Акафист преподобному Кукше, Киево-Печерскому, Почаевскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный последователю Христов и благодатию Его исполненный духовный преемниче великих монашествующих отцев, молися о нас, недостойных звания христианскаго, но искренне тя о Господе и Богородице любящих, и тепле поющих ́ти:

Радуйся, преподобне отче наш Кукшо, пророче предивный, целебниче и чудотворче.

Икос 1

Ангелом Творца и людем Отца и Учителя Единаго измлада возлюбив, издетска церковь Божию со тщанием посещал еси, и, якоже прежде Чудотворец Николай, первым в нея входя последним из Дома молитвы исходил еси, нынеже слышиши:

Радуйся, великий Божий угодниче;

Радуйся, блаженный Богородицы избранниче.

Радуйся, родителем твоим славо;

Радуйся, православным христианом похвало.

Радуйся, обязанности сыновнии рачительно исполнивый;

Радуйся, крест свой вземый и последовавый за Христом.

Радуйся, благое иго Спасителево приемый;

Радуйся, и бремя Его легкое имевый на себе.́

Радуйся, кротости у Господа Иисуса научивыйся;

Радуйся, пример смирения совершеннаго в Сыне Божием обретый.

Радуйся, родительскому дому Дом Божий предпочтый;

Радуйся, прилежно моливыйся в нем и Писание Священное слушавый.

Радуйся, преподобне отче наш Кукшо, пророче предивный, целебниче и чудотворче.

Кондак 2

Видя от демона мучимаго собрата к подвижнику преподобному его препроводил еси. И старец той святый стррдальца исцелив, гонения от мести лукаваго тебе предвозвести, яже от отрочества твоего все житие твое терпети имаши. Ты же пророчеству сему мужественно внимал еси взывая:Аллилуиа.

Икос 2

Разумеюще любовь твою к Божественному и Священному, отец и мати твои благословяху тя еще юношею, в Землю Святую паломничати, идеже увидел еси начавшияся совершатися над тобою Божии чудесы, приими же и приносимыя нами похвалы:

Радуйся, любовию жертвенною преисполненный;

Радуйся, душу за ближняго положивый.

Радуйся, козней демонских не убоявыйся;

Радуйся, на Господа уповаяй.

Радуйся, добльственно претерпевавый гонения;

Радуйся, безмятежно ожидавый от зол избавления.

Радуйся, всяпомышления твоя Богу посвятивый;

Радуйся, всею крепостию твоею Ему поработаяй.

Радуйся, Распятию Христову на Голгофе поклонивыйся;

Радуйся, благоговейно лобызавый Крест Христов Всечестный.

Радуйся, елеем, у Гроба Животворящаго на тя чудесно излившимся, от верху главы до подножия стоп твоих священнопомазанный;

Радуйся, одетый в купели Силоамской нечаянно омывыйся, на целомудренное духовное многочадие свыше благословен.

Радуйся, преподобне отче наш Кукшо, пророче предивный, целебниче и чудотворче.

Кондак 3

Силою долготерпения преоружен, твердое и долговременное отчее нежелание с тобою разстатися и посвятити тя ́Господу преодолел еси, и Богу и Богородице усыновитися по благодати Святаго Духа в Афонском уделе Пречистыя ́в той же час поспешил еси взывая: Аллилуиа.

Икос 3

Имея желание совершенному монашескому деланию научитися, наставника ́благоискуснаго и опытнаго взыскал еси,́и к старцу Мелхиседеку, трезвения и молитвы умныя делателю благодатному, с пользою для души твоея прилепился еси, мы же поем ти:

Радуйся, сыне богоугоднаго родителем послушания;

Радуйся, послуживый им с кротостию и благословение их обретый.

Радуйся, Христову заповедь о любви и жительстве совершенных к себе отнесый;

Радуйся, любовь двуединую к Богу и людем стяжавый и чрез все житие твое в пакибытие пронесый.

Радуйся, паче отца твоего земнаго возлюбивый в Троице Святей славимаго Господа;

Радуйся, Матерь Приснодевственную нас ради воплотившагося Сына Божия матери твоей кровней предпочтый.

