Акафист священномученику Михаилу Тихоницкому, пресвитеру Вятскому и Орловскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный Господем от древняго священническаго рода и Вятския земли предивное прозябение,/ благочестивою жизнию своею Господеви угодивший/ и мученическую кончину от сатанинския власти безропотно приявший,/ иерею Божий Михаиле,/ приими сие смиренное пение,/ да из глубины сердец наших зовем ти:/ «

Радуйся, священномучениче Михаиле, кроткий страдальче за веру Православную».

Икос 1

Архангел Михаил от купели церковныя храни тя, иерею Божий, да не коснется души твоея всякая скверна греховная, и да исполнится она, яко сосуд чистоты, дарами духовными. Сего ради зовем ти:

Радуйся, родителей богобоязненных чадо кроткое;

Радуйся, избранное отроча, в честь Архангела Михаила нареченное.

Радуйся, друже Христов, слово Евангельское от младенчества возлюбивый;

Радуйся, заповеди Божии с юных лет в сердце хранивый.

Радуйся, в любви ко Господу родителями воспитанный;

Радуйся, в колыбели материнскою молитвою согретый.

Радуйся, послушанием своим отца и мать утешивый;

Радуйся, в чтении и пении церковнем прилежавый.

Радуйся, священномучениче Михаиле, кроткий страдальче за веру Православную.

Кондак 2

Видя глубокую любовь твою ко Господу и к Церкви Божией, родители твои благословили тя на прохождение учения духовнаго, и тако во град Вятку преселился еси и тамо в стяжании духовных знаний усердно прилежал еси, отвращаясь тлетворнаго духа богоборческаго и с благодарением воспевая Спасителю нашему: «Аллилуиа!».

Икос 2

Разум твой Божественными познаниями просветил еси, богомудре отче Михаиле, и сердце свое в руце Божии всецело предал еси. Желание же великое имея, Христу Богу и народу Вятскому послужити, мученический путь пастяря Христова избрал еси. Видя такое великое горение сердца твоего, взываем ти со умилением:

Радуйся, на пастырскую стезю благоговейно восшедший;

Радуйся, благое иго Христово радостно понесший.

Радуйся, народ простой всем сердцем возлюбивший;

Радуйся, теплоту души своея щедре ему даривший.

Радуйся, в служении пастве своей себя не щадивший;

Радуйся, проповедию Слова Евангельскаго и любовию своею раскольников вразумивший.

Радуйся, делами добрыми и милосердием Христа Бога прославивший;

Радуйся, заблудшия овцы в лоно Матери-Церкви во множестве возвративший.

Радуйся, священномучениче Михаиле, кроткий страдальче за веру Православную.

Кондак 3

Силою Божественныя любве горело сердце твое, пастырю предивный, егда службу церковную с великим трепетом и страхом Божиим совершал еси, и людей молящихся причащал еси, и Словом Божиим их укреплял еси. Тии же, благочестию и ревности твоей дивящеся, со усердием воспевали ко Господу: «Аллилуиа!».

Икос 3

Имея непрестанное попечение о Доме Божием и пастве своей, яко истинный пастырь Христов, по словам апостола, «всякий день и в храме и по домам непрестанно учил еси об Иисусе Христе». Наипаче всей добродетельной, подвижническою жизнью своею проповедал еси Христа, темже вопием ти:

Радуйся, пастырю мудрый и благочестивый;

Радуйся, о чистоте Православныя веры неустанно ревновавый.

Радуйся, к покаянию народ Божий призывавый;

Радуйся, душетленныя учения обличавый.

Радуйся, всего себе в жертву Господеви принесый;

Радуйся, славы человеческия избегавый.

Радуйся, во славу Божию труды к трудам прилагавый;

Радуйся, скромностию и смирением всех удивлявый.

Радуйся, священномучениче Михаиле, кроткий страдальче за веру Православную.

Кондак 4

Буря учений безбожных и гибельных восколебала умы и души русских людей во всех градах и весех Русския земли, сего ради мнозии учениями сими прельстилися и от Господа и Церкви-Матушки отвратилися. Ты же, пастырю добрый Михаиле, пламенным проповеданием Слова Божия, яко мечем огненным, учения сия душетленныя от паствы твоея отгонял еси и право ходити в истинней вере всех призывал еси, да стяжут у Господа милосердие в час Судный и воспоют Ему в чистоте сердечней: «Аллилуиа!».

