Акафист преподобному Арсению Каппадокийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1

Я́ко воздержа́нием пожи́в богоуго́дно/ святы́х сподо́бился еси́ све́тлости/ и венце́м нетле́ния укра́сился еси́,/ но моли́ся ко Го́споду, мо́лимся,/ изба́витися от озлобле́ния и печа́лей вопию́щих ти:// ра́дуйся, о́тче Арсе́ние.

И́кос 1

Челове́к преподо́бномудр показа́лся еси́ в мíре, Арсе́ние, преподо́бных приложе́ние, и а́нгельским житие́м твои́м Уте́шителя прия́л еси́ сия́ние, и́мже просвеща́еши вся вопию́щия ти такова́я:

Ра́дуйся, но́вый в преподо́бных.

Ра́дуйся, ра́вный во святы́х.

Ра́дуйся, Арсе́нию Вели́кому соиме́нне.

Ра́дуйся, отце́в дре́вних единонра́вне.

Ра́дуйся, у́ме чисте́йший, испо́лненный Бо́жиего светосия́тельства.

Ра́дуйся, пото́че проза́рнейший дарова́ний Бо́жиих.

Ра́дуйся, я́ко ны́не по́стничеством сия́еши.

Ра́дуйся, я́ко во всем небому́др яви́лся еси́.

Ра́дуйся, звездо́ но́вая Благода́ти.

Ра́дуйся, ви́хре бу́рный на искуси́теля.

Ра́дуйся, и́мже сокрове́нная явля́ется.

Ра́дуйся, и́мже Це́рковь ликовству́ет.

Ра́дуйся, о́тче Арсе́ние.

Конда́к 2

Жития́ тле́ннаго презре́в все держа́ние, уразуме́л еси́ Го́споду раб бы́ти, и житие́м чи́стым после́довал еси́ Того́ за́поведе́м, Арсе́ние блаже́нне, Ему́же и благогове́йно вопия́л еси́: Аллилу́иа.

И́кос 2

Порожде́ние Каппадо́кии благосла́вное яви́лся еси́, роди́вся от благочестна́го ко́рене, и вся Христу́ возложи́в, прия́л еси́ от Него́ Благода́ть небе́сную, е́юже наказу́еши, свя́те, благогове́йно ти вопию́щия:

Ра́дуйся, цве́те Каппадоки́йский.

Ра́дуйся, сосу́де безсме́ртия.

Ра́дуйся любве́ Христо́вы сокро́вище.

Ра́дуйся, пре́лести вра́жия низверже́ние.

Ра́дуйся, основа́ние новоутвержде́нное Це́ркве Христо́вы.

Ра́дуйся, дарова́ние и утвержде́ние богому́драго наро́да.

Ра́дуйся, я́ко избавля́еши от держа́вы Велиа́ровой.

Ра́дуйся, я́ко подае́ши правосла́вным сла́ву.

Ра́дуйся, вра́жия стре́лы сокруши́вый.

Ра́дуйся, ве́рным подая́й боже́ственная.

Ра́дуйся душ поля́ оземлени́вый.

Ра́дуйся, страсте́й ко́рни отсека́яй.

Ра́дуйся, о́тче Арсе́ние.

Конда́к 3

Си́лу небе́сную прия́в, я́ко прия́л еси, свя́те Арсе́ние, святу́ю схи́му, совле́клся еси́ горя́щею душе́ю к бо́льшим труда́м, о́тче, и по́двигам, Христо́вою бо любо́вию восперя́емь вопия́л еси́: Аллилу́иа.

И́кос 3

Име́я в душе́ свое́й о́гнь боже́ствен, всеблаже́нне, попали́л еси́ страсте́й те́рния, и свяще́нства оде́жду, я́ко чист се́рдцем оде́ялся еси́, преподо́бно подвиза́лся бо еси́, от вся́каго слы́ша сия́:

Ра́дуйся, боже́ственный уго́дниче Бо́жий.

