Акафист преподобному Елисею Лавришевскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный угодниче Христов Елисее, издревле на земли нашей в подвизех добрых подвизался еси, древним святым отцем подражая, славу и богатство суетнаго мира стопам Христа повергл еси. Трудом и постом смиренномудренно кознем диавольским противустоял еси. Мы же, дивящеся твоему преславному житию, вопием ти:

Радуйся, отче наш Елисее, молитвенниче и защитниче земли нашея.

Икос 1

Ангел во плоти в житии явился еси, предъизбранный из чрева матере твоея Господем Сил и Творцем Ангелов; иже дарова ти ревность древних пророков, да по Бозе последовал еси житию ангельскому. Мы же, восхваляюще чудный подвиг земных трудов твоих, благоговейно зовем ти:

Радуйся, избранный прежде рождения своего во чреве матере;

Радуйся, вскормленный млеком Божественныя благодати.

Радуйся, благочестие в Бозе душею возлюбивый;

Радуйся, целомудрие, яко камень драгий, сохранивый.

Радуйся, измлада мир в Бозе искати устремивыйся;

Радуйся, веру истинную взыскати умудривыйся.

Радуйся, сердце твое воле Божией всецело вверивый;

Радуйся, ум в молитве непрестанней к Богу очистивый.

Радуйся, отче наш Елисее, молитвенниче и защитниче земли нашея.

Кондак 2

Князя Литовскаго сын был еси, преподобне Елисее, обуреваяся прелестями мира сего, не прельстился еси, ибо уразумев суетность славы и богатства временнаго живота, последовал еси Христу, укрепляемь благодатию Святаго Духа, воспевая любящему нас Господу благодарственную песнь: Аллилуиа.

Икос 2

Видя тя Господь, яко древо бесплодное вдали от истины православныя веры, человеколюбия ради призва к Себе чрез угодника Своего, благолепнаго Лаврентия, и ороси тя росою Евангельскаго учения. Мы же, истомившиися от жажды духовныя, вопием ти:

Радуйся, древо добролиственное, свыше облеченное благодатию;

Радуйся, Авелев плоде, Богу принесый себе жертвою

Радуйся, от юности лживость языческих вероучений познавый;

Радуйся, веру Православную, аки многоценный адамант, восприявый.

Радуйся, овча, Господом врученное доброму пастырю;

Радуйся, от волка душехищнаго упасенный старца Лаврентия мудростию.

Радуйся, стено веры, на твердем основании устрояемая;

Радуйся, искусно благодатию Христовою слагаемая.

Радуйся, отче наш Елисее, молитвенниче и защитниче земли нашея.

Кондак 3

Промыслом Божиим по стезям Господним ведомый, отче наш Елисее, притекл еси к стопам богоноснаго старца, аки пчела собирающе духовный нектар и наслаждающеся от сладких словес чуднаго Лаврентия. Преподобный же, предуведя и предуготовляя тя, сосуде избранный Божиея благодати, благодаря взывал есть к Богу: Аллилуиа.

Икос 3

Имея сосуд своея души чист от всякия греховныя скверны, добре подвизался есть с преподобным Лаврентием; той же рече ему: «Сыне мой! Блюди себе от всякия нечистоты, да Христа обрящеши». Мы же, далече от Бога предстоящии, со смирением взываем:

Радуйся, паче сладкаго меда неутолимо правды Божия жаждавый;

Радуйся, смиренномудрия и целомудрия от юности искавый.

Радуйся, чистоту душевную паче мира возлюбивый;

Радуйся, в любви твоей ко Господу Ангелом подражавый.

Радуйся, заповедь старца, аки талант, приявый и умноживый;

Радуйся, верность в малом сохранивый и во мнозем поставленный.

Радуйся, пустыннолюбцев в искании Бога усердный сподвижниче;

Радуйся, верный послушниче и даров Святаго Духа вместилище.

Радуйся, отче наш Елисее, молитвенниче и защитниче земли нашея.

Кондак 4

Аки столп огненный, путь указующий и ум просвещающий, – Божественную благодать дарова ти Господь, боголюбиве отче Елисее, яко боговидцу Моисею в пустыни, тако на спасительный подвиг иноческаго жития укрепляше тя. Ты же, дивно водимый Духом Святым среди тяжких искушений в юности и престарении, вошел еси в Горний Иерусалим, вечно прославляя Бога: Аллилуиа.

Икос 4

Слышаще о тебе, яко дивно от мирския суеты к иноческому подвигу призван бысть, и благодатию Божиею добр плод твориши, преподобне, течаху к тебе людие, аки елени на источник водный, делы и словесы твоими услаждахуся и поучахуся равноангельному житию твоему, с радостию зовуще: Радуйся, цвете благовонный, в пустыни процветший;

Радуйся, цветник духовный подле себе возрастивший.