Икос 4

Слыша непрестанно в душе своей слова Христовы, яко «пастырь добрый душу свою полагает за овцы», ты, иерею Божий Михаиле, душу свою за паству твою полагал еси и молитвы слезныя за людей Божиих проливал еси, да не похитят их волки коварныя и да не уловят сердца их в учения сатанинския. Наипаче, о детских и юных душах попечение имел еси, в Законе Божием их с любовию наставляя и от безбожия сердца их отвращая. Сего ради вопием ти:

Радуйся, с детских лет Христа возлюбивший;

Радуйся, сердце свое и душу в чистоте сохранивший.

Радуйся, о детях и юных заботу всегда имевший;

Радуйся, к правде Божией их души приводивший.

Радуйся, всем сердцем Господа любити их призывал еси;

Радуйся, любовию своею сердца их согревал еси.

Радуйся,, Премудрость Божию им открывал еси;

Радуйся, от учений пагубных их отвращал еси.

Радуйся, священномучениче Михаиле, кроткий страдальче за веру Православную.

Кондак 5

Богоносной звезде подобен был еси, отче святый Михаиле, яко всем, ищущим спасения, путь верный в Царствие Божие освещал еси, мрак расколов и лжеучений разгоняя и в правде Божией всех прибегающих к тебе наставляя, да вознесут сердца свои ко Господу и воспоют Ему: «Аллилуиа!».

Икос 5

Видевше тя паства твоя, отче Михаиле, не токмо иерея усерднаго и благочестиваго, но и мудраго отца и воспитателя детям своим, удивляхуся мудрости твоей, и воспитанию чад своих у тебе поучахуся, сего ради вопием ти:

Радуйся, воспитавый чад своих в вере и благочестии;

Радуйся, отвращавший сердца их от всякаго злочестия.

Радуйся, расхитити стадо твое душетленному зверю не попустивый;

Радуйся, отче благосердый, многих юношей и дев на путь спасения обративый.

Радуйся, примером ревностнаго служения Господу сердца их к Богу возжегший;

Радуйся, к покаянию усердному всех призывавший.

Радуйся, мудрый наставниче, стези правыя юным указал еси;

Радуйся, любити Церковь Божию их неустанно призывал еси.

Радуйся, священномучениче Михаиле, кроткий страдальче за веру Православную.

Кондак 6

Проповедию Христова учения бысть все житие твое, отче преславный Михаиле, яко горел еси пламенеющею любовию ко Господу и к пастве своей, печали и утраты личныя безропотно претерпевая и воспевая ко Христу смиренную песнь: «Аллилуиа!».

Икос 6

Возсиял еси, богомудре отче Михаиле, яко пастырь благостный и кроткий во граде Орлове, лучами любви твоея сердца притекавших к тебе умягчая, печальных утешая, заблудших вразумляя, в Законе Божием отроцы наставляя и храмы Божии предивно украшая. Темже прихождаше к тебе христолюбивые людие, благословения и наставления от тебе ищущи, тако зовуще и глаголюще:

Радуйся, Алтаря Господня непорочный служителю;

Радуйся, Таинств Божиих достойный совершителю.

Радуйся, ходатаю пред Господем о спасении душ человеческих;

Радуйся, молитвенниче, яко свеча ко Господу горящий.

Радуйся, о грехах человеческих всем сердцем скорбящий;

Радуйся, жизнь свою за ближних полагающий.

Радуйся, за Землю Русскую слезы проливающий;

Радуйся, о народе русском с печалью воздыхающий.

Радуйся, священномучениче Михаиле, кроткий страдальче за веру Православную.

Кондак 7

Хотя Человеколюбец Господь поучити ученицы Своя о Царствии Небеснем, призвав дитя, рече: «Иже убо смирится, яко отроча сие, той есть болий во Царствии Небеснем. И иже аще приимет отроча таково во Имя Мое, Мене приемлет». Следуя слову Господню, всю жизнь свою во граде Орлове со смирением проводил еси и детей с любовию принимал еси, Закону Божию их поучая и вкупе с ними воспевая Господеви: «Аллилуиа!».

Икос 7

Новаго Завета Божественный свет осия все житие твое, пастырю наш добрый Михаиле, яко взем свой Крест, за Господем с любовию и благодарением ты последовал еси, терпя все испытания и скорби. Тако душу свою, яко злато в горниле, ты очистил еси и к мучениям за Христа всего себе предуготовал еси. Сего ради зовем ти:

Радуйся, заповедей Христовых верный исполнителю;

Радуйся, терпению и смирению истинный учителю.

Радуйся, светило благочестия немерцающее;

Радуйся, звездо, путь ко спасению грешным указующая.

Радуйся, нестяжанием своим всех удививый;

Радуйся, верою, любовию и надеждою исполненный.

