Акафист святым мученикам Кирику и Иулитте

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Символ веры:

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щего, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Кондак 1

Избранныя раби Царя Небеснаго и доблии Хриcтови мученицы Кириче и Иулитто, славныя святыя чудотворцы и помощники наши, похвальными песньми воспоим вас: вы наши утешители и молитвенницы, вы же, предстояще престолу Святыя Троицы, молитвами своими от всяких зол и напастей избавите нас, верою зовущих вам: Радуйтеся, святии мученицы Кириче и Иулитто!

Икос 1

Архангели и ангели с любовию зряху чистое житие твое, Иулитто, святая мученице Христова: ты бо царска рода суще, пекущеся о Господних, како угодити Господеви и веру Христову сохранити, небрегла еси о суетных и земных благах и сего ради оставила еси вся имения своя. Сама же яко странна и ничтоже имуща отбегла еси отечества своего с сыном своим отроком Кириком и двумя рабынями своими во страну иную. Мы же, мудрость твою воспоминающе, таковой любви твоей ко Господу дивящеся, со умилением взываем вам сице:

Радуйтеся, вернии раби Христови.

Радуйтеся, всю мира красоту и славу ни во что вменившии.

Радуйтеся, наслаждения земная веры ради Христовой презревшии.

Радуйтеся, не имевшии зде пребывающаго града, но грядущаго взыскавшии.

Радуйтеся, благородие свое утаившии и яко едини от нищих на земли пребывшии.

Радуйтеся, святии мученицы Кириче и Иулитто!

Кондак 2

Видяще святая Иулитто, яко и в Селевкию от зловернаго царя Максимиана игемон Александр прииде, муж суров и зверонравен, да мучит без всякия милости исповедающих имя Христово, помяну слово писанное: егда гонят вас во граде сем, бегите в другия, изыде из Селевкии и пойде в Тарс, моля Бога, да защитит верныя рабы своя, поющия Ему: Аллилуиа!

Икос 2

Разумев мучитель, яко многи христианы отыдоша из Селевкии и во град Тарс прииде, тамо на седалищном судищи пред народом седе, повеле яти христианы и на суд его нечестивый привести. Вам же, святым мученикам Христовым, оклеветанным от неверных и на суд пред мучителя Александра приведенным, мы с любовию припадаем и дерзновению вашему дивляхуся, глаголем:

Радуйтеся, доблии исповедницы Христови.

Радуйтеся, вернии страдальцы Господни.

Радуйтеся, силою крестною мужество непреодолимое стяжавшии.

Радуйтеся, дерзновенно себе христианами именовавшии.

Радуйтеся, за имя Христово на суд приведении.

Радуйтеся, святии мученицы Кириче и Иулитто!

Кондак 3

Силою Христовою свыше препоясаннии возмогосте победити древняго змия лукаваго, не убоялися бо зверообразного мучителя игемона Александра, веруя себе быти наследницами Царствия Небеснаго, пели Христу Богу нашему: Аллилуиа!

Икос 3

Имея в сердце своем твердую веру, дерзновенно рекла еси лукавому мучителю славная мученица Иулитто: "Имя и благородие мое христианыня есмь, отечество – Христа Бога нашего Царство". Беззаконный же мучитель повеле отроча отъяти от матери его, Иулитту же святую без пощадения суровыми жилами бити. Мы же мужество ваше блажаще, сице вам зовем:

Радуйтеся, твердии адаманти Святыя веры.

Радуйтеся, Столпи непоколебимии Святыя Церкве.

Радуйтеся, неверных страх и посрамление.

Радуйтеся, нетленных венцев стяжателие.

Радуйтеся, Христовых заповедей всечестныя исполнителие.

Радуйтеся, святии мученицы Кириче и Иулитто!

Кондак 4

Бурею помышлений злобный мучитель колеблем, видя младенца Кирика плачуща и от рук держащих его мучителей исторгающагося, еже к матери своей славней Иулитте тещи, повеле младенца себе принести и прием е, на коленех своих посади и утешаше того, да не плачет, и поглаждаше главу его, и лобзаше его, и глаголы благая вещаше ему. Детище же отпирашеся, изъимая себе от рук мучителя, не ведущаго пети Богу: Аллилуиа!