Радуйся, благое иго Христово в подвизе твоем с любовию носивый;

Радуйся, ум твой, сердце и волю в Бозе молитвою утвердивый.

Радуйся, душевныя и телесныя чистоты хранителю усердный;

Радуйся, непрестанною молитвою на высоту безстрастия возшедый.

Радуйся, устава иноческаго добрый и верный блюстителю;

Радуйся, пустынножителей богоносных в подвизех подражателю.

Радуйся, отче наш Елисее, молитвенниче и защитниче земли нашея.

Кондак 5

Щитом веры, яко доблестный воин, вооружися супротив козней диавольских, отражая стрелы лукавыя силою непрестанныя молитвы и поста, и попрал еси полки бесовския. Они же, тобою посрамленнии, бежаша не терпяще благодати Божиея, в тебе пребывающия. Тако от сетей врага душу твою, яко голубицу кроткую, Бог соблюл есть, Тому же непрестанно воспеваем: Аллилуиа.

Икос 5

Бурю лютых страстей воздвиже на тя человекоубийца диавол, искони хотяй праведных погубити, но ты, отче Елисее, Духом Святым наставляемый в непрестаннем бдении и смирении, козни диавола предваряя, того победил еси. Мы же, имуще ратника пред Богом неусыпна, со умилением зовем:

Радуйся, доблестию и мужеством древним святым отцам уподобивыйся;

Радуйся, хитросплетенных прелестей и соблазнов не искусивыйся.

Радуйся, сугубым постом и молитвою искусителя от себе отгнавый;

Радуйся, ловления и ухищрения диавола побеждати нас научивый.

Радуйся, трудами монастырскими обитель на небесех себе устроивый;

Радуйся, братию плодами трудов твоих насытивый.

Радуйся, трудниче неусыпный, в подвизе изнемогающих укрепляй;

Радуйся, чада своя, послушанию своею жизнию научаяй.

Радуйся, отче наш Елисее, молитвенниче и защитниче земли нашея.

Кондак 6

Наукам от юности научен бысть, аки талантом одаренный от Царя Небеснаго, в житии своем богатно умножил есть. Господь же, вся дивно устрояяй и промышляяй, книжней мудрости братию научил есть, чрез преподобнаго Елисея, и тако просветил Евангельским Светом люди Своя, прославляющия сице Творца всего Бога в Троице Единосущней: Аллилуиа.

Икос 6

Прияв жребий наставника и учителя от Господа твоего, питомцы своя учением Христовым с отеческою любовию усердно наставлял еси, и братию обители во иночестем благочестии утверждал еси, да пришедше ко Христу, в честнем жительстве течение совершали есте. Мы же, славяще праведныя труды твоя, ублажаем тя сицевыми похвалами:

Радуйся, в земнем Едеме церкви Христовы вертоградарю верный;

Радуйся, в апостольских трудах в помощи и надежде на Бога поживый.

Радуйся, добрый сеятелю, слово Божие на ниве сердец усердно сеявый;

Радуйся, мудрый учителю, в Евангельстей истине таковых просветивый.

Радуйся, на верху горы горяй и светяй, веры светильниче;

Радуйся, право ходити нас научаяй, добрый наставниче.

Радуйся, правила веры и образа кротости усердный служителю;

Радуйся, святоотеческих учений верный блюстителю.

Радуйся, отче наш Елисее, молитвенниче и защитниче земли нашея.

Кондак 7

Видя распростертыя объятия Отца, Божественнаго Человеколюбца, отче Елисее, аки птенец, иский любве Божиея и к Тому любовию пламенеяй, и слезно сердцем согреваяся, взывал еси: Любы моя, како воспою Тя, что воздам Ти, день и нощь не имам покоя от любве к Тебе. Сего ради умиляемся душею о толицем горении любве Твоея, и вопием ко Всещедрому Богу: Аллилуиа.

Икос 7

Возгореся в душе твоей, яко углия огненныя, Божественная любовь, согревающая, честный отче, всякаго приходящаго к тебе и неутешенными не оставляющая. Сего ради мы, видяще источник любве твоея неиссякаемый, припадаем и зовем ти:

Радуйся, яко младенец млеко матере, любве Божиея иский;

Радуйся, в любви твоей ко Господу Ангелом подражаяй.

Радуйся, Богом возлюбленный и одаренный щедротами небесныя доброты;

Радуйся, иже и на земли причастниче неизреченныя райския красоты.

Радуйся, лампадо пред Господем Вседержителем неугасимая;

Радуйся, елей добрых своих дел в светильник возливаяй, яко дева разумная.

Радуйся, цвете сельный, к Солнцу Правды прильнувый;

Радуйся, благоуханием молитвы слабых духом подвигнувый.

Радуйся, отче наш Елисее, молитвенниче и защитниче земли нашея.

