Акафист священномученику Павлу (Гайдаю) Одесскому, пресвитеру

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный от Господа воине духовный и чудотворче предивный, светозарное светило земли Одесския, богомудре и вседоблественне отче наш Павле, крест служения священническаго от Господа восприявый и даже до смерти Подвигоположнику своему последовавый, Сего моли, да помилует нас, со умилением зовущих ти: Радуйся, отче наш Павле, богоизбранный исповедниче Христов.

Икос 1

Ангелов Творец, ведый коегождо от чрева матере, избра тя служителя Церкве Святей, да пастырь добрый явишися, жезлом учений твоих паству словесную наставляющий и от волков душехищных ограждающий. Сицевому о сем смотрению Божию дивящеся со благоговением глаголем ти:

Радуйся, родителей благочестивых богоугодное рождение.

Радуйся, Божия саждения благоуханное прозябение.

Радуйся, от лет юных отцев духоносных творения познавый.

Радуйся, Божественное учение восприявый.

Радуйся, Евангельския словеса в житии воплотивый.

Радуйся, прелести мира сего ни во что же вменивый.

Радуйся, разум правый Боговедения стяжавый.

Радуйся, волю свою воле Господней всецело предавый.

Радуйся, отче наш Павле, богоизбранный исповедниче Христов.

Кондак 2

Видя духовныма очима, яко не воскреснут нечестивии на суде праведнем, суть бо яко прах, егоже возметает ветр; от юных лет на совет нечестивых не шел и на пути грешных не стал еси: но Писанию Священному усердно поучаяся, стопам Сладчайшаго Господа Иисуса Христа неуклонно последовал еси даже до смерти, воспевающе: Аллилуиа.

Икос 2

Разум Христов стяжав, уклонился еси от стезей неправды и стопы своя направил еси на путь мирен, во еже присно ходити путем заповедей Господних и волю Его творити непрестанно . Сего ради вопием ти:

Радуйся, благодатию Божией освященный.

Радуйся, сиянием разума духовнаго украшенный.

Радуйся, Милостей Господних всем сердцем взыскавый.

Радуйся, Правды Божией взалкавый.

Радуйся, Хлебом небесным насыщенный.

Радуйся, Питием бессмертия напоенный.

Радуйся, на служение пастырское предизбраный.

Радуйся, венцем небесным увенчанный.

Радуйся, отче наш Павле, богоизбранный исповедниче Христов.

Кондак 3

Сила Божия, немощи человеческия укрепляющая и оскудевающая восполняющая, преизобильно излияся на тя отче наш Павле, егда от десницы святительския благодать священства восприял еси, да явишися молитвы столп огненный, верных души просвещающий во еже присно пети: Аллилуиа.

Икос 3

Имеяй воистину сердце свое утверждено о Господе, блаженне Павле, делание пастырское добре сотворил еси: словесныя овцы своя неврежденно к Пастыреначальнику Христу привел еси. И ныне молитвами твоими во Православии утверди всех, поющих ти сицевая:

Радуйся, пастырю наш добрый.

Радуйся, отче милостивый и кроткий.

Радуйся, образе терпения и смирения.

Радуйся, верных среди соблазнов утвержение.

Радуйся, во броню правды облаченный.

Радуйся, щитом благодати Божией покровенный.

Радуйся, Евангелия проповедниче.

Радуйся, Господней Нивы добрый делателю.

Радуйся, отче наш Павле, богоизбранный исповедниче Христов.

Кондак 4

Буря огненная обыде Отечество и возрастоша на земли нашея богопротивныя плевелы расколов и нестроений, ихже всемудренно исторгал еси серпом учений твоих,отче наш Павле, волю Божию людем возвещающе и пети Господу присно научающе: Аллилуиа.

Икос 4

Слышаша и видеша людие православнии крепость исповедания и твердость непоколебимую веры твоея, отче треблаженне, не устрашилися есть державы безбожныя, но крест мучения приимше, ко страстем всерадостно шествовали есте, тя, яко наставника своего воспевающе и похвалы сицевыми ублажающе:

Радуйся, вечныя Правды благовестниче.

Радуйся, Церкве Христовыя несокрушимый поборниче.

Радуйся, догматов твердый хранителю.

Радуйся, ересей и расколов обличителю.

Радуйся, чистоту веры даже до конца сохранивый.

Радуйся, словом своим многия умудривый.

Радуйся, на путь спасительный верных наставляющий.

Радуйся, от стезей неправды отвращающий.

Радуйся, отче наш Павле, богоизбранный исповедниче Христов.

Кондак 5

Боготечней звезде уподобился еси, отче, вселенную всю озаряющей лучами благодати и верныя на путь спасительный наставляющей, последствующе бо стопам твоим, достигнути возможем незаходимыя славы Небесного Царствия, идеже ты купно со всеми святыми песнь Богу воспеваеши: Аллилуиа.

