Акафист преподобному Иродиону Илоезерскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный угодниче Христов и велий подвижниче Белоезера, святе  Иродионе, прославляюще подвиги и труды твоя, ими же Богу и людем добре послужил еси, путь спасения в море житейском ладьям душ наших показав, с благоговением приносим ти, отче праведный,  сие благодарное пение и из глубины сердца с любовию  зовем ти:

Радуйся, преподобне Иродионе, Илоезерский чудотворче, теплый о нас молитвенниче.

Икос 1

Ангельскому житию ревнуя, учениче богоноснаго Корнилия, по исходе учителя ко Господу Комельский монастырь оставил еси, по образу преподобных отец узким и тесным путем шествовати возжелев, и на север Руси к Белоезеру пришел еси, уединение для молитвеннаго делания взыскав. Мы же, радуяся о твоем хотении токмо с Богом быти, поем ти сицевая:

Радуйся, отрасле дивная, корене Корнилиева, добрый плод принесшая.

Радуйся, реко чудная, исток в Комельской обители обретшая.

Радуйся, земною славою и телесным покоем пренебрегший.

Радуйся, под водительством богомудраго игумена Корнилия духом окрепший.

Радуйся, живот, имущий отвержение и скорби, избравый.

Радуйся, мирской суеты бежавый.

Радуйся, в селение Илоское вселивыйся.

Радуйся, в пустом и тихом месте душею о Бозе веселивыйся.

Радуйся, своима рукама молебницу зде создавый.

Радуйся, в руци Богови всего себе предавый.

Радуйся, в лесной пустыни келлию срубивый.

Радуйся, для Господа поживый.

Радуйся, преподобне Иродионе, Илоезерский чудотворче, теплый о нас молитвенниче.

Кондак 2

Ведомы токмо Богу потаеннии подвизи твои, кои ради Царя Славы в лесах  Белоезерских ты, верный служителю Христов, подъял еси, выну воспевая Богу: Аллилуиа.

Икос 2

Разумом богопросвещенным волю Божию о себе постигл еси, блаженне Иродионе, егда ночию в тонком сне по велицем бдении прииде к тебе ангел и повеле ити на полуостров, иже на Илоезере, и зде церковь Пречистыя Богородицы честнаго Ея Рождества урубити. Славя Божественное о тебе смотрение, чтим чистоту жития твоего и поем ти таковая:

Радуйся, ангельскаго гласа  сподобленный.

Радуйся, от Бога познавый полуостров для аскитства тебе уготовленный.

Радуйся, воли Божией усердный исполнителю.

Радуйся, молитвы Иисусовой непрестанный творителю.

Радуйся, по велению ангела последствовавый в путь.

Радуйся, разсмотревый послушания суть.

Радуйся,  беседою с Богом поправый вихри смятений.

Радуйся, демественниче доброгласный ночных псалмопений.

Радуйся, благодерзновенный муже.

Радуйся, страха Господня друже.

Радуйся, смирения благовонное кадило.

Радуйся, земли Белоезерския богосиянное светило.

Радуйся, преподобне Иродионе, Илоезерский чудотворче, теплый о нас молитвенниче.

Кондак 3

Силою Божиею укрепляем, ты, подвиготекущий Иродионе, на реку Рыбницу пришед, и зде во сне на полуострове иже на Илоезере  звону внимая, разсудил еси, иже тако Господь место приидущим страданиям твоим указа, и воспел еси благодарственно Богу: Аллилуиа.

Икос 3

Имея крепкую веру, на пустый полуостров Илоезера вселился еси, приснославный Иродионе, у боголюбиваго мужа Анисима его купив, дабы зде иноком жити и выну Богу молитвы возносити. Зряще твое упование во всем на Бога, воспеваем ти таковая:

Радуйся, тихое пристанище на Илоезере обретый.

Радуйся, людей множество ко Господу приведый.

Радуйся, притяжавый землю для подвигов, купче богомудрый.

Радуйся, благодаривый Бога равно и за улов богатый и за скудный.

Радуйся, питавый езеро слезами о гресех своих.

Радуйся, пощением и бдением поправый полки духов злых.

Радуйся, Белоезеро, яко светило, добродетельми своима озаривый.

Радуйся, сладость безмолвия вкусивый.

Радуйся, денно и нощно молитвы Богу возносивый.

Радуйся, плоть духови покоривый.

Радуйся, предоблий Илоезерский пустынножителю.

Радуйся, иноческих обетов усердный исполнителю.

