Акафист равноапостольному Косме Этолийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избраннаго в новомученицех, всеблаженнаго, и Этолии отрасль Богопрозябшую, воспеваем, вопиюще согласно, ты же молитвами своими, Космо, к Человеколюбцу, чтущия тя от всяких бед свободи, да зовем:

Радуйся, отче всеславный.

Икос 1

Ангел предстатель Еллады всея, Космо священноявленне, показался еси, благочестию потщався научити от агрян плененныя, тем тя хвалим песньми, сице зовуще:

Радуйся, Христа прославивый;

Радуйся, враги низложивый.

Радуйся, Этолии сыне всеславный;

Радуйся, благочестия питателю трисветлый.

Радуйся, венче украшенный иереев благочестивых;

Радуйся, крине непорочный страстотерпцев святых.

Радуйся, бедствующих еллинов сокровищнице;

Радуйся, чужелюбцев неверных обличение.

Радуйся, ополчения безбожных противоборче;

Радуйся, учителей святых проповедание.

Радуйся, имже благочестие умножися;

Радуйся, имже вера утвердися.

Радуйся, отче всеславный.

Кондак 2

Житие девственное и чистоту издетска возлюбив, на высоту безстрастия Косма взыде, подвиги же восприяв, радостно вопияше: Аллилуиа.

Икос 2

Разумом Божественным ум просветив, отвержеся Косма земных, и Боголюбив сый, во обители Филофейстей поживе. Сего ради слышит от всех сицевая:

Радуйся, воздержания подвижниче;

Радуйся, безмолвия таинниче.

Радуйся, общежития правило священное;

Радуйся, ризою девства украшенный.

Радуйся, горо невосходная таинств Божественных;

Радуйся, свитче откровений неизреченных.

Радуйся, всякое наслаждение отрясый;

Радуйся, попечения земныя отложивый.

Радуйся, Ангелом всем единонравный;

Радуйся, нищеты священныя ревнителю.

Радуйся, чистоты поборниче;

Радуйся, злобы противоборче.

Радуйся, отче всеславный.

Кондак 3

Уязвленьми ядовитыми и грехи многими неврежден пребыл еси, тех нахождения посекая мечем поста и молитвы, непрестанно Спасу всех вопияй: Аллилуиа.

Икос 3

Имея житие, Безплотным Чином подобящееся, на гору Боговедения возшел еси, смертным неприступную, темже похвальными словесы, страстотерпче, днесь память твою почитающе, зовем ти, Богоносне:

Радуйся, благочестия грозде;

Радуйся, благомужества отрасле.

Радуйся, небеснаго закона содержителю;

Радуйся, благодатию свыше украшенный.

Радуйся, страстей демонских низложителю;

Радуйся, потоцы двизаний уставляяй.

Радуйся, Боголюбия наслаждения возжелавый;

Радуйся, стремления плотския умертвивый.

Радуйся, светлый Троицы избранниче;

Радуйся, Святыя Горы земледельче.

Радуйся, любве предела разумение;

Радуйся, жизни вечныя наследниче.

Радуйся, отче всеславный.

Кондак 4

Житие на Горе провождая в Дусе Божественнем, небесныя дары стяжал еси, и света исполнь, тьму страстей душетленную, всеблаженне, отгнал еси, пояй разумно песнь: Аллилуиа.

Икос 4

Слышав вопль и стенание в работе сущих братий твоих, потщался еси приити к ним, по словеси Павлову, да некия спасеши. Тем зовем ти:

Радуйся, Ангелов похвало;

Радуйся, христиан утверждение.

Радуйся, злобы мучителей ослабление;

Радуйся, еллинов страждущих опоро.

Радуйся, уз неверных облегчение;

Радуйся, душ тех работы свобождение.

Радуйся, христоненавистных присное посрамление;

Радуйся, православных небесное веселие.

Радуйся, душ мужеством облечение;

Радуйся, светлый преподобных венче.

Радуйся, рог верных вознесый;

Радуйся, ополчения вражия победивый.

Радуйся, отче всеславный.

Кондак 5

Ловец сый, от богоубийц, уловлен, Богомудре, подвиги неустанными, яко врабий же, божественный Космо, красно душу облекл еси, постом и молитвою, зовый непрестанно сице: Аллилуиа.

Икос 5

Священно странствовав, Богом вхохновляем, ят был еси немилосердно руками рождений Агариных, страстотерпче, в жертву Первосвященнику Великому принеслся еси, тем в работе сущий Еллинский род вопияше:

Радуйся, Этолии отрасле;

Радуйся, македонян красото.

Радуйся, Епира божественный иакинфе;

Радуйся, Иллирии благоуханный наркиссе.