Икос 8

Руце свои простираеши в молитве к Богу за род христианский, молитвенниче наш теплый Елисее. Ты же, уразумев благодати сея силу, во умилении взывал еси: Спаси, Боже, люди Твоя и благослови достояние Твое. Сице, на молитвы твоя уповаем, испроси душам нашим исцеление, да благодарно Богу возопием: Аллилуиа.

Икос 8

Чадо возлюбленное явился еси Пресвятыя Богородицы, аки свеща несгораемая, предстояй пред Богом во многих молитвах и бдениих своих. Ведуще тя таковаго избранника Божиея Матере, о спасении всех молящагося, достодолжно с любовию вопием ти:

Радуйся, пустыннолюбцев в молитвах к Богу усердный сподвижниче;

Радуйся, к Царице Небесней о всех нас теплый молитвенниче.

Радуйся, звездо незаходимая, в скорбех нам путь указующая;

Радуйся, мольбами твоими слезными к Богу заблудшыя взыскаяй.

Радуйся, предивный подвижниче, землю нашу молитвою освящаяй;

Радуйся, отче чадолюбивый, за всех, во гресех погибающих, слезно пред Богом ходатайствуяй.

Радуйся, в смирении и послушании обитель своея души для Духа Святаго сотворивый;

Радуйся, горением молитвы твоея и нас обителию Духа Божественнаго создавый.

Радуйся, отче наш Елисее, молитвенниче и защитниче земли нашея.

Кондак 9

Ангельския силы и вся Церковь торжествующая, увидев твое преславное житие, достоблаженне отче Елисее, удивишася и возблагодариша дивнаго Бога во святых Своих. Со Ангелы ликовствующе, и мы подолгу восхваляем в храмех Церкве воинствующия, взирающе на высоту твоего ангельскаго подвига, и прославляем Всехвальнаго Бога в песнех духовных: Аллилуиа.

Икос 9

Ангел во плоти явился еси на земли, отче наш Елисее; кто возможет воспети твое чудное житие, сокрытое под завесою многих веков. Яко орля воспаряет на воздусе, тако духом возшел еси на небеса во исполнении Заповедей Христовых. Мы же, удивляющеся высоте жизни твоея, чествующе вопием ти:

Радуйся, похвало и радость Церкве Вселенския;

Радуйся, яко ныне с нами воспевают тя силы Ангельския.

Радуйся, силу любве твоея ветии многовещании изрещи не возмогоша;

Радуйся, душу свою обителью любве Христовой сотворша.

Радуйся, смирением твоим Ангелом бесплотным уподобивыйся;

Радуйся, сердцем и душею за Христа в подвизех сораспинавыйся.

Радуйся, братолюбия и человеколюбия ревностный наставниче;

Радуйся, обуреваемых в лютых страстех помощниче.

Радуйся, отче наш Елисее, молитвенниче и защитниче земли нашея.

Кондак 10

Господа возлюбивый паче временныя жизни, отче наш Елисее, сподобился еси Божественныя благодати, аки святый Симеон Богоприимец, Христа приял еси во объятия своея души, и рекл еси Богу: Яко видеста очи мои спасение Твое, Свет во откровение языков и славу людей Твоих. Тако уповая на милосердие Божие, взывал еси Ему: Аллилуиа.

Икос 10

Желая райских селений, паче земныя юдоли плачевныя, и со Христом вечно сочетатися, нежели во узах смертныя плоти пребывати, неослабно в вере до конца подвизался еси. Темже, тобою в вере укрепляемии, с любовию зовем ти:

Радуйся, мосте блаженный из благих дел, от земли до неба стояй;

Радуйся, подражая тебе, может взойти по тому безбедно всякий хотяй.

Радуйся, Христа руками души своея во объ ятия принимаяй;

Радуйся, Божественную благодать денно и нощно в душе соблюдаяй.

Радуйся, яко Адам, потом и слезами стремился еси в райския селения;

Радуйся, смирением главу змия стерл еси ради спасения.

Радуйся, яко Иисус Навин, враги душевныя и телесныя мечем посецый;

Радуйся, тем землю обетованную вскоре приемый.

Радуйся, отче наш Елисее, молитвенниче и защитниче земли нашея.

Кондак 11

Егда приближися к концу крестный путь живота твоего, страстотерпче Елисее, взошел еси на Голгофу, следуя своему Божественному Учителю, иже от ученика своего смерть прият. Темже мученический венец славы вечныя вос- приял еси, славословя Господа со святыми мучениками в Горнем Иерусалиме: Аллилуиа.

Икос 11

Ангели радовахуся зело о преставлении твоем, мучениче Елисее, принимающе твою блаженную душу к Богу на небеса, яко жертву благовонную и богоприятную. Мы же тя, световидными лучами просвещаемаго в славе Божией и венец нетленный приемлющаго, тако восхваляем:

Радуйся, ища Господа, обрел еси жизнь вечную;

Радуйся, имея страх Божий, открыл еси Любовь Предвечную.

