Акафист преподобномученице Марии Колычевской (Мамонтовой-Шашиной)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Символ веры:

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щего, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Кондак 1

Избранная невесто Христова, святая мученице Марие, в преподобии и правде благочестно пожившая, агнице Агнца Божественнаго, прещений мучительских не убоявшаяся и любовь к Богу даже до смерти явившая, величающе прославльшаго тя Господа, воспеваем ти похвальная, и твоея помощи просяще зовем ти: Радуйся, преподобномученице Марие, обители Колычевския заступнице.

Икос 1

Ангельскаго жития взыскавши, преподобная страстотерпице Марие, мира сего отверглася еси и мученическою кончиною твоею прославила еси преславное имя Святыя Троицы, пред богоборцы силу Христову явивши. Мы же, зряще подвиги и страдания твоя, со умилением и любовию глаголем ти сицевая:

Радуйся, благочестию от юности навыкшая;

радуйся, Божий храм зело возлюбившая.

Радуйся, Небесному Жениху уневестившаяся;

радуйся, верность Ему даже до смерти сохраньшая.

Радуйся, святой Марии Магдалине в ревности по Бозе поревновавшая;

радуйся, яко Египтяныня Мария покаяннаго жития взыскавшая.

Радуйся, благоуханный цвете добродетелей;

радуйся крине целомудрия и чистоты.

Радуйся, земли Рязанския прозябение;

радуйся, Церкве Православныя украшение.

Радуйся, к сонму новомучеников земли Русския причтенная;

радуйся, познавшая сладость страданий за Христа.

Радуйся, преподобномученице Марие, обители Колычевския заступнице.

Кондак 2

Видящи, яко вся в мире сем тлению бывают причастна, во обитель Колычевскую стопы твоя направила еси, боголюбивая Марие, вечная паче временнаго возлюбивши, идеже житие постническое провождающи, непрестанно вопияла еси Господу: Аллилуиа.

Икос 2

Разум духовный стяжала еси, святая Марие, иноческаго жительства взыскующи, и сего ради во обитель Богоматере притекла еси, Покрову Ея вверивши себе, и тамо добродетелем монашеским научалася еси. Мы же, восхваляюще подвиги твоя, вопием ти:

Радуйся, Господу служити возжелавшая;

радуйся, благую часть избравшая.

Радуйся, мира изволением отвергшаяся;

радуйся, славу тленную яко сон вменявшая;

Радуйся, смирение возлюбившая;

радуйся, послушанию прилежавшая.

Радуйся, в молитве дни своя провождавшая;

радуйся, сладость призывания имене Христова познавшая.

Радуйся, манною любве сердце питавшая;

радуйся, словом Божиим духовно насыщавшаяся.

Радуйся, безсмертныя трапезы причастнице;

радуйся, бисере многоценный Церкве Русския.

Радуйся, преподобномученице Марие, обители Колычевския заступнице.

Кондак 3

Сила Вышняго исполни тя, мати Марие, егда насташа в стране нашей времена жестокая и обитель Колычевская от богоборцев разорена бысть. Ты же верность Господу сохраньши, служения Ему не оставила еси, в храме святом воспевающи Творцу: Аллилуиа.

Икос 3

Имущи о храме Божии попечение сугубое, усердие прилагала еси, еже сохранитися храму в селении твоем и совершатися в нем пению ко Господу невозбранно. Сего ради песньми похвальными тя ублажаем:

Радуйся, фимиам молитвы Господу принесшая;

радуйся, сердцем сокрушенным и смиренным Бога воспевшая.

Радуйся, на камени заповедей Божиих храмину души утвердившая;

радуйся, подобно отроком вавилонским страданий не убоявшаяся.

Радуйся, Бога паче всего мира возлюбившая;

радуйся, небеснаго отечества взыскавшая.

Радуйся, сердце твое престол Божества соделавшая;

радуйся, венец нетленный стяжавшая.

Радуйся, день и нощь преподобнеи руце твои к Богу простиравшая;

радуйся, образ веры и благочестия явившая.

Радуйся, славий добропеснивый, присно Господа восхваляющий;

радуйся, сокровище многоценное даров духовных.

Радуйся, преподобномученице Марие, обители Колычевския заступнице.

Кондак 4

Бури скорбей не поколебаша души твоея, преподобная Марие, взирала бо еси на Подвигоположника Христа Спасителя твоего, иже страстию Креста мир от клятвы свободи и воскреси с Собою верных, вопиющих Ему: Аллилуиа.

