Акафист преподобному Филиппу Ирапскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный Господем земли Череповстей благочестия светильниче, велий подвижниче, Вседержителем прославленный, святоблаженный Филиппе, восхваляем сими песнопениями житие и труды твоя, угодниче Божий, и молим тя усердно: испроси Владыку всех кротостию и любовию исполнити сердца с верою зовущих ти:

Радуйся, преподобне Филиппе, дивный чудотворче и теплый о нас молитвенниче.

Икос 1

Ангельския чистоты измлада взыскуя, ты, чадо Феофиле, к монастырю преподобнаго Корнилия пришел еси и, вселяся близ него у христолюбива мужа Василиа, по вся дни в церкве Божией моляся Господеви и нощию же предстоя на молитве, без сна пребываше. Мы же ныне дивящеся отроческим подвигам твоим, поем ти:

Радуйся, младенцем осиревый.

Радуйся, выну в сердце Господа имевый.

Радуйся, именем Христа изыскавый препитание.

Радуйся, кротости красование.

Радуйся, юното, игралища не творивый.

Радуйся, Бога единаго возлюбивый.

Радуйся, с младых лет не ведавый иде главу подклонити.

Радуйся, в скорби научивыйся благодушествовати.

Радуйся, образе воздержания.

Радуйся, реко покаяния.

Радуйся, благовонный цвете молитвы непрестанныя.

Радуйся, храме Духа Святаго Богозданный.

Радуйся, преподобне Филиппе, дивный чудотворче и теплый о нас молитвенниче.

Кондак 2

Видевше люди веси тоя многия труды и подвиги твоя и поведаша о смиреннем отроце преподобному Корнилию, той же зря на тя прозорливыма очима и разсмотрев, яко Господь хощет сосуд избран из него сотворити, воспел Милостивому Богу: Аллилуиа.

Икос 2

Разум богопросвещенный от юности имея, ты, Феофиле, людьми к мудрому Корнилию сопривлаченный, благословение на угнеждение в монастыре у преподобнаго испроси и ста зде служити братии зело прилежно и со всяким тщанием. Мы же ныне, подражати твоему искреннему служению ближним хотяще, молим тя, святе, помози преуспети в сем, и нам, немощным, славящим тя тако:

Радуйся, бо преподобный Корнилий отверз ти неба земнаго двери.

Радуйся, пчело, сладкий мед обретшая в вере.

Радуйся, послушания рачителю.

Радуйся, по Бозе ревнителю.

Радуйся, в дванадесять лет к послушникам сопричтенный.

Радуйся, сосудохранителем три лета оглашенный.

Радуйся, древних отец подражателю.

Радуйся, теснаго пути к Царствию Небесному взыскателю.

Радуйся, послушниче люботрудный.

Радуйся, отроче богомудрый.

Радуйся, чистая росо.

Радуйся, световодящая ко Христу звездо.

Радуйся, преподобне Филиппе, дивный чудотворче и теплый о нас молитвенниче.

Кондак 3

Силою Божиею укрепляем, ты, трудниче славный, тяготы три лета послушания усердно прошед, иноческаго пострижения с наречением имени Филипп от руку преподобнаго Корнилия сподобился еси, дабы выну служити Господу и пети Ему: Аллилуиа.

Икос 3

Имеяй в сердце и уме твоем единаго Бога, ты, любоблагий Филиппе, в пятьнадесять лет иго иноческаго жития на рамена взем, дабы в монастыре с любовию и трепетом работати Господеви. Сего ради блажим тя сице:

Радуйся, из тенет суеты и прелестей мира себе изведый.

Радуйся, вся службы монастырския любочестно прошедый.

Радуйся, тезоименитый апостолу Филиппу.

Радуйся, сподвижниче в извещении слова Божия Епафродиту.

Радуйся, иноком Флавианом грамоте и вся яже ко спасению обученный.

Радуйся, мудростию от Бога одаренный.

Радуйся, Священное писание уразумевый.

Радуйся, искушения с покорностию терпевый.

Радуйся, в пещи хлеб многая лета творивый.

Радуйся, любезно для братии дрова рубивый.

Радуйся, сотницу поклон на коейждо ступени храма клавый.

Радуйся, путь покаяния избравый.