Радуйся, в уделе Афонском Пренепорочныя Девы подвизатися возжаждавый;

Радуйся, во обители святаго великомученика и целителя Пантелеимона водворивыйся благословением Игумении Святыя Горы.

Радуйся, послушнический искус достойно прошедый и ноческаго пострижения сподобивыйся;

Радуйся, собою пополнивый славныя и добропобедныя афонския монашеския полки.

Радуйся, учителя богоноснаго молитвеннаго умнаго делания со тщанием иский;

Радуйся, отца духоноснаго, схимника и священника, милостию Божиею и изволением Богородичным сретевый.

Радуйся, преподобне отче наш Кукшо, пророче предивный, целебниче и чудотворче.

Кондак 4

Бурею гонения, воздвигнутаго на делателей непрестаннаго покаяния, тысяща боголюбивых русских иноков силою удалена быша от Святыя Горы, с ними же и ты, хотяй на Афоне умрети безвинный страдальче, в земное свое Отечество возвратился еси, поюще: Аллилуиа.

Икос 4

Слыша, яко уравнивают тя с нетленнопокоящимися в пещерах отцами святыми Лавры Киево-Печерския, в нюже Промышлением Божиим преселился еси, высокоумием и гордостию не уловился еси, себо прахом земным себе почитал еси, ныне же достойно прославляешися с преподобными:

Радуйся, под водительством опытным стяжавый умную, сердечную и самодвижную молитву Иисусову;

Радуйся, апостольскую заповедь непрестанно молитися исполнивый.

Радуйся, добропобедно подвизаяйся супротив поднебесных лукавых духов;

Радуйся, непрестанно пред Богом ходатайствуяй о прощении наших зол и грехов.

Радуйся, от демонов ненавидимый;

Радуйся, любве Божественныя преисполненный.

Радуйся, подвижниче препростый, с витиями, богословящими об Имени Божием, нестязавыйся;

Радуйся, смиренный иноче, неизреченными воздыхании Бога славивый, а не бедными человеческими усты.

Радуйся, Именем Иисусовым потребивый похоти плоти и очес;

Радуйся, гордость житейскую всецело исторгнувый и бесы проженый.

Радуйся, не собственною волею, а Божиею за послушание старцу твоему руководствуяйся;

Радуйся, промыслительно преселивыйся из Афонскаго жребия Пречистыя Богородицы в Ея Киевский удел.

Радуйся, преподобне отче наш Кукшо, пророче предивный, целебниче и чудотворче.

Кондак 5

Боготечно совершая подвижнический твой путь послушничество на иночество, сие же монашеством на Афоне пременил еси, яко степенями в Горняя восходя, в пещерах же Киевских о еже умрети миру и сподобитися схимы великия молился еси, хотя непрестанно взывати со Ангелы: Аллилуиа.

Икос 5

Видяще братия Печерская внезапу тя умирающа, восхотеша увенчати честное монашеское житие твое пострижением в великий ангельский чин, и тако внушением Духа Святаго не точию тайное желание твое исполниша, но и исцелиша, и воскресиша тя, мы же тако зовем:

Радуйся, чадо безпрекословнаго послушания;

Радуйся, достойно иночествующих собрате.

Радуйся, ангельскаго чина афонский воспреемниче;

Радуйся, великаго ангельскаго образа в пещерах Киевских сподобльшийся.

Радуйся, отверсты Небеса и славу Церкве Торжествующия молитвами старца Мелхиседека Схимника пред изгнанием твоим с Горы Святыя видевый;

Радуйся, по послушанию пещерника нетленныя мощи преподобнаго Силуана Схимника рукама твоима держа, о пострижении своем в той же чин, действенно помоливыйся.

Радуйся, душу свою за сие положити жаждаяй и ́близ уже придверех смерти ́бывый, обновивый ю во Христе и спасый;

Радуйся, не яко раб и наемник, а яко чадо Божие возлюбленное сугубаго молитвеннаго дерзновения преисполнивыйся.

