Акафист преподобной княгине Софии Суздальской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранней Божественным промышлением славней подвижнице земли Суздальския, преподобней матери Софии достойную честь и похвалу воздадим, яко святей угоднице Божией и усердней молитвеннице о всех почитающих ея пречестную память. И ныне припадающе к ея святому гробу со умилением зовем:  Радуйся, богомудрая мати Софие, прехвальная молитвеннице земли Суздальския.

Икос 1

Ангелов лики возрадовашася, видяще твое иноческое житие в подвизех поста, бдения и богомыслия, и яко единонравную прияша душу твою, достойно венчанную чином ангельским в пострижении монашестем, да будеши образ жития во Христе всем ищущим спасения. Темже воспеваем ти:

Радуйся, прославленная подвижнице, Богом избранная.

Радуйся, Христа Подвигоположника всем сердцем возлюбившая.

Радуйся, к ангельскому лику монашеским чином сопричисленная.

Радуйся, чистоту душевную неустанными трудами стяжавшая.

Радуйся, с небесными силами Господа Вседержителя воспевшая.

Радуйся, Бога Творца всяческих мудрость познавшая.

Радуйся, промышление Вышняго на себе во благих испытавшая.

Радуйся, Его Божественней воли всю себе предавшая.

Радуйся, богомудрая мати Софие, прехвальная молитвеннице земли Суздальския.

Кондак 2

Видящи злострадания жительства в мире сем, волнами житейскаго моря обуреваемем, презрела еси всяческую тленность благ земных: богатства, власти и чести, и в надежде живота вечнаго оставила еси славу великокняжескую, в благодарении поющи Богу: Аллилуия.

Икос 2

Разумеющи вся суетная и скоротечная в мире сем, покорила еси себе, яко кроткая агница, воли Всемогущаго Бога и, вземши крест на рамо свое, понесла еси во след Христа Жизнодавца. Мы же, дивящеся твоему смирению и послушанию, во умилении поем ти:

Радуйся, мира сего тленную красоту совершенне отвергшая.

Радуйся, славу его и богатство нивочтоже вменившая.

Радуйся, земнаго жительства скорогибнущия прелести отвергшая.

Радуйся, в нетленныя одежды равноангельскаго жития облекшаяся.

Радуйся, яко свеща негасимая, любовию к Богу возженная.

Радуйся, яко роса небесная, благодатию Божиею напоенная.

Радуйся, миро благоуханное, добродетельми насыщенное.

Радуйся, розго многоплодное, от лозы, Христа, взращенное.

Радуйся, богомудрая мати Софие, прехвальная молитвеннице земли Суздальския.

Кондак 3

Силою свыше вооружившися, противостала еси всем кознем диавольским. ты непрестанным пощением, псалмопением и терпением попрала еси древняго змия, имущи в сердце своем сладчайшее имя Иисуса, и тем обрела еси покой душе своей, в благодарении Богу зовущи: Аллилуия.

Икос 3

Имущи боголюбивую душу, взыскала еси Царствия Небеснаго и правды его; неустанным деланием правил монашескаго жития восходила еси от силу в силу и достигла еси высоты совершенства в меру полнаго возраста духовнаго. Мы же, славяще твоя труды и добродетели, сице тебе поем:

Радуйся, вся искушения вражеская силою свыше победившая.

Радуйся, похоть плоти многим воздержанием умертвившая.

Радуйся, похоть очес непрестанною молитвою угасившая.

Радуйся, гордость житейскую нелицемерным смирением искоренившая.

Радуйся, яко добропобедно взошла еси на гору святости.

Радуйся, яко узрела еси очима души обители небесная.

Радуйся, горлица чистая, к Божественным чертогам возлетевшая.

Радуйся, кроткая голубице, к Богу вознесшаяся.

Радуйся, богомудрая мати Софие, прехвальная молитвеннице земли Суздальския.

Кондак 4

Бурю помышлений претерпела еси, преподобная мати Софие, егда направила еси стопы своя путем иноческаго жития, обаче скоро познала еси душею неизглаголанную радость общения со Христом в непрестанных трудех поста, бдения и молитв и в мире сердца своего прославила еси Всещедраго Бога, поющи: Аллилуия.

