Акафист преподобному Никандру Городноезерскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранному подвижнику и дивному пред Богом предстателю, мир прелестный и плотския страсти возненавидевшему, в пустыне же псаломски Богу взыскавшему, богоносному отцу нашему Никандру составим похвалы, ты же яко имея дерзновение ко Господу, молися Ему о спасении нас грешных, да зовем ти тако:

Радуйся, преподобне отче Никандре, Городноезерский чудотворче.

Икос 1

Ангелом, славящим непрестанно на небе Бога, уподобился на земле, блаженне Никандре, путь широкий, ведущий в пагубу, презрел еси, идеже и ныне ликуя, от нас недостойных прими похвалы таковая:

Радуйся, благочестивых родителей пречестное порождение; радуйся, края нашего святое прозябение.

Радуйся, от юности чистоту телесную и душевную хранивый; радуйся, постом и молитвою плоть свою удручивый.

Радуйся, тесноту и скорбь иноческаго жития избравый; радуйся, вместо тленных нетленныя стяжавый.

Радуйся, светлость чина купеческаго Христа ради презревый; радуйся, служити Богу единому восхотевый.

Радуйся, преподобне отче Никандре, Городноезерский чудотворче.

Кондак 2

Видя родителие твоя, преподобне, яко точию благочестие на все полезно, имеяй обетование нынешняго и грядушаго жития, тщашеся тя воспитати в страсе Божием и Церкви Святей в послушании, в нем же и пребыл еси до скончания жития, вопияше Богу: Аллилуия.

Икос 2

Разумеша от юности, преподобне Никандре, яко мира красная ни во что же вменяются, куплями к тому житейскими не обязался еси, обаче духом влеком в пустыню, остави родители и отечество свое, во еже единому Христу поработати, сего ради вопием ти:

Радуйся, водительству мудрости небесныя всего себе предавый; радуйся, всякое плотское мудрование от себе отринувый.

Радуйся, богатство земное ни во что же вменивый; радуйся, страх Божий в сердце твоем крепко насадивый.

Радуйся, блаженный Христов последователю; радуйся, заповедей Его преискренний любителю.

Радуйся, мудрый купче Царствия Небеснаго;

Радуйся, верный рабе, данный тебе талант употребивый уместно.

Радуйся, преподобне отче Никандре, Городноезерский чудотворче.

Кондак 3

Силою Господа, умудряющаго во спасение, просвещенный, в места блáтные и непроходимые пришел еси, и гору высоку, яко место богоизбранна твоего пустынножительства обрел еси, в ней же пещеру ископав, вселися еси в ту, присно поя Богу: Аллилуия.

Икос 3

Имый едино попечение, преподобне отче, како спастися и благоугодити Христу, великия подвиги и труды пустынныя благодушно проходил еси, знáмением Креста Христова враги невидимыя прогоняя и побеждая, во еже не можаху им приближитися к тебе, сего ради сретаем тя приветствиями сими:

Радуйся, в пустыню от суеты земной сокрывыйся; радуйся, в дебри непроходимыя удаливыйся.

Радуйся, высоких подвигов жития христианскаго ревнителю; радуйся, молчания изрядный хранителю.

Радуйся, неизменное правило поста и покаяния, радуйся, хранителю непрестаннаго воздержания.

Радуйся, человече Божий, преподобием украшенный, радуйся, воине Христов непобежденный.

Радуйся, преподобне отче Никандре, Городноезерский чудотворче.

Кондак 4

Бурю многомятёжную житейскаго моря безбедно прошел еси, преподобне, и в пристань безстрастия достигл еси, окормляемь заповедями Христа Бога, место же безвестное очистил и освятил молитвами своими, на нем же деннонощно возносил еси хвалы Богу и пел еси Ему во умилении глубоцем: Аллилуия.

Икос 4

Слышавши мнози о богоугодном житии твоем, отче Никандре, прихождаху к тебе, овии послушать поучений твоих душеполезных, овии же сожительствовати тебе в пещере твоей пустынней, их же ты с отеческою любовию приемля, руководствовал еси стезею правою ко спасению, яко всем звати тебе:

Радуйся, правило веры истинное; радуйся, образе кротости духовныя.

