Акафист святителю Георгию архиепископу Могилевскому и Белорусскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный Богом от юности к служению Церкви Христовой, предивный угодниче Христов, Святителю Георгие, непоколебимый столпе Православия, пастырю добрый, душу твою за паству положивый. Ныне всечестную твою память празднуще, похвальное пение приносим ти. Ты же, яко имеяй дерзновение ко Владыце небесе и земли, от всяких нас бед свободи, зовущих:

Радуйся, святителю отче наш Георгие, Церкве Белорусския похвало и града Могилева Украшение.

Икос 1

Ангел земный и человек небесный был еси, святителю отче Георгие, святителю отче наш Георгие, вперив бо ум в божественная, временная и земная пренебрегл еси. Темже и вселился в тя Пресвятый Дух, Его же благодатию светло украшен еси. Сего ради тебе, на небеси и на земли прославленному вопием сице:

Радуйся, града Нежина доброплодное прозябение.

Радуйся, родителей именитых чадо благословенное.

Радуйся, от младенства Богом избранный.

Радуйся, Бога от юности всею душею возлюбивый.

Радуйся, Тому усердно послуживый.

Радуйся, яко мирскою лепотою не уязвился еси.

Радуйся, благоуханный крине девства.

Радуйся, благими делы, яко бисером драгим, себе украсил еси.

Радуйся, яко храм всечестен Богу был еси.

Радуйся, славо Церве Православной.

Радуйся, святителю отче наш Георгие, Церкве Белорусския похвало и града Могилева Украшение.

Кондак 2

Видя Господь душу Твою, святе Георгие, пламенем Божественныя любве объятую, в юном возрасте научи тя благоугождению истинному, да возможеши достойно и праведно воспевати ангельскую песнь Богу: Аллилуиа.

Икос 2

Разум твой божественными учении просветил еси, богомудре Георгие, отвергнув всякое мудрование, с разумом же и волю повинул еси Господеви: подражая сроднику своему старцу Иову, во обители Киево-Печерской ангельский образ восприим, нелестно послужил еси Господу Богу. Тем же, аки звезда путеводная светиши всем, хотящим жити в преподобии и вопиющим тебе:

Радуйся, житию безплотных поревновавый.

Радуйся, подвигом древних отцев подражавый.

Радуйся, яко прием крест, Христу последовал еси.

Радуйся, яко образ страстей Его в сердце твоем преднаписал еси.

Радуйся, яко вся козни диавола силою Креста Господня разрушил еси.

Радуйся, правило веры благочестивыя.

Радуйся, образе кротости духовныя.

Радуйся, благий делателю винограда Христова.

Радуйся, дарованный тебе талант преумноживый.

Радуйся, в радость Господа твоего вшедый.

Радуйся, святителю отче наш Георгие, Церкве Белорусския похвало и града Могилева Украшение.

Кондак 3

Силою Божиею укрепляемый, вся земная оставил еси, Георгие богомудре, в Киево - Печерской Лавре подвизался еси, и в ней добродетельным житием просиял еси, яко солнце, всех просвещая и подвизая славословити Творца всяческих и пети Ему: Аллилуиа.

Икос 3

Имел еси едино попечение, святе Георгие, да спасеши душу твою и представиши ю Христу. Благий же и Человеколюбец Господь, видев таковое твое произволение, призывает тя быти наставником иноков Киево - Братского монастыря и проповедником слова Божия. Мы же тебе, яко делателю верному в вертограде Господни, вопием:

Радуйся, усердный трудниче винограда Христова.

Радуйся, учителю смирения и целомудрия.

Радуйся, образе кротости и послушания.

Радуйся, проповедниче чудес Божиих.

Радуйся, светозарный светильниче всех просвещаяй.

Радуйся, вместилище Божия премудрости.

Радуйся, провозвестниче Православия.

Радуйся, благодатными вещании сердца верных утешаяй.

Радуйся, славу Божию житием и словом твоим проповедавый.

Радуйся, столпе Православия непоколебимый.

Радуйся, святителю отче наш Георгие, Церкве Белорусския похвало и града Могилева Украшение.