Икос 4

Слышавше о мнозех бедах и мятежах жительства суетнаго мира, утешалася еси Божиим изволением, данным тебе жребием монашескаго бытия. Темже славяще твое благочестное житие в подвизех послушания, целомудрия и нестяжания, воспеваем тебе сицевая:

Радуйся, волею Божиею от мира во обитель благоотишную пресельшаяся.

Радуйся, тамо сокровище нетленное неложно себе стяжавшая.

Радуйся, яко жена потерянную драхму жития во Христе иночеством нашедшая.

Радуйся, подобне купцу богатство, честь и славу на бисер Царства Небеснаго пременившая.

Радуйся, яко тамо сердце твое, идеже сокровище твое.

Радуйся, яко скрыла оное на Небеси, идеже червь не тлит.

Радуйся, зерно горушично, доброделанием в велие древо взрастившееся.

Радуйся, яко семя словес Христовых богате уплодоносила еси.

Радуйся, богомудрая мати Софие, прехвальная молитвеннице земли Суздальския.

Кондак 5

Богозданную обитель во имя Покрова Божия Матере возлюбила еси всею душею твоею, под священный Ея омофор всельшаяся, и святым водительством Царицы Небесныя обрела еси покой и сладость душевную, и Сыну Ея Христу Богу воспела еси благодарственную песнь, зовущи: Аллилуия.

Икос 5

Видевши путь к Царствию Небесному, предначертанный Христом во Святем Евангелии, нопоколебимо шествовала еси стезями богоугоднаго жития и достигла еси неизреченных благ, уготованных Богом любящим Его. Мы же, назидаемии твоим добрым житием, воспеваем ти:

Радуйся, прежде всего Царствия Небеснаго искавшая.

Радуйся, чаяние жизни будущаго века исповедовавшая.

Радуйся, заповеди Новаго Завета в жительстве исполнившая.

Радуйся, к нищим духом себе присовокупившая.

Радуйся, с плачущими в покаянии утешение себе обретшая.

Радуйся, преподобная, с кроткими блаженство унаследовавшая.

Радуйся, с алчущими правды Божия зело насыщенная.

Радуйся, с милостивыми от Бога помилование получившая.

Радуйся, богомудрая мати Софие, прехвальная молитвеннице земли Суздальския.

Кондак 6

Проповеда земля Суздальская твое изрядное житие, во мнозех добродетелех процветшее; мирстии людие текоша к тебе, да узрят тя, духовне совершенную, и слышат душеспасительныя глаголы твоих богомудрых уст, в благодарении Богу зовущи: Аллилуия.

Икос 6

Возсия свет благодати подвигов твоих, просвещающий всякаго человека, грядущаго ко святей обители Покрова Божия Матери на поклонение, да приимут зде хотящии спастися помощь твоими молитвами от Всещедраго Бога, внемлющаго гласу моления угодников Своих. Сего ради возглашаем ти:

Радуйся, Богом Светодавцем в иноческих трудех просвещение.

Радуйся, огнем святости людем приходящим возсиявшая.

Радуйся, свещнице, не под спудом, но вверху стоящая.

Радуйся, лучами Солнца Правды вся блистающая.

Радуйся, в нощи грехов людских тьму погибельную прогоняющая.

Радуйся, яко седящии во тьме греха видят свет твоего жития.

Радуйся, тако просветившаяся пред человеки светом души твоея.

Радуйся, тако прославившая Отца милости и щедрот, Иже есть на Небесех.

Радуйся, богомудрая мати Софие, прехвальная молитвеннице земли Суздальския.

Кондак 7

Хотящи последовати Искупителю рода человеческаго, рекшему: «Аще кто хощет по Мне ити, да отвержется себе и возмет крест свой, и по Мне грядет», возненавидела еси вся красная земных благ и всею крепостию души своея возлюбила еси Сладчайшего Иисуса, поющи: Аллилуия.

Икос 7

Дивную тя во святых показа Христос Бог, сподобивый ангельскаго чина прияти и нарещи тя Софиею, тезоименитая Премудрости Божией, да будеши великая и неизреченная домостроительства Божия тайны, да ведаеши и благая вечная, да Царство Небесное наследуеши со всеми небожителями. Мы же таковому Божию изволению чудящеся, зовем ти:

Радуйся, Божественнаго промышления достойная избраннице.

