Акафист священномученику Александру Никольскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный угодниче Христов и страстотерпче священномучениче Александре, в годину гонений лютых душу свою за Христа и Церковь Его положивый и к сонму новомучеников российстих сопричтенный, помяни нас во святых твоих молитвах ко Пресвятой Троице, да зовем ти:

Радуйся, священномучениче Александре, теплый молитвенниче о спасении нашем!

Икос 1

Ангелов Творец и всея твари Создатель во дни смут и нестроений церковных избра тя, святе Александре, в проповедника Православия среди народа от веры отступавшего Ты же, яко добрый воин Христов, Креста оружием вооруженный, со усердием провозвещал еси учение Спасителя Нашего, за Него же многия страдания смиренне претерпевши, венцем мученическим украсился еси на небесех, идеже молишися о всех, взывающих ти сице:

Радуйся, всем сердцем и всем помышлением твоим Бога возлюбивый;

Радуйся, за веру и Отечество живот свой положивый;

Радуйся, царствия Христова сонаследниче;

Радуйся, славы Божия сопричастниче;

Радуйся, Спасителя возлюбивших покровителю;

Радуйся, кающихся с Богом примирителю;

Радуйся, чтущих память твою пред Богом поминающий;

Радуйся, о прославляющих тя Господа умоляющий;

Радуйся, священномучениче Александре, теплый молитвениче о душах наших!

Кондак 2

Видящие благочестивыя родители твоя, протоиерей Матфей и матушка Людмила чадо свое благочестием и богомыслием с детства Всевышним одаренное и крепкою любовию к Христовой Церкви озаренное, в радости духовней воспевали о тебе Господеви: Аллилуйа!

Икос 2

Разумом свыше просвещаемь, угодниче Христов, житие добродетельное возлюбил еси; богобоязненным родителям твоим внимая, во страсе Божии и благочестии возрастал еси; к молитве и чтению книг священных навыкл еси, и во трудах твоих образ будущаго добродетельнаго жития явил еси. Мы же, дивящееся таковому от юности твоея усердию вопием ти сице:

Радуйся, рода честнаго отрасле благородная!

Радуйся, лозо винограда Христова многоплодная!

Радуйся, чадо молитвы родителей благочестивых!

Радуйся, надеждо и утешение сердец их боголюбивых!

Радуйся, от малых лет сладость молитвы вкусивый!

Радуйся, Божественное Писание возлюбивый;

Радуйся, от юности служити Христу возжелавый;

Радуйся, нелецемерную по Бозе ревность показавый;

Радуйся, священномучениче Александре, теплый молитвенниче о душах наших!

Кондак 3

Сила Христова осени тя, преславне Александре, и дарова ти крепость мужественнее претерпети искушения врага невидимаго, его же стрелы разженные угасил еси твоими слезными к Богу молитвами; сего ради, яко победитель, воспеваеши с безплотными силами песнь победную Христу Богу: Аллилуйя!

Икос 3

Имуще Премилосердный Господь Наш велия попечение о тебе, прехвальне Александре, благодатию. Своею укрепи тя со дней юности твоея, ты бо начаток и конец жития твоего на камене благом Христе – Спасителе положил еси; Ему же последующе вся красна мира сего презревше, страдание прескорбное Его же ради претерпел еси, и ныне во чертозех небесных радуешися и веселишися о Бозе Спасе Твоем. Мы же, вся сия поминающее, таковые величаем тя сице:

Радуйся, Духом Святым просвещенный!

Радуйся, соблазнами мира сего не прельщенный!

Радуйся, заповеди Христовы в сердце твоем сохранивый!

Радуйся, Пречистую Матерь Его зело возлюбивший!

Радуйся, молитвы твоея к Ней неустанно возносивый!

Радуйся, честь и похвалу святым угодникам праведно воздававый!

Радуйся, благим супружеством своим и нам образ брака честнаго явивый;

Радуйся, в супружнице твоей добраго помощника на пути Христовом обретый;

Радуйся, священномучениче Александре, теплый молитвенниче о душах наших!

Кондак 4

Буря искушений и устремлений бесовстих и волны соблазнов мирских не возмогоша поколебати храмины твоея душевныя, святый Александре, основана бо бе на твердом камене веры во Христа и хранима трезвлением, трудами и молитвы твоима богоприятными; ты бо на Единаго Спасителя уповая, умиленным сердцем воспевал еси Ему: Аллилуйя!

