Акафист святителю Арсению Элассонскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Возбранный святыя Церкве добрый воине и верных о Христе языков единителю, восхваляем тя любовию, святителю отче Арсение, ты же, яко имеяй дерзновение ко Господу, моли Тoгo укрепити сердца наша о вере православней, да в союзе мира Духом Истины соблюдаеми, зовем ти: радуйся, Арсение, благочестия непоколебимый столпе.

Икос 1

Ангельскаго взыскуя образа, мати бо и старейша братия твоя уже в монашестем чине быша, добре потрудился еси в иноческом житии, Арсение боголюбиве, подвизаяся молитвою и послушанием, паче же поучаяся в Писании Священнем и пользу от книг собирая. Ведуще убо мы, яко богоразумия и добродетелей твоих ради поставлен был еси в архипастыря греческаго града Геласонска, глаголем ти сице:

Радуйся, Апостолом во Крещении святем прозорливо нареченный;

радуйся, древнею и святою землею греческою в добронравии воспитанный.

Радуйся, лику инокующих тамо вчиненный;

радуйся, и честнейшим епископства саном от неяже почтенный.

Радуйся, от патриарха Цареградскаго посольником в Россию посланный;

радуйся, святую Русь Отечествие новое обретший.

Радуйся, Арсение, благочестия непоколебимый столпе.

Кондак 2

Видевше епископ града Львова и вси вернии, яко от Бога разумлив и в еллинском языце премудр еси, Арсение богословесне, умоляша тя усердно, да учиши малая дети и юныя отроки их правоверию, и егда согласился еси, благодарно воспеша Богу: Аллилуиа.

Икос 2

Разумению наречия словенскаго навыкший, первую написал еси, просветителю Арсение, «Грамматику доброглаголиваго еллинословенскаго языка в научение многоименитому роду российскому», от нея же последи неисчетнии сынове Церкве нашея в заповедех Господних поучашася добре. Сего убо ради вопием ти тако:

Радуйся, правыя веры благовестниче;

радуйся благочестия и добронравия учителю.

Радуйся, от инославия суемудраго ограждение;

радуйся, неверия и нечестия искоренителю.

Радуйся, от архипастыря Львовскаго трудов твоих ради благопохвальная стяжавый;

радуйся от патриарха Цареградскаго благословения за тыя удостоенный.

Радуйся, Арсение, благочестия непоколебимый столпе.

Кондак 3

Сильную о вере правой державу российскую защищение крепкое всем христианом, от восток солнца сущым и в области агарян страждущым, помышляя быти, благоуветливыми словесы твоими, богодвижне Арсение, согласил еси первосвятителя Цареградскаго к поставлению на Руси патриарха, люди же ея с радостию воспеша Богу: Аллилуиа.

Икос 3

Имея на Москве жительство близ палат царевых и служение присное при гробех преждепочивших государей российских в соборнем храме святых Архангел, вмале не вся имения твоя, безмездниче Арсение, даял еси на строение церковное. Мы же, ведуще, яко нестяжания ради мзда твоя многа на небесех, восписуем ти похвальная сия:

Радуйся, земли Российския усердный храмоздателю;

радуйся, святым обителем горы Афонския щедротный благотворителю.

Радуйся, рукою твоею святое Евангелие красно преписавый;

радуйся, святыя тоюже иконы художне начертавый.

Радуйся похвалы праздничная святому Василию Блаженному сложивый;

радуйся, чудотворцы российския чисте возлюбивый.

Радуйся, Арсение, благочестия непоколебимый столпе.

Кондак 4

Бури наставши нарицаемаго Смутнаго времене, низложи самозваный правитель со стола патриаршаго первосвятителя Иова и повеле в его место инаго избрати соборне. Ты же, благосерде Арсение, увещавал еси освященный Собор, да паки поставят страдальца неповиннаго и сотворят достоин плод покаяния, вопиюще всемилостивому Богу: Аллилуиа.

Икос 4

Слышав о благосердии твоем, духоносне Арсение, совеща с тобою святый патриарх Ермоген и призва во град Москву древняго и немощнаго старца первосвятителя Иова покаяния ради. Ты же купно с нима молился еси, святителю Божий, о чадех земли Российския, да отвратит от них Господь праведный гнев Свой и да устроит паки в державе единение. Темже и мы, недостойнии, грехов отпущения требующе, зовем ти:

Радуйся, спасительнаго покаяния проповедниче;

радуйся, милосердия Христова добрый вестниче.

Радуйся, за Отечество наше молитвенниче непрестанный;

радуйся, о людех его ходатаю ко Творцу неусыпный.

Радуйся, власти, яко дарование Божие, почитавый;

радуйся послушание Церкви Христовой сыновне хранивый.

Радуйся, Арсение, благочестия непоколебимый столпе.

Кондак 5

Богородицы икону чудотворную, именуемую Владимирская, сохранил еси от поругания безбожнаго, святителю Христов, егда нуждею внутрь престольнаго града Москвы удержан был еси от иноплеменник нечестивых, и укрыв многоцелебный образ сей, радостно воспел еси Богу: Аллилуиа.