Радуйся, по словеси преподобнаго Григория Синаита, подвижника Афонскаго, Духа Святаго благодатию освятивыйся и просветивыйся;

Радуйся, во свете Христовом увидевый души своея воскресение прежде Воскрешения всеобщаго. Радуй́ся, еще на земли денно и нощно трезвенно подвизавыйся, Царю Небесному выну предстояй;

Радуйся, выну отверсты к прошениям и славословиям твоим ушесы Божия имеяй.

Радуйся, преподобне отче наш Кукшо, пророче предивный, целебниче и чудотворче.

Кондак 6

Проповедника покаяния уже старцa летами тя соделывая Господь во диаконы и священномонахи тя возвел есть, да благодатию священства преоружившеся, делатель новый будеши на жатве Его, и в скорбех, и в радостех умеющий ииныя учащий пети Богу: Аллилуиа.

Икос 6

Просиял еси святостию во время мрака, лютости и браней исполнено, сего ради и пострадал еси от богоборец: взят был еси под стражу, осужден был еси за веру, и с разбойники причтен, в пределы северо-русския сослан был еси и заточен. Занеже и:

«Радуйся»,- многая слышиши:

Радуйся, старче, душею и телом благодатный;

Радуйся, от юности до престарения Богу посвященный и поработаяй.

Радуйся, подобно святому Саровскому старцу дух мирен стяжавый;

Радуйся, по егоже предуказанию тысящи верных ко Господу приведый.

Радуйся, на едине угождати Господеви желаяй и безмолвия иский, обаче по воле Божией на пользу братии и сестер повизавыйся;

Радуйся, себе внимая бервно из очесе своего духовнаго исторгнувый и ясно видети научивыйся.

Радуйся,священнодиаконом и пресвитером в Лавре Киевской послуживый;

Радуйся, и позакрытии святыя сия обители в Слободе Воскресенской града Киева достойно священствовавый.

Радуйся, безстрашно пред неверными и верными о Христе немолчно свидетельствовавый;

Радуйся, и самим твоим благодатию божественною просветленным обличием веру истинную безмолвно проповедавый.

Радуйся, за Христа судимый богоборцами и в темницу заключенный;

Радуйся, за веру свою пострадавый и в стране северной каторжно потрудивыйся.

Радуйся, преподобне отче наш Кукшо, пророче предивный, целебниче и чудотворче.

Кондак 7

Хотящему всем человеком спастися Иисусу Христу Сыну Божию и в темнице твоей священнически послужити сподобился еси, егда Честными Дары схиархиепископом Антонием Прозорливым из Киева тебе присланными, верных множество причастил еси, поющих Господеви: Аллилуиа.

Икос 7

Новаго Илию Фесвитянина в тебе имамы, яко и тебе, гладом мучиму, пятию хлебы, даже птенцы своя не питающим враному стражников твоих для тя восхищенными и тебе принесенными напитан и от смерти избавлен был еси.́Сего ради молитвенно ти зовем:

Радуйся, пророку Божию Илииу подобивыйся;

Радуйся, ревностный служителю Божий и добрый рабе Его.

Радуйся, гонения и опасности смертныя добльственно претерпевый;

Радуйся, ненавидящия и гонящия тямужеством твоим препобедивый.

Радуйся, яко и в твоей немощи сила Божия изрядно совершися;

Радуйся, ближним твоим и словом, и делом по заповеди Христовой помогаяй.

Радуйся, постниче крайний, вольный и невольный, от глада телом, яко трость ветром колеблема, бывый;

Радуйся, духом твоим, благодатию обоженным, столп веры несумненныя явивыйся.

Радуйся, до грехопадения прародителева бывшее господство над тварию во Христе Спасителе со отцы преподобными славно обретый;

Радуйся, яко в молитве у Господа служения вранова себе испросивый, нечестивыя гонители твоя пред чудом сим главы своя преклонити расположил еси.

Радуйся, хлебом богодарованным глад нестерпимый утоливый и умиленным и сердцем и усты пред стерегущими тя яве Бога прославивый;

Радуйся, Божественными Телом и Кровию не сам себе точию, но и ины христианы, священники и миряны, напитавый и утешивый.