Радуйся, света небеснаго земное зерцало.

Радуйся, печати Премудрости Божия дивная носительнице.

Радуйся, благодати Духа Святаго непорочное вместилище.

Радуйся, сосуде златый чистоты душевныя и телесныя.

Радуйся, образе честный иноческаго жития.

Радуйся, ангельскому славословию непрестанными песньми подражавшая.

Радуйся, деланьми благочестия на лествицу духовную возшедшая.

Радуйся, богомудрая мати Софие, прехвальная молитвеннице земли Суздальския.

Кондак 8

Странное чудо видимо есть, како честь и хвалу века сего на тихое и безмолвное житие пременила еси и славное звание великия княгини смиренно сложила еси; едино, еже есть на потребу, сие возлюбила еси, благодарственно гласом радования Богу поющи: Аллилуия.

Икос 8

Всю себе, яко Жениху, Господу Иисусу предавши, уподобилася еси мудрым девам, елеем добрых дел светильники своя исполнившим, и, бодрствующи, в радости сретила Его. Сего ради ублажаем тя сице:

Радуйся, небесных чертогов богоизбранная наставнице.

Радуйся, обители горния преславная насельнице.

Радуйся, многими добродетельми путь свой к небеси уготовившая.

Радуйся, слезами, скорбьми и покаянием стези своя оросившая.

Радуйся, глас Жениха Небеснаго всерадостно услышавшая.

Радуйся, пира брачнаго жизни вечныя приобщившаяся.

Радуйся, Божественнаго рая сладость вкусившая.

Радуйся, света невечерняго приснотекущую радость восприявшая.

Радуйся, богомудрая мати Софие, прехвальная молитвеннице земли Суздальския.

Кондак 9

Всякое плотское мудрование в себе упразднила еси силою Божественныя благодати, сораспявши себя Христу со страстьми и похотьми, добре в иночестве пожила еси; темже и была еси яко древо, насажденное при исходищих вод, приносящи мног плод Богу Жизнодателю, поющи: Аллилуия.

Икос 9

Вития многоглаголивая не возмогут изрещи твоя труды сокровенныя, подвиги и благодеяния, ими же угодила еси Богу, Прославляющему прославльших Его, Иже содела тя нарочитым сосудом благодати Своея, из него же преизливаются чудеса всем тя воспевающим:

Радуйся, Премудрости Божия житием своим проповеднице.

Радуйся, благости Божией в человецех свидетельнице.

Радуйся, любве Божия невредимое хранилище.

Радуйся, милосердия Божия достохвальное приятелище.

Радуйся, яко тобою славится Бог, дивный во святых Своих.

Радуйся, яко тобою посрамляется отец лжи диавол.

Радуйся, смирением своим Богом вознесенная.

Радуйся, чистотою сердца своего Господом прославленная.

Радуйся, богомудрая мати Софие, прехвальная молитвеннице земли Суздальския.

Кондак 10

Спасти хотя всякаго человека, великодаровитый Господь управи житие твое, преподобная мати Софие, и благослови твоя стопы исправити к деланию заповедей Своих. Ты же, яко благопослушливая раба Господня, в смиренномудрии познала еси волю Небеснаго Домовладыки Христа и исполнила вся заповеданная Им, воспевши с радостию: Аллилуия.

Икос 10

Стена необоримая бысть тебе всемогущий Покров Пресвятыя Богородицы, препобедила еси вся искушения духов злобы, облекшися в броню правды, и угасила еси разженныя стрелы лукаваго, вземши щит веры. Сего ради восхваляем тя сице:

Радуйся, Пресвятыя Богородицы усердная почитательнице.

Радуйся, всечестнаго Покрова Ея неумолкаемое хваление.

Радуйся, возлюбленная дщере Царицы Небесныя.

Радуйся, ревностная печальнице пред Нею за вся единоверныя.

Радуйся, смирению Девы Марии благочестне учившаяся.

Радуйся, Ея святейшему послушанию неленостно последовавшая.

Радуйся, всеблаженным Ея омофором во иночестве утвержденная.

Радуйся, милостию Богородицы вся обеты монашества соблюдшая.

Радуйся, богомудрая мати Софие, прехвальная молитвеннице земли Суздальския.