Икос 5

Видев, яко дом и имение твое злочестивии до конца разграбиша, никакоже скорбел еси, старче святый, памятствуя апостольская словеса, яко избра Бог нищыя мира сего богаты к вере. Мы же, таковому дивящеся смирению твоему, приносим ти похвальная сия:

Радуйся, первосвятителя Иова единомысленниче;

радуйся, священномученика Ермогена соузниче.

Радуйся, кротости досточудныя образе;

радуйся, терпения великодушнаго обителище.

Радуйся, за творящих ти напасть молитвенниче прилежный;

радуйся, ненавидящим тя добротворителю усердный.

Радуйся, Арсение, благочестия непоколебимый столпе.

Кондак 6

Проповедник скорыя милости Божия внезапу явися ти, святителю Арсение, от глада изнемогающу и на конечнем издыхании бывшу, преподобный Сергий Радонежский чудотворец и глагола тебе: «Се, Господь Бог услыша молитву раб Своих и заутра град сей предает в руце православным христианом, и врагов ваших низложит». Ты же, в себе пришед от чуднаго видения онаго, ощутил еси себе здрава от великия болезни и помощи Подателю Богу воспел еси: Аллилуиа.

Икос 6

Возсия паче солнца Владимирская икона Пречистыя Богородицы, егда из града Кремля изнесл еси ю, священнохранителю Арсение, во сретение воеводам благочестивым и всему российскому воинству, и тыя, узревше чудотворную святыню, еяже не надеяхуся видети никогдаже, от радости многая слезы от очию изливающе, целоваху ю. Темже, иконы сея приснии почитатели, приносим ти таковая:

Радуйся, воинства христолюбиваго духовный пастырю;

радуйся, воеводам благочестивым доброе научение.

Радуйся, избранию перваго царя от богобоязненнаго дома боляр Романовых поспешниче;

радуйся, наречению и поставлению митрополита Филарета на стол патриарший сопричастниче.

Радуйся, царем покорносте и утешение;

радуйся, патриархом совете и послушание.

Радуйся, Арсение, благочестия непоколебимый столпе.

Кондак 7

Хотя во граде Твери архиепископа поставити, освященный Собор Церкве Русския, избра тебе на служение то, святителю Христов Арсение, ты же храм соборный Преображения Господня, иже от злочестивых иноплеменник разорен бысть, возставил и украсил еси благолепно, и до днесь убо воспевают вернии во храме сем: Аллилуиа.

Икос 7

Новым архипастырем таже в земли Суждальстей поставленный, предтечника твоего смиреннаго Герасима, иже по соборе земстем, на Москве скончася, честное тело вземь положил еси во граде Суждале в соборнем храме Рождества Пресвятыя Богородицы, идеже и сам последи погребен был еси, святителю Арсение, предав твою чистую в руце Божии. Мы же, церковныя труды твоя поминающе, вопием ти сице:

Радуйся, преподобнаго Дионисия, неправедно осужденна, от заточения свободивый;

радуйся, обою справщику его книжную заступивый.

Радуйся, новоявленных святых икон прославление;

радуйся, чудес от сих икон неложное извещение.

Радуйся, святых храмов удела Суждальскаго благоукрасителю;

радуйся, и монастырем святым земли тоя доброхотный даятелю.

Радуйся, Арсение, благочестия непоколебимый столпе.

Кондак 8

Странно видеша во граде Суждале вси вернии, яко свод плинфяный над гробом твоим, святителю Божий, распадеся, и по мале весьма времени обреете архиепископ Стефан тело твое нетленно, вопия ко Творцу чудес Богу: Аллилуиа.

Икос 8

Всем верным поклонения ради, постави архиепископ Стефан над честными мощами твоими, достодивне Арсение, яже паки под спуд положи, образ твой святописный. Мы же, грешнии, ныне тя зряще в Соборе святых земли Владимирския, поем ти:

Радуйся, Суждальскаго удела похвало;

радуйся, Церкве Христовы славное украшение.

Радуйся, богоносных иерархов Феодора, Иоанна и Дионисия единопрестольниче;

радуйся, великих чудотворцев Суждальских сопредстателю.

Радуйся, верою тя почитающих скорое утешение;

радуйся любовию тя восхваляюших сладостное умирение.

Радуйся, Арсение, благочестия непоколебимый столпе.

Кондак 9

Вся добродетели и подвиги твоя, блаженне Арсение, исчести не возмогоста списателя святаго жития твоего, еже еллинскими писмены сложиста, глаголяща точию, яко безвестная и тайная сердца твоего ведает Господь и вопиюще Ему: Аллилуиа.

Икос 9

Ветию тя преизрядна показа Господь, егда обретена бысть книга, юже написал еси, премудре Арсение, рекомая «История России», от неяже вся бывшая в Отечестве нашем издревле до скончания Смутнаго времене, истинно ведаем и, яко самовидца, восхваляем тя:

Радуйся, новый Несторе земли Российския;

радуйся летописче праведный Церкви Русския.

Радуйся, премудросте, немудрых просвещающая;

радуйся, разуме, ведцов изумевающий.