Икос 5

Видяще яко разорити тщатся нечестивии завет Господень, храмы разрушающе и олтари раскапающе, священнослужители и верныя чада церковныя избивающе, ревнуя поревновал еси о Господе Бозе Вседержителе и посреде тьмы безбожия яко светильник явился еси, правдою пламенеющий, сего ради приими от нас похвалы сия:

Радуйся, Путем Господним присно ходивый.

Радуйся, многих от путей погибельных отвративый.

Радуйся, свеще, огнем ревности божественныя пламенеющая.

Радуйся, кадильнице, фимиамом молитвы благоухающая.

Радуйся, добродетельнаго жития ревнителю.

Радуйся, демонскаго нечестия посрамителю.

Радуйся, отеческих уставов хранителю.

Радуйся, людей христоименитых защитителю.

Радуйся, отче наш Павле, богоизбранный исповедниче Христов.

Кондак 6

Проповедник преславный явился еси, отче наш Павле, не точию усты, но и всем житием твоим Господа прославляющий, нищим благотворящий, странныя упокоевающий, алчущия питающий и всех научающий Богу воспевати: Аллилуиа.

Икос 6

Возсиял еси яко светильник всесветлый, тьму неверия озаряющий и путь к Небеси указующий, верных же от сетей и соблазнов отвращающий, да стопам твоим последствующе и тя, яко браз добродетельного жития имуще, достигнем незаходимыя славы Царствия Христова, тя, яко наставника воспевающе похвалы сицевыми:

Радуйся, благочестивых отрадо и утешение.

Радуйся, колеблющихся в вере твердое ограждение.

Радуйся, спасения многих взыскавый.

Радуйся, вся любовию своею объявый.

Радуйся, путем тесным в радость Господа возшедый.

Радуйся, вся красная мира сего во уметы вменивый.

Радуйся, росо, еюже огнь безбожия угашается.

Радуйся, море, имже зловерие потопляется.

Радуйся, отче наш Павле, богоизбранный исповедниче Христов.

Кондак 7

Хотяще путем Господним присно шествовати, уклонился еси стезей неправды и от путей лукавых многия отвратил еси, наставленьми и добродетельми твоими образ быв чадом твоим духовным, темже, яко пастырь добрый Господу ныне предстоиши и глаголеши: "Се аз и дети, яже ми дал еси, ихже научил Ти служити и молитися непрестанно: Аллилуиа.

Икос 7

Дивныя и преславныя чудеса показа тобою на земли Всех Творец и Владыка, егда ты, благодатию Святаго Духа исполненный, покрывал от бед и соблазнов паству твою словесную. Тако и по преставлении ко Господу ограждаеши невредно грады и веси, идеже подвиг твой совершал есть, и живущих в них от смерти и нападений вражиих. И ныне теплым предстательством твоим заступаеши верныя, со умилением взывающия ти таковая:

Радуйся, милостей Господних явление.

Радуйся, благоутробия Божественнаго знамение.

Радуйся, благодати источниче неоскудеваемый.

Радуйся, милости кладезю неистощимый.

Радуйся, огненный столпе, во тьме светлосияющий.

Радуйся, путь истинный нам указующий.

Радуйся, звездо, верных к Богу путеводящая.

Радуйся, солнце, путь ко Христу освещающее.

Радуйся, отче наш Павле, богоизбранный исповедниче Христов.

Кондак 8

Странно и недомыслимо есть мудрецам суемудрствующим века сего твое еже по Бозе житие нескверное и подвиг преславный. Ты же отче, буйство сих обличающе, ко страстем неуклонно шествовал еси, сердце молитвою укрепляюще и Подвигоположнику непрестанно поюще: Аллилуиа.

Икос 8

Весь украсился еси добродетельми, отче наш преславне, и в жертву Господеви чисту и непорочну себе уготовал еси, молитвою и богослужением душу очищающе и благодатию сердце укрепляюще, да посреде страстей и мучений яко адамант всетвердейший явишися, похвалы сими ублажаемый:

Радуйся, яко злато, в горниле страдания очищенный.

Радуйся, питием страстей яже за Христа напоенный.

Радуйся, душу свою за стадо твое положивый.

Радуйся, подвигом своим нас в Православии укрепивый.

Радуйся, яко оружие Крест Христов приемый.

Радуйся, тем всезлобную ярость победивый.

Радуйся, светом небесным души наша озаряющий.

Радуйся, и ныне благословением твоим нас осеняющий.

Радуйся, отче наш Павле, богоизбранный исповедниче Христов.

Кондак 9

Всякия скорби претерпел еси, отче богомудре Павле, со Апостолом вопия: вся могу о укрепляющем мя Иисусе. Темже от скорби многомятежныя мира сего возшел еси в радость Господа своего, крест Христов яко знамение страдания носяще и Господу воспевающе песнь победную: Аллилуиа.

Икос 9

Витийствующие всуе безумнии проповедатели безбожия не возмогоша соблазнити тя, отче преславне Павле, но, яко апостол язык буйством проповеди евангельския посрамил еси суемудрствующее безумие мира сего обличил еси и даже да смерти Подвигоположнику последовал еси, сего ради сицевыми похвалы ублажаешися:

Радуйся, подвигом своим ангелов удививый.