Радуйся, преподобне отче наш Кукшо, пророче предивный, целебниче и чудотворче.

Кондак 8

Странно бысть гонителем твоим на трилетнее поселение в землю Пермскую тя сосланнаго, духом не унывающа и телом неутомима и здрава видети, яко Бог благодатию Духа Святаго силы ти обнови, немолчно поющу сердцем и усты: Аллилуиа.

Икос 8

Весь Киев град святый и Лавра Печерская Успения Богородицы возвращению твоему на место молитвенных подвигов и трудов первоначальников монашества русскаго Антония и Феодосия преподобных возрадовастася, и мы прерадостно тебе поем:

Радуйся, подвизаяйся и спасаяйся в духе кротости; радуйя, в селения Духа Утешителя сподобльшийся.

Радуйся, светом Христовым верныя и неверныя озаряяй;

Радуйся, просвещаяй неправедныя и праведныя освящаяй.

Радуйся, волков мысленных и гонителей не страшивыйся;

Радуйся, сретаемыя тобою заблуждшия овцы словесныя правою верою исполняяй и возгреваяй.

Радуйся, щите молитвенный града Киева;

Радуйся, обители Киево-Печерския насельниче святый.

Радуйся, схимническими труды Антонию Печерскому подражаяй;

Радуйся, святому Феодосию уподобивыйся, священническия ризы и звание игуменское достойно носяй.

Радуйся, братию лаврскую щедро питаяй и назидаяй;

Радуйся, прихожаны и паломники монастырския духовно пестовавый.

Радуйся, преподобне отче наш Кукшо, пророче предивный, целебниче и чудотворче.

Кондак 9

Всякия нужды и печали приходящих к тебе прозорливо провидел еси, и врачевание должное в меру и потребу всякаго подавал еси, еще же и от отчаяния советами богомудрыми и молитвами богоугодными избавлял еси, и пети всех́благ Подателю научал еси: Аллилуиа.

Икос 9

Витийствованию с человеками безмолвие и делание молитвенное предпочел еси, и плоды благодатными трудов сих духовных ко Господу Иисусу многия привел еси, яко на мужа Богу угодна, на тя взирающия, недуги душевныя и телесныя врачующа и похвалу сицевую от нас приемлюща:

Радуйся, верный Господень служителю, по дару божественныя благодати вся о всех ведый;

Радуйся, очима богопросвещенныма пороки и грехопадения людския видевый, страдаяй о сем и скорбяй.

Радуйся, высоту дарований твоих изрядных смиренномудрием и скромностию растворяяй;

Радуйся, мучениче вольный, даже до старости подвиги телесными себе измождаяй и силою духовною не оскудеваяй.

Радуйся, в Горняя воспаривый, худшим и грешнейшим всех человек себе почитаяй;

Радуйся, точию истинных рабов Божиих чадами своими о Господе именуяй и окормляяй.

Радуйся, боголюбче, о преумножении славы Божией и о еже достойным всем Господа быти пекийся;

Радуйся, братолюбче, во уверение монашествующих и мирян неленостно потрудивыйся.

Радуйся, светосияния сподобльшийся, многия помраченныя грехом очистивый;

Радуйся, святостию своею многия к вере правой приведый и утвердивый в ней.

Радуйся, врачу безмездный;

Радуйся, целителю благодатный.

Радуйся, преподобне отче наш Кукшо, пророче предивный, целебниче и чудотворче.

Кондак 10

Спасению из ближних и дальних весей притекающих служил еси, и богоборцами, ожесточившимися на тя за сие, из Лавры Киевския в Почаевскую сослан был еси, и, яко птица словесная с Афонския Горы в горы Киевския некогда, на Гору Почаевскую воспарил еси пети Богу: Аллилуиа.