Радуйся, преподобне Иродионе, Илоезерский чудотворче, теплый о нас молитвенниче.

Кондак 4

Бури искушений  не возмогошапоколебати корабль твой, воине Христов Иродионе, бо парусом ты соделал еси молитву, кормилом – упование на Бога, ядрилом – память смертную, дном – смирение. Дивящеся Богу, вразумившему тя, с ликованием поем Ему: Аллилуиа.

Икос 4

Слышав ангела глас, преподобне, покорно повеление Господне исполнил еси и на полуострове церковь во имя Рождества Пресвятыя Богородицы осуществовал еси, да возносятся зде молитвы Богу и Матери Божией, да причащаются люди Даров Святых. Мы же ныне, почитая труды твоя, поем тебе сице:

Радуйся, церкви Пречистыя Девы строителю.

Радуйся, Рождества Богородицы прославителю.

Радуйся, благолепно церковь украсивый иконами, яко невесту Христову.

Радуйся, выну внимающий Богу Слову.

Радуйся, при церкви в трапезе живый.

Радуйся, веру в Белоезере укрепивый.

Радуйся, цвете неувядаемый Илоезерских лесов.

Радуйся, бо Царицы Небесныя храни тя покров.

Радуйся, птице сладкозвучная, духовным пением славящая Творца.

Радуйся, лиро, утешающая скорбящая сердца.

Радуйся, в искушениях за помощью присно к Богу прибегавый.

Радуйся, исцеление от болезни игумену Новоезерскаго монастыря даровавый.

Радуйся, преподобне Иродионе, Илоезерский чудотворче, теплый о нас молитвенниче.

Кондак 5

Боготечная жизнь твоя  многим явися путеводною звездою, возсиявшею путь ко спасению, да, подражающе образу твоему, жительствуют мирно и единодушно люди, пояще Богу: Аллилуиа.

Икос 5

Видевше люди подвиги твоя, многочестный Иродионе, приходяше к тебе пользы ради и поучашеся Закону Божию, пищу ти принося, ано ты, богомудре, все раздая нищим, сам мало яде. Умиляяся милосердию твоему, поем ти таковая:

Радуйся, причащавыйся Святых Христовых Таин куюждо субботу.

Радуйся, в послушании Богу подражавый Лоту.

Радуйся, дар токмо дабы не преобидети дателя принимавый.

Радуйся, алчущих и жаждующих питавый.

Радуйся, благозванным быти  с гостями мнози себе принуждавый.

Радуйся, молитвою ночною страсти угнетавый.

Радуйся, дабы не слышати речей злословных Бога моливый.

Радуйся, яко мертв миру и его прелестем бывый.

Радуйся, шум и безчиние на острове ради любве ко искреннему терпевый.

Радуйся, в гаме толпы о былом безмолвии сожалевый.

Радуйся, миротворче, ссорящихся примиряяй.

Радуйся, спорящих уступать научаяй.

Радуйся, преподобне Иродионе, Илоезерский чудотворче, теплый о нас молитвенниче.

Кондак 6

Проповедник жития во Христе явился еси, преподобне Иродионе, тожде  и нам, возследователем твоим,  в простоте сердца служити Богу помози, благодарственно поя Спасу: Аллилуиа.

Икос 6

Возсиявый пламень горящих углей не прикоснуся тя, святе, в пещи лежащаго, егда принесший ти пищу боголюбивый Елисей трижды сотворив молитву вниде в трапезу и узре тя на огненном одре возлежащу, яко на месте покойне. Дивящеся чудесем твоим, богославный Иродионе, ублажаем ти тако:

Радуйся, яко в хладном месте, лежавый в горящей пещи.

Радуйся, любве к Богу неугасимый огнь свещи.

Радуйся, отроком Вавилонской пещи уподобивыйся.

Радуйся, славы от Бога на земли сподобивыйся.

Радуйся, жар  углей смирением, яко росою, угасивый.

Радуйся, телом в мире сем, а умом на небеси живый.

Радуйся, коривый себе за грехи, мня во аде  горети.

Радуйся, бо чудо сие показа Елисею Бог, дабы тя предвоспети.

Радуйся, из огнегорящей пещи изшедый, яко из кита Иона.

Радуйся, в пламенновидных углех обретый Авраамово лоно.

Радуйся, старче, у Елисея кротко Бога ради прощения просивый.

Радуйся, Елисею глаголати о виденном им чуде запретивый.