Радуйся, страждующим тепле сострадавый; радуйся, всех любовию своей согревавый.

Радуйся, сердец окаменелых умягчителю; радуйся, совести к покаянию возбудителю.

Радуйся, на Христа единаго присно взиравый; радуйся, заповеди Его пред собою присно имевый.

Радуйся, преподобне отче Никандре, Городноезерский чудотворче.

Кондак 5

Боготечное светило быв, всех к солнцу правды Христу путеводил еси, угодниче Божий, словом и примером жития твоего святаго, еже все посвящено бысть на служение Богу и ближним твоим, непрестанно воспевая Богу: Аллилуия.

Икос 5

Видев Всевидец Господь благое души твоей изволение, отче Никандре, во еже устроити обитель монашескую, указа тебе место удобно и красно на берегу езера Городно, да вселишеся тамо, во еже работати единому Богу, сего ради взываем ти сице:

Радуйся, обители пустынной основателю;

Радуйся, иночества в пределах новгородских распостранителю.

Радуйся, мудрый странниче, иский отечества горняго; радуйся, Божий избранниче, презревый вся красоты мира дольнего.

Радуйся, место пусто в вертоград Христов преобразивый; радуйся, благочестно на нем поживый.

Радуйся, с посохом странническим на езеро Городно пришедый; радуйся, второе отечество на нем обретый.

Радуйся, преподобне отче Никандре, Городноезерский чудотворче.

Кондак 6

Проповедник послушания истиннаго явился еси, отче Никандре, разумев место от Бога тебе указанное к возграждению обители иноческой и возлюбив е, со слезами теплыми молился Богу, да сподобит тя скончати на нем житие твое земное и псаломски взывал еси: се покой мой, зде вселюся во веки, мы же воспоминающе таковое твое благое изволение, вопием Богу: Аллилуия.

Икос 6

Возсия благодать велия в подвизе многотруднаго жития твоего, преподобне Никандре, Господом укрепляем, труды великия подъял еси при создании обители твоея пустынней, древеса секий и здания обители сооружаяй руками своими, присно моляся ко Господу, да благословит дело рук твоих во славу имени Его святаго, сего ради вопием ти сице:

Радуйся, здателю мудрый; радуйся, домостроителю верный.

Радуйся, несомненною надеждою на Бога обитель твою создавый; радуйся, слезами молитвенными основание ся оросивый.

Радуйся, всем сердцем Господа возлюбивый; радуйся, во имя Воскресения Его храм во обители соорудивый.

Радуйся, при устройстве храма земнаго о Храме Небесноем помышлявый;

Радуйся, по отшествии ко Господу в Него вселивыйся.

Ралуйся, преподобне отче Никандре, Городноезерский чудотворче.

Кондак 7

Хотя добре соблюсти вверенную ти от Бога паству, заповедал еси в храме и трапезе молчание, в келии молитвенное пребывание, чистоты и целомудрия хранение, всякаго мудрования отсечение, всех обетов Иноческих хранение, во еже рещи на Страшнем Судищи Христове: се аз и дети яже ми еси дал, и воспевати с ними вкупе: Аллилуия.

Икос 7

Дивныя и доблестныя подвиги твоя восхваляем, преподобне отче наш Никандре, труды ко трудом прилагая, удручил еси плоть свою постом, бдением, коленопреклонением, долу леганием и молитвами непрестанными, шествуя по пути спасения до маститыя старости, тем же чтим тя глаголюще:

Радуйся, устава добраго общежития насадителю; радуйся, присный его охранителю.

Радуйся, в терпении спасение души своей искавый; радуйся, себе и весь живот свой Господеви предавый.

Радуйся, общими трудами помыслов праздных шатания упразднивый;

Радуйся, теми яко бронею, страстей разженных стрелы отразивый.

Радуйся, слезы теплыя благодарения и хваления пред Богом изливавый;

Радуйся, к подвигом высоким ученики твоя побуждавый.