Радуйся, лучезарный светильниче, Божественным пламенем возженный;

Радуйся, пчело трудолюбивая, благодатным нектаром учения Христова исполненная.

Радуйся, священномучениче Михаиле, кроткий страдальче за веру Православную.

Кондак 8

Странницею истерзанною и окровавленною во мраке злобы и безбожия предстала земля Российская, егда попусти Господь скорби великия народу русскому за отступление от веры Православныя. Ты же, пастырю Христов Михаиле, страдая горько о народе своем, умолял его смииритися пред Господем и воспети Отцу Небесному с покаянием и со слезами: «Аллилуиа!».

Икос 8

Все дни и нощи в молитве проводил еси, отче Михаиле, скорбя об отечестве своем земном, яко помрачилась совесть многих людей и злобою сердца их исполнились. Отступились они от веры Православныя и попрали все Заповеди Божии. Ты же, старче святый, видя сие помрачение народа русскаго, умолял его словами Патриарха Тихона: «Опомнитесь, безумцы! Прекратите ваши кровавые распри!». Сего ради, видя пастырское мужество твое и преданность святому Патриарху Тихону и Церкви-Матушке, зовем ти тако:

Радуйся, о невинных жертвах глубоко скорбевший;

Радуйся, голос совести своея никогда не поправший.

Радуйся, Православную веру всегда защищавший;

Радуйся, мужественно воззвание Патриарха Тихона с амвона церковнаго прочитавший.

Радуйся, свет Христов на лицах людей в тот час узревший;

Радуйся, на защиту веры Святой их вдохновивший.

Радуйся, за воззвание сие Господа и Патриарха Тихона в молитве своей возблагодаривший;

Радуйся, на путь мученический с любовию ко Господу вступивший.

Радуйся, священномучениче Михаиле, кроткий страдальче за веру Православную.

Кондак 9

Весь любовию к Богу горящий, святче Божий, не убоялся еси, егда безумные людие, злобы и ненависти к Церкви Божией исполнении, суду неправедному тя, старца благостнаго, предаша и погубити восхотеша. Ты же, с радостию о Господе неустанно воспевал еси: «Аллилуиа!».

Икос 9

Ветийство злобное и коварное судий твоих посрамися, отче Михаиле, егда людие, призванные на судилище неправедное, дабы отличити тя, обаче о многих милосердных и добрых делех твоих возвестили, яко бедным и обездоленным помогал еси, больных и заключенных навещал еси и хлеб свой безвозмездно раздавал еси. Мы же, видя велию любовь к тебе народа твоего, зовем ти тако:

Радуйся, душу свою за паству свою положивший;

Радуйся, злобу безбожную милосердием своим посрамивший.

Радуйся, на Господа все упование возложивший;

Радуйся, в терпении скорбей Христу подражавший.

Радуйся, паству свою не убоятися злобы сатанинския призывающий;

Радуйся, веру народа Божия примером своим укрепивший.

Радуйся, верность Господу до конца сохранивший.

Радуйся, священномучениче Михаиле, кроткий страдальче за веру Православную.

Кондак 10

Спасительный подвиг свой совершая, угроз безбожников не убоялся еси, и старческих сил своих не жалея, всего себе служению ближним посвятил еси, пастырю верный; и в страшные годы отречения от Христа государства Российскаго, егда злоба и ненависть царила вокруг, любовию и милосердием своим паки Христа провозвещал еси и вдохновлял еси русских людей пети Богу: «Аллилуиа!».

Икос 10

Царя Небеснаго Христа верный раб и последователь был еси, отче Михаиле, яко немощи свои старческия презирая и злобу гонителей нивочтоже вменяя, неистощимую любовь сердца своего страждущим несл еси, нищим помогая, больных посещая, заключенных утешая, тьму безбожия и злобы светом веры и Христовой любви разгоняя. Темже подвиг веры твоея прославляюще, тако зовем ти:

Радуйся, плоды духовныя от Христа в изобилии приял еси;

Радуйся, любовию сердца своего страждущих согревал еси.

Радуйся, радость духовную о Христе им даровал еси;

Радуйся, мир благодатный Христов в души их изливал еси.

Радуйся, долготерпением своим немощныя души врачевал еси;

Радуйся, благостию и милосердием многих ко Христу привел еси.

Радуйся, пламенною верою своею колеблющихся в вере укреплял еси;

Радуйся, кротким словом многих умудрял еси.

Радуйся, священномучениче Михаиле, кроткий страдальче за веру Православную.