Ра́дуйся, похвало́ всех ве́рных.

Ра́дуйся, мона́шествующих сия́ние новосве́тлое.

Ра́дуйся, иере́ев пра́вило Богода́нное.

Ра́дуйся, розго́ сладкопло́дная виногра́да жи́зни.

Ра́дуйся, дре́во плодови́тое свяще́ннаго жития.

Ра́дуйся, я́ко проше́л еси́ в по́стничестве житие́.

Ра́дуйся, я́ко презре́л еси́ земны́х гла́дкое.

Ра́дуйся, Христо́ву ме́ртвость возлюби́вый.

Ра́дуйся, све́та испо́лненный прича́стия.

Ра́дуйся, жи́зни рачи́телю безсме́ртныя.

Ра́дуйся, сла́дости о́бщниче нетле́нныя.

Ра́дуйся, о́тче Арсе́ние.

Кондак 4

Ревни́тель о всех дре́вних отце́в быв в после́дняя времена́, подража́л еси́ сих житию́ и сла́вы равноси́лен был еси́, Арсе́ние Богоприя́тне, с ни́миже Христу́ вопие́ши: Аллилу́иа.

И́кос 4

Свято́е житие́ твое́ оте́честву кро́вному сия́ет досто́йно, Богоно́се, и детово́дствует по Христу́ боже́ственною зна́менаныя кро́вию, я́ко к Боже́ственному проро́ку бо прихожда́ху, вопию́ще:

Ра́дуйся, устне́ благоче́стия.

Ра́дуйся, разруше́ние беззако́ния.

Ра́дуйся, строи́телю душ действи́тельный.

Ра́дуйся, проро́че боже́ственных Богоприя́тный.

Ра́дуйся, свети́льниче дальнесия́тельный доброде́тельнаго руково́дства.

Ра́дуйся, язы́че Богому́дрый уче́ний жи́зни.

Ра́дуйся, я́ко прия́л еси́ Ду́ха благода́ть.

Ра́дуйся, я́ко посрамля́еши богопроти́вную пре́лесть.

Ра́дуйся, язв душе́вных очисти́телю.

Ра́дуйся, страсте́й разруша́яй жа́ла.

Ра́дуйся, и́мже ве́рнии веду́тся.

Ра́дуйся, и́мже благочести́вии све́том озаря́ются.

Ра́дуйся, о́тче Арсе́ние.

Конда́к 5

Чудесы́ жи́знь твою́, Влады́ка вся́ческих просла́ви, Арсе́ние о́тче, жив бо мно́жайшим благоде́тельствуеши, и мертв боже́ственными твои́ми моща́ми подае́ши благода́ть незави́стную благогове́йно Бо́гу вопию́щим: Аллилу́иа.

И́кос 5

Иере́й Богоно́сен, я́ко досто́ин сосу́д и друг Спа́сов яви́лся еси́, и непоро́чно свяще́нноде́йствуя, испо́лнился еси́ небе́снаго сия́ния, к лу́чшим направля́я вопию́щих ти такова́я:

Ра́дуйся, от Восто́ка боже́ственное сия́ние.

Ра́дуйся, святы́х прия́вый воздая́ние.

Ра́дуйся, та́ин боже́ственных служи́телю.

Ра́дуйся, правосла́вных догма́тов наста́вниче.

Ра́дуйся, я́ко свяще́нствовавый я́коже А́нгел Христу́.

Ра́дуйся, я́ко вся своя́ Тому́ возложи́л еси́.

Ра́дуйся, [от] земны́х богоно́сно удали́выйся.

Ра́дуйся, небе́сных осия́ньми обогати́выйся.

Ра́дуйся, све́та Боже́ственнаго селе́ние.

Ра́дуйся, жития́ свята́го сокро́вище.

Ра́дуйся, врачу́ неисце́льных.