Радуйся, Навпакту и Аграфе во утверждение дарованный;

Радуйся, Скиафа и Скопела честный учителю.

Радуйся, Керкире явлейся форминга;

Радуйся, Паргу познавыйся труба.

Радуйся, Жичи неколебимое утверждение;

Радуйся, Коницы божественная похвало.

Радуйся, Химарры светильниче светоносный;

Радуйся, Еллады всея славо.

Радуйся, отче всеславный.

Кондак 6

Проповедал еси благочестно отеческия догматы, учения безбожныя низложив, отче, и христоотметник потоки изсушив, несумненно учай Троицу почитати Святую, поюще: Аллилуиа.

Икос 6

Разрушил еси измышления агарянския благодатию словес, яко паучину лесть растерзав инославия, Космо, множества во истине наставив, яже ти вопияху со дерзновением:

Радуйся, Ианнины просветителю;

Радуйся, Богословия блистание.

Радуйся, умов помраченных вразумление;

Радуйся, падших явлейся востание.

Радуйся, Павла равностоятелю и последователю светлый;

Радуйся, преподобных мученик утверждение.

Радуйся, яко Cедми Островом проповедал еси;

Радуйся, яко мучителей падение предрекл еси.

Радуйся, пророчества дар свыше приявый;

Радуйся, дольняя мудрствующих обличивый.

Радуйся, гордыню вражию низложивый;

Радуйся, богатство земное возненавидевый.

Радуйся, отче всеславный.

Кондак 7

Меда сладчайше быша уста твоя, еллином путь спасения сказующия, Богодухновенными бо словесы твоими, Богоблаженне, люди наставил еси во истине звати: Аллилуиа.

Икос 7

Нов Павел явился еси в последняя времена, божественными странствии и болезньми, сего ради агарянския, страстотерпче, низложил еси полки, ум на небеса возводя, тем зовем ти:

Радуйся, проповедниче Богословия;

Радуйся, учителю душеполезный.

Радуйся, жену, от демона одержимую, избавивый;

Радуйся, блудники и прелюбодеи обличивый.

Радуйся, крине многокрасный, облагоухаяй верных;

Радуйся, стено ограждения от злобы вражия.

Радуйся, благочестия семена всеявый;

Радуйся, грешныя ко благу воставивый.

Радуйся, источниче благодати неизсякаемый;

Радуйся, пристанище сый благоутишное.

Радуйся, Космо, иереов украшение;

Радуйся, Космо, мира красто Божественная.

Радуйся, отче всеславный.

Кондак 8

Странно бысть зрение, како мужие злодейственныя обратишася к добродетели, послущающия словеса твоя, души бо тех скользкия, изменил еси, всебогате, и наставил еси, мудре, звати: Аллилуиа.

Икос 8

О, Богомудре пророче, в стране Епирстей возвестил еси слово Господне, предзрев бегство грядущее, еже и бысть, тем сбытие словес твоих пророческих зряще, вопием сице:

Радуйся, обычаев чужеродных низложителю;

Радуйся, отеческих преданий воставителю.

Радуйся, начальниче еллинов дерзновения;

Радуйся, христоненавидцев евреов мучение.

Радуйся, бурю уставивый чудно;

Радуйся, безбожных гордыню низложивый абие.

Радуйся, яко собрал еси благочестивых паству;

Радуйся, яко потрясл еси нечестивых седалища.

Радуйся, светлое благодати познание;

Радуйся, честное верных сокровище.

Радуйся, нищих единоплеменных уста;

Радуйся, народа порабощеннаго языче.

Радуйся, отче всеславный.

Кондак 9

Дыша злобою род Богоубийц евреев, желающе умертвити тя, Этолии подвижниче Космо, обаче Христос тех низложи тщания, вернии же вопияша сице: Аллилуиа.

Икос 9

Поточе благочестия, изведен водою, новоявленный милостиею, всесладчайший, во всех известных всепетый, воспеваем в память о твоем славнем на брег изнесении:

Радуйся, поточе подношения;

Радуйся, хранителю честных догматов.

Радуйся, жен честное украшение;

Радуйся, мужей праведное любоздравие.

Радуйся, яко пришел еси в помошь верным;

Радуйся, яко правители вожди омрачивый.

Радуйся, яко облегчаяй бедным бремя;

Радуйся, богатящимся опустошаяй державу.

Радуйся, Христов жрец преславный;

Радуйся, наш готовый управитель.

Радуйся, сущих в печали спасителю;

Радуйся, неизреченнаго зла разрешение.

Радуйся, отче всеславный.