Икос 4

Слышав злочестивый мучитель отроча взывающа: "Христианин есмь, пусти мя к матери моей!", от лобзаний же его скверных лице свое отвращающа и к матери своей биемой взирающа, ногтьми же лице его игемонское раздирающа, исполнися ярости и верже отроча о пол и в ребра ногою пхну, низвергая его долу от высокаго седалища своего. Ты же, святый мучениче Кириче, благодатию Божиею и молитвами матери твоея укрепляемый, от Христа не отступил еси, но вся претерпел еси. Сего ради величаем вас сице:

Радуйтеся, искушений диавольских избежавшии.

Радуйтеся, исповедницы Христови неустрашимии.

Радуйтеся, воини Христови непобедимии.

Радуйтеся, всех, вас призывающих от искушений избавляющии.

Радуйтеся, и нам сетей вражиих избегати помогающии.

Радуйтеся, святии мученицы Кириче и Иулитто!

Кондак 5

Боготечной звезде уподобилися есте, святии мученицы Кириче и Иулитто, от земли бо к небеси к Солнцу правды Христу шествие свое страдальческое совершисте, поюще Ему: Аллилуиа!

Икос 5

Видя себе посрамленна от малаго отрока, мучитель Александр стыда многаго исполнися, мученика Кирика же сверже от седалища своего. Он же по ступенем каменным ниспадая, главою о ступенныя острыя углы приражашеся и сокрушашася, все то место наполни кровию своею святою. Таковая убо страдания его и матери его всечестныя Иулитты воспоминающе, сице зовем им:

Радуйтеся, исповедницы Христови неустрашимии.

Радуйтеся, воини Христови преблаженнии.

Радуйтеся, кровь свою за Христа пролиявшии.

Радуйтеся, небесных чертогов наследницы.

Радуйтеся, теплые наши предстателие и пред Богом заступницы.

Радуйтеся, святии мученицы Кириче и Иулитто!

Кондак 6

Проповедует весь мир христианский честныя страдания ваша, святии мученицы Кириче и Иулитто, и мученическую кончину вашу ублажает, поя Богу: Аллилуиа!

Икос 6

Возсиял еси яко новое солнце святый мучениче Кириче - триех лет сущий не убоялся еси лютаго мучителя. Мал леты сый – велий подвиг совершил еси и непорочную душу твою в руцы Божия предал еси. Мы же, святый мучениче Кириче вкупе с материю твоею святою великомученицею Иулиттою вас на помощь призываем и сице вам взываем:

Радуйтеся, честным страданием вашим Богу угодившии.

Радуйтеся, доброту мира сего и прелесть его презревшии.

Радуйтеся, мзду многую на небесех обретшии.

Радуйтеся, обилие благодати Божией стяжати сподобившиися.

Радуйтеся, о нас пред Богом ходатаи.

Радуйтеся, святии мученицы Кириче и Иулитто!

Кондак 7

Хотя беззаконный мучитель игемон Александр святую мученицу Иулитту от Христа отвратити повеле надолзе и жестоко бити ю. Святая же Христова мученица Иулитта яко в чужем теле страждуще яко столп бездушен пребываше, ничтоже ино вещаша токмо: "Христианыня есмь, не пожру бесом". Егда же престаша бити ю и возставиша ю, узре святая мученица любезное чадо свое пред судилищем лежащее в крови мертво, радости убо исполнися и рече: "Благодарю Тя, Господи, яко сподобил еси сына моего таковыя благодати Твоея, еже скончатися ему прежде мене мученически за имя Твое святое и венец мученический во славе Твоей прияти". Мы же таковому о вас Божию промышлению дивящеся поем Богу: Аллилуиа!

Икос 7

Новую показа милость рабом своим Господь яко укрепи вы на подвиг мученический и яви в вас Благодать Свою укрепляющую, Мы же радующеся о славе вашей сице вам вопием:

Радуйтеся, сосуды благодати Христовой избраннии.

Радуйтеся, от Бога на подвиг силою Христовою укреплении.

Радуйтеся, в самих страданиях своих радость вечную стяжавшии.