Ра́дуйся, ви́хре ду́хов нечи́стых.

Ра́дуйся, о́тче Арсе́ние.

Конда́к 6

Пропове́дники чуде́с твои́х мно́их, всеблаже́нне, показа́шася в уде́ле восто́чнем, и́же твои́х улучи́вше даро́в, ны́не же от всечестны́х моще́й твои́х благода́ть при́сно точа́щую пропове́дуем, о́тче, вопию́ще: Аллилу́иа.

Икос 6

Возсия́л еси́ на восто́це, я́ко звезда́ у́тренняя, Арсе́ние, жи́тельством свои́м, освети́в ны́не нас положе́нием боже́ственных моще́й твои́х, [и] страсте́й свобожда́я омраче́ния от ве́рно ти вопию́щих:

Ра́дуйся, сла́вою обогати́выйся боже́ственною.

Ра́дуйся, обрати́вый в бе́гство вра́жие неи́стовство.

Ра́дуйся, действи́тельнаго жи́тельства тяжа́ние.

Ра́дуйся, Боже́ственнаго промышле́ния избра́ние.

Ра́дуйся, сто́лпе Богообра́зный зако́на духо́внаго.

Ра́дуйся, орга́не богодохнове́нный А́нгельскаго жития́.

Ра́дуйся, я́ко подае́ши ве́рным боже́ственныя дая́ния.

Ра́дуйся, я́ко веща́еши Бо́жия возноше́ния.

Ра́дуйся, пра́вило преподо́бнаго по́стничества.

Ра́дуйся, свеще́ свята́го мудрова́ния.

Ра́дуйся, душе́вную очища́яй скве́рну.

Ра́дуйся, нас направля́яй к лу́чшим.

Ра́дуйся, о́тче, Арсе́ние.

Конда́к 7

Еди́наго от се́рдца Христа́ возлюби́в, стопа́ми Того́ ше́ствовал еси́, и в смире́нии житие́ и нестяжа́нии соверши́в, преподо́бне, возне́слся еси́ Ду́хом Боже́ственным и Бо́гови совокупи́лся еси́, поя́: Аллилу́иа.

И́кос 7

Но́вая звезда́ яви́лся еси́ Це́ркви Христо́вой, Арсе́ние, преподо́бно пожи́в, и чудесы́ все́м помога́еши прибега́ющим боже́ственным моща́м твои́м, святы́ню [бо] и исцеле́ние подаю́т вопию́щим:

Ра́дуйся, Христо́ву любо́вь проявля́яй.

Ра́дуйся, страсте́й вещь пожига́яй.

Ра́дуйся, уз беспло́дия избавле́ние.

Ра́дуйся, к Бо́гу тве́рдое направле́ние.

Ра́дуйся, высото́ смире́ния и любве́ сокро́вище.

Ра́дуйся, глубино́ чистоты́, я́ко Христо́в тайново́дец.

Ра́дуйся, я́ко устроя́еши ве́рныя стра́хом Бо́жиим.

Ра́дуйся, я́ко обуча́еши зако́ну Госпо́дню.

Ра́дуйся, вра́жие сокруша́яй шата́ние.

Ра́дуйся, Христо́вым науча́яй глаго́лам.

Ра́дуйся, нра́вов насади́телю изря́дных.

Ра́дуйся, страсте́й кореносека́телю губи́тельных.

Ра́дуйся, о́тче Арсе́ние.

Конда́к 8

Очужди́вся земны́х, усво́ился еси́ Го́сподеви, Его́же всем бла́гость явля́еши, ни́щим и стра́ждущим, му́дре, сло́вом и де́лом помога́л еси́ всегда, приводя́ ко Го́споду, Арсе́ние, вопию́щих: Аллилу́иа.