Радуйся, преподобне Иродионе, Илоезерский чудотворче, теплый о нас молитвенниче.

Кондак 7

Хотя тело  удручити, трудниче Иродионе, в бани во вся дни живота своего не опратился еси, ано чист покаянием и силою Божиею соделался еси, выну воспевая Человеколюбцу: Аллилуиа.

Икос 7

Новый раз явися ти ангел Божий, возвестив скорое ко Господу твое отшествие. Ты же, схимниче, причастився, душу в руце Господа с радостию предал еси, дабы с Ним в Царствие Небесное внити. Почитая ныне память твою, богозримый Иродионе, поем ти сице:

Радуйся, от ангела  день успения твоего познавый.

Радуйся, от рук священноинока пред смертью Дары Святыя приявый.

Радуйся, бо по успении келлия твоя явилася есть яко благовонный цвет.

Радуйся, бо ко гробу твоему потече  людей поток.

Радуйся, постниче, в мире отшедшый.

Радуйся, в часовне у церкви Богородицы отишие нашедый.

Радуйся, псалмолюбче, с пении духовными  погребенный.

Радуйся, на память Харитона исповедника душею на небо восхищенный.

Радуйся, вшедый в Царский чертог трилетно по оставлении Комельскаго монастыря.

Радуйся,  кандило светозарное, на свет добродетелей твоих стекашеся братия.

Радуйся, бо обитель устроися на месте подвигов твоих.

Радуйся, и избави нас  помышлений суетных.

Радуйся, преподобне Иродионе, Илоезерский чудотворче, теплый о нас молитвенниче.

Кондак 8

Странен явися ты миру, прелести его презрев, Господа всем сердцем возлюбив и Ему единому с радостию поработав. Ныне же, доблественниче, помози и нам себе отврещися, Христу усердно послужити, честно поя Богу: Аллилуиа.

Икос 8

Всяк тебе, святоблаженне, с верою призывавый, помощь скоро получаше , бо дарова Бог ти таковую благодать мнози чудесы творити. Мы же, тя, сосуде Духа Святаго, чтя, восхваляем тако:

Радуйся, всех притекающих к тебе, яко чад, любивый.

Радуйся, Божественною силою чудеса творивый.

Радуйся, болящую расслаблением Ирину на ноги поставивый.

Радуйся, отрока слепорожденнаго слепоты избавивый.

Радуйся, Антония, в лесах блуждавшаго, домой возративый.

Радуйся, Анисию трехлетней болезни свободивый.

Радуйся, духа нечистаго из сына Иоанна изгнавый.

Радуйся, мужу, в Светлый понедельник онемевшему, в Антипасху речь давый.

Радуйся,  грабителя молебницы невидимою рукою поразивый.

Радуйся, страждущаго зубною болию Михаила возвеселивый.

Радуйся, Белоезера источниче неисчерпаемый.

Радуйся, поточе любве неиссякаемый.

Радуйся, преподобне Иродионе, Илоезерский чудотворче, теплый о нас молитвенниче.

Кондак 9

На всяк час сего временнаго жития благопоспеши, любоблагочестный Иродионе, нам, яко ты, себе смиряти и Бога славити, поя Ему: Аллилуиа.

Икос 9

Ветии умолкают, недоумеюще, како можно описати мнози чудеса твоя, чудодейственниче Иродионе, от гроба твоего проистекающая. Тако и Софония дивися, егда ткнув посохом в могилу твою, зрения лишися, и, раскаявшися, у гроба твоего со слезами моляшеся и прозрел есть. Мы же ныне, веселяся силе твоей, Богом данной, славим тя и поем ти:

Радуйся, слезити о гресех своих нас, яко Софонию, научаяй.

Радуйся, прощати обидителей, яко сам простил еси Софонию, нас наставляяй.

Радуйся, во сне Софонии в келлии твоей явивыйся.

Радуйся, бо по молитвам к тебе Софония исцеливыйся.

Радуйся, зане чрез Софонию Бог дарова людем икону твою.

Радуйся, и помози прозрети нам, ослепленным тьмою греховною.

Радуйся, Софонии раскаявшагося уцеломудривое видение.

Радуйся, мятежных помышлений утихновение.

Радуйся, плачущих ободрителю.

Радуйся, немощных укрепителю.

Радуйся, в болезнех терпети и благодарити Бога вразумляяй.

Радуйся, тяжких недугов и бед нас избавляяй.

Радуйся, преподобне Иродионе, Илоезерский чудотворче, теплый о нас молитвенниче.