Кондак 10

Труба спасения новозвучная, возвещающая Христово царство, всех бо учения твоего послушающих, научал еси послушанию, зовый сице: Аллилуиа.

Икос 10

Погибаяй в трудех, ревнитель сый, священномучениче, древних отец страдалец, кровьми честными украсился еси, Космо Богоблагодатне, тем ти вси зовут:

Радуйся, мучениче Богоносче;

Радуйся, великий победоносче.

Радуйся, волею потщался еси во страстех;

Радуйся, пречестый вожделенный воине.

Радуйся, огнем и водою крестивый верныя;

Радуйся, Святым Духом удавивый врага.

Радуйся, яко показал еси путь стойкости;

Радуйся, яко разсеял еси нечестивых веяния.

Радуйся, странное житие поживый;

Радуйся, демонов хитрость поправый.

Радуйся, многих отданных в рабство свобождаяй;

Радуйся, смертных равнославных победо.

Радуйся, отче всеславный.

Кондак 11

Пение хвалебное неумолчно возносится, Космо, прославляя дивныя чудеса твоя, от мощей твоих исходящия, с тобою воспевати Господу песнь: Аллилуия.

Икос 11

Свет, просвещаяй множества познался еси, и столп нам светосияяй истины, источником бо кровей твоих, верных души просвещаеши, вопиющих ти таковая:

Радуйся, спутниче Закона;

Радуйся, еллинов святче.

Радуйся, преподобных возвеселяяй собрания;

Радуйся, мученик возвеличивый число.

Радуйся, прошедый горизонт Земли;

Радуйся, возвеселяяй даваяй жизнь.

Радуйся, священниче всеблаговонный;

Радуйся, приимый вечную славу.

Радуйся, болящим безплатное средство;

Радуйся, чудес источниче приснотекущий.

Радуйся, чудес неисчерпаемое средство;

Радуйся, струе неисчерпаемая чудная.

Радуйся, отче всеславный.

Кондак 12

Благодати Утешителевы исполненное, от вод прият тело твое Марк, и, радуяся, яко злато честное, под землею сокры, о тебе, Богоблаженне, вопия благочестно песнь: Аллилуиа.

Икос 12

Поюще ти песнь, хвалим скончание твое, мучениколюбцы вси, яко агнец бо Христови принесл еси веры ради кровь свою, и вся подвизаеши звати ти, Богоносне, сице:

Радуйся, славный Творца венче;

Радуйся, преподобных новых начальниче.

Радуйся, храме Троицы пречестный;

Радуйся, мудрый человеков учителю.

Радуйся, священное честнословие православных монахов;

Радуйся, высото недосягаемая добродетелей пачеестественных.

Радуйся, Иллирии твердое основание;

Радуйся, нивы Церковныя орошение.

Радуйся, песне, Христу воспеваемая;

Радуйся, жития чистаго образе.

Радуйся, блаженств нескончаемых причастниче;

Радуйся, веселия со Ангелы наследниче.

Радуйся, отче всеславный.

Кондак 13

О всехвальне отче, православных похвало, Космо, священномучениче Господень, из глубины сердечныя приносимыя похвалы сия прияв, не престай молитвами своими укрепляти поющих тя и Спасу вопиющих: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О священная главо, преславный чудотворче, священномучениче Космо равноапостольне! К тебе припадаем и молимся мы, смиреннии и грешнии, и яко отца чадолюбиваго просим: всели в сердца наша любовь твою, еюже к Богу и ближним твоим, при жизни твоей преисполнен был еси, яко и душу свою за паству твою положил еси, мученически от агарян пострадав: научи нас, отче, тебе подражати верно, Бога и ближних наших любити искренно, и заповеди Господни совершати непогрешительно: да будем и мы чада твоя, не по имени токмо, но самым делом и всем житием нашим. Молися, угодниче Божий, ко Христу Богу, о святей православней Церкви и отечестве твоем и о всех христианех: да пребудут в мире и благостоянии и процветают в благочестии христианстем непоколебимы. Призри благоутробно на всяку душу христианскую, милости и помощи от тебе ищущую: всем нам, в болезнех целитель, в скорбех утешитель, в печалех избавитель, в бедах помощник, в час смертный покровитель: да при помощи молитв твоих святых, сподобимся и мы грешнии спасение вечное получити и царство Христово унаследовати. Ей, священномучениче Христов! Не посрами упования нашего, еже по Бозе и Пресвятей Богородице на тя крепко возлагаем, но яви нам твое многомощное заступление: да хвалим, славим и величаем великое человеколюбие дивнаго во святых Своих Бога, Отца и Сына и Святаго Духа, во веки веков. Аминь.