Радуйся, яко святописцы новыя на труды церковныя подвизаеши;

радуйся, яко от праведных словес твоих оправданный, и нам у Христа оправдания молиши.

Радуйся, Арсение, благочестия непоколебимый столпе.

Кондак 10

Спасения душевнаго и здравия телеснаго чадом своим чающе, жены мнози молишася тепле при гробе твоем, святителю Арсение, скораго тя заступника разумеюще пред Господем и поюще Ему: Аллилуиа.

Икос 10

Стеноподобно невидимою силою Своею, егда обветшиша гробницу древяну, огради Господь погребение твое, богоблаженне Арсение, нецыи бо дерзостне над гробом твоим стающе, абие отриновени быша от места того, и возсоздана бысть гробница, и паки потекоша к ней молитвенницы. Сего убо ради зовем ти:

Радуйся, матерем, молящымся о недугующих чадах своих, благонадежное упование;

радуйся, малым детем и отроком юным в болезнех скорое исцеление.

Радуйся, благочестивому царю Феодору дщери рождение предвозвестивый;

радуйся, добродетельныя царицы Ирины неплодство молитвами разрешивый.

Радуйся, честнаго брака известный покровителю;

радуйся семей христианских добрый блюстителю.

Радуйся, Арсение, благочестия непоколебимый столпе.

Кондак 11

Пение молебное свершающе на всякое лето Собору святых Владимирских, священнолепно чтим вернии святую память твою, богоносне Арсение, и звезду тя новую нарицаем, украсившую небо церковное, взывающе Богу: Аллилуиа.

Икос 11

Светлостию звезде подобна, множайше облиста тя Господь славою, боголюбезне Арсение, яко обретены быша честныя мощи твоя, яже благоговейно днесь почитаем и скорбем душевным и телесным скораго исцеления чающе, взываем ти тако:

Радуйся, святым угодником Божиим на небесех соводворенный;

радуйся, честныя твоя мощи на земли нам оставивый.

Радуйся, чином ангельским сликовствующий в вышних;

радуйся, от человек похвалы досточестно приемлющий.

Радуйся, правды и кротости дивный учителю;

радуйся, братским Церквам православным благий единителю.

Радуйся, Арсение, благочестия непоколебимый столпе.

Кондак 12

Благодать, юже непорочным твоим житием и труды богоугодными у Господа стяжал еси, ведая, прослави тя в сонме святых своих Православная Церковь Элладская, воспевая Богови: Аллилуиа.

Икос 12

Поюще молитвенно тя, достохвальне Арсение, с радостию великою сретоша верная чада Церкве Элладския частицу святых мощей твоих, яже от России с честию пренесена бысть в землю Греческу. Тoгo же ради зовем ти сице:

Радуйся, селению Калорианскому, идеже рожден бысть, радование;

радуйся, граду Геласонску, аможе во епископа поставлен бе, благое веселие.

Радуйся, святых патриархов Московских сподвижниче;

радуйся, святых архипастырей Суждальских единоревнителю.

Радуйся, Престолу Пренебесному днесь предстоящий;

радуйся, о нас земнородных Господа выну молящий.

Радуйся, Арсение, благочестия непоколебимый столпе.

Кондак 13

О, святителю богоизрядне Арсение, земли Владимирстей похвало и Церкви святей украшение, услыши сие малое моление наше и теплым твоим к Богу предстательством преспеяния нам испроси о вере правой и благочестии, да избавльшеся вечныя муки, Царству Небесному причастники учинимся, поюще в Троице славимому Богу: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва ко святителю Арсению, архиепископу Элассонскому (Суздальскому)

О преславный угодниче Божий и прехвальный избранниче Дивнаго во святых Своих Господа и Бога нашего! От благочестивых родителей в смирении и послушании воспитанный, в христианском учении от юных ногтей зело преуспевший, прилежно стяжал еси мудрость, во Христе богозданную и многоплодными трудами украсил еси Церковь Православную в пределех греческих и русских. С любовию и доброй памятью чтит тя епархия Елассонская, идеже ты пришел еси в возраст совершенный, величает тя неумолкаемо и земля Российская, в ней бо ты усердно подвизался еси даже до кончины своей блаженной.

Во дни страшного нашествия на землю русскую полчищ вражеских, веру римскую восхотевших насадити, ты, отче святый, во узах ислытуем, сподобился еси явления с небесе аввы Сергия Радонежского и всея России чудотворца и глас его живый услышати о избавлении скором многострадальной Москвы великим милосердием Божиим.

И ныне с твердой верою притекаем мы к раце твоих святых мощей и из глубины души, молясь, зовем: не забуди нас, убогих и немощных, истово славящих твое преизрядное мужество духовное, твоему имени тезоименитое; избави всех чтущих твою светлую и вечную ламять от всякия напасти и смертоносныя болезни, глада, губительства, укрепи нас своею благодатию в расслаблении сущих, да твоим святительским предстательством и молением помилует и спасет нас Всечеловеколюбивый Господь наш, Емуже подобает всякая слава, честь и поклонение Отцу и Сыну и Святому Духу, ныне и присно и во веки веков. Аминь.