И́кос 8

Всею си́лою Го́споду служа́, я́ко раб благопоко́рлив, Богоно́се, в Нем сынополже́ния блага́я пожа́л еси́ Боже́ственным Ду́хом, от ни́хже и нам, свя́те, пода́ждь ве́рою вопию́щим:

Ра́дуйся, сы́не Све́та Невече́рняго.

Ра́дуйся, ураня́яй зловече́рняго врага́.

Ра́дуйся, воздержа́ния па́жить благово́ннейшая.

Ра́дуйся, скорбя́щих о́тче сострада́тельнейший.

Ра́дуйся, приста́нище непоколеби́мое в мо́ре волне́ний.

Ра́дуйся, свобожда́яй омраче́ния душетле́нных обстоя́ний.

Ра́дуйся, я́ко карки́на цели́ши страсть.

Ра́дуйся, я́ко отвраща́еши велиа́рову держа́ву.

Ра́дуйся, Христо́ву показу́яй бла́гость.

Ра́дуйся, вра́жие пожига́яй кова́рствие.

Ра́дуйся, лю́тыя печа́лия разреше́ние.

Ра́дуйся, душе́вныя ра́дости стяжа́ние.

Ра́дуйся, о́тче Арсе́ние.

Конда́к 9

Ве́рою моще́м твои́м и мно́гим благогове́нием жены́ благочести́выя присту́пльша, богода́нным твои́м дарова́нием пре́жде непло́ды ма́тери бы́ша, и в ра́дости, Арсе́ние, тя Просла́вльшему вопия́ху: Аллилу́иа.

И́кос 9

Глаго́лы, и́же предъяви́л еси́ Ду́хом проро́чества, испо́лнишася, Арсе́ние блаже́нне, не бо в принесе́нии, но в Керки́ре преподо́бно сконча́лся еси́ и к Бо́гу восте́кл еси́, благода́ть подая́й вопию́щим:

Ра́дуйся, А́нгелов сожи́телю.

Ра́дуйся, свя́те, венце́м увенча́нный.

Ра́дуйся, соверши́вый путь до́брый.

Ра́дуйся, прия́вый вене́ц нетле́нный.

Ра́дуйся, я́ко подава́л еси́ ча́да непло́дствующим жена́м.

Ра́дуйся, я́ко звене́л еси́ в у́ши на́ша у́мныя.

Ра́дуйся, нему́дрых сердца́ наказу́яй.

Ра́дуйся, любо́вь Госпо́дню проявля́яй.

Ра́дуйся, вся́ких страсте́й свободи́телю.

Ра́дуйся, до́брых боже́ственных дарова́ние.

Ра́дуйся, Христо́ва милосе́рдия гу́сли.

Ра́дуйся, жи́зни блаже́нныя цевни́це.

Ра́дуйся, о́тче Арсе́ние.

Конда́к 10

Те́ло твое́, Богоно́се, честно́е благообра́зно преда́ша погребе́нию преподо́бному, блаже́нная же твоя́ душа́ ра́достно ко Христу́ вознесе́ся, Его́же добро́ту непоро́чную, Арсе́ние, ви́дящи воспева́ет: Аллилу́иа.

И́кос 10

Честны́ми твои́ми моща́ми, я́ко дарова́нием Богода́нным, обогаща́яся оби́тель твоя́, чуде́с твои́х дарова́ние благоразу́мными усты́ пропове́дует всем и любо́вию блажи́т тя, Арсе́ние, при́сно вопию́щи:

Ра́дуйся, Госпо́день насле́дниче.

Ра́дуйся, богодохнове́нне и богоно́се.

Ра́дуйся, тезоимени́тыя оби́тели твоея́ сокро́вище.

Ра́дуйся, мона́хов но́вое украше́ние.

Ра́дуйся, утвержде́ние непоколеби́мое благогове́йно мона́шествующих.

Ра́дуйся, похвале́ние спаси́тельное благочести́вых христиа́н.

Ра́дуйся, я́ко подае́ши ча́да непло́дствующим.