Радуйся, преподобне отче Никандре, Городноезерский чудотворче.

Кондак 8

Странное бысть видение, приходящим в обитель твою святую, преподобне Никандре, видя бо тя, начальника обители, в худыя и многошвейныя ризы одеяннаго и труждающегося в работах монастырских наравне с братией, никогда бо празден был еси: овогда же на саждение и сеяние снеди землю копал еси, овогда же дрова секий, овогда же рыбу удил на пропитание братии, выну сладце Христу поя: Аллилуия.

Икос 8

Весь был предан еси на служение Богу, людям такожде служа непрестанно, обоя заповеди сочетая, всем был утешитель благодатный, тугу сердечную страждущих словесы: и молитвами прогоняя, во уповании на помощь Всевышняго тех укрепляя, во еже их звати тебе:

Радуйся, роду христианскому присный утешителю; радуйся, коемуждо во благо усердный служителю.

Радуйся, болящих и немощных успокоителю; радуйся, утесняемых заступителю.

Радуйся, гладныя питавый; радуйся, должников искупавый.

Радуйся, ленивых к подвигом возбудителю; радуйся, исправления грешников поручителю.

Радуйся, преподобне отче Никандре, Городноезерский чудотворче.

Кондак 9

Всего себе принесл еси в жертву Богови угодную, многия труды, скорби и печали понесл еси устрояя обитель и служа братии, умертвляя страсти и сокрушая наветы миродержителя тьмы века сего, тем же к небесным сопричислен еси силам, купно с ними воспевающе Богу: Аллилуия.

Икос 9

Витий многовещанныя не возмогут изрещи вся подвиги и чудеса твоя, преподобне Никандре, ибо доброта жития твоего воистину превосходит похвалу человеческую, мы же любовию к тебе побеждаеми дерзаем благохвалити тя тако:

Радуйся, всякое сладострастие в себе искоренивый; радуйся, плоть твою духу любовию покоривый.

Радуйся, Царствие Божие внутрь себя восхитивый; радуйся, в бренном телеси райскую сладость вкусивый.

Радуйся, внутреннею красотою Креста Христова восхищенный; радуйся, силою свыше на труд крестоношения облеченный.

Радуйся, волею твердою воли своей отрекийся; радуйся, отсечением страстей угодивый Богу и спасыйся.

Радуйся, преподобне отче Никандре, Городноезерский чудотворче.

Кондак 10

Спасения подвиг добре совершив, жития же сего временнаго отрешаяся и отходя к животу вечному и блаженному, преподобне Никандре, со слезами увещал еси ученики твоя верно заповеди Христовы хранити, наипаче любовь имети между собою и ничтоже предпочитати паче любви Христовой, да воспоют с тобою на небеси хвалебную песнь: Аллилуия.

Икос 10

Царя Небеснаго Христа верный рабе и угодник был еси, и кончину преподобную яко венец подвигом твоим получил еси, неболезненно и мирно прошед от земных обителей к Небесным, идеже святая твоя душа, воздаяния прият от руки Вседержителя Бога, и со всеми святыми предстоит Престолу его Божественному, сего ради ублажаем тя званиями сими:

Радуйся, от младых ногтей до престарения всю жизнь твою Богу, посвятивый; радуйся, свято и праведно на земли поживый.

Радуйся, многоскорбное твое течение благочестно скончавый;

Радуйся, Крест Христов, яко оружие непобедимое, спутника себе стяжавый.

Радуйся, путь спасения ясно познавый; радуйся, житием твоим путь сей нам указавый.

Радуйся, в жизни присно о смерти помышлявый радуйся, любовь к Богу с любовью к ближнему сочетаый!

Радуйся, преподобне отче Никандре, Городноезерский чудотворче.

Кондак 11

Пение погребальное слезами растворяшеся у гроба твоего, блаженне Никандре, ученицы твоя плакаху, яко о любимом отце своем и учителе, но скорбь их в радость претворяшеся, егда зряху лице твое, светом невечерним осиянное и лику ангела подобное, и рыдания их прерываху умиленная песнь к Богу: Аллилуия.