Кондак 4

Буря католицизма и униатства Речи Посполитой готова была попрать веру Православную в Белой Руси, идеже и единыя могилевския епархии епископ Иосиф на изгнание, яко схизматик, папою римским определися. Твоими же молитвами и предстательством пред Богом правоверие и благочестие земли нашей утвердися и верные воспевают Христу Богу песнь: Аллилуиа.

Икос 4

Слышаша архипастырие благодатное души твоея дарование, Богоносе Георгие, Божиим промыслом утведиша тя избранника во епископа на скорбную кафедру града Могилева и Белой Руси. Ты же, воле Божией повинуяся, принесл еси себе в жертву Господеви, готовый вдатися на мечи и колья, на челюсти зверей и змиев. Мы же, дивяся сему, приносим ти благохваленья сицевая:

Радуйся, архиерею, изволением Божиим пронареченный.

Радуйся, мужу желаний, пасти стадо Христово свыше избранный.

Радуйся, Пастыреначальника Господа нашего Иисуса Христа благоволение.

Радуйся, иерархов украшение.

Радуйся, яко от утра жизни твоея на стражу словеснаго стада избран был еси.

Радуйся, яко до вечера жития твоего сущия в вере нелестно назидал еси.

Радуйся, пастырю добрый, яко готов был еси душу твою положити за овцы своя.

Радуйся, многосветлый Церкве Христовой светильниче.

Радуйся, Апостолов сопричастниче.

Радуйся, веры Православныя поборниче.

Радуйся, святителю отче наш Георгие, Церкве Белорусския похвало и града Могилева Украшение.

Кондак 5

Боготечная звезда в скорби сущим явился еси, святителю Георгие, от матере градов Богоспасаемого Киева к пастве своей в Могилев на Днепре пришел еси, идеже вернии с радостию и ликованием сретоша тя, благодарно воспевая Господеви песнь: Аллилуиа.

Икос 5

Видя паству свою белорусскую от многолетных угнетений и гонений на Православие зело страждущу, в страшном запустении сущу, храмы разрушены, люди в нищете пребывающие и горце о разорении домов своих плачущие, умилосердився, святителю Христов, скорби их на рамена своя подъял еси и даже до смерти пострадати за них и веру Православную готов был еси. Темже благодарственно вопием ти:

Радуйся, яко пастве твоей добрый вождь показался еси.

Радуйся, Церкве Христовой добрый кормчий был еси.

Радуйся, свет Христов верным возсиявый.

Радуйся, яко пастырем был еси премудрый учитель.

Радуйся, яко сильных мира сего был еси обличитель.

Радуйся, Христова вертограда делателю неусыпный.

Радуйся, душетленному зверю стадо твое расхищати не попустивый.

Радуйся, Церковь в гонениях сущую, верной Христу сохранивый.

Радуйся, яко по заповеди Апостола Слово Божие благовременне и безвременне проповедал еси.

Радуйся, от Господа вечною славою венчанный.

Радуйся, святителю отче наш Георгие, Церкве Белорусския похвало и града Могилева Украшение.

Кондак 6

Проповедник благочестия и правды воистину явился еси, святителю Георгие. Был еси глашатай истины. Возвестил еси миру о страданиях паствы совея, яко вера Христова в пределах земли Белорусския зело уничижися, яко отнят у православных свет учения, яко веру Православную исповедовать не дают, народ гонят плетью, аки овец, из домов и церквей православных в костелы и храмы униатские, ставят висельницы, вкапывают столбы, возгнещают костры, на колья сажают и другие мучительные орудия изобретают. Таковую жестокую жизнь паствы своея разумно прием, святителю Христов Георгие, ты мужественно вступил на подвиг апостольский, защищая веру и люди православныя, поучая их пети Богу: Аллилуиа.

Икос 6

Возсиял еси во граде Могилеве, святителю Георгие блистанием учений твоих и исповедничества, души верных озаряя и тьму нечестия инославных разгоняя. Просвещал еси паству свою светом Евангелия Христова. Ты с ревностию учил еси о вере Православной, обличал еси пороки людския очищая от суеверия и лености, оберегая от неверия, нечестия века сего и безбожия вольтерьянского. Сего ради и мы в дни скорби блуждания греховнаго, внегда постигоша нас ереси и расколы, припадаем к тебе, святителю Божий, слезно взывая: охраняй и ныне Отечество наше, буди в жизни нам вождь добрый и благонадежный, да не престанем величати тя сице:

Радуйся, от потопления бурями житейскими правоверных спасаяй.