Икос 4

Слышавши, мати Марие, глаголы евангельския, како судиям неправедным предан бысть Господь завистию людей злочестивых, силу обретала еси претерпевати суд неправедный и обличение беззаконное. Мы же, зряще мужество твое, вопием ти:

Радуйся, оружием Креста Господня побеждавшая;

радуйся, вооружившаяся тем противу козней диавольских.

Радуйся, препоясанная истиною;

радуйся, оболкшаяся в броня правды.

Радуйся, восприимшая щит веры и шлем надежды спасения;

радуйся, мечем молитвы врагов бесплотных поражавшая.

Радуйся, многотрудною стезею шествовавшая;

радуйся, в женстем естестве велие мужество явившая.

Радуйся, разум боголюбив стяжавшая;

радуйся, духом Христовы любве пламеневшая.

Радуйся, горлице пустыннолюбивая, пучину скорбей прелетевшая;

радуйся, чертогов горних достигшая.

Радуйся, преподобномученице Марие, обители Колычевския заступнице.

Кондак 5

Богоблагодатный свет осия тебе, преподобная страстотерпице Марие, егда, имущи надежду на Бога несумненную, явила еси мужество необоримое пред лицем людей безбожных, такожде на изгнание и работы горькия осуждена была еси, обаче кротце претерпела еси вся, вопиющи Богу: Аллилуиа.

Икос 5

Видевше твердость твою во исповедании веры Христовы, осудиша тя судии беззаконии. Ты же, сердцем верующи в правду, усты своими исповедала еси Господа Иисуса Христа во спасение, и в темнице заточения, изгнания и горьких работ не убоялася еси. Мы же восхваляюще терпение твое, вопием ти:

Радуйся, стопам древних мученик последовавшая;

радуйся, от них в подвизе укрепляемая.

Радуйся, долготерпению Христову подражавшая;

радуйся, немощь естества препобеждавшая.

Радуйся, от великия скорби прешедшая к славе небесней;

радуйся, в виссон праведности облеченная.

Радуйся, в ризах белых предстоящая престолу Царя Славы;

радуйся, званая на брачную вечерю Агнца.

Радуйся, добрая дево, к сретению Жениха себе предуготовившая;

радуйся, одеяние души просветившая.

Радуйся, от реки чисты воды животныя напоенная;

радуйся, вышняго Иерусалима жительнице.

Радуйся, преподобномученице Марие, обители Колычевския заступнице.

Кондак 6

Проповедует земля Казахстанская подвиг твоего страдания, иже во изгнании претерпевала еси. Помнящи, яко Господь Славы не имеяше, где главу преклонити, ты, мати Марие, хлад и зной, лишения и скорби на стране чуждей кротко преносила еси, ко Господу очи сердца твоего возводящи и вопиющи Ему: Аллилуиа.

Икос 6

Возсия свет души твоея, греховней тьме во отечестве нашем огустевающей. Ни узы бо, ни темница, ниже труды горцыи свободы духа и веры Христовы лишити тя возмогоша. Темже достодолжно ублажаем тя:

Радуйся, исповеднице непоколебимая;

радуйся, страданием Христу сочетавшаяся.

Радуйся, любовию к Богу страх превозмогавшая;

радуйся, духа росою зной скорбей охлаждавшая.

Радуйся, злобу врагов Церкве посрамившая;

радуйся, силою Божиею зло во благо претворившая.

Радуйся, облеченная в ризу спасения;

радуйся, страстоносице благославная.

Радуйся, тьму безбожия светом Христовым просвещавшая;

радуйся, лампадо молитвы неугасимая.

Радуйся, луче светозарная, мир осияющая;

радуйся, звездо златообразная на небосводе церковнем.

Радуйся, преподобномученице Марие, обители Колычевския заступнице.

Кондак 7

Хотяще богоборцы вся люди от Господа отвратити, посрамлены быша крепостию христианскою: ты бо, святая Марие, из изгнания возвратившися, паки и паки служити Церкви Христовой возжелала еси при храме святем и воспевати Творцу: Аллилуиа.

Икос 7

Новую обретше тя избранницу Божию, како не дивимся благомудрому и боголюбивому житию твоему! Како воспоем добродетели души твоея, како почтим достойно мужество твое? Восхваляем убо тя любовию и вопием ти сице:

Радуйся, святых ангелов веселие;

радуйся, человек благоговейное удивление.

Радуйся, рачение божественное стяжавшая;

радуйся, мучения пучину безбедно преплывшая.

Радуйся, терпением препобеждавшая неистовство неверных;

радуйся, тернистой стези скорбей не уклонившаяся.

Радуйся, Евангелия исповеднице и Православия ревнительнице;

радуйся, за исполнение Христовых заповедей ублажаемая.