Икос 12

Светоподательный светильник Божия благодати воистину явился еси и по смерти, преподобне Никандре, яко всем притекающим ко гробу твоему и помощи просящим был еси заступник и утешитель благодатный,

тем во умилении зовем ти:

Радуйся, от горних высот к земнородным милостиво приникаяй;

Радуйся, не точию невидимо, но видимо верныя посещаяй.

Радуйся, обитель твою и по смерти молитвенно назиравый;

Радуйся, от гроба святаго исцеления болящим подававый.

Радуйся, земныя скорби и нужды наша призираяй; радуйся, к молитвам скоро слух свой приклоняяй.

Радуйся, враждующих скорое умирение; радуйся, любящих и чтущих тя ходатаю спасения.

Радуйся, преподобне отче Никандре, Городноезерский чудотворче.

Кондак 12

Благодать неистощимую и знамение чудес непререкаемое яви нам Христос Бог в нетлении мощей твоих, яже по трехсот восьмидесяти девяти летех, яко сокровище драгоценное из недр земных обретены быша целы и нерушимы, и в храме Божием положенны, во еже всем зрящим сия прославляти Творца чудес Бога:

Аллилуия.

Икос 12

Поюще святое и равноангельное житие твое, отче Никандре, смиренно просим тя, небеснаго заступника нашего: в час грозный смертный, егда убогая душа наша к исходу своему приближится, покажи нам многомощное твое заступление и избави нас предстательством твоим от власти сил темных, обыкших преграждати душе человечестей восход в Горняя Обители, идеже достигнути сподоби нас молитвами твоими, да зовем ти таковая:

Радуйся, земли новгородской Богом дарованный заступниче;

Радуйся, чтущих тя благодатный наставниче.

Радуйся, кроткий и незлобивый Христов последователю;

Радуйся, Евангельскаго по Бозе жития ревнителю.

Радуйся, яко мощей твоих демоны трепещут;

Радуйся, яко молитвы твоя всю их силу, аки паучину сокрушают.

Радуйся, мудрость духовную стяжавый;

Радуйся, смерть вкусивый, тления же не познавый.

Радуйся, преподобне отче Никандре, Городноезерский чудотворче.

Кондак 13

О преподобне и богоносне отче наш Никандре, ты горе на Небеси, мы долу на земли, удаленнии от тебе не толико местом, колико грехами нашими, не отрини нас немощных, совершающих похвальное пение сие, и научи волю Божию невозбранно творити, и да сподобимся с тобою в будущем веце воспети Богу Спасителю нашему благодарную песнь: Аллилуия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О преподобный и богоносный отче наш Никандре, земный ангеле и небесный человече, слава и украшение земли новгородской и всего православнаго Отечества нашего. К тебе припадаем и умиленно просим тя яви нам, смиренным, любовь твою отеческую и многомощное твое заступление, се бо грех ради наших не дерзаем со свободою чад Божиих просити Господа и Владыку нашего о спасении нас грешных, но тебе молитвенника к нему благоприятна предлагаем, яко вся благая можеши испросити у Благости Его, аще токмо восхощеши. Испроси убо нам недостойным, угодниче Божий, веру праву, благочестие непоколебимое, любовь нелицемерную, покаяние совершенное и жития исправление решительное. Ей, святче Божий, ты веси немощь естества нашего и тяжесть и скорбь времен настоящих: моли убо выну, да николиже нас оставляет Его неизреченное милосердие, но да хранит от всех сетей вражиих. Да приимем от Господа Бога тобою и вся потребное к жизни временней, освобождение от бед и напастей, терпение до конца, и да сподобимся непостыдной и мирной кончины жития нашего достигнути и наследовати Царство Небесное. Наипаче же моли примилосерднаго Бога: Церковь же Свою Святую да утвердит и укрепит, и все наше православное Отечество в мире, тишине, в любви, единомыслии, во правоверии и благочестии да сохранит и соблюдёт, да выну прославляем Отца и Сына и Святаго Духа и твое милостивое предстательство во веки веков. Аминь.