Радуйся, терпением своим бесовския дерзости посрамивый.

Радуйся, образе исповедничества всетвердый.

Радуйся, Православия поборниче препетый.

Радуйся, любовию твоею всему миру возсиявый.

Радуйся, подвиги своими вся облиставый.

Радуйся, Царствия Христова наследниче.

Радуйся, Пасхи вечныя причастниче.

Радуйся, отче наш Павле, богоизбранный исповедниче Христов.

Кондак 10

Спасительнаго подвига твоего, богомудре, достигл еси скончания, течение совершил, веру соблюл, темже восприял еси от Праведнаго Судии венец правды и в незаходимей сияеши славе, непрестанно воспевающе: Аллилуиа.

Икос 10

Стена еси ты и покров всем приходящим к тебе, пастырю добрый, молитвами бо твоими обитель устояется на месте, идеже первее подвизался еси, и иночествующих лики славу твою возвещают и в молитвах тя, яко предстателя и заступника ублажают, взывающе присно:

Радуйся, заступление наше всекрепкое.

Радуйся, пение наше хвалебное.

Радуйся, духовных чад твоих радосте.

Радуйся, земли нашея сокровище.

Радуйся, яко тобою бесовския полки отгоняются.

Радуйся, яко тобою верныя радости исполняются.

Радуйся, яко предстательством твоим жизнь вечная обретается.

Радуйся, яко молитвами твоими вера истинная познавается.

Радуйся, отче наш Павле, богоизбранный исповедниче Христов.

Кондак 11

Пение похвальное и мольбы наша прими, отче наш Павле, от любви наше тебе возносимыя и всемощным предстательством твоим от всякия напасти, греха и искушения огради всех, о тебе Богу зовущих: Аллилуиа.

Икос 11

Царь Небесный приял есть тя в покой свой яко раба благаго и вернаго и венцем нетленным увенча подвиги и труды твоя, отче наш всечудный, темже ныне Небесныя славы причастник явился еси и молитвенник о людех православных, пение сицевое ти приносящих:

Радуйся, Светом Невечерним озаренный.

Радуйся, Славою Божией просвещенный.

Радуйся, мглы неверия отгонителю.

Радуйся, лживыя неправды потребителю.

Радуйся, всемощное ересей посрамление.

Радуйся, всесветлое прелести попрание.

Радуйся, неверия грозный обличителю.

Радуйся, Тайн Божиих верный служителю.

Радуйся, отче наш Павле, богоизбранный исповедниче Христов.

Кондак 12

Благодати Божией источник неоскудеваемый явился воистину всем отче наш Павле; никто бо, притекаяй к тебе не отходит тощ и неутешен, но помощник скорый являешися всем, благодатную помощь твою прославляющим и Дивному во святых Своих Богу: Аллилуиа.

Икос 12

Поюще подвиги и страдания твоя, отче наш Павле прославляем мученическую кончину твою, еюже страсть Сына Божия в телеси своем прославил еси, почитаем память твою и сицевая радостно приносим ти:

Радуйся, селений небесных преславно достигнувый.

Радуйся, в чертозех пресветлых водворивыйся.

Радуйся, огнем любве Христовы сердца наши согревающий.

Радуйся, росою молитв страстями палимые души наша прохлаждающий.

Радуйся, вселукавых духов прогонителю.

Радуйся, козней диавольских победителю.

Радуйся, яко тобою от напастей избавляемся.

Радуйся, яко тобою благодати сподобляемся.

Радуйся, отче наш Павле, богоизбранный исповедниче Христов.

Кондак 13

О, всеблаженный священномучениче Христов отче наш Павле, приими малое сие моление, в похвалу твою приносимое и ходатайством твоим от искушений нас и бед свободи, да тобою наставляеми, велегласно воспеваем Господу: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О добрый наш пастырю и богомудрый наставниче, преподобне отче Павле! Услыши нас грешных, молящихся тебе и призывающих в помощь скорое предстательство твое: виждь нас грешных, в толицех обстояниих сущих, виждь нас немощных, отвсюду уловляемых, всякаго блага лишенных и умом от малодушия помраченных: потщися, угодниче Божий, не оставити нас в греховном плену быти, да не будем в радость врагом нашим и не умрем в лукавых деяниях наших. Моли о нас недостойных Содетеля нашего и Владыку, Емуже ты со безплотными лики предстоиши. Милостива к нам сотвори Бога нашего в нынешнем веце и в будущем, да не воздаст нам по делам нашим и по нечистоте сердец наших, но по своей благости воздаст нам: на твое бо ходатайство уповающе, твоим предстательством хвалимся, твое заступление на помощь призываем и, к цельбоносному гробу твоему припадающе, исцеления просим: избави нас, угодниче Христов, от злых, находящих на нас, и укроти волны страстей и бед, востающих на нас, да ради святых твоих молитв не обымет нас напасть, и не погрязнем в пучине греховней и в тине страстей наших. Моли, преподобне отче Павле, Христа Бога нашего, да подаст нам мирное жительство, оставление грехов, душам нашим спасение и велию милость. Аминь.