Икос 10

Стене необоримой Почаевской чудотворной иконе Богородицы многажды припоклонени и братии и мирян предстоя лучами сияния ея благодатнаго просветился еси, и неизреченными ароматы райскими от нея облагоухался еси, ныне же святым обители сия почитаешися и слышиши:

Радуйся, вторицею из Киевскаго удела Пречистыя Приснодевы правды ради изгнанный;

Радуйся, Христа ради поношения и злословия гонящих тя грешников нераскаянных и завистников безропотно претерпеваяй.

Радуйся, из матери градов русских в землю Волынскую Божественным Промышлением и изволением Богородицы преселен;

Радуйся, сугубою благодатию Их зде посещаемый и утешаемый.

Радуйся, пред образом препрославленным Владычицы Небеси и земли и Богомладенца Иисуса многажды колена преклоняяй;

Радуйся, при целовании Их братиею Почаевскою и богомольцами иконе сей цельбоносней аки страж предстояй.

Радуйся, моливыйся Спасителю нашему и Марие Богоневестной и Приснодевственной за всех, с верою к Ним притекающих;

Радуйся, помощи чудесныя страждущим, бесов прогнания и исцелений свидетелю благодатный и соучастниче.

Радуйся, водою святою, от стопы нерукотворенныя на месте явления Богородицы, в столпе огненном древле бывшем, предивно источаемою, лице твое омываяй и жажду утоляяй;

Радуйся, ́явлений святаго Иова, игумена Почаевскаго при служении Литургии Божественныя близ мощей его нетленных в храме ему посвященном сподобльшийся.

Радуйся, грешников кающихся безчисленное множество исповедывавый, властию, тебе Богом данною, прощаяй их и от грехов разрешаяй;

Радуйся, в Таинстве Причащения Тела и Крови Христовых верныя питаяй и к животу вечному предуготовляяй.

Радуйся, преподобне отче наш Кукшо, пророче предивный, целебниче и чудотворче.

Кондак 11

Пение хвалебное яко отцу их преподобному и в Крещатицкой обители Буковинской слышиши, себо из Почаевския Лавры сюду сослан был еси, и место сие молитвами и бдении твоими освятил еси, во время же гонений новых в́Одесский патриарший монастырь преселился еси взывая: Аллилуиа.

Икос 11

Светлыми лучами Афонския иконы Божия Матери «Млекопитательницы» согревался еси последния четыре летатвоего земнаго пути, и Касперовскому чудотворному образу Богородицы с радостию поклонялся еси сыновне великия святыни сия града Одессы чествуя, сего ради тако тебе поем:

Радуйся, на горе над днестровской в обители святаго апостола Иоанна Богослова вселивыйся и подвизавыйся;

Радуйся, место сие пустынное возлюбивый и новым Афоном своим зовый.

Радуйся, ктиторе святый, ́церковь Покрова Божия Матери зде воздвигнувый;

Радуйся, молитвенниче благословенный и дерзновенный, преукрасивый сию и облагодатствовавый.

Радуйся, телесно отсюду изшедый, но духом твоим место сие объемляй и молитвами ограждаяй и благословляяй;

Радуйся, храмом Божиим, в память твою в обители сей устроенным, почтенный ныне и препрославленный.

Радуйся, православнии людстии земли Одесския пришельствием твоим возвеселивый;

Радуйся, христоненавистники и враги Божия преогорчивый сим и обезсиливый.

Радуйся, о трапезах духовных и вкушении утешения с предстоятелем приснопамятным Церкви Русския Алексием Первым в Крещатике пророчествовавый;

Радуйся, в Свято-Успенской Одесской обители патриаршей собеседником и духовником его ставый, сослуживый с ним и хлебы его с ним ядый.

Радуйся, властию богоборческою теснимый, но точию Господу служивый и рабом Его, к тебе притекающим, пособствуяй;

Радуйся, кроткий угодниче Божий и безсребренниче щедроподательный.

Радуйся, преподобне отче наш Кукшо, пророче предивный, целебниче и чудотворче.

Кондак 12

Благодатию Божиею щедро одарен, чудесы многия на пользу душ приходящих и приезжающих в обитель Одесскую Успения Божия Матери совершал еси, и веру правую в видевших дары сия, знаемому их и ближнему их низпосланныя, утверждал еси, с тобою поющих: Аллилуиа.