Радуйтеся, кровию своею, яко багряницею царскою украшеннии.

Радуйтеся, на небеси со Христом Богом вечно царствующии.

Радуйтеся, святии мученицы Кириче и Иулитто!

Кондак 8

Странное чудо зряще удивляхуся вси - како малый отрок многолетняго змия диавола победи и матерь свою своею смертию, Христа ради принятою возвесели. Таковую память вашу о Христе помышляющи, благодарно поим Богу: Аллилуиа!

Икос 8

Вся добродетельми духовными жизнь твоя исполнена есть, святая славная мученице Христова Иулитто, не устрашилася бо еси страдати за Господа своего, ибо паки повеле злочестивый игемон Алесксандр мучити тя – повеле бо тя на мучилищи повесити и железными гребнями строгати и раны твоя кипящею смолою поливати и тебе вещати: "Пощади юность твою, да не умреши безгодно, якоже и сын твой". Мы же, молящися, вас просим: услышите нас, вопиющих вам таковая:

Радуйтеся, купно страдавшии и купно венцы приявшии.

Радуйтеся, юность свою за Христа не пощадившии и вечное блаженство стяжавшии.

Радуйтеся, диавола сети сокрушившии и вечною славою от Господа почтении.

Радуйтеся, мучителеву гордыню посрамившии и Бога прославившии.

Радуйтеся, святии мученицы Кириче и Иулитто!

Кондак 9

Все воинство ангельское возрадовася, видя ваша непреоборимая страдания за Христа Бога подъятыя, имиже победили есте миродержателя тьмы века сего, и воспеша Богу: Аллилуиа!

Икос 9

Ветия многовещанныя не возмогут по достоянию восхвалити страдания ваша, святии мученицы Кириче и Иулитто, мы же таковому мужеству вашему дивящеся, таковая хваления приносим вам:

Радуйтеся, Христа всем сердцем возлюбившии.

Радуйтеся, о Бозе Вседержителе поревновавшии.

Радуйтеся, наследницы Царя Небеснаго явившиися.

Радуйтеся, о спасении нашем Богу молящиися.

Радуйтеся, святии мученицы Кириче и Иулитто!

Кондак 10

Спасти хотя душу твою, всечестная мученице Христова Иулитто, презрела еси вся повеления мучителя твоего и о теле своем нерадивше, радостною душею пела еси Жениху твоему Христу: Аллилуиа!

Икос 10

Стены твердыя вемы вас, всем с верою к вам прибегающим, святии мученицы Кириче и Иулитто, сего ради с любовию зовем вам:

Радуйтеся, яко никтоже с верою притекающ к вам неутешен от вас исходит.

Радуйтеся, любовию Божественною хладныя сердца наша согревающия.

Радуйтеся, небесных благ искати нас наставляющия.

Радуйтеся, суету мира презирати нас научающия.

Радуйтеся, терпети скорби и болезни нам помогающия.

Радуйтеся, святии мученицы Кириче и Иулитто!

Кондак 11

Пение хвалебное приношаше Тебе, Господи, святая мученица Иулитта, егда виде непреодолимое ея терпение, на посечение смертное мучителем осуждена бысть, и радующеся во страдании своем воспела еси Богу: Аллилуиа!

Икос 11

Свеща еси Церкви Христовой горящая невещественным светом благодати Христовой, святая мученице Иулитто, вкупе со святым сыном твоим Кириком, ему же радующеся, вожделела еси последовати в Небесное царство, и егда шла еси на место осуждения смертное, радующеся шествовала еси яко к венцу брачному. Достигше же того места, испросила еси малое время на молитву и, преклоньше колена, помолилася еси, глаголющи: "Благодарю Тя, Господи Боже мой Иисусе Христе, яко призвал еси сына моего прежде мене и сподобивый его пострадати за Имя Твое святое и страшное, и дал еси ему, оставившему суетное житие, вечную жизнь со святыми, приими убо и мене, недостойную рабу Твою, да причтена буду мудрым девам и войду в Чертог Твой нетленный" - тако помолившейся тебе тогда спекулатор, поостривши меч свой удари тя в выю и отсече главу твою святую и оставивши тело непогребенно на снедением псом и зверем, вкупе и тело сына твоего Кирика с тобою повергоша. Мы же молим тя – просвети нас, омраченных грехом молитвою твоею, да радостно возопием:

Радуйтеся, свет веры Христовой в сердцах своих носившии.