Радуйся, болезньми страданий аки диадимою украшенная;

радуйся, о Господе покой души обретавшая.

Радуйся, лозо доброплодная Церкве Христовы;

радуйся, драгий сосуде благодати.

Радуйся, преподобномученице Марие, обители Колычевския заступнице.

Кондак 8

Странница на земли была еси, преподобная страстотерпице Марие, тленная и временная презревши и о горнем выну помышлявши. В сердце твоем престол молитвы воздвигла еси, и егда службы церковныя лишена была еси, сердце свое соделала еси храм Живаго Бога, присно хвалу Ему возносящи: Аллилуиа.

Икос 8

Весь желание, весь сладость Господь Иисус Христос тебе бысть, мати Марие. И егда скорбь о разорении храма в селении твоем постиже тя, николиже возроптала еси, в сердечней клети Жениху Сладчайшему служащи молитвою непрестанною. Сего ради вопием ти:

Радуйся, яко любящим Бога вся поспешествует во благое;

радуйся, нескверное зерцало божественных разумений.

Радуйся, сердце храм молитвы сотворившая;

радуйся, добрым житием Творца прославившая.

Радуйся, аки злато, во огни злостраданий очищенная;

радуйся, просиявшая, яко солнце, посреде беззаконник.

Радуйся, голубице кроткая, криле поста и молитвы имущая;

радуйся, в любви нелицемерней возраставшая.

Радуйся, Жениху Христу обрученная;

радуйся, девством благоукрашенная.

Радуйся, в неистленной красоте кроткаго и молчаливаго духа прекрасная;

радуйся, цвете благоуханный небеснаго сада.

Радуйся, преподобномученице Марие, обители Колычевския заступнице.

Кондак 9

Всякое естество ангельское возрадовася, зряще твердость души твоея, святая мученице Марие: паки бо в темницу заключена бывши, крепостию твоею низложила еси богоборцев дерзость, явивши исповедание веры непоколебимое и сердцем Господу взывающи: Аллилуиа.

Икос 9

Ветии многовещаннии не возмогут воспети прославльшаго тя Господа, подавшаго доброте твоей силу и на враги непобедиму тя показавшаго, преподобная страстотерпице Марие. Ты бо светозарением Духа Святаго просвещенная, венец победный стяжала еси. Сего ради похвалами блажим тя сими:

Радуйся, усердием души суровство мучительское претерпевшая;

радуйся, изгнанная правды ради.

Радуйся, Господу послужившая в терпении мнозе;

радуйся, вечныя радости причастнице.

Радуйся, Бога не отвергшаяся пред человеки;

радуйся, яко алавастр мира, страдание Христу принесшая.

Радуйся, преукрашенная елеем чистоты;

радуйся, бисер многоценен Царства Небеснаго обретшая.

Радуйся, семя слова Божия на земли сердца твоего усердно взрастившая;

радуйся, душевною лепотою осиянная.

Радуйся, дщи благословенная Отца Небеснаго;

радуйся, избранная в женах.

Радуйся, преподобномученице Марие, обители Колычевския заступнице.

Кондак 10

Спасти хотящи душу твою, небрегла еси о немощи телесней, паки бо на труды горькия во изгнании осуждена была еси, обаче ни иго работное, ниже слабость женская поколебаша терпение твое. К Жениху Христу всем естеством своим устремлялася еси, ради любве Его скорби подъемлющи и взывающи Ему: Аллилуиа.

Икос 10

Стена несокрушимая и надежда бысть тебе Пречистая Мати Божия, Ейже во обители святой служила еси. Темже Покрову Богородицы себе вверяющи, силу обретала еси на сопротивныя и сладость утешения в тесноте и горести гонений. Темже со умилением вопием ти:

Радуйся, страданием змия врага умертвившая;

радуйся, желанием духа плоти желание увядившая.

Радуйся, оружием правды побеждавшая;

радуйся, в смирении возвеличенная.

Радуйся, Пресвятыя Богородицы служительнице;

радуйся, в добродетелех Ей подражавшая.

Радуйся, пред Царицею Небесною за нас ходатайствующая;

радуйся, покров Ея обители Колычевской испрошающая.

Радуйся, от благаго сокровища сердца твоего добрая изнесшая;

радуйся, словеси Господню послушная.

Радуйся, духовная ластовице, к небеси воспаряющая;

радуйся, светильниче молитвы златосиянный.

Радуйся, преподобномученице Марие, обители Колычевския заступнице.