Икос 4

Слышавше, святый Александре, глаголы Спасителя нашего, яко «жатва убо многа, делателей же мало» (Лк 10:2), сему поревновал еси, и, егда сан священный прияти сподобился еси; со усердием провозвещал еси учение Христово; сего ради твоя пастырские добродетели хваляще тя, Боголюбче, ублажаем и на предстательство твое уповая, вопием ти сице:

Радуйся, священство, яко великий дар Господень, восприявый;

Радуйся, обильно в хиротонии благословение небесное стяжавый;

Радуйся, Жертву безкровную со страхом и трепетом совершавый;

Радуйся, словом мудрым всех приходящих к тебе питавый;

Радуйся, помраченные умы наша просвещающий;

Радуйся, окаменелыя сердца наша оживляющий;

Радуйся, Бога любити и волю Его творити нас научающий;

Радуйся, в радости Творца благодарити нас побуждающий;

Радуйся, священномучениче Александре, теплый молитвениче о спасении нашем!

Кондак 5

Боготечней звезде уподбился еси, священномучениче Александре, мнозих бо к Солнцу Правды Христу путеводил еси словом твоим премудрым и примером преславнаго жития твоего, еже посвящено бысть Богу и ближним твоим. Тем же блаженство вечное со всеми святыми унаследовал еси и с ними же (предстоя престолу святыя Троицы) пение хвалебное воспеваеши: Аллилуйя!

Икос 5

Видяще, яко властителие богоборныя возвигоша супротив христиан православных гонение лютое, не престал еси молитися, священномучениче Александре, да укрепит тя Всемудрый Господь за веру правую даже до смерти стояти; паству же твою наставлял еси благодатию Божественной в таинствах укреплятися и от матери – Церкви никакоже не отхождати. Сего ради величающее тя, добрый воине Христов, таковыя похвалы приносим ти:

Радуйся, Христова стада пастырю верный;

Радуйся, носителю духа кротости добропобедный;

Радуйся, правды и истины паче всего в житии твоем искавый;

Радуйся, проповеди Слова Божьего николиже оставлявый;

Радуйся, всех нас к покаянию ныне призывающий;

Радуйся, на милость Божию уповати нас подвизающий;

Радуйся, от плевел ненависти сердца наша очищающий;

Радуйся, светом любве нелицемерныя нас озаряющий;

Радуйся, священномучениче Александре, теплый молитвенниче о спасении нашем!

Кондак 6

Проповедник веры Христовой и ревнитель благочестия не словом токмо, но и всем житием твоим был еси, всехвальный священномучениче Александре; тем же и Церковь Святая достойно почитает подвиги, труды и страдания твоя, иже Спасителя ради подъял еси, немолчно Господеви воспевая: Аллилуйя!

Икос 6

Воссиял еси, яко светило незаходимое, горением веры и чистотою души твоея в земли Брянстей, идеже Пастыреначальник Господь поставил тя пасти овец Его, имже ты воистину был еси правилом жития благочестиваго и, яко наставник богомудрый, в вере Православной паству твою утвердил еси, образ пастыря добраго (аки память благую и драгоценную) оставил еси нам, приносящим ти благохваления сия:

Радуйся, духовных чад богомудрое окормление;

Радуйся, паствы твоея отрадное утешение;

Радуйся, в годину бед и испытаний отеческою любовию всех утешавый;

Радуйся, к благодатной и благомощной защите Спасителя прибегати паству твою научавый;

Радуйся, чад наших от соблазнов мира соблюдаяй;

Радуйся, оных в целомудрии и чистоте укрепляяй;

Радуйся, скорби наша в радость претворяющий;

Радуйся, светом надежды Христовой нас озаряющий;

Радуйся, священномучениче Александре, теплый молитвенниче о спасении нашем!

Кондак 7

Хотяще веру Православную в веси Речица утвердити, святый отче наш Александре, крест Христов с кротостью восприял еси, укрепляя чад твоих духовных в добродетелех христианских; смирении, кротости, любви к Богу и ближнему. Мы же, ныне молим тя, угодниче Христов, предстательством твоим испроси и нам сия боголюбезные добродетели; да не поработимся страстем греховным, но чистым сердцем воспоем Спасителю Нашему: Аллилуйя!

Икос 7

Новые труды и подвиги ко устроению жизни Христианской в земли Брянстей подъял еси, новомучениче Александре, чад твоих духовных на усердное служение Христу Богу и исполнение, заповедей Его подвизая (и был еси има наставник благодатный и праведный). Тогда возвигоша властилие богоборческия гонение, супротив тя, дабы отвратити тя от трудов сих; ты же благодатию свыше укрепленный, верен Господу даже до смерти пребыл еси. Мы же, ныне память твою славим и взываем ти сице:

Радуйся, пастырю добрый, душу свою положити за словесных овец готовый;

Радуйся, о потерянных овцех зело скорбевый;

Радуйся, никогоже от приходящих ти отвергавый;

Радуйся, любовию твоею вся покрывавый;

Радуйся, о укреплении веры во чадех своих ко Господу взывавый;

Радуйся, образ истиннаго служения Христу явивый;

Радуйся, светом Божим от растления нас охраняющий;

Радуйся, в вере и верности Богу нас утверждающий;

Радуйся, священномучениче Александре, теплый молитвенниче о душах наших!