Кондак 11

Пением чудес, от твоих молитв проистекших, утешаемся, о преподобная мати Софие, величаем твоя подвиги, их же неослабно понесла еси до последняго издыхания. Егда же скончала еси поприще земнаго живота своего, преселилася душею в небесныя жилища и тамо воспеваеши Царю царствующих хвалебную песнь: Аллилуия.

Икос 11

Светоприемную свещу славы Божия зрим тя, во тьме грехов наших светящую, и ко святей иконе твоей, надеющися на твое вспоможение, притекаем, и к раце мощей твоих с верою и любовию припадаем, воспевающи тебе таковая:

Радуйся, яко подвигом добрым подвизалася еси.

Радуйся, яко течение земнаго жительства доблественне скончала еси.

Радуйся, яко веру правую нелицемерно соблюла еси.

Радуйся, яко в радость Господа твоего достойно взошла еси.

Радуйся, жизни вечныя красоту узревшая.

Радуйся, доброту неизреченную в селениих вышних обретшая.

Радуйся, с чины ангельскими немолчно ликующая.

Радуйся, со всеми святыми Бога Творца славословящая.

Радуйся, богомудрая мати Софие, прехвальная молитвеннице земли Суздальския.

Кондак 12

Благодати чудо явила еси ныне: грех наших ради по многолетии судом Божиим попущеннаго запустения обитель сию Покрова Богородицы, юже во граде Суздали, твоим предстательством, праведная мати Софие, Господь паки возроди и дарова ю ищущим спасение, да вси благодарственно поют Богу: Аллилуия.

Икос 12

Поющи твоя новая чудеса, блаженная мати Софие, почитаем твою пречестную память, твоим бо непрестанным тщанием и небесными молитвами пред Престолом Божиим святая обитель, в ней же ты телом почиваеши, вновь созидается и милостию Царицы Небесныя новым стадом монашествующих обильно населяется. Поминающи твоя таковая благодеяния, приносим тебе песнь сию:

Радуйся, своим попечением обитель сию не оставившая.

Радуйся, дерзновенным ходатайством пред Богом о ней болезнующая.

Радуйся, яко твоим предстательством новыя свещи иночества зде возгораются.

Радуйся, яко твоими молитвами токи благодати Божия заблудшия во граде Суздале к Церкви обращают.

Радуйся, обители сия присная хранительнице.

Радуйся, иночествующих в ней незримая наставнице.

Радуйся, прибегающим к тебе в молитвах скорая помощнице.

Радуйся, чудес многоразличных неоскудеваемый источниче.

Радуйся, богомудрая мати Софие, прехвальная молитвеннице земли Суздальския.

Кондак 13

О, святая и богомудрая угоднице Божия, преподобная мати Софие, приими благодарственную песнь, тебе ныне возносимую недостойными устнама нашима. Не забуди молений и прошений всех, чтущих твое святое имя и с любовию ублажающих твою пречестную память. Не остави сию обитель нашу, но сохрани ю целою в часы бед и напастей, да вси вкупе сподобимся воспевати хвалу Богу Спасителю нашему, верою зовущим: Аллилуия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобной княгине Софии Суздальской

О, прехвальная и праведная мати Софие, Суздальския страны досточудная подвижнице! Славим твое богоугодное житие, чтим твоя великия добродетели, поклоняемся честным мощем твоим, с любовию лобызаем твой святый образ и с верою приносим тебе прилежныя наша молитвы. Помози нам, яко странним и пришельцем в мире сем, стати на истинный путь христианскаго жития, не отврати лица своего от всех прибегающих к твоему покровительству, духовне умудри подвизающихся в иночестве познати коемуждо образ спасения своея души, настави в подвизех смирения, терпения и покаяния, поспешествуй стяжати нам целомудрие, послушание и любовь Божию. Буди щит и ограждение обители сия от всякаго зла, в ней же сама ревностно подвизалася еси. Обрати и вразуми заблудшия люди на путь правый. Умоли Господа сил пощадити души наша и даровати нам время на покаяние, да твоим предстательством сподобимся безпагубне прейти поприще многоскорбнаго нашего земнаго жития и быти причастники вечнаго блаженства в небесных обителех Бога и Спаса нашего, Ему же подобает всякая слава, честь и поклонение, ныне и присно, и во веки веков. Аминь.