Радуйся, унывающих и мятущихся укрепляяй и от заблуждения отреваяй.

Радуйся, самоотвержение всецелое показавый.

Радуйся, спасение многих взыскавый.

Радуйся, волков хищных от паствы твоея отгнал еси.

Радуйся, яко коварство их мудро распознал еси.

Радуйся, сокровищ Православныя веры усердный хранителю.

Радуйся, еретических баснословий премудрый истребителю.

Радуйся, непоколебимый исповедниче Православия.

Радуйся, ревностный защитниче благочестия.

Радуйся, святителю отче наш Георгие, Церкве Белорусския похвало и града Могилева Украшение.

Кондак 7

Хотя спасти паству свою от порабощения инославных и на высоту веры Православныя поставити, труды ко трудом прилагал еси, святителю Георгие; православных пред королем и в судах защищал еси, собор Спасский во граде Могилеве и храм во имя святаго великомученника Георгия в Печерске воздвигл еси, школы, книгопечатание и семинарию открыв, да вси во свете Христовой веры поют Богу: Аллилуиа.

Икос 7

Обновити человека по образу Создавшего его возжелал еси, святителю Георгие, сего ради ополчился еси на иноземное суемудрие и ратовал еси за древнее Православие, да во всех людех и житии их изобразится Христос Бог. Сего ради благодарственно вопием ти:

Радуйся, стада Христова ограждение;

Радуйся, Православия в земле нашей утверждение.

Радуйся, разума Апостольския Церкве хранителю.

 Радуйся, таин Божиих верный строителю.

Радуйся, златоустый проповедниче веры Православныя.

Радуйся, небоязненный обличителю суемудрия и неправды.

Радуйся, мужественный духа воине.

Радуйся, светильниче Божественнаго света.

Радуйся, страже дома Божия неусыпный.

Радуйся, дивную крепость духа в скорби показавый.

Радуйся, святителю отче наш Георгие, Церкве Белорусския похвало и града Могилева Украшение.

Кондак 8

Страно есть маловерным и малодушным зрети, како ты святителю Георгий, воистину крепкий воин Христов, дерзновенно обличал еси измену вере Христовой. Егда же «миссионеров» доминиканцев в Оршанско - Кутеиской обители не от Христа быти возвестил еси, тогда разъяренная толпа католиков, окружила монастырь ища убити тя и егда иезуиты вооруженные на дом архиерейский и семинарию во граде Могилеве нападоша, Господь от рук убийц спасе тя. Тебе же, защитника Православия и печальника народа своего, Господь и среди огня в Варшаве спасе, да чудо видяще людие православные благодарно воспевают Богу: Аллилуиа.

Икос 8

Весь исполнен любве Христовы, Георгие Благосерде, яко пастырь добрый ему же суть овцы своя, видев волка грядуща, не оставил еси их и не бегал еси, но пред ними ходил во всеоружии силы и истины. Ты яко Ангел - хранитель чадом своим пребываеши, молитвы о них Всевышнему возсылая: сего ради усердно чтим светлую память твою, воспевая ти сице:

Радуйся, непреклонный исповедниче Православия.

Радуйся, ревностный защитниче благочестия.

Радуйся, священнотаинниче благодати.

Радуйся, Апостолов немолчная уста.

Радуйся, Церкве непоколебимый столпе;

Радуйся, пастырю добрый.

Радуйся, яко непричастен явился еси лицеприятию.

Радуйся, святою ревностию о спасении паствы твоея пламеневый.

Радуйся, возжещи сию ревность в чадех твоих восхотевый.

Радуйся, каменю драгий, землю нашу всю украшаяй.

Радуйся, святителю отче наш Георгие, Церкве Белорусския похвало и града Могилева Украшение.