Кондак 8

Странно бысть людем маловерным видети пречудное житие твое, святый Александре, яко не о славе си, ни о мимотекущих и преходящих благах земных помышлял еси; егда нечестивых советы, о еже оставити ти служение твое пастырское отвергл еси. Мы же, благочестие и мудрость воспевающее, Всеблагого Господа Нашего, умудрившего тако тя, славим вопиюще Ему о тебе: Аллилуйя!

Икос 8

Всего себе Господу предал еси, святый новомучениче Александре, егда взяша тя нечестиви и в темницу ввергоша. Ты вслед апостолу помышлял еси «аще бо живем, Господеви живем, аще бо умираем, Господеви умираем» (Рим. 14:8); благодатию Христовой укрепляемь путь страданий добропобедно прошел еси. Мы же, воспоминающее о подвигах твоих, восписуем ти хваления сия:

Радуйся, яко неблагомысленных наветы претерпел еси;

Радуйся, яко от яростных поношения приял еси;

Радуйся, неправедный приговор с кротостью приявый;

Радуйся, крилами богомыслия сети вражия сокрушивый;

Радуйся, злобные умышления того доброславно посрамивый;

Радуйся, заповедь Христову о любви ко врагом исполнивый;

Радуйся, прощати и благословляти ближних нас научающий;

Радуйся, в кротости и смирении нас укрепляющий;

Радуйся, священномучениче Александре, теплый молитвенниче о душах наших!

Кондак 9

Вся помыслы и все упование на Спасителя Нашего возложил еси, страстотерпче Александре, егда во узах темничных суще, от гонителей веры Православия оскорбления, надругания, заушения и биения незлобливе приял еси, молящее Всеблагаго Христа о даровании ти в муках терпения и во страдания – укрепления. Мы же, Господа Нашего, озарившего тя светом своим во дни испытаний твоих, славим и вопием Ему: Аллилуйя!

Икос 9

Вития многовещанные не довлеют по достоянию восхвалити праведное житие и мученическую кончину твою, всехвальне Александре; обаче же мы, любовию к тебе подвизаемы и надеждою на предстательство твое окрыляемы, со смирением и верою таковые похвалы приносим ти:

Радуйся, венец терновый на земли благочестно носивый;

Радуйся, венец нетленный на небеси от Господа получивый;

Радуйся, нужды наша ко Престолу Божиему возносящий;

Радуйся, отраду и утешение нам ниспосылающий;

Радуйся, от глада духовнаго всех нас избавляющий;

Радуйся, грешников ко исправлению направляющий;

Радуйся, суетную славу мира сего презирати нас научающий;

Радуйся, светом радости души наша озаряющий;

Радуйся, священномучениче Александре, теплый молитвенниче о душах наших!

Кондак 10

Спасение и славы вечныя достигл еси, святый новомучениче Александре, егда верности Христу ради претерпел еси страдания лютыя и смерть мученическую. Мы же, память твою святую, благоговейно чтуще, просим тя, угодниче Христов, избавити ны от скорбей, бед и напастей, исцелити недуги наши духовныя и телесныя, да и с тобою Благодеющему нам Господу смиренне воспеваем: Аллилуйя!

Икос 10

Стена крепкая, козньми врага неодоленная пребыл еси до конца, всехвальный священномучениче Александре, егда злочествии богоотступницы (во граде Брянске) лютой смерти тя предаша. Тем же мы, благоговейно поминающее страдания твоя и подвиги твоя, с любовию зовем ти:

Радуйся, последователю верный распятаго Учителя;

Радуйся, споспешниче усердный ада Разрушителя;

Радуйся, пастырю, за Христову веру пострадавый;

Радуйся, не убоявыйся убивающих тело, душу же свою не погубивый;

Радуйся, ум и сердце посреди мучения горького ко Господу устремивый;

Радуйся, ризы твоя в крови Агнца убеливый;

Радуйся, пренесением мук лютых тленная на нетленная пременивый;

Радуйся, благодать молитвы о нас от Творца получивый;

Радуйся, священномучениче Александре, теплый молитвенниче о душах наших!