Кондак 11

Пение всякое побеждается, зряще мученическую кончину твою, богомудрая Марие. Житие бо свое в горьких работах в краю Сибирском скончала еси и преставилася еси к Богу, аки птица в чертог световидный возлетевши, идеже ныне выну зриши доброту красную Жениха твоего Христа и вопиеши ему песнь хвалы: Аллилуиа.

Икос 11

Светоприемную свещу веры держащая, страстоносице Марие, смерть за Христа, смерти державу поправшаго, прияла еси, и ныне ликуеши во славе вечной. Темже ублажаем тя, всехвальная:

Радуйся, мученице непобедимая;

радуйся, в меру возраста исполнения Христова достигшая.

Радуйся, даже до конца претерпевшая;

радуйся, жизнь за веру во Христа положившая.

Радуйся, ветвь победную в руце приимшая;

радуйся, ко престолу Божию ту положившая.

Радуйся, подвигом добрым подвизавшаяся;

радуйся, течение добре скончавшая и веру соблюдшая.

Радуйся, яко уготовася тебе венец правды;

радуйся, агнице, упасшаяся на пажити живоносной.

Радуйся, в сонме святых жен на небеси прославленная;

радуйся, вшедшая в радость Господа твоего.

Радуйся, преподобномученице Марие, обители Колычевския заступнице.

Кондак 12

Благодать велия возсия во обители Колычевской, егда предстательством твоим сия возрождена бысть. И паки на месте сем святем возносится Господу песнь хвалы и благодарения: Аллилуиа.

Икос 12

Поюще твое прославление, ублажаем тя, святая преподобномученице Марие, обители Колычевския покровительнице. Буди нам ко благу наставница, в любви и единомыслии сохрани, и сподоби нас спасение вечное улучити вопиющих ти сице:

Радуйся, имя Христово призывати нас научающая;

радуйся, Творца благодарити за вся побуждающая.

Радуйся, к покаянию и добродетельному житию ны подвизающая;

радуйся, на стези добродетелей нас утверждающая.

Радуйся, маслино многоплодная даров Духа Святаго;

радуйся, медоточною росою благодати нас напаяющая.

Радуйся, спасения нашего споспешнице;

радуйся, об Отечестве нашем молитвеннице.

Радуйся, скорая на помощь призывающим тя;

радуйся, о обители твоей пред Богом предстательнице.

Радуйся, мати богоблаженная;

радуйся, со ангелы ликовствующая.

Радуйся, преподобномученице Марие, обители Колычевския заступнице.

Кондак 13

О всехвальная преподобномученице Марие, обители Колычевския покровительнице и заступнице, молим тя усердно: приими малое сие моление наше, с любовию ти приносимое, и не презри нас, твоея помощи просящих. Да твоим пред Богом предстательством избавимся от бед и озлоблений греховных и сподобимся во Царствии Небеснем вкупе с тобою выну Господу воспевати: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О всехва́льная преподобному́ченице Марие, кро́ткая Христо́ва а́гнице, земли́ Росси́йския цве́те благоуха́нный, избра́нная, непоро́чная и до́брая в жена́х! Ты любо́вию после́довала еси́ Христу́, во обитель Колычевскую притекши, благо́е и́го за́поведей Его́ терпели́вно подъе́мши и я́звы Его́ преподо́бием нося́щи: во дни же гоне́ний на Це́рковь Ру́сскую му́жественне во испове́дании правосла́вныя ве́ры пребыла́ еси́, и житие́ мона́шеское по́двигом муче́ния увенча́вши, в черто́г Небе́снаго Жениха́ возшла́ еси́. Те́мже мо́лим тя, сла́вная в жена́х му́ченице: моли́ це́ркви на́шей в ми́ре и благоде́нствии пребыва́ти, держа́ве же Росси́йстей непоколеби́мей в правосла́вии и ми́ре сохрани́тися и всех враго́в сокруши́ти: жена́м, по́двиг и́ночества восприи́мшим, во благоче́стии и послуша́ниих мона́шеских укрепи́тися, в ре́вности по Бо́зе не оскудева́ти и неро́потным, бо́дренным и благода́рным всегда́ бы́ти: нам же любо́вию тя почита́ющим, испроси́ вре́мя на покая́ние, тве́рдость во испове́дании ве́ры и́стинныя, заступле́ние от ко́зней вра́жиих и на Cтра́шнем Cуде́ предстоя́ние одесну́ю Го́спода на́шего Иису́са Христа́, Ему́же со Отце́м и Святы́м Ду́хом подоба́ет вся́кая сла́ва, честь и поклоне́ние, ны́не и при́сно и во ве́ки веко́в. Аминь.