Кондак 9

Всякие труды подъял еси, святителю Божий Георгие, всякие лишения, обиды и болезни претерпел еси, спасения ради чад твоих. Егда вновь открыся гонение на православных, враги устремились на тя, ищущие души твоея. Ты же тайно яко того возжела паства твоя, отбыл еси в Смоленск, идеже четыре лета пребывая в изгнании, глаголал еси: мне еже жити Христос, и смерть приобретение. Сего ради вся находящия ти скорби сладце терпел еси, рассуждая, яко недостойны суть страсти века сего хотящей явитися в нас славе, воспевая Богу: Аллилуиа.

Икос 9

Витии мира сего безмолствуют, видяще страну нашу разоряему жестокими гонениями на Православие, егда гонимые с воплями и рыданиями, обымая хладныя могилы близких своих, с жалостью взывали к ним: блаженны вы, умерши во благочестии. Ты же, святый исповедниче веры Православныя, мужественно противостоял еси ополячиванию и окатоличиванию народа Белой Руси, и, яко пастырь добрый, со слезами просил Синод и Русь Святую подать помощь, защитить сей в скорби сущий народ. Ныне же паства, плодами сеяния твоего насыщаема, с любовию взывает к тебе:

Радуйся, добрый паствы твоея наставниче и управителю:

Радуйся, Православия велий ревнителю.

Радуйся, угрозы и прещения врагов твоих презревый.

Радуйся, о мире церковном много скорбевый.

Радуйся, яко Церковь и Святое Православие в стране Белорусския сохранивый.

Радуйся, мучениче, изволением душу свою за паству положивый.

 Радуйся, Илие, огненную ревность о Православии явивый.

Радуйся, Елисее, сугубую благодать восприявый.

Радуйся, Ное, от потопа беззаконий благодатию Христовою нас спасший.

Радуйся, Аврааме, не сына, но себе самого в жертву Богу принесл еси.

Радуйся, святителю отче наш Георгие, Церкве Белорусския похвало и града Могилева Украшение.

Кондак 10

Спасти хотя паству твою от волков, расхищающих ю, вменил еси себе жизнь кочевника, по глаголу Христову, не имеющего где главы подклонити. И тако, защищая не токмо паству свою, но и православных Юго - Западной Руси, представ польскому королю Станиславу Августу, дерзновенно возвестил ему: яко мы христиане, но христианами же угнетаемся, ибо дерзаем изъяснить Божьи законы по Преданию. Не смешивая неба с землей; называют нас схизматиками, богоотступниками, так как страшимся противоречить гласу совести; осуждают нас на заключение в темницу, на раны, позорную смерь и сожжение. Вручив же ему хартию о угнетении и отнятых униатами церквей, снискал еси ослабу гонений. За сие благодарная паства твоя воспевает Богу: Аллилуиа.

Икос 10

Стена неодолимая Церкве был еси, отче наш Георгие, еюже страна наша оградися, в Православии утвердися и от врагов спасеся. Трудами бо твоими свобода Православию и в Юго - Западном крае России и в самой Польша дадеся, ибо семьнадцать лет боролся ты с волками и ныне воспоминая образ мужественного борения твоего, с любовию благодарно взываем ти сице:

Радуйся, злыя козни нечестия отвернувый.

Радуйся, Православие в земли нашей утвердивый.

Радуйся, святых преданий отеческих хранителю.

Радуйся, уставов Православия ревнителю.

Радуйся, вольным Христовым страданиям подражавый.

Радуйся, страдания за Христа и Церковь Его радостно почитавый.

Радуйся, страданием и исповедание совершивый.

Радуйся, Правую веру чрез многие подвиги непреклонно утвердивый.

Радуйся, благочестивую отрасль трудами твоими возрастивый.

Радуйся, добрый пастырю и заступниче Белорусския земли.

Радуйся, святителю отче наш Георгие, Церкве Белорусския похвало и града Могилева Украшение.

Кондак 11

Пение благоприятное Пресвятей Троице принесл еси, достойный преемниче Апостолов, святителю Георгие, возлюбил бо еси паству свою, за ню же и душу твою полагал еси и ныне радостию радуешися. В залог любве своея руководство о должностях пресвитеров приходских Церкви оставил еси, поучая всех взывати к Богу: Аллилуиа.