Кондак 11

Пение наше всякое побеждается, и многое множество хвалебных песен, воспеваемых ти, несть довольно, дабы по достоянию восхвалити тя, священномучениче Александре; обаче молитвами твоими получающее от Христа Бога благодения многообразныя, благодарни сущи, поем о тебе Ему: Аллилуйя!

Икос 11

Света нетварнаго зритель и радости Божественныя причастник явиися еси, новомучениче Александре, тем же молим тя: не престани молитися о нас (купно со всеми новомученики росийстими), да помилует нас Господь твоего предстательства ради и сподобит нас, немощных, новую силу нечестия посрамити и победителие злонравия явистися, да ублажаем тя сицевыми похвалы:

Радуйся, в неизреченной славе Творца мира созерцающий!

Радуйся, во благоухании святыни присно почивающий!

Радуйся, от райских обителей в юдоль плачевную низходящий;

Радуйся, молитвы наша к стопам Вседержителя возносящий;

Радуйся, труды наша на пути спасения облечающий;

Радуйся, тайно творити добродетели нас научающий;

Радуйся, от обычаев душетленных сердца наша отвращающий;

Радуйся, нравы добрыя и благочестие в нас насаждающий;

Радуйся, священномучениче Александре, теплый молитвениче о спасении нашем!

Кондак 12

Благодать Божию обильно приял еси, священномучениче Александре, еюже укрепися сердце твою в любви ко Христу Богу Нашему; сице бо долготерпением и верою просиявше, мученически житие твое скончавше, со лики ангельскими водворился еси в чертозех Отца Небеснаго. Ему же со дерзновением предстоя, молися тепле, о еже благодатию Всесвятаго Духа укрепитися и нам, грешным, о тебе, Господеви, поющим: Аллилуйя!

Икос 12

Поющи преславныя подвиги твоя и величая добропобедныя страдания твоя, восхваляем неизреченное благоволение Божие на нас свершившееся. Тя бо, благага и вернаго раба Своего, Всеблагий наш Спаситель во утешение и утверждение веры нам дарова, да уразуемем, яко щедр и милостив Господь, в род и род Помощник и Защититель нам будет: избавит очи наша от слез, нози от поползновений лукавых и всех нас от всяческих скорбей житейских и твоего предстательства ради услышит нас и спасения вечнаго удостоит. О сем же воздыхающе, тебе, всехвальне Александре, таковыя похвалы приносим:

Радуйся, мучеников пречестных неувядаемое украшение;

Радуйся, верных в терпении непоколебимое утверждение;

Радуйся, ходити в заповедех Божиих нас наставляющий;

Радуйся, друг друга тяготы носити нас подвизающий;

Радуйся, от сетей вражиих чтущих тя избавляющий;

Радуйся, от заблуждений духовных нас исцеляющий;

Радуйся, за вся Творца благодарити нас научающий;

Радуйся, милосердие Божие к нам приклоняющий;

Радуйся, священномучениче Александре, теплый молитвенниче о спасении нашем!

Кондак 13

О страдальче многосветлый и служителю Христов Александре! Приими малое хваление сие в простоте сердечной тебе возносимое. Вонми гласу недостойному молящихся тебе и твоими скорыми ко Господу прошениями, умоли Его пробавити благоутробие Свое на ны, да сподобимся в радости блаженней купно с тобою воспевати Ему (ангельскую песнь): Аллилуйя!

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О избранниче и угодниче Христов, священномучениче Александре, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! К тебе припадаем и молимся мы, смиреннии и грешнии, и, яко отца чадолюбиваго просим: всели в сердца наша любовь, еюже к Богу и ближним твоим при жизни земней преисполнен был еси, яко и душу твою положил еси, мученически пострадав. Научи нас, отче Александре, подражати тебе верно, Бога и ближних наших любити искренне и заповеди Господни совершати непогрешительно, да будем и мы с тобою чада Божия, не по имени токмо, но и самим делом и всем житием нашим. Призри благоутробно на всякую душу христианскую, милости и помощи от тебе ищущую. Буди всем нам в болезнех - целитель, в скорбех - утешитель, в печалех - избавитель, в бедах - помощник, в час смертный – покровитель, да помощию молитв твоих святых сподобимся и мы грешнии спасение вечное получити и Царствие Небесное унаследовати. Ей, страстотерпче Христов, не посрами упования нашего, еже по Бозе и Пресвятей Богородице на тя крепко возлагаем, но яви нам многомощное заступленине, да хвалим, славим и величаем человеколюбие дивнаго со святых Своих Бога, Отца и Сына и Святаго Духа, во веки веков. Аминь.