Радуйтеся, тьму идольского служения обличившии.

Радуйтеся, в незаходимем свете у престола Божия ныне вселившиися.

Радуйтеся, тьму неведения нашего светом заповедей Христовых озаряющии.

Радуйтеся, страданием своим всю вселенную просвещающии.

Радуйтеся, святии мученицы Кириче и Иулитто!

Кондак 12

Благодать дана есть вам от Бога, святии мученицы Кириче и Иулитто, сохранять от бед и напастей чтущих страдания ваша. Сего ради оградите молитвами вашими от всякаго зла верныя чада Церкви Христовой и в добродетелех преуспеяти сотворите ны,воспевающих Богу: Аллилуиа!

Икос 12

Поюще Бога, помогшего вам страдания совершити, приидоша обе рабыни ваша и вземше повеженныя телеса ваша далече отнесоша и в земли погребоша. Едина же от рабынь тех поживе даже до лет Великаго Константина, перваго царя христианскаго. Тогда рабыня оная показа верным христианом место, идеже погребена быша честныя мощи ваша и страдания ваша возвестиша. Верныя же изъяша от земли мощи честныя ваша нетленны, благоухающи, исцеления подающии. Мы же память вашу чтуще, сицевыми хвалами венчаем вы:

Радуйтеся, Церкви Христовой украшение.

Радуйтеся, верных чад Божиих утешение.

Радуйтеся, недугов наших исцеление.

Радуйтеся, скорбей наших избавление.

Радуйтеся, печалей наших утоление.

Радуйтеся, святии мученицы Кириче и Иулитто!

Кондак 13

О, святии угодницы Христови и чудотворцы, страстотерпцы святии , великомученицы Кириче и Иулитто! Приимите сие хваление наше и мольбы, к вам приносимыя, и благоприятными вашими к Богу молитвами избавите ны от всяких зол и обстояний, болезней душевных и телесных и от всякаго мучения. Предстательством вашим сотворите ны достойными Царствия Небеснаго быти, да сподобимся в небесных селениях воспевати Богу: Аллилуиа!

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва мученикам Кирику и Иулитте

О, святый великомучениче Христов Кириче, угодниче Божий! Ты во страдании своем первый предстатель Престолу Господню и никтоже близ Владыки разве Иоанна Предтечи превыше тебе предстоит. Призри, угодниче Божий, на ны, грешныя раби твоя, с материю твоею Иулиттою великомученицею призывающих вас с верою. Приимите убогую молитву нашу и сердце сокрушенное и токи слез. Помяните нас у Престола Господня, дабы мы, окаянии не объяти были сетьми врага и да не впадем во искушения, уже бо враг наш яко лев рыкает, ища кого поглотити и свести во ад жива. Мы бо многогрешнии и недостойнии раби ваши воспоминаем ныне страдания ваша святая – вы бо победителие вражия силы бысте: ты же, святый мучениче Кириче триех лет и двух месяц сый, не убоялся еси беззаконных мучителей Александра и Максимиана, обличая их богомерзкое идолослужение, вкупе же с материею твоею Иулиттою всечестною многоразличными муками томими от них бысте, с радостию вся терпесте и болезни и скорби не иместе, веровавше во Христа истиннаго Бога нашего. Господь же благослови вы и рече: "Кириче, рабе мой верный, аще кто от человек имя твое призывает и мучение ваше воспоминает, то избавлен будет диавольскаго навета, или кто в болезни имя ваше призовет – исцелю его, или кто дом нов строит да имя ваше призовет – благословлю его и обогащу его милостию Своею, или кий человек в напасти впад – избавлю его, или кто по морю плавает – то морской пучины избавлю его, или кто при смертнем часе о имени вашем начнет просити об отпущении грехов – оставятся ему." Мы же, недостойнии раби ваши обретохом вас заступников наших, в бедах и скорбех помогателей, да прославим вас во имя Отца и Сына и Святаго Духа, ныне и присно и во веки веков. Аминь.