Радуйся, силою любви ко Господу смерть нивочтоже вменивый;

Радуйся, убийцу кающагося силою мощей своих от беснования исцеливый.

Радуйся, мученическою кончиною демонов поправый;

Радуйся, веру свою кровию засвидетельствовавый.

Радуйся, мучеников пречестных неувядаемое украшение;

Радуйся, верных в терпении непоколебимое утверждение.

Благость сотворил еси с рабом Своим

Кондак 12

Господь по словеси Своему, во еже сподобил еси пребывати на небеси угодника Своего Елисея, паче злата и топазия Бога возлюбившаго и душу за Христа предавшаго. Во еже чающия твоея помощи, поминай нас у Престола Вседержителева. Обаче, еще молимся: пролей, о всеблаженне, теплую молитву ко Господу, да милосердовав, Церковь Святую утвердит, сохранит и укрепит, да во веки славословится имя Божие от нас, поющих: Аллилуиа.

Икос 12

Восхваляюще преславную память твою, достоблаженне отче Елисее, чтим болезни и труды во бдении и пощении, иже понесл еси, даже до крове подвизаяся против супостат. Кто убо возможет воздати достойныя похвалы за слезы и воздыхания, в молитве ко Господу возносимыя? Ибо по отшествии твоем, от нападения варвар наши земли защищая, послал еси конницу небесную и обратил еси в бегство их воинство. Мы же, дивящеся твоему молитвенному покровительству, зовем тебе таковая:

Радуйся, к Свету Невечернему из юдоли земныя возвысивыйся;

Радуйся, непрестанною твоею молитвою за мир Ангелом уподобивыйся.

Радуйся, землю нашу от врагов видимых и невидимых избавляяй;

Радуйся, воине Христов, щитом мира нас ограждаяй.

Радуйся, наследниче Царствия Небеснаго, подвигом своим землю нашу украсивый;

Радуйся, верный сподвижниче, путь, ведущий к Богу, нам указавый.

Радуйся, верныя от греховныя смерти сохраняяй;

Радуйся, Богом увенчанный, в молитвах своих нас не оставляяй.

Радуйся, отче наш Елисее, молитвенниче и защитниче земли нашея.

Кондак 13

О, предивный угодниче Божий Елисее, земли Белорусския и обители Лавришевския похвало и украшение. Приими от нас малое сие моление, яко фимиам благовонный в кадило приносимое, и испроси нам у Христа Бога велию милость, да помилует всех нас, чада Своя, и благодатию Святаго Духа свяжет союзом любве, тако, спасаемии тобою, сподобимся непостыдно в день Судный со всеми святыми воспевати хвалебную песнь: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобному Елисею Лавришевскому

О, предивный угодниче Божий, отче Елисее! Имея веру адамантову и любовь серафимскую ко Господу, Страсти Христовы всеусерднейше понесл еси, всеблаженне. Призри на нас, чада твоя, к тебе с умилением припадающия и всесильнаго твоего заступления пред Господем слезно просящия. Ныне же, со всеми святыми Белыя Руси, славно подвизавшимися, принеси молитву сердечную о нас ко всех Владыце, во страстех греховных ныне погибающия. Сице же, предстателю наш теплейший, помяни нашу немощь, укрепи нас в любви ко Господу и в мужественнем стоянии противу сетей духа злобы поднебесныя. Да отлучится от мыслей наших дух ненависти и злопомнения, зависти и лести, дух гордости и всякия иныя злобы. Сердца же наша благодатию Христовою раствори и волю нашу ко исполнению заповедей Божиих спешно сотвори, нозе наши на путь мирен направи. О, боголюбивый отче Елисее, якоже в пагубнем нашествии иноплеменников в пределы наша, молитвенным предстательством ны защитил еси, тако и ныне силою молитвы твоея сподоби избавитися нам от глада, губительства, труса, потопа, огня, меча, нашествия иноплеменников и междоусобныя брани и от всех враг видимых и невидимых; и тако святей обители нашей до скончания века сохранитися сотвори. Еще испроси, угодниче Божий, мира Божия Церкви Христовой, да в братстем единомыслии и любви к Богу добре поживем. Пастырей Церкве Православныя и честное иночество в молитвах согрей и поддержи, и воздыхание их о спасении мира благоприятно пред Лицем Божиим сотвори. Наипаче же, умоли Господа Сил, да не отвратит милость Свою от нас, грех ради наших, но яко Отец чадолюбивый, изольет милость Свою на достояние Свое, да не постыдимся во веки. Емуже честь и поклонение подобает: Отцу, и Сыну, и Святому Духу ныне и присно и во веки веков. Аминь.