Икос 12

Поюще предсмертныя подвиги твоя и Господом благословенныя ти в болезни страдания, долготерпению и кротости твоим, и жажде молитвы храмовыя удивляемся, и яко чада и внуки твоя духовныя пред ракою мощей твоих цельбоносных преклоняемся, и сице молимся ти:

Радуйся, бесами одержимых работы вражия свобождаяй;

Радуйся, разслабленных и недвижимых возставляяй и укрепляяй.

Радуйся, неисцельно недугующих исцеляяй;

Радуйся, врачами отверженных умирающих оживотворяяй.

Радуйся, все житие твое не имый, где главу долговременне приклонити, страдания мученическия за старческое попечение твое пред отшествием к Богу вкусивый;

Радуйся, труждающуюся для брати и обители чадо твое духовное, старицу схимонахиню посетивый и в келию шедый, стегно себе преломивый и на смертный твой одр возлегий.

Радуйся, мужества преисполненный, место и обстоятельства безвременно спешнаго погребения твоего предведевый и прозорливо предуказываяй;

Радуйся, тридесять лет честными останки своими в земле монастырской покоивыйся и первым в соборе святых Одесскими именуемых, обретенный.

Радуйся, в лице отцев преподобных земнаго Отечества твоего первее просиявый, ныне же всею Русскою Церковию яко Исповедник прославленный;

Радуйся, сокровищницу духовную святынь велиих града сего и обители, тя упокоившия, собою преумноживый.

Радуйся, мощами твоими святыми с нами пребываяй и десницу твою лобызающих благословляяй;

Радуйся, молениям нашим внимаяй и купно с твоими ходатайствы Господу с Богородицею их приносяй.

Радуйся, преподобне отче наш Кукшо, пророче предивный, целебниче и чудотворче.

Кондак 13

О, преподобне отче наш Кукшо, внегда оставил еси отеческий твой дом, сугубым избранником Господа и Богородицы стал еси, и от юности твоея до старости достойно Им послужив, выну с любовию взывал еси и ныне со Ангелы взываеши: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О, преподобне и богоносне отче наш Кукшо, Святыя Горы Афонския и триех отечественных обителей Успения Божия Матери: Киевския, Почаевския и Одесския славо немеркнущая и пресветлая похвало! Из безвестности и бедности в юности призван был еси на служение Господу, и Казанским образом Пречистыя Богородицы материю твоею богобоязненною и боголюбивою на подвиг монашеский благословен, супротив похоти плоти, похоти очес и гордости житейския самоотверженно преоружился еси, ведая, яко брань христианом не супротив плоти и крови, а супротив начальств, и властей, и миродержителей века сего, невидимых, но неусыпно и ощутительно на нас нападающих, предлежит. Многая злострадания и гонения непрестанныя все житие твое мужественно терпел и добропобедно претерпел еси, видя на себе самем, яко воистину сила Божия совершается в человеческой немощи. Смиренномудрия и кротости исполненный, преизобильную благодать Святаго Духа на себе привлекл еси, и в сердце твое, предочищенное от страстей, яко в храм живый, таинственное Божественное вселение приял еси, даров пророчества, цельбы и чудотворения сподобивыйся. Еще же и тела твоего освящения и сохранения святых мощей твоих благодать обрел еси,сего ради пред ними тебе поклоняемся, щедроподательную помощь ́Божию приемлюще и истинно уверяющеся, яко много может молитва богоугодная твоя, отче святый, во благая нам поспешествующая. Не лишай же нас и впредь твоея милости: прощения согрешений наших испроси, недуги исцели, от плена бесовскаго и тлена страстей, нас мучающих и губящих, свободи, и в час кончины нашея прииди к нам и помози, да спасение улучим, и с тобою хвалим, славим, величаем и поем в Троице Святей славимаго Бога нашего Отца Безначальнаго, Сына Единороднаго и Духа Святаго Животворящаго в безконечныя веки веков. Аминь.