Кондак 11

Пение молебное вознесл еси Господеви, отче святый Михаиле, егда злобные безбожники коварно тя схватиша и в темницу мрачную ввергоша, ты же в и заточении своем кротко воспевал еси Господеви: «Аллилуиа!».

Икос 11

Светозарен весь явился еси, пастырю наш благий и добрый, егда яко агнца кроткаго и незлобиваго, богоборцы, злобою омраченныя, тя, старца невиннаго, на расстрел влекоша и могилу ископати приказаша. Ты, из последних сил, могилу неглубокую себе ископал еси и разрешение помолитися перед казнью испросил еси, и тако по молитве ко Господу, мужественно душу свою в руце Божии предал еси. Почитая мужественный исповеднический подвиг твой и мученическую кончину твою, зовем ти:

Радуйся, все упование свое на Господа возложивший;

Радуйся, незлобием своим мучителей посрамивший.

Радуйся, подобно Спасителю, на Кресте распятому, молитву о них возносивший;

Радуйся, весь скорбный путь твой к месту расправы о пастве своей воздыхавший.

Радуйся, и в последния минуты перед казнью о страждущих скорбевший;

Радуйся, безбоязненно, с открытым лицем смерть от мучителей принявший.

Радуйся, мужеством своим Господа прославивший.

Радуйся, священномучениче Михаиле, кроткий страдальче за веру Православную.

Кондак 12

Благодатный дар веры непоколебимой испроси нам у Господа, отче Михаиле, да не погрязнем мы во тьме безбожия и злобы, да стяжем дух любви и долготерпения к ближним своим, дабы воспети нам вкупе с ними победную песнь: «Аллилуиа!».

Икос 12

Поюще добродетельное твое житие, преисполненное нелицемерной любви к Богу и ближним, мужественное исповедание веры Православныя и мученическую кончину твою от рук лютых безбожников, молим тя, пастырю наш добрый, не остави нас, грешных и недостойных, слабую веру свою укрепити чающих и из глубины сердечной взывающих к тебе тако:

Радуйся, кровью мученическою своею землю Вятскую освятивший;

Радуйся, светом и солию земли Российския бывший.

Радуйся, Господеви и народу Вятскому верно послуживший;

Радуйся, в радость Господа вкупе с ликом новомучеников Российских вшедший.

Радуйся, неустанный о нас молитвенниче;

Радуйся, в вере Православной наш добрый наставниче.

Радуйся, стойкому исповеданию веры нас научаеши;

Радуйся, мужественно следовати за Христом нас призываеши.

Радуйся, священномучениче Михаиле, кроткий страдальче за веру Православную.

Кондак 13

О, преславная похвало Церкви Российския / и Вятския земли духовный цвете, священномучениче Михаиле! / Приими воздыхания сердец наших, / с любовию тебе приносимыя, / и твоим неустанным предстательством ко Господу / дух правыя веры и благочестия в нас укрепи, / от учений душетленных нас отврати, / в добродетели и милосердии души наша утверди, / помози крест скорбей с терпением и кротостию понести, / да сподобимся души свои очистити / и в радость Господа внити / и воспети Ему со умилением: // «Аллилуиа, аллилуиа, аллилуиа!».

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О священному́чениче о́тче Михаи́ле, зе́млю Вя́тскую кро́вию свое́ю ороси́вый, ю́же за Христа́ излия́л еси́! Страда́ниями свои́ми Це́рковь укрепи́л еси́ и богобо́рческия шата́ния укроти́л еси́. Приими́ ны́не благомо́щное моле́ние на́ше и испроси́ у Бо́га и Го́спода Сил, И́же венце́м му́ченическим тебе́ увенча́вый, да даст Це́ркви Правосла́вней мир и да сохрани́т ю от раско́лов, ересе́й и нестрое́ний, град наш и всю зе́млю Ру́сскую да сохрани́т от мяте́жа и бра́ни, наше́ствия иноплеме́нник, тру́са, пото́па, огня́, меча́, нас же в ве́ре правосла́вней укрепи́т и всех к позна́нию и́стины призове́т. Научи́, о́тче Михаи́ле, да́нною ти от Бо́га благода́тию, нас гре́шных и неразу́мных любви́ ко Го́споду и бли́жнему своему́, милосе́рдию, нестяжа́нию и воздержа́нию. Наста́вь нас чад на́ших люби́ти и воспита́ти их в ве́ре и благоче́стии, да воспое́м вку́пе Бо́гу и благоде́телю на́шему, дарова́вшему нам тебе́, засту́пника и моли́твенника: сла́ва Тебе́, Бо́же, во ве́ки. Ами́нь.