Икос 11

Светильник Христов на верху стояй, и всей Руси Святей был еси в житии твоем, святителю Георгие, Апостольские труды твои всех верных утешают. Попечением бо твоим епископия в Польше учреждена бысть и возвращение униатов в Православие, егоже Господь удостоил видеть тебе. Мы же, поминая труды твои, восхваляем тя сице:

Радуйся, за веру Православную изгнание претерпевый.

Радуйся, за благочестие от католиков гонимый.

Радуйся, от народа Божьего возлюбленный.

Радуйся, светлостию жития твоего возсиявый.

Радуйся, истины державный поборниче.

Радуйся, покаяния рачительный проповедниче.

Радуйся, лжеучителей лукавство разоривый.

Радуйся, маловерных в Православии утвердивый.

Радуйся, таинниче Божий, еще на земли благ небесных вкусивый.

Радуйся, святость души твоея житием явивый.

Радуйся, святителю отче наш Георгие, Церкве Белорусския похвало и града Могилева Украшение.

Кондак 12

Благодать велия дадеся тебе, святителю Георгие, яко и пред кончиною своею попечения о пастве твоей не оставил еси, завещая ей хранить веру Православную и уставы Церкви Христовой, да ходят вернии достойно звания своего и благотворительности не забывают. Благословение преподав, мирно почил еси о Господе. Промыслом Божиим тело твое тридесять дней пребысть непогребенно, видя же его нетление паства твоя со умилением взывает Богу: Аллилуиа.

Икос 12

Поюще песнь исповедничеству твоему, Георгие досточудне, недоумеем, како воистину тя, ибо тобою в Троице славимый Бог наш славно прославися Сего ради приносим ти похвалы сицевыя:

Радуйся, труд крестоношения богоугодно подъявый.

Радуйся, токмо благоволения Божия искавши.

Радуйся, сосуде, Духа Святаго исполненный.

 Радуйся, дарами Духа Владычня обогащенный.

Радуйся, над всеми кознями сатанинскими восторжествовавый.

Радуйся, всеоружие благочестия подъявый.

Радуйся, об утверждении пасты твоей присный ходатаю.

Радуйся, теплый к Богу о нас предстателю.

Радуйся, вечное приемый от Бога благословение.

Радуйся, людем твоим испросивый Божие благоволение.

Радуйся, святителю отче наш Георгие, Церкве Белорусския похвало и града Могилева Украшение.

Кондак 13

О, пастырю наш предобрый, святителю Георгие! Приими сие моление наше и твоей славе сорадование. Умоли венчавшего тя славою Господа низпослати нам от бед, скорбей и болезней, обдержащих нас, скорое избавление, даровати же благодать утешения, да с веселием выну поем Богу: Аллилуиа, Аллилуиа, Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва Георгию Архиепископу Могилевскому и Белорусскому

О великий угодниче Христов, Святителю отче наш Георгие! К тебе, молитвеннику теплому и предстателю пред Богом непостыдному усердно притекаем, в нуждах и скорбех наших утешения и помощи просяще.

В древнюю годину испытаний, внегда посетиша страну нашу беды и скорби, Господь яви тя Церкви Своей столпа непоколебима и людем православным пастыря добра, душу свою за овцы полагавшего и лютыя волки далече отгнавшаго. Ныне убо призри на ны, недостойная чада твоя, умиленною душею и сокрушенным сердцем тебе призывающия. Крепость бо наша в нас оскуде и вражия ловления и сети, ереси и расколы обыдоша нас.

Помози нам, заступниче наш! Буди щит несокрушим Святей Церкви Православней и Отечеству нашему. Преосвященные архиереи благолепием святительства и премудростию украси, пастырем в служении ревность даруй, монашествующия к подвигам добраго течения в послушании утверди, православным христианом веру святую непорочну соблюсти умоли, мир весь твоим предстательством умири. Осени горним благословением нас, чад твоих, и подаждь нам скорбящим утешение, болящим здравие, гонимым защищение. Буди всем нам благосердный отец и за вся теплый молитвенник, яко да предстательством твоим ограждаеми, непрестанно воспеваем и прославляем Всесвятое имя Живоначальныя Троицы, Отца и Сына и Святаго Духа, во веки веков. Аминь.