Радуйся, преподобне Филиппе, дивный чудотворче и теплый о нас молитвенниче.

Кондак 4

Бури наветов вражиих и козней бесовких избегая, непрестанно пребывал еси ты, доблий воине Христов Филиппе, в велицем воздержании и трудех, молитве и коленнопреклонении, выну воспевая Богу: Аллилуиа.

Икос 4:

Слышав и видев братия зельное подвизание и труды твоя, богомольне Филиппе, и чудишася сему, упросиша преподобнаго Корнилия поставити тя в чин священный к церкви Божией, да пасеши души их. Мы же ныне, почитая тя, пастыря добраго, молим: ко спасению настави всех, зовущих ти:

Радуйся, отрасле добрая Корнилиева корене благочестиваго.

Радуйся, смирением победивый врага льстиваго.

Радуйся, учителю веры православныя.

Радуйся, красото, Богом славная.

Радуйся, Духа Святаго хранилище.

Радуйся, Божественныя любви вместилище.

Радуйся, искусный кормчий ищущих спасения.

Радуйся, верный исполнителю Божия хотения.

Радуйся, искоренителю любочестия.

Радуйся, наставниче благочестия.

Радуйся, усердный благовестниче.

Радуйся, любви к Богу и ближним проповедниче.

Радуйся, преподобне Филиппе, дивный чудотворче и теплый о нас молитвенниче.

Кондак 5

Боготечней звезде светом благодати люди озаряющей подобен явился еси, блаженне Филиппе, в подвизех телесных и духовных непрестанно пребывая, научая всех пети Богу: Аллилуиа.

Икос 5

Видев любопочитание тя братии и улучив славу от человек, ты, смиренномудрый Филиппе, о тем оскорбися зело, бо вожделел еси не хвалы человеческия, абие возмездие от Бога, и посему восхоте из монастыря отъитти и вселитися, идеже Господь повелит. Мы же, ведяще сие, молим тя: тщеславия избави всех вопиющих ти:

Радуйся, творче молитвы непрестанный.

Радуйся, сподобленный благодати достожеланныя.

Радуйся, ленивых обличение.

Радуйся, гордынных исправление.

Радуйся, псаломниче сладковещанный.

Радуйся, иноче богозванный.

Радуйся, скромностию украшенный.

Радуйся, казателю благоумиленный.

Радуйся, добродетелей стяжателю.

Радуйся, Царства Божия неусыпаемый искателю.

Радуйся, орле, на крылех молитвы неба досязающий.

Радуйся, в сердце своем коегождо вмещающий.

Радуйся, преподобне Филиппе, дивный чудотворче и теплый о нас молитвенниче.

Кондак 6

Проповедниче истин Божиих преподобный Корнилий прошению твоему об оставлении монастыря вняв, тя благослови и отпусти с миром. Ты же прилежно с молитвою к Пречистей Деве припав и услышав глас Ея о уготованном ти месте для спасения, благодарственно воспел еси Господу: Аллилуиа.

Икос 6

Возсия нощию, яко заря пресветлая, свет в оконце келлии твоея, любобожественный Филиппе, южную страну озаривый, место подвигам твоим указа. Заутра же гласу Божию изыти из монастыря вняв, оттамо ты исшел еси и к Кубенскому езеру притекл еси, безмолвия взыскав. Сего ради ныне, хваляще тя, со умилением поем ти:

Радуйся, канона в честь Одигитрии нощный демественниче.

Радуйся, взыскавый Бога неутружденный шественниче.

Радуйся, все упование на Бога возложивый.

Радуйся, щитом веры себе оградивый.

Радуйся, сподобленный Божественнаго гласа.

Радуйся, моливый Господа в монастыре Всемилостиваго Спаса.

Радуйся, от угождения плоти бежавый.

Радуйся, спасения всем желавый.

Радуйся, мрежею сребролюбия неуловленный.

Радуйся, столпе Церкве, на краеугольном камене утвержденный.

Радуйся, явление Божия благоволения.

Радуйся, человеков удивление.

Радуйся, преподобне Филиппе, дивный чудотворче и теплый о нас молитвенниче.