Кондак 10

Спасти душу  хотяще и   наставника богомудраго в тебе видяще, мы, чада твоя, молим тя, любобожественный Иродионе, помози нам грехи свои зрети, друг друга не зазирати, ано любовию и послушанием радовати, да, благожительствуяще, соборне поем Богу: Аллилуиа.

Икос 10

Стено и покрове притекающих к тебе, блаженне Иродионе, инока Васиана спасший от утопления в езере, простри  руку помощи и нам, утопающим в море страстей, с верою поющим ти сицевая:

Радуйся,  напрасной смерти иконописца Васиана избавивый.

Радуйся, ко Господу мысли погибающего инока направивый.

Радуйся, Васиановой радостью о Господе сердца наша исполняяй.

Радуйся, чудеса по воле Божией творяй.

Радуйся, возвративый из моря старца на брег, и нас утверди на камени терпения.

Радуйся, не устрашивыйся грозной бури, смири и наша житейская треволнения.

Радуйся, бо благодарный Васиан остался есть на полуострове Спасителю служити.

Радуйся, боголюбче, помози и нам с любовию друг друга тяготы носити.

Радуйся, нечаянная надеждо отчаявшихся.

Радуйся, увеселение печалящихся.

Радуйся, неустанное о людех попечение.

Радуйся, в бедах скорое  заступление.

Радуйся, преподобне Иродионе, Илоезерский чудотворче, теплый о нас молитвенниче.

Кондак 11

Пение всеумиленное Богу приносил еси, владыколюбче Иродионе, во вся дни живота твоего, тожде и нам делом и словом славити Господа помози, да ликуют сердца наша о пребывающем всюду с нами Избавителе от всех бед, да поют умы и уста Спасителю: Аллилуиа.

Икос 11

Светильника добродетелей в тебе видев, имяше веру великую к тебе священник Евфимий, коего спасл еси спод льда езера от потопления ты, вняв мольбе его, чудесоподатель Иродионе. Избави же ныне погружения в море гордыни зовущих ти:

Радуйся, Евфимия из воды на воздух поднявый.

Радуйся, в ответ на призыв к тебе скорую помощь иерею подавый.

Радуйся, перенесший, яко на крылах, Евфимия в место безопасное.

Радуйся, Белоезера заре красная.

Радуйся, носивый на руках Евфимия, яко свое чадо.

Радуйся, пастырю многопопечительный, не оставляй и ныне нас, твое стадо.

Радуйся, лед наших сердец в теплоту обращающий.

Радуйся, нас, яко заблудших овец, на путь спасения возвращающий.

Радуйся, держава наша в минуту падений.

Радуйся, неистощимая чаша чудотворений.

Радуйся, имавый из воды иерея, тако и души наша из темницы страстей изведи.

Радуйся, погубивый мрежи славолюбия, ныне из сетей тщеславия нас свободи.

Радуйся, преподобне Иродионе, Илоезерский чудотворче, теплый о нас молитвенниче.

Кондак 12

Благодати ковчеже, богатодарный отче Иродионе, яко при жизни о спасении всех Богу молился еси, тако и ныне о помиловании нас ко Господу взываеши, воздвизая пети Милостивому Всецарю: Аллилуиа.

Икос 12

Пение и хвалы тебе, божественный Иродионе, вознося, молим тя, щедролюбче, благопоспеши, яко ты, преподобно жити всем с верою зовущим ти:

Радуйся, смиренный богозрителю.

Радуйся, Богом данный нам целителю.

Радуйся, беснование Стефана укротивый.

Радуйся, жену от зелни болезни чрева исцеливый.

Радуйся, Григория скорби главныя избавивый.

Радуйся, рабу царедворца пиянственнаго пития не пити наставивый.

Радуйся, вернувый здравие Белоезерскому воеводе Иоанну.

Радуйся, бо чрез тя Господь яви миру целительную стамну.

Радуйся, скорбящих утешение.

Радуйся, малодушных укрепление.

Радуйся, Белоезерской земли хранителю.

Радуйся, душ наших попечителю.

Радуйся, преподобне Иродионе, Илоезерский чудотворче, теплый о нас молитвенниче.

Кондак 13

О дивный угодниче Божий и чудотворче, преподобне отче наш Иродионе. Приими сие малое моление наше и у Христа Бога испроси нам любовь, смирение и послушание,  да в мире и единомыслии поживем, поюще Владыке всех: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.