Ра́дуйся, я́ко подае́ши благода́ть уныва́ющим.

Ра́дуйся жи́зни бу́дущия собра́ние.

Ра́дуйся, ве́рных но́вый ве́нче.

Ра́дуйся, оби́тели на́шея благохвале́ние.

Ра́дуйся, ве́рных и́стинная ра́досте.

Ра́дуйся, о́тче Арсе́ние.

Конда́к 11

Пе́нии святы́ми восхва́лим тя, о́тче, мона́шествующих ли́цы с любо́вию, обыма́юще ра́ку твою́, и отвсю́ду благочести́вии тща́тся [ко] благода́ти твое́й, преподо́бне, тя Просла́вльшему вопию́ще: Аллилу́иа.

И́кос 11

Свет прие́мь Боже́ственный Святы́я Тро́ицы со все́ми ли́ками святы́х, свободи́ от мглы́ обстоя́ний притека́ющих боже́ственным моще́м твои́м, здра́вие же и свобожде́ние прося́ вопию́щим:

Ра́дуйся, свобожде́ние от уны́ния.

Ра́дуйся, похвало́ церко́вная.

Ра́дуйся, поможе́ние су́щим в труде́х и печа́лех.

Ра́дуйся, исцеле́ние су́щим в неду́зех и страсте́х.

Ра́дуйся, Боже́ственныя бла́гости щедро́ты подая́й.

Ра́дуйся, благода́тию, ю́же име́л еси́, уклоня́яй волне́ния.

Ра́дуйся, я́ко исцеля́еши лю́тыя не́мощи.

Ра́дуйся, я́ко подае́ши Боже́ственныя подая́ния.

Ра́дуйся, ве́рных прибе́жище Боже́ственное.

Ра́дуйся, те́плое на́ше утеше́ние.

Ра́дуйся, ве́рных но́вое пе́ние.

Ра́дуйся, Богода́нная на́ша ра́досте.

Ра́дуйся, о́тче Арсе́ние.

Конда́к 12

Ра́дуется ра́достию свято́ю оби́тель твоя́, всеблаже́нне, обрета́ющи тя, о́тче, предста́теля и Боже́ственную по́мощь, и честны́м припа́дающи моще́м твои́м, почита́ет тя, Арсе́ние, и Го́споду воспева́ет вы́ну: Аллилу́иа.

И́кос 12:

Воспева́я со А́нгелами песнь трисло́жную Тро́ице Святе́й, Богому́дре, моли́ непреста́нно с си́ми о нас, ча́дех твои́х, преподо́бне, я́ко от вся́ких бед свобожда́емся, вопию́ще:

Ра́дуйся, Боже́ственныя сла́вы зри́телю.

Ра́дуйся, исто́чниче мно́гих исцеле́ний.

Ра́дуйся, по́стников дре́вних собесе́дниче.

Ра́дуйся, у́мных во́инов равностоя́телю.

Ра́дуйся, я́ко призыва́ющим тя явля́ешися у́мно.

Ра́дуйся, я́ко провозглаша́ющим тя споспешеству́еши ми́лостивно.

Ра́дуйся, сея́ оби́тели к Созда́телю моли́твенниче.

Ра́дуйся, от вся́каго се́рдца отыма́яй скорбь.

Ра́дуйся, и́мже от страсте́й исцелю́ся.

Ра́дуйся, и́мже Го́споду явлю́ся.

Ра́дуйся, ве́рных ко Го́споду хода́таю.

Ра́дуйся, и мене́ в ну́ждех изба́вителю.

Ра́дуйся, о́тче Арсе́ние.

Конда́к 13

О Арсе́ние блаже́нне, небе́сный жи́телю и всех святы́х соприча́стниче, моли́ усе́рдно с ни́ми свободи́ти нас от вся́кия печа́ли, и небе́сныя благода́ти прия́ти ве́рно вопию́щих: Аллилу́иа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.