Кондак 7

Хотя волю Господню исполнити, ты тяготы пути в поисках тихаго места для уединеннаго жительства мужественно терпел еси, соделав Бога твоим водителем и наставником, воспевая Ему сердцем и усты: Аллилуиа.

Икос 7

Новое место для иноческих подвигов на брезе реки Андоги обрел еси ты, Богоделателю Филиппе, зде во сне явления ангела Господня сподобленный. Яко зде молился еси Господу о спасении души своея, тако ныне молися и о нас, славящих тя сице:

Радуйся, с князем Андреем Шелешпанским место подвигов обсудивый.

Радуйся, от реки Андоги до Малого Ирапа земли улучивый.

Радуйся, ископавый вокруг места того ров.

Радуйся, бо Божией Матери храняше тя покров.

Радуйся, вертеп соучинивый.

Радуйся, келлию на брезе урубивый.

Радуйся, славословия непрестанно Богу возносивый.

Радуйся, Иисуса Сладчайшаго в сердце носивый.

Радуйся, мировати приглашавый.

Радуйся, любити и чести родителей взывавый.

Радуйся, недугов врачу чудный.

Радуйся, совершивый на земли путь многотрудный.

Радуйся, преподобне Филиппе, дивный чудотворче и теплый о нас молитвенниче.

Кондак 8

Странное чудо Господь яви миру, ограждая тя, угодника Своего, от зла, егда хотящаго изгнати тя князя Иоанна конь преогорчив, чрез ручей не броди и на землю его сброси, той же о камень ударився, умре. Мы же в сем попечение Божие о тебе зряще, поем Царю Небесному: Аллилуиа.

Икос 8

Всю землю между источники Ирапы, Большым и Малым, по прошению твоему князь Андрей, велию веру имея к тебе, святе, даде, и поставил еси зде часовню, послежде и храм во имя Святыя Троицы, дабы Господеви пение и молитвы деннонощно приносити. Помози же верно работати Богу и нам, зовущим ти:

Радуйся, основателю Красноборскаго монастыря.

Радуйся, сподвижниче Первопастыря.

Радуйся, Живоначальныя Троицы служителю.

Радуйся, богомольный пустынножителю.

Радуйся, любовь имети друг ко другу призывавый.

Радуйся, Бога познавый.

Радуйся, нищим благопоспешати просивый.

Радуйся, житие мучениц в наставу сопривлачивый.

Радуйся, приуказе трезвения.

Радуйся, живоначалие нашего к тебе благоговения.

Радуйся, лиро любве благогласная.

Радуйся, Андоги звездо красная.

Радуйся, преподобне Филиппе, дивный чудотворче и теплый о нас молитвенниче.

Кондак 9

Всякому за помощью к тебе, преподобне Филиппе, притекающему, яко чадолюбивый отец и богомудрый наставник явился еси, тако ныне не остави молитвами твоими и нас, поющих Богу: Аллилуиа.

Икос 9

Ветии многовещаннии не возмогут изрещи твоих благодеяний множество, святе Филиппе, кои в земле Череповстей ты сотворил еси, многия люди ради пользы душевныя принимая и на путь спасения управляя. Вразуми ныне и нас, приносящих ти сии похвальныя словесы:

Радуйся, Слова Божия многоразумный сеятелю.

Радуйся, Богом насажденнаго винограда искусный делателю.

Радуйся, с любовью коегождо учивый.

Радуйся, соблюдение своих помышлений всем наручивый.

Радуйся, поучатися о присносущнем житии наказавый.

Радуйся, яко ратитися в духовней брани казавый.

Радуйся, благохитростный священнослове.

Радуйся, горевый сердцем богослове.

Радуйся, иноков укрепление.

Радуйся, подвизающимся заступление.

Радуйся, пустынниче крепкодушный.

Радуйся, Господу послушный.

Радуйся, преподобне Филиппе, дивный чудотворче и теплый о нас молитвенниче.

Кондак 10

Спасения всех желая, отче Филиппе, люди в вере непрестанно наставлял еси и тайныя брани невидимыя учил еси, образом добродетельнаго жития твоего назидая, да выну воспеваем Богу: Аллилуиа.

Икос 10

Стеною заступления от козней бесовских явися молитва твоя, преподобне Филиппе, коей, яко мечем разил еси лукавых супостат. Противу же злых людей облеклся еси ты в броню незлобия и терпения, моляся за досадителей, да простит их Господь. Тако в мире и единомыслии жити друг с другом помози и нам, зовущим ти:

Радуйся, подвиги твоими люди удививый.

Радуйся, покаянием ризу души убеливый.

Радуйся, ратниче доброхрабрый в духовней сече.

Радуйся, любви неугасимая свеще.

Радуйся, пятьнадесять лет в Ирапстей пустыни особне живый.

Радуйся, выну молитву Иисусову творивый.

Радуйся, напастьми искушенный.

Радуйся, песнословче Бога бденный.

Радуйся, крестным знамением и молитвою нечистых духов победивый.

Радуйся, молитися за врагов учивый.

Радуйся, изрядный постниче.

Радуйся, богоблагодатный безмолвниче.

Радуйся, преподобне Филиппе, дивный чудотворче и теплый о нас молитвенниче.

Кондак 11

Пение всеумиленное Пресвятей Троице ты выну приносил еси, святе Филиппе, руце к небу воздевая, кои, како рече Мелетий, светистеся яко огненныя свещи, егда тя в окне в нощи узре, иде ты на коленех у церкви стоя, воспевая сердцем Богу: Аллилуиа.

Икос 11

Светозарным светильником явися богоугодное житие твое, преподобне Филиппе, яко лучами солнечными земли российския осияв. Тожде по блаженней кончине осветися изрядным светом лице твое, истинным сосудом благодати Божией тя показав. Ныне же пред престолом Всевышняго предстоя, моли прилежно о воспевающих тя тако:

Радуйся, велий подвигами во славу Пресвятыя Троицы.

Радуйся, Христу служивый под омофором Богородицы.

Радуйся, словами «терпи, вмужайся и крепися» себе благодерзавый.

Радуйся, списателя жития твоего инока Германа вкупе подвизатися приявый.

Радуйся, по успении источником дивнаго благоухания ставый.

Радуйся, раздрешную от священноинока Иова приявый.

Радуйся, иноки с псалмопениями погребенный.

Радуйся, в основанном монастыре упокоенный.

Радуйся, скорбящих утешение.

Радуйся, страстей потопление.

Радуйся, смирением богатный.

Радуйся, отче благоподатный.

Радуйся, преподобне Филиппе, дивный чудотворче и теплый о нас молитвенниче.

Кондак 12

Благодать велию дарова Господь ти, преподобне Филиппе, коею ты совершал еси в земней жизни и твориши ныне многая исцеления и чудесы. Тем же и нас от недуг душевных и телесных исцели, да здравии духом поем Богу: Аллилуиа.

Икос 12

Поюще Всеблагаго Бога, даровавшего нам таковаго заступника, яко ты, любосмиренный Филиппе, хвалим тя, отче, многия подвиги во славу Господню совершившаго и дара чудотворения сподобленнаго, и чтим тя, честно глаголя ти сице:

Радуйся, исцелений неоскудеваемый источниче.

Радуйся, страждущих скорый помощниче.

Радуйся, иступившаго ума Власа изврачевавый.

Радуйся, зрение слепому Тимофею даровавый.

Радуйся, ногу пономаря Илариона целивый.

Радуйся, к беснующейся Екатерине по воде с крестом ходивый.

Радуйся, дьячка Матфея смерти избавивый.

Радуйся, разслабленнаго Иоанна на нозе поставивый.

Радуйся, Феодосия в сонномечтании причастив, здравие возвративый.

Радуйся, явлением старцу во сне урубити Казанскую церковь предложивый.

Радуйся, студенец неисчерпаемый чудотворений.

Радуйся, огненниче, исполненный елея благотворений.

Радуйся, преподобне Филиппе, дивный чудотворче и теплый о нас молитвенниче.

Кондак 13

О предивный угодниче Христов, преподобне и богоносне отче наш Филиппе! Приими сие малое моление наше и у Всемилостиваго Бога испроси нам грехов оставление, жития исправление, крепости веры, любви сердцу, смирения уму и вся, яже ко спасению полезная, да твоими молитвами соблюдаеми, Царствия Небеснаго сподобимся, и тамо с тобою воспоем Спасу нашему: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.