя сниде во огненне виде, боголюбче Матфее, от Негоже приял еси светлыя почести благодати, по обетованию Христову, юже раздал еси всем евангельски, мрак безбожия разоряя, научая в мире пети Богу: Аллилуия.

Икос 10

Стена и заступник явился еси Церкви Иерусалимстей, друже Христов, благовестие Господне писмены изложил еси еврейски, яко самовидец быв и слуга возсиявшаго Слова; мы же, имущее кийждо на свой язык преложшееся Евангелие, тобою написанное, воспеваем ти сице:

Радуйся, благодати Божия приятелище.

Радуйся, Духа Святаго обиталище.

Радуйся, от Господа жребий апостольства улучивый.

Радуйся, догматы Христовы в Евангелии изложивый.

Радуйся, Церковь Иерусалимскую в вере соблюдый.

Радуйся, Словом Божиим, яко манною, оную питавый.

Радуйся, Евангелия Христова усердный списателю.

Радуйся, учений Небесных благовещанный сказателю.

Радуйся, святый апостоле и евангелисте Матфее, благовестия Христова проповедниче.

Кондак 11

Пение похвальное приносит ти Христова Церковь, святый Матфее, яко язык множество богоуправлени тобою быша, егда оставив Святый град, Сирию, Мидию, Персиду, Парфию и Ефиопию, просветил еси, научая воспевати всех Единому Истинному Богу: Аллилуия.

Икос 11

Свет невещественный озари тя, апостоле, егда благолепнейшим венцем десница Вседержителева тя украси по кончине твоей мученичестей, со Ангелы ти представшу Престолу Божию. Ныне чающих предстательства твоего не остави нас, грешными усты тебе приносящих сицевая:

Радуйся, веры Христовы насадителю.

Радуйся, церквей множества зиждителю.

Радуйся, чудесы твоими идолопоклонники удививый.

Радуйся, учением твоим неверныя во истинней вере утвердивый.

Радуйся, благовестниче веры Христовы усерднейший.

Радуйся, учителю Церкви Христовы изряднейший.

Радуйся, венцем мученическим увенчанный.

Радуйся, заступниче нам Богом данный.

Радуйся, святый апостоле и евангелисте Матфее, благовестия Христова проповедниче.

Кондак 12

Благодать неистощимую яви нам Господь от мощей и святых икон твоих, богоглаголиве Матфее, некогда бо чудотворив силою Христовою, тоюжде и до днесь всем потребная подаеши, подвизая дивному во святых Своих Богу пети: Аллилуия.

Икос 12

Поюще пресветлую твою память, Матфее апостоле, приснаго твоего предстательства просим, ты бо от мытницы призванный не постыдился еси мытари и грешники призвати на пир Христов; и ныне не остави всех нас, управи к Царствию Небесному тебе приносящих таковая:

Радуйся, Евангелием Христовым нас просвещающий.

Радуйся, присное заступничество нам являющий.

Радуйся, о мытарех благоразумных присный молитвенниче.

Радуйся, образе христолюбивым златоправцем и казнохранителем.

Радуйся, яко мощи твоя исцеления источают.

Радуйся, яко от икон твоих многа чудеса бывают.

Радуйся, яко тобою вера святая прославляется.

Радуйся, яко тобою Церковь Христова дивно красуется.

Радуйся, святый апостоле и евангелисте Матфее, благовестия Христова проповедниче.

Кондак 13

О, всехвальный апостоле и евангелисте Матфее! Приими малое сие хваление наше и испроси нам у Милостиваго Спаса ревность ко исполнению Евангелия Христова, мир душевный и грехов очищение, яко да внити и нам в радость Господа нашего и Триединому Богу воспевати с тобою вкупе во Царствии